Rasul 16

Timotiusi ria usara Paulusi tutir Silasi

1Paulusi tutir Silasi, sunda so Derbe, janama sunda so Listra. Na jana siniotu verausara Yesus pesi nina sano pa Timotiusi. Siniani ma siniotu Yahudi vesanemitiar to manau maso Yesus, vape tamani ma siniotu Yunani. 2Kaiwasa vesanemitiar venana Listra e Ikonium pasia, senduin Timotiusi ma siniotu viate nina. 3Paulusi miajar ave Timotiusi ria usara sandu, apa dionae Timotiusi vie sunat, Paulusi nienari to jana, aso siniotu Yahudi venana uta jasia vura, senduin toapa Timotiusi tamani ma siniotu Yunani nina. 4Nanapa senda wawariri bendar pasi pa, setopan ariri rasul pasia tutir penatua venana Yerusalem pasia sene kavo senggutu pasi maso siniotu na kuaruvi vesanemitiar pasia, ave amamo senda ariri kavo arer pasi. 5Janama siniotu na kuaruvi vesanemitiar pasia senggarakuai nana sene sanetiar pasi, e raria vura ma siniotu vesanemitiar pa sepau riwan ea.

6Wainunu Sren pai dierandu Paulusi e Silasi sandu sutopana Allah nie Kavo Vesie pai na provinsi Asia. Apa sunda kara so provinsi Frigia tutir Galatia. 7E senda sederiasi wata na uta Misia pa, seto sesua so provinsi Bitinia, vape Wainunu Yesus pai dierandu sendara so wana. 8Apa senda kara provinsi Misia e, sendama so Troas. 9Diru pa ma Paulusi siejo sajajo pesi nana Troas. Nana sajajo jani siniotu Makedonia pesi, diosa na aropo pa e siau e diojo, “Rua mavaru so Makedonia ave sanepai ama!” 10Manau na siejo sajajo jani pa, sawawara e ama sasera kasau, ave amanda so Makedonia. Aso nanapi sajajo nei amasanemitiar vesiri toapa, Allah diemiasa ama ave amatopan sasara Kavo Vesie pai maso siniotu Makedonia venana wasia.

Lidia sanetiar na Syen Yesus

11Avori amasuvi nana Troas, amasa na wa pai e amatapai so nu Samotrake, e kausapa pa amasirieu na Neapolis. 12Nana jana pa amanda raso Filipi, bendar retena na uta Makedonia. Filipi ma bendar, raja Roma vie pareta paina. Apa amamasoi na wana raria pa toi. 13Nana raria Sabat pai pa, amasuvi vurusu rature baba pai so vorira bendar pai e amanda na maria derepa, aso amasanemipai usara uta jana ave amamo siniotu Yahudi pasia senduir e sembe nadi maso Allah nana pana. Avori amamasoi nana jana e amanggavavo tutir vavi veruir to manau pasia. 14Vavi pesi nana kasau sia, sano pa Lidia e vieva nana Tiatira. I ma viovo sis veve wombo e sis ninei nie vait pai riewai vesiri e, i ma siom Allah to manau. Nanapa diediawa Paulusi nie aniau pai pa, Syen sieva sane raro pa ave sanetiar aniau vitosi tiopanasi pa. 15Apa Lidia tutir nie anio raropa vura sesamuai kambu masi, manau pa siau ama. Kievo e diojo, “Maneta pa mia, masisi mesanemipai ja ve siniotu vesanemitiar maso Yesus to manau mamo, ite mendama ve memasoi na ine anio nei.” I ma siau vei vea maso ama ave amanda ariri nie sau pai.

