Rasul 19

Paulusi niana Efesus

1Nanapi Apolos andija niana Korintus pa, Paulusi ria wariri so uta venana rei pasi vura to manau, avori riama so Efesus. Na jana siemuai siniotu pa esia sesanemitiar Yesus. 2Paulusi duta maso sia e diojo, “Nana raria mesanemitiar maso Yesus pa, mia ma mesamuai Wainunu Sren pai to manau e?” Siniotu vesanemitiar jasia senduar maso i e setojo, “Piva rami e, aja amatadiawa Wainunu Sren pai andia pa va.” 3Apa Paulusi duta sia e diojo, “Tojana mamo, kambu masi vetoane ni mesamuai pa?” Senduar e setojo, “Nanapi Yohanesi nie kambu masi paina.” 4Avori Paulusi kievo e diojo, “Yohanesi diono kambu masi maso siniotu pa ma, ave veruana toapa siniotu pasia sesovera nana sene tatar pasi to manau. E Yohanesi kievo kota maso siniotu Israel pasia ave sesanemitiar maso Siniotu nari vera vepui ma pai, andina Yesus.”1

5Nanapa setadiawa Paulusi kievo to nine pa, sesau maso Paulusi ave amamo diono kambu masi maso sia nana Syen Yesus sano pa. 6E nanapi Paulusi pir vara pa ajai so sia pa, Wainunu Sren pai siasai nana sia, apa senggavo nana kavo saserai e, setopanusara kavo vitosi Syen Allah vieruana maso sia. 7Sia vura sepau pa vare sembe sura e muandu.

8Woroi pa sembai torua pasi ma, Paulusi kievo maso kaiwasa pai tutiri mietai va, nana anio ari agama Yahudi pasi. E tiopan ariri so sia ave amamo siesera ve dionae sesanemitiar nanapi Allah vie pareta ariri Raja pa. 9Vape siniotu pa esia ma, sendumi pa sikarakuai e senggambarai sesanemitiar. E na aropo siniotu vepau pasia, senggavo sisiajara Allah nie aniau nanapi Yesus ave amamo diono vesie pai maso siniotu pasia. Toapa jana Paulusi vievu vurusu anio ari agama Yahudi pai e, kior siniotu verausara Yesus pasia maso andiraro nana anio vianiau vesanomi na Tiranus pai. E raria vura ma, Paulusi dieniniau tutir kaiwasa pasia na jana. 10I ma nienari vava jana woroi pa taun muandu, veito kaiwasa venana Provinsi Asia pasia vura, e kaiwasa Yahudi tutir kaiwasa vevesiei pasia kota, setadiawa Syen nie kavo pai.

Skewa nie atuma rim e muandu pasia setariri Paulusi

11Allah diono paja so Paulusi ave amamo nienari pitandor verawai vesiri. 12Masisi siniotu pasia senggor Paulusi nie sis vesokiara vara tutir kavavirai veve sis to manau pai e, sepiri na vavo siniotu vepota pasia mamo, sene pota pasi sinai e, wainunu vekariria pai sisuvi vurusu sia. 13Siniotu Yahudi verut airawi pa sembe toi vera wawariri bendar pasi, seto setatavar wainunu vekariria pai suvi vurusu siniotu vetere wainunu vekariria pasia, tutiri sesau nana Syen Yesus sano pa. Apavo senggavo so wainunu vekariria pasi e setojo, “Nanapi Yesus sano pa, Paulusi tiopana pai, jetavar au e suvi vurusu siniotu ninei.” 14Siniotu imam veveru pesi sano pa Skewa, atu mua pa sembe rim e muandu. Sia ma senanari vava vetoapa nine. 15Vape wainunu vekariria pai kievo so sia e diojo, “Ja ma iruini Yesus, e Paulusi kota iruini, vape mia ma teini mia?” 16E siniotu jani ma wainunu vekariria pai sua nana, kiopa buru sia e mutatiri sia. Siniotu jani dionae setapai e sembavu vurusu anio pai tutiri sene tarai pasi sive kapor e sembavu kakavir. 17Kaiwasa Yahudi veito kaiwasa vevesiei venana bendar Efesus pasia setadiawa vava nine pa, sematai mo. Apa kaiwasa pasia sesanandiki maso Syen Yesus sano pa. 18Siniotu pa sepau sesanemitiar maso Yesus to manau, sendama setopa ariri sene kariria nana senanari airawi pasi maso kaiwasa vepau pasia nana raria vepapo. 19Kaiwasa venanari airawi pasia senduir sene surat vimbui airawi pasi e senggairsi na aropo kaiwasa vepau pasia. Surat senggair pasi sine vait pai, i ma vare siaran siniotu muandu e sura pipi perak. 20Tutiri vava verawai mo nine pa, siniotu pa sepau riwanea setadiawa Allah nie kavo ariri Syen Yesus, e siniotu vesanemitiar pa sepau ea.

Sawau na Efesus

21Manau nana vava vie ruana pasi, Paulusi kutu toapa nari ria so uta Makedonia tutir Akhaya avori dinda so Yerusalem. E kievo e diojo, “Ira so wana to manau mamo, nari ira so bendar Roma kota.” 22Avori Paulusi diemiasa nie siniotu venanaripi tutiri pa sandu, sumbe muandu andina Timotiusi e Erastusi, e sunda so Makedonia, vape miesari ma miesoi raria pa toi ea na provinsi Asia.

23Nana rabua jana, kaiwasa venana Efesus pasia, senggasiou e setono sesawaui pimasa aso Paulusi nie aniau pai nanapi Syen Yesus. 24Aso na bendar jani, siniotu pesi sano pa Demetriusi, i ma nienari pi saserai nana perak. E i ma nienari pi ariri anio katu maso karuar vesanomi nana vavi Artemis pai. Pi nienari jasi sionae siemuai pipi vepau vesiri maso nie siniotu venanaripi pasia. 25Apavo siniotu nei ruir nie venanaripi tutiri pasia, tutir siniotu vevesiei venanari pi saserai na perak pasia. Avori kievo e diojo, “Maneta pa mia! Menduina to manau toapa tasamuai pipi vepau vesiri na tane nanaripi ninei. 26Vape matau mesajo e metadiawa mesari to manau vitopi Paulusi nienarisi pa. Paulusi kievo toapa karuar vitosi siniotu senanari nesi ma sive allah vata va. E dionae siniotu pa sepau sesanemitiar maso nie kavo aniau pasi nana Efesus vea va, vape vare na uta Asia vetutira kota. 27Vinggariria nana pa, tane nanaripi ninei nari siemuai sano vekariria, apa siniotu nesia nari semamo toapa karuar vavi pai Artemis tutir nie anio pai, kasa setatuani ea va, e nari setararojari, arora vae kaiwasa venana provinsi Asia e dunia vetutira, sesom karuar vavi paina.” 28Nanapi siniotu jasia setadiawa Demetrius nie kavo pasi pa, senggasiou vesiri e setananar e setojo, “Tane karuar vavi Artemis nana Efesus, andi bieba mo!” 29Apa kaiwasa venana bendar pai vetutira, sepau riwanea e senduir e setananar veito vediadi sawau. Avori kaiwasa pasia setapu Gayus tutir Aristarkhus, sandu ma siniotu Makedonia verausara Paulusi nana nie rara pai. E senggor sandu raso uta kaiwasa senduir na bendar pai. 30Paulusi dio sua so kaiwasa jasia ave amamo kievo maso sia, vape siniotu verausara venana jasia setarandu Paulusi, senggavo e setojo, “Jai rua so wana va.” 31Siniotu veve baba pa sembe toi na Provinsi Asia, sembe maneta tutir Paulusi, setamiasa siniotu so Paulusi tutir arer ave amamo riara kievo tutiri kaiwasa venana uta senduir nana pasia vape moja. 32Apa kaiwasa veruir na uta jasia, setananar saradidioi; esia setananar to nine, esia setananar to jana. Apa veito sesawai, aso siniotu vepau ninei sia setatara pi vionae senduir soa na janapa. 33Avori kaiwasa Yahudi pa setawa pidiara siniotu pesi vesanomi na Aleksander so aropo kaiwasa veruir pasia, ave tiopa sasara toapa vitopi vediajara vava ninei pa. Apa Aleksander siasana vara pa amamo sepeja e kievo e matau niavori na aropo kaiwasa pasia. 34Vape nanapi siniotu pasia sesajo riruini Aleksander i ma siniotu Yahudi nina, setananar to baba vesiri woroi pa oras muandu e setojo, “Tane karuar vavi Artemis nana Efesus, andi bieba mo!” 35Avori sekretaris nanapi bendar Efesus pai dionae kaiwasa pasia sepeja. Kievo so sia e diojo, “Eh kaiwasa Efesus pa mia! Siniotu vura nana dunia nesia senduini to manau toapa Efesus pa tata tataram vedioro anio karuar vavi vesanomi na Artemis pai, vebaba mo, tutiri karuar vavi veviar na rora pai! 36Siniotu vura kasa senggavo vepau so vava jani va, apavo memanasi vea, mendukakara menanaripi pa vape moja. 37Aso menggor siniotu nine sandu maso nine pa, amana sandu ma suramanana piesa va nana tane anio karuar vavi pai, e sandu kota sunggavo sisiajara sano pa va. 38Masisi Demetrius e nie venanaripi pasia seto setimbe karaka siniotu pesi, diadi so senggor sene kavo waririwi jani maso kuaruvi vekutu kavo pasia. Avori diadi so setopana sene sasara pasi nana aropo kuaruvi vekutu kavo pai, avori veve baba nana pareta pa tawana asiaja. 39Vape masisi pi vevesiei pesa ja nana mene sanepaja pasi, nari tanggavo aririasi ave simanau nana ruir baba vevesiei pareta pai disatuira pa. 40Aso pi veveruana nana raria ninei, nari viediajara kariria maso tata. Pi veveruana ninei nari dionae pareta Roma pai sengge sasara so tata toapa tata tatono sawau ninei, aso kasa tatopana ariri vitopi viediajara sawau ninei pa.” 41Sekretaris nana Efesus pai kievo kavo ninesi vura to manau pa, diemiasa sia e sembavu.