Alkitab Bahasa Wondama
Rasul 21
Paulusi ria so Yerusalem
Amatopana tabea maso veveru na kuaruvi vesanemitiar na Efesus pasia to manau, janama amambavuru sia. Avori amatapai tutiri wa pimasa pai raso nu Kos. Raria kausapa pa amandama so nu Rodos. Nana jana amatapai vea so Patara pai. Na Patara pa, amasamuai wa pimasa vio viapai so Fenisia pesi. Apa amasa na wa pimasa jani avori amatapai. Janama amasajo nu Siprus nana rawa sara wa pai, vape amanda rawaini e amatapai so Siria. Vepui pa amandama so Tirus, aso siniotu venana wa pai seto sembiara pi diedu pasi na bendar jani. Na uta jana pa, amanda e amasajoro siniotu vesanemitiar maso Yesus pasia e amamasoi tutir sia woroi pa raria rim e muandu. Wainunu Sren pai dionae setono kavo sanepaja maso Paulusi, ave amamo ria so Yerusalem vape moja. Vape, raria pa simanau na amana jana pa, amanda vurusu sia e amanda amane rara pai ea. Siniotu vesanemitiar pasia vura tutiri sembiniemi e sene atuma, senda usara ama raso vorira bendar pai; e na sasidere pa, ama vura amatisa aebu pasi e amambe nadi. Manau pa, amatopana tabea vavera so ama, janama amasa so wa pimasa pai, e sia vura sembavu so sene anio pasi. Amatapai nana Tirus pa, amasirieu nana Ptolemais. Apa amanda amasajoro maneta vesanemitiar venana wasia, e amatopa tabea so sia, e amanana wana tutir sia raria siri. Nana kausapa pa amasuvi na jana e amanda ea e amasirieu na Kaisarea. Na jana pa amandama so siniotu vesanomi na Pilipusi, e i ma siniotu vetopana Kavo Vesie nina, janama amanana nie anio pai. Pilipusi i ma esi nina, setiri nana siniotu rim e muandu pasia na Yerusalem.1 Pilipusi nie atuma vavi pa sembe at, sesamuai paja na Wainunu Sren pai ave amamo setopanusara kavo vitosi Allah vieruanasi maso kaiwasa pasia. Amanana Pilipusi nie anio pai raria toi to manau, nabi pesi sano pa Agabusi, riama nana provinsi Yudea.2 Riama so ama, avori kior Paulusi nie kavavirai pai e matau kiesie vera ae pasi tutir vara pasi, avori kievo e diojo, “Wainunu Sren pai kievo toapa nine, vene kavavirai ninei, nari siniotu Yahudi wasia, senggasiesi nana Yerusalem e sesiwia maso siniotu Yahudi va pasia.” Na amatadiawa pa, ama tutir maneta vesanemitiar venana Kaisarea pasia vura, amasau maso Paulusi ave ria so Yerusalem vape moja. Vape Paulusi ruar maso sia e diojo, “Metotopi mesai pa e metonae sanene kariria pa? Aso ikutu na sane raro ne to manau, ave amamo imajar e senggasie jau e ivoru kota na Yerusalem, aso Syen Yesus sano pa.” Aso Paulusi kiembarai diediawa amane kavo sanepaja pasi, apa amamanau amambedioiri. Amanggavo e amatojo, “Amambe nadi ave vava borai nine sive diadi ariri Syen nie majar pai vea!”
Ama nana Kaisarea woroi pa raria toi to manau pa, amapir ariri amane pi pasi, avori amanda raso Yerusalem. Maneta vesanemitiar pa esia kota nana Kaisarea senda tutiri ama, e senggor ama so Manason nie anio pai, aso nie anio paini nari ama nana pana. Manason ma vieva nana Siprus, e nana papo pa vie siniotu vesanemitiar maso Yesus to manau.
Paulusi ria siejo Yakobusi pa
Nanapa amanda so Yerusalem pa, maneta vesanemitiar venana wasia, senda vedior ama tutir sane vesie vesiri. Nana kausapa pa Paulusi ria tutiri ama so Yakobusi nie anio pai; penatua nana kuaruvi vesanemitiar jasia senana jana kota. Manau na Paulusi tiopana tabea maso sia, avori tiopanusara pi vura Allah nienari maso kaiwasa