16Nana raria pesi pa, amanda ea so uta veve nadi nana pa, amasamuai vavi veve womi pesi. I ma wainunu vekariria pai ria savui pana, e I ma tiopa veruana pi nari veve diadi nana raria verama wasi. Nanapi vava jasi vavi pai tiopana pasi, i ma dionae veveru pasia nana vavi ninei, sesamuai vait to baba vesiri. 17Vavi jani ria usara Paulusi tutir ama e, dienanar e diojo, “Siniotu nine sia ma Syen Allah vetariai mo pai, nie womi pasia na! Sendama ave setopan ariri ria so mia, ave amamo mesamuai vesie pai!” 18Woroi pa raria toi, vavi jani dienanar vei vea to jana. Apa Paulusi mienasi va, avori diarai e kievo so wainunu jani e diojo, “Nanapi Yesus Kristusi sano pa e, jemias au suvi vurusu vavi ninei!” Raria jani pa, wainunu pai suvi vurusui. 19Janama veveru na vavi pasia senduin toapa kasau so sesamuai pipi na vavi ninei, sinai to manau, apa setapu Paulusi e Silasi sandu, avori sepapara sandu so na aropo veveru na pareta pasia. 20Avori senggor sandu so veveru na pareta Roma pasia, e setojo “Siniotu nine sandu ma siniotu Yahudi sandu na. Suronae manasi na bendar ninei va. 21Suraniniau sune buai, siniotu Roma ne tata ma, kasa tanggorusara e tananari ariri sune buai pasi va.” 22Kaiwasa vepau pasia senggota e sendora Paulusi e Silasi sandu, e veveru na pareta pasia setamias verut pimamuna pasia e sendaba sune sasu pasi, avori sendora sandu na aitato pai. 23Manau na sendora sandu nana aitato pai to rawai vesiri, avori setonae susua na bui pai raropa. Veveru nana pareta pasia setamiasa veveru nana bui pai setarama sandu to karakuai vesiri. 24Ariri pareta jani, veveru na bui pai dionae susua nana bui pai andiraro venana dopui mo pai e senggepa tawana sundaemi pasi to karakuai nana ai setonae veve kamberei pai. 25Vare diru rabua pa, Paulusi e Silasi sumbe nadi e sundoi ranu sanandika maso Allah. E siniotu venana bui esi pasia kota setadiawa sundoi pa. 26Worabua vae, mundija pimasa vesiri, veito anio pai nie dui pa simanawar. Rature bui pasi sitasieva e wangga pasi sitaisu vurusu kaiwasa venana bui pasia. 27Avori veveru na bui pai tiendor veito siobatai, e diosa siejo ma rature pasi sitasieva, apa piati sumbe pai na sor pai ave dio mun riwani, aso miemo ma diojo siniotu venana bui pasia setapai vurusu bui pai to manau. 28Vape Paulusi dienanar to baba vesiri e diojo, “Mu riwana au vape moja! Amane ama na nine vura!” 29Veveru na bui pai, diemiasa womi pai kior padamara pai avori diepai surapui, tutiri titiat e mietai vesiri, apa disa aebu pa sandu na aropo Paulusi e Silasi sandu. 30Avori kior sandu e susuvi vurusu andiraro jani avori kievo e diojo, “Tuan pa mia, vitopi nari inanari pa ave amamo isamuai vesie pai?” 31Paulusi e Silasi sunduar e surojo, “Sanetiar maso Syen Yesus! Mamo suemuai vesie pai e, au tutir siniotu venana nomu anio raropa pa vura.” 32Avori Paulusi e Silasi sutopana ariri Syen nie kavo pai maso veveru nana bui pai, tutir siniotu vena nie anio raro pa vura. 33Nana diru jani kota, veveru nana bui pai kior sandu e rioisi rurana sune kapor pasi. Apa raria jani kota, kaiwasa vena nie anio raro pasia vura setisamuai kambu masi. 34Avori kioro Paulusi e Silasi sandu so nie anio pai e, vie masis pisia maso sandu. Avori Siniotu veveru nana bui pai tutir nie anio raropa vura sesanemi vesie vesiri aso sia ma sesanemitiar Allah to manau.

35Kausapa vavoru pa, veveru nana pareta Roma pasia setamiasa verut pimamuna pasia e senda so bui pai ave setopana arer pai amamo setavini Paulusi e Silasi sandu. 36Veveru nana bui pai tiopa so Paulusi, e diojo, “Tuan pa mia, veveru nana pareta pasia setamias jau ave itavini mandu. Apavo nine ma mumbavu e munda tutir vesie!” 37Vape Paulusi kievo maso verut pimamuna jasia e diojo, “Veveru nana pareta Roma pasia setamiasa siniotu pasia sendora ama tutiri aitato pai to manau, vape aja setuta ama nanapi sasara varami e siniotu pa sepau sesajo vava jani. Arora vae ama ma siniotu Roma ni ama. Sia kota setonae ama sua nana bui pai. E raria ninei setamias e amanda tutiri vava manana vea. Vape amanggambarai! Metamiasa veveru nana pareta pasia e matau sendama so nine ave sesuviri ama.” 38Apa verut pimamuna pasia setopana vava jana maso veveru na pareta Roma pasia. Janama setadiawa toapa, Paulusi tutir Silasi ma siniotu Roma ni sandu, apa vava ninei onae sematai vesiri. 39Avori senda maso Paulusi e Silasi sandu, sesau so sandu e munggasiou ama vape moja e senggor sandu vurusu bui pai so vorira wa, sesau ea e sunda vurusu bendar jani. 40Paulusi e Silasi sumbavu vurusu bui pai, avori sunda so Lidia nie anio pai. Manau na susamuai kaiwasa vesanemitiar pasia na wana, e surono kavo sanepaja maso sia, avori Paulusi e Silasi susuvi nana bendar Filipi e sunda.