Rasul 17

Paulusi tutir Silasi sunda so Tesalonika

1Paulusi tutir Silasi surinda nana ria vera nana Amfipolis tutir Apolonia pai avori sundama so Tesalonika. Anio ari agama Yahudi pesi niana jana. 2Apavo Paulusi ria sua na Anio ari agama Yahudi pai -- ariri ria so uta pesa, nana raria Sabat pai ora, ria samuai anio ari agama Yahudi pesi niana uta jana mamo sua nana -- avori Paulusi kievavo tutir siniotu venana pasia ariri ayat venana Repo pai diapa maso sia. Nienari toapa jana nanapi raria Sabat pa toru. 3Tiopa sasara ayat venana Repo pasi e dioisara toapa Raja vekor vesie nari siemuai marior e tienam sovera nana voru pai, avori Paulusi kievo e diojo, “Raja Vekor Vesie ninei, andina Yesus, itopana so mia paina.” 4Siniotu Yahudi pa sembe toi nana sia ma sesanemitiar vitopi Paulusi tiopana pa e senggoto Paulusi tutir Silasi. E siniotu Yunani pa sepau sesanemitiar e sesom Allah, e vavi veve sano pa sepau sesanemitiar kota. 5Vape siniotu Yahudi pasia sesanemi pa siete so Paulusi tutir Silasi sandu va. Apa senda e senduir siniotu vekawawaru e venganggau viarir nana uta vevovo pi pasia e setono kuaruvi ave amamo setono sawau na bendar jani. Setapai buru Yason nie anio pai ave sesasera Paulusi e Silasi sandu aso seto senggor sandu maso dopon kaiwasa vepau pasia. 6Vape nanapa sesamuai Paulusi tutir Silasi sandu va pa, sepapara Yason tutir kaiwasa vesanemitiar pa esia, senggor sia so aropo veve baba na bendar pasia. Avori setananar e setojo, “Siniotu viono sawau na dunia vetutira, sendama so bendar ninei to manau, 7e Yason kior sia so nie anio pai. Sia vura sendawaini Kaisar nie pareta nienari pasi, aso senggavo e setojo Raja vevesiei pa esinia, sano pa Yesus.” 8Nanapa kaiwasa pasia e veve baba na bendar jasia setadiawa vava jasi vura pa, senggasiou vesiri e setono sawau. 9Avori veve baba pasia setamiasa Yason e siniotu vesanemitiar pasia e sembait sia nana pipi ave amamo sive arer maso sia e sesawau ea vape moja, avori setavini Yason e nie neta pasia.

Paulusi tutir Silasi sunana Berea

10Vape nana diru jani kota, sawawara e kaiwasa vesanemitiar venana Tesalonika pasia setamias Paulusi tutir Silasi, ave amamo sunda so Berea. Nanapa sundara so wana to manau pa, sunda so anio ari agama Yahudi pai. 11Siniotu Yahudi venana Berea jasia ma, sene sanepaja pasi siete rawai nana siniotu Yahudi venana Tesalonika pasia, aso setadiawa kavo nanapi Syen Yesus pa, tutir sesanemi vesie vesiri, e raria vura ma sesasera ariri Repo nei, ave amamo senduini ariri Paulusi nie aniau nesi vura ma sitindija. 12Nana kasau siniotu pasia, sia ma sepau sesanemitiar maso Yesus, e vavi Yunani veve sano pa pasia e mua Yunani pa sepau sesanemitiar kota. 13Vape siniotu Yahudi venana Tesalonika pasia setadiawa Paulusi tiopanusara Allah nie kavo pai na Berea pa, sendama so Berea e setonae siniotu vena bendar jasia senggasiou e setono sawau. 14Vape sawawarae kaiwasa vesanemitiar na Berea pasia senggor Paulusi raso sasi derepa, vape Silasi e Timotiusi sandu ma aja sunana bendar pai rami. 15Manau na senggor Paulusi raso Atena, avori sesovera so Berea, e senggor Paulusi nie arer pai maso Silasi e Timotiusi sandu, ave amamo sawawarae sunda usari.

Paulusi niana Atena

16Nana rabua Paulusi dienota Silasi e Timotiusi sandu nana Atena pa, sane raro pa vesai vesiri aso siejo, toapa bendar jani dionu tutiri karuar vesom. 17Apavo na anio ari agama Yahudi pai, Paulusi kievavo tutir siniotu Yahudi pasia e siniotu vevesiei vesom Allah pasia. Na raria vura ma kievavo vavera nanapi Yesus tutir teinina vea na uta vevovo pi nanapa. 18E kota guru nana kuaruvi Epikuros e Stoa1 pa esia senggavo vavera tutiri Paulusi. Avori esi pasia ma senggavo e setojo, “Siniotu ninei ruin vitoi? I ma ruini katu vea, vape kievo e pau!” Siniotu esi pasia senggavo e setojo, “Esa mamo tiopanusara aniau nanapi karuar vevesiei kaiwasa pa sesom pasi.” Sia ma senggavo tojana, aso Paulusi tiopan usara Kavo Vesie nanapi Yesus tienam sovera nana voru pai pa. 19Avori senggor Paulusi so ruir vesanomi na Areopagus pai. Avori senggavo maso i e setojo, “Amato amanduini ariri aniau vavoru tuopana pai. 20Aso amatadiawa kavo tuopana pa sivesiei vesiri. Apavo amato amanduin ariri jasi vura sine tarai pasi.” (21Aso siniotu Atena pasia e siniotu wasa vemasoi nana jana sia ma sesanemi vesie semasoi to jana vea ave setadiawa e senggavavo nanapi vava vavoru.)

22Nana rabua Paulusi diosa na aropo kaiwasa veruir nana Areopagus pa, Paulusi kievo e diojo, “Eh kaiwasa venana bendar Atena pa mia! Isajo toapa nana pi vura ma, vevata mo mesom maso karuar pasi. 23Aso nanapa ira wawariri mene bendar nei pa isajo ariri pi membe nadi e mesom nana nesi pa, isajo samuai wavusom menanari pesi kota; tutir sive aivuire tonine, ‘Maso Allah amanduin va pai.’ Jo ma Syen Allah mesomi vape menduini va ninei, andi itopani maso mia pa. 24Allah venanari dunia nei, tutir pi venana pasi vura, I ma Syen veve pareta na rora e kakopa. I ma miesoi nana anio karuar siniotu senanari pasi va.2 25I kota ma, siau piesa va, toapa siniotu nienari maso I, aso andi diono tenam pai, e sarap sasie pai, tutir pi vura so siniotu pasia. 26Nana siniotu pa siri vea, e Allah dionae siniotu jani viediajar kaiwasa vura e, Allah diemiase semasoi nana dunia nei vura. Andi kutu ariri nana retena pa, raria tonina e, uta topina e nari setenam nana pa. 27Allah nienari siniotu pasia, ave amamo sesaserai, e sesamuai e senduina toapa I ma andija. Vape tindija mamo Allah ma vie kasau tata siri-siri va. 28Ariri kavo esi pasia senggavo e setojo, ‘Aso Nie paja pai viediajara e tatenam e tamanawar e tanana dunia nei pa.’ Nine masi ariri mene siniotu vevui kavo sosiau pa senggavo pa e, setojo, ‘Vevata mo nine tata vura ma usapui Allah kota.’

29Aso tata ma tambava nana usapui Allah, tata ma kasa tatojo Allah ariri karuar siniotu senanari na barawa e perak e rovuki nanapi sene ruina pasi va. 30Allah piero siniotu pa sene nganggau pasi to manau nana rabua senduin ariri Allah nie sanepaja pai va, vape raria ninei ma, diemias maso siniotu vura na dunia nei ave amamo sesovera nana sene tatar pasi e sesom Allah vea. 31Aso I ma disatuir raria pesi to manau, ave amamo kutu kavo vetindija mo jana, maso dunia nei vetutira. Syen Allah diri siniotu pesi to manau, e nari kutu kavo ninei. E nari siniotu vura sesanemitiar mo maso vava nine pa, jo ma Allah dionae siniotu jani tienam sovera nana voru pai!” 32Nanapa siniotu pasia setadiawa Paulusi diojo nana tenam sovera nana voru pai pa, esi pasia semari Paulusi. Vape esia kota senggavo e setojo, “Amasanemi vesie amatadiawa kuevo riwanea nana vava nine pa.” 33Avori Paulusi vievu vurusu ruir jani. 34Vape siniotu pa sembe toi senda usara Paulusi e, sesanemitiar maso Yesus. Nana rabua vesanemitiar jasia, Dionisius, i ma veve baba na ruir Areopagus nina, tutir vavi pesi sano pa Damaris, e siniotu vevesiei pa esia kota.