Skip to content
BibleKenya

Alkitab Bahasa Wondama

Rasul 20

Paulusi ria so Makedonia tutir Yunani

Sawau venana Efesus pai mienau pa, Paulusi ruiri verausara Yesus pasia vura e dionae senggarakuai sene sane raropa pasi, janama tiopana tabea maso sia, avori ria nie rara pai so Makedonia. Paulusi ria usara uta Makedonia pasi e diono kavo sanepaja vepau so kaiwasa vesanemitiar maso Yesus pasia na wana ave amamo dionae senggarakuai sene sane raropa pasi. Janama ria so uta Yunani. Miesoi na wana woroi pa sembai toru. Janama dio diepai so Siria, vape nana raria jani diediawa raupui nanapi siniotu Yahudi pasia setato kavo ave semuni. Apajoma kutu ave siovera e ria nanapi Makedonia. Siniotu verausara Paulusi pa sia ma Sopateri, Pirusi atu pai, vieva na bendar Berea, e Aristarkhus tutir Sekundus, siniotu Tesalonika pa sandu, e Gayus siniotu Derbe pai. Tutir Timotiusi, Tikhikusi e Trofimusi sandu ma sumbava na uta Asia. Sia ma senda papo raso Troas e setanota Paulusi tutir ama na wana. Vape manau na raria baba Mamami Vevaro Ragi pai pa, amatapai nana Filipi. E raria veve rim pai avori amasirieu na Troas, e amanduir riwanea tutiri sia. Amamasoi na wana raria pa rim e muandu.

Paulusi nie rara vena paina na bendar Troas

Nana diru ari pai amanduir ave amatapi vura. Paulusi kievo tutiri siniotu vesanemitiar pasia na jana, aso kausapa mamo dio vievu vurusu Troas. Apa veito diru rabua, Paulusi andia kievo rami. Ama vura amanduir na andiraro venana rawa vavo anio pai, padamara pa sipau siveviar. Atuma katiei pesi, sano pa Eutikhus miesoi na jendela pai. Aso Paulusi kievo to woroi vesiri, katiei pai vie remo veja, diena sia mo apa veito tiawa so douwa nana sos toru na anio pai. E kasau jana siniotu pasia sendusasani mana, vioru to manau. Vape Paulusi viar avav e disa aebu pa sandu siwara katiei pai e tiepuri. Avori Paulusi kievo e diojo, “Mesanemi sasera mia va, andine tienam!” Janama Paulusi siajai sovera so vavo wa, avori viovo mamami pasi e setapi vura. Nana setapi to manau, avori Paulusi kievavo tutir kaiwasa pasia vea, veito bera vavoru pa, janama Paulusi suvi e dinda. Avori senggor atuma katiei vetenam pai so nie anio pa, e sesanemi vesasie to baba vesiri.

Paulusi dinda nie rara pai nana Troas so Miletus pa

Amanda e amasa na wa pimasa pai e amatapai papo so Asos, ave amamo amanggor Paulusi na wana, ariri tutiri dierer pa, aso matauni ma dio ria na ae pa sandu so wana nanapi ria dorei pai. Nana rabua Paulusi siemuai ama nana Asos, avori siajai so wa pai avori amatapai so Metilene. Nana wana pa amatapai, e kausapa pa ma deriaisi nu Khios. E nana raria vesousara pai amasirieu na nu Samos, e sasaar ea pa amandama so Miletus. Paulusi kutu to manau toapa, sirieu na Efesus va, aso kiembarai niana provinsi Asia to woroi. Ave diadi mamo saira ve niana Yerusalem nana raria baba Pentakosta pai pa.

Paulusi tiopan kavo maso penatua na kuaruvi vesanemitiar venana Efesus pasia ave semasiepar

Nana Miletus, Paulusi dienatu raupui so Efesus ave siau maso penatua na kuaruvi vesanemitiar venana wasia, ave sesamuai sia na Miletus. Sendama to manau pa, Paulusi kievo maso sia e diojo, “Maneta pa mia, menduini toapa, toanetoi itenam nana rabua mia pa nana raria retena irama so uta Asia pa. Ja ma inanaripi maso Syen tutiri isanandiki ja va e tawana isai, aso siniotu Yahudi pasia setato kavo ave senanari kariria maso jau apa isamuai marior pa pau to manau. Maneta pa mia, menduini toapa ja ma imatai va itopana vava viate maso mia. Jeniniau mia nana uta ruir vesababeri pasi e na anio pasi pa. Tutiri vevata mo, ja ma tawana itopanusara maso siniotu Yahudi pasia, e siniotu Yahudi va pasia, ave amamo semanau sene tatar pasi e sendama so Allah, tutiri sesanemitiar maso Syen Yesus. Vape nine ma, ira so Yerusalem aso ira usara Wainunu Sren pai nie pareta. E ja ma iruin va so vitoini nari siniotu pasia senanari maso jau na wana pa. Ja ma iruini vea, nanapi Wainunu Sren pai tiopan sasara maso jau to manau, toapa nana bendar pa siri-siri mamo, nari isua na bui pai e isamuai marior. Vape imatai va so isamuai voru pai. Ja ma isanemipai vea ave imanau nanaripi Syen Yesus diono maso ja pai e ikarakuai mo veito raria vemanau pai ave amamo i ma itopanusara Kavo Vesie pai, nanapi Allah nie vesie pai.1 Ira atitieri mia vura to manau, e itopana ariri so mia nanapi toanetoi Allah vie pareta ariri Raja pa. Rabua nine ma isanemi riruina mana, nari mesajoro ja ea va. Apajoma, itopa to karakuai maso mia nana raria ninei toapa masisi mia esi nari mesamuai kariria pai, i ma ive sasara va. Aso itopa vava vura maso mia ariri Syen Allah nie sanepaja pai vura to manau. Apa metarama mene tarai pasi e kuaruvi vesanemitiar pasi vura, aso Wainunu Sren pai kutu maso mia ave mesajorasi, ariri gembala viarama vene domba pasi pa. Allah diono kuaruvi vesanemitiar jani, nanapi matau Nie Atuma pai vioru to manau pa. Iruina toapa, ira to manau pa, nari siniotu vemas pasia semasi vaveri ariri Warasiriwai pasi, e nari sendama so mia, e senanari kariria maso siniotu vesanemitiar maso Allah pasia. Nana matau mia kota, nari esia sendama e setopana aniau veve vata va. Senanari tojana ave siniotu vesanemitiar maso Yesus pa esia sendausara sene aniau veve vata pai ea va, vape senda usara aniau veve sasara pasi. Apajoma metarama voria e mesanemi paja, toapa woroi pa taun toru, diru sasaar, tutiri ine rerukaru nesi sitavuvu, imanau va so jono kavo sanepaja maso mia siri-siri pa. Raria ninei isiwi mia maso Allah ave dieram vedioro mia, e ave amamo tawana menggorusara kavo nanapi Allah nie Vesie pai. Allah andi piaja so dionae menggarakuai e vie masis berkat so Nie usapui pasia vura to manau. Ja ma aja isanemi kariria pipi pivai avavar nana siniotu pesi kota va. Mataun menduin toapa, nana matau ine vara ne, inanaripi ave isamuai pipi so jau, tutir mambeneta verausara jau nesia. Nana pi vura ma iveruana maso mia to manau, toapa nari tananaripi to karakuai ariri jau, ave amamo tasanempai siniotu vepaja va pasia. Aso nari tasanempai Syen Yesus matauni kavo tiopana to manau pasi, ‘Tatono pi so siniotu pa vesie rawai nanapa tasamuai pi nanapi siniotu pa.’” Manau na Paulusi kievo pa, disa aebu pa sandu tutiri sia vura avori sembe nadi. Sia vura sesai e setapu Paulusi tutiri sesum nendiwani. Sesanemi pasi sive sai mo, aso Paulusi kievo toapa kasa sesajori ea va pa. Avori senggori raso wa pimasa pai.

Source notes (1)
  1. Cross-reference 2Tim. 4:7

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.