Alkitab Bahasa Wondama
Markusi 1
Yohanesi viono kambu masi pai
(Mat. 3:1-6, 11-12; Luk. 3:3-6, 15-17; Yoh. 1:19-28)
Ninei ma Kavo Vesie nanapi Yesus Kristusi, Atuma Allah. Nabi Yesayai vui to manau nanapi nie buku pai toapa Allah kievo tonine,
“Mesanemipai, Ine amias pai nine.
Jemiasi e piepo Au,
ave amamo sieva ria pai so Au.1
Siniotu pai dumi na mapar kurumi e diojo,
‘Membe masis ria pai maso Syen:
Metono ariri ria pai tindija maso I.’ ”2
Ariri kavo vevui nine pa, Yohanesi diaria na mapar kurumi pai. Diono kambu masi maso siniotu pasia e tiopana kavo pai e diojo, “Nari memanau nana mene tatar pasi e mesamuai kambu masi pai, ave Allah vie ampun mia nana mene tatar pasi.” Siniotu vepau nana uta Yudea e bendar Yerusalem senda setadiawa Yohanesi. Setopana sasara sene tatar pasi, e Yohanesi diono kambu masi pai maso sia na maria Yordan. Yohanesi siesuni na sasu unta ruvavuru pai. Nie wai kavavirai pai nana piaum rawa, e pisia dian pasi ma nginggisi tutiri unu rukaru airaro.3 Tiopana kavo ninei e diojo, “Manau nana jau, nari siniotu vepaja rawai na jau pesi riama. Ja ma sa ipa so ituan e ireku nie wai aeva sor pasi va. Nari ive masi mia tutiri kambu, vape I ma nari vie masi mia tutiri Wainunu Sren pai.”
Yohanesi diono kambu masi maso Yesus
(Mat. 3:13-17; Luk. 3:21-22; Yoh. 1:32-34)
Nana rabua jana Yesus riama nana Nazaret na uta Galilea, e Yohanesi diono kambu masi pai maso I na Mariai Yordan. Nana rabua Yesus suvi nana maria jani, siejo rora wai tiesieva e Wainunu Allah pai vieva ariri aja nu e viar avav so I. Avori Yesus diediawa raupui nana rora wa e Allah kievo e diojo, “Au ma ine atuma isanemipaja mo panau na, buono sane vesieni so Jau.”4
Bilis pai siotouru Yesus
(Mat. 4:1-11; Luk. 4:1-13)
Manau nana jana pa, sawawara Wainunu Allah pai dionae Yesus ria so mapar kurumi pai. Yesus niana mapar kurumi jana woroi pa raria siniotu muandu, Bilis pai siotouri. Miesoi nana uta jana, tutiri piaum rindi pasi, e siniotu rora pasia senanaripi so I.
Yesus ria nie nanaripi pai na Galilea
(Mat. 4:12-22; Luk. 4:14-15, 5:1-11)
Manau na Yohanesi sua nana bui pai pa, Yesus ria so Galilea, e tiopana Allah nie Kavo Vesie pai. Yesus kievo e diojo, “Raria pai miesi to manau, aso deriaisi Allah vie pareta ariri Raja pana. Apavo memanau vurusu mene tatar pasi, e nari mesanemitiar maso Allah nie Kavo Vesie pai.”5
Yesus siau nie verausari retena pasia
(Mat. 4:18-22; Luk. 5:1-11)
Nana rabua Yesus ria na ruru Galilea derepa, siejo siniotu pa muandu sumupi na rawana pai, Simoni tutiri neta katu pai, Andreasi. Sandu ma sutapu dia nana ruru pai tutiri diara. Yesus kievo maso sandu e diojo, “Mundama, munda usara Jau, nari jeniniau mandu mutapu siniotu, ave senggor usara maso Jau.” Apa sawawarae sumbavuru sune diara pasi avori sunda usara Yesus. Yesus ria kara katu ea mana, siejo mambeneta pa sandu, Yakobusi e Yohanesi, Zebedeusi atu pa sandu. Sunana wa pai raro pa, e surono ariri sune diara pasi. Sawawarae Yesus siau sandu. E sumbavuru sutamani pai, Zebedeusi na wa pai raro pa tutiri siniotu venanaripi usari pasia. Avori sunda usara Yesus.
Siniotu vetere wainunu vekariria
(Luk. 4:31-37)
Yesus tutiri nie verausari pasia sendama so aniose Kapernaum. Nana raria Sabat pai pa, Yesus sua so anio ari agama Yahudi pai e dieniniau. Kaiwasa viadiawa Nie kavo aniau pasia, senggavo usara. Aso dieniniau sia ariri siniotu vene paja. Dieniniau ariri siniotu veruin sasavu kavo aniau na Torat pasia va.6 Nana kasau jana siniotu vetere wainunu vekariria pesi niana anio ari agama Yahudi pai raro pa, e dienanar e diojo, “Hei Yesus, siniotu Nazaret panau, buo buono vitoi tutir ama? Buo ruama buono kariria so ama e? Iruina teini Au: Au ma amias Veve Sren nana Allah!” Vape Yesus kievo masa wainunu vekariria jani e diojo, “Pueja! Suvi vurusu siniotu ninei!” Apavo wainunu vekariria jani diono siniotu jani titiat vavera, avori suvi vurusu siniotu pai tutiri dienanar. Kaiwasa pasia vura senggavo usara, apajoma senggavo vavera, “Vitoini nine? Ninei ma aniau vavoru pesi na! Kievavo tutiri paja. I ma vie pareta wainunu vekariria pa sisuvi, e sikorusara nie pareta pai!” Apavo raupui nanapi Yesus pai saira e miesiepar so Galilea vetutira.
Yesus diono panam pai maso Simoni nioni vavi pai, tutir kaiwasa vepau pa esia
(Mat. 8:14-17; Luk. 4:38-41)
Avori Yesus tutiri nie verausari pasia sesuvi vurusu anio ari agama Yahudi pai, e senda so Simoni e Andreasi sune anio pai. Yakobusi e Yohanesi sunda tutiri sia kota. E nana rabua sesua pa, Simoni nioni vavi pai andia visi pananit e viata na uta diena nana pai. Siniotu pa esia setopan piota pa maso Yesus. Apavo Yesus riama so Simoni nioni vavi pai, e ruti na vara pa, avori dionie biatai. Visi pananit pai niai, janama ria e vie masis pisia so sia. Rabua ravinena pa, wor pai dio tiawa, kaiwasa pasia senggor siniotu vepota pasia vura, tutiri siniotu vetere wainunu vekariria pasia maso Yesus. Apavo kaiwasa vepau na bendar jani sesorum na anio pai repo pa. Avori Yesus diono panam pai maso siniotu vetere pota saserai pasia, e dietavar wainunu vekariria borai pasi kota. I ma kiembarai dionae wainunu vekariria pasi sikavo, aso siruina I ma teinina.
Yesus tiopana Kavo Vesie pai na uta Galilea
(Luk. 4:42-44)
Raria kausapa vavoru pa, aja kumuar rami, Yesus biatai avori ria vurusu anio pai. Ria so uta veseja na vorira bendar jani, e vie nadi na wana. Vape Simoni tutir nie maneta pasia senda e sesaserai. E nana rabua sesamuai to manau pa, senggavo maso I e setojo, “Siniotu vura sesasera Au.” Vape Yesus ruar e diojo, “Mendama tanda so aniose esi vederiaisi uta ninei, ave amamo itopana Kavo Vesie nei na wana kota. Aso jana pa irama so nine pa.” Avori Yesus ria so Galilea vetutira, e tiopana Kavo Vesie pai nana sene anio ari agama Yahudi pasi e dietavar wainunu vekariria pasi.7
Yesus dionae siniotu vetere pota pado pai pienam
(Mat. 8:1-4; Luk. 5:12-16)
Siniotu vetere pota pado pesi riama so Yesus, e disa aebu pasi na aropo Yesus e siau so I e diojo. “Masisi Jai, muajar mamo, diadi so buonae ipanam.” Yesus sanepai maso siniotu jani. Apa, siwi vara pa e pir ajai so siniotu jani tutiri kievo e diojo, “Imajar, puenam!” Nana kasau jana kota nie pota pai niai e pienam. Avori Yesus diemiasi e ria, e dieranduni to karakuai e diojo, “Sanepaja to vesie mo, kasa tuopana vava ninei maso siniotu vevesiei va, vape rua, vueruana nomu tarai pai maso imam pai e buono pi som ariri Musai nie pareta pasi, ave amamo veruana maso sia toapa vevata mo puenam to manau.”8 Vape siniotu jani ria e tiopa usara vava jana e masiepar so uta pasi vura, apajoma Yesus kasa sua so bendar pasi tutiri vieruani va maso siniotu pasia. I ma miesoi vea na vorira uta veseja pasi; Vape siniotu pasia tawana sendama so I nana uta vura.
Source notes (8)
- Cross-reference Mal. 3:1
- Cross-reference Yes. 40:3
- Cross-reference 2Raj. 1:8
- Cross-reference Kej. 22:2; Mzm. 2:7; Yes. 42:1; Mat. 3:17, 12:18; Mrk. 9:7; Luk. 3:22, 9:35
- Cross-reference Mat. 3:2, 4:17
- Cross-reference Mat. 7:28-29; Luk. 4:32
- Cross-reference Mat. 4:23, 9:35; Luk. 4:44
- Cross-reference Im. 14:1-32
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.