Rasul 18

Paulusi niana Korintus

1Manau pa, Paulusi suvi vurusu bendar Atena e ria so Korintus. 2Na Korintus i ma siemuai siniotu Yahudi pesi sano pa Akwilai, vieva nana uta provinsi Pontus. Akwila tutir vinie pai Priskila, erine vori sunda nana Roma na uta Italia. Sunda so Korintus, aso Kaisar Klaudius vie pareta maso kaiwasa Yahudi pasia vura to manau, ave amamo sesuvi vurusu Roma! Apavo Paulusi ria siejo sandu na Korintus. 3E miesoi tutir sandu na jana e senanaripi vura, aso sune nanaripi pasi simasi vaveri tutir Paulusi, senanari pasi ma java sina, ave amamo sembovasi. 4Nana raria Sabat pasi vura, Paulusi ria so anio ari agama Yahudi pasi e kievo tutir siniotu Yahudi e Yunani pasia, ave amamo dionae sesanemitiar maso Yesus.

5Manau na Silasi tutir Timotiusi sundama nana Makedonia pa, Paulusi mienau nie nanaripi java pai e raria pasi vura ma, Paulusi tutiri sane vetutira e tiopanusara Allah nie kavo pai maso Kaiwasa Yahudi pasia, toapa Yesus i ma Raja Vekor Vesie Allah dierera paina. 6Amana siniotu pasia senggavo pau e sesisiajari, apa Paulusi tiotap wabu venana nie avavar pasi, siveruana sene sasara pasi. E kievo maso sia e diojo, “Masisi mesamuai kariria pai, matau mia membe sasaar. Jau, ive tatar va! Nana raria ninei nari ira vurusu mia e itopanusara Kavo Vesie nei maso kaiwasa Yahudi va pasia.” 7Avori Paulusi vievu vurusu sia e ria miesoi nana anio viosa siwara anio ari agama Yahudi pai. Siniotu vene anio pai sano pa, Titius Yustus, I ma siniotu Yahudi va vape siom Allah. 8Krispus, siniotu veveru na anio ari agama Yahudi pai, tutir nie anio raro pa vura, sesanemitiar maso Syen Yesus. E kaiwasa Korintus esi pasia kota, sepau setadiawa Allah nie kavo Paulusi tiopana pasi, apa sesanemitiar maso Syen Yesus, avori sesamuai kambu masi pai.

9Nana diru pesi pa, Syen kievo so Paulusi nana sajajo pesi e diojo, “Muetai va! Tuopanusara Allah nie kavo pai vei vea, pueja vape moja! 10Aso Ja ma ina tutir au. Siniotu pesi kota kasa nienari kariria maso au va, aso nana bendar ninei kaiwasa pa sepau nari sesanemitiar maso Jau.” 11Apa Paulusi miesoi na Korintus woroi pa taun siri e sembai rim e siri e, dieniniau sia nana Allah nie kavo pai. 12Nana rabua Galio vie Gubernur nana provinsi Akhaya pa, siniotu Yahudi pasia ma sembe siri e sembaririwi tutir Paulusi e senggori so gubernur pai ave amamo kutu kavo pai. 13Senggavo maso Galio e setojo, “Siniotu ninei, dieniau kaiwasa ave amamo sesom Allah tutiri ria vionae amandawaini Allah nie hukum Torat pasi.” 14Nana Paulusi dio dinggavora pa, vape Galio kievo maso siniotu Yahudi pasia e diojo, “Eh kaiwasa Yahudi pa mia! Masisi mene kavo metimbe karaka nanapi nienari sasara e vava vekariria, vevata mo nari jediawa usara mene amuaus ninesi. 15Vape membaririwi nana kavo e, wasa e, nanapi matau hukum agama menda usara pasi vea, apavo matau mia menanarisi. Ja ma ikambarai ikutu kavo ninesi.” 16Avori Galio diemiasa nie verut pimamuna pasia ave setatavar siniotu Yahudi pasia sesuvi vurusu uta vekutu kavo pai. 17Avori siniotu vena uta jasia vura setapu Sostenes, veveru na anio ari agama Yahudi pai, sendorai na aropo karapesa vekutu kavo pai. Vape Galio kiembarai siejo vava jana.

Paulusi siovera so Antiokhia

18Paulusi miesoi na Korintus woroi pa sembai toi ea. Avori tiopana tabea maso kaiwasa vesanemitiar venana jasia, avori diepai so uta provinsi Siria tutiri Priskila e Akwila. Paulusi kiasa rurandau pasi na Kengkrea, aso siauwora maso Allah1 to manau.2 19Nanapa sendama so Efesus pa, Paulusi vievu vurusu Priskila e Akwila sandu, avori sua so anio ari agama Yahudi pai e kievavo tutiri siniotu Yahudi venana jasia. 20Sesau maso Paulusi ave amamo miesoi tutiri sia nana jana woroi rawai ea, vape Paulusi kiembarai. 21Nanapa dio suvi e ria pa, kievo maso sia, e diojo, “Masisi Allah sane vesie toa mamo, nari isovera ea maso mia na nine.” Kievo tonine to manau pa, janama diepai ea so uta Siria nana Efesus. 22Nanapa Paulusi sirieu na Kaisarea, e viar vurusu wa pai to manau, ria so Yerusalem e tiopana tabea maso siniotu na kuaruvi vesanemitiar venana jasia. Avori ria so Antiokhia. 23Miesoi na jana woroi pa raria toi, janama suvi vurusu uta jana e ria ea so uta provinsi Galatia e Frigia vura ave amamo dionae verausara Yesus pasia sene sanetiar pasi sipaja.

Apolos niana Efesus tutir Korintus

24Nana raria jani, siniotu Yahudi pesi sano pa Apolosi riama so Efesus. I ma vieva nana Aleksandria. I ma dieniniau tutiri vava vesasie vesiri e verawai. I ma ruini ariri mo vitopi ve aivuire nana Repo pai. 25I ma siemuai aniau pai nanapi Syen Yesus to manau. Apavo kievo tutir sane vesie e, dieniniau nanapi Yesus tutiri vevata mo. Vape ruina Yohanesi nie aniau tutir nie kambu masi pa vea. 26Apolos kievavo nana anio ari agama Yahudi pai tutiri mietai va. Nanapa Priskila e Akwila suradiawa nie kavo aniau pasi pa, sunggori so sune anio pai e sutopa maso i tutiri vevata rawai, nana Allah nie sanepaja pai ave diono vesie maso siniotu pasia, nanapi Syen Yesus. 27Janama Apolos dio ria so provinsi Akhaya. Apa kaiwasa vesanemitiar venana bendar Efesus pasia, sembui surat pesi maso siniotu verausara Yesus pasia na Akhaya ave amamo senda vedior Apolos tutir sane vesie. E nanapa riama so bendar Korintus pa diono sanepai maso siniotu vesanemitiar pasia aso Allah nie vesie pai. 28Aso i ma dieniniau tutir karakuai mo e dionae siniotu Yahudi pasia senggavo vavera tutiri ea va na aropo siniotu vepau pasia. E tutiri tiopa veruana nanapi Repo pai, toapa Yesus I ma Raja Vekor Vesie Allah dierera paina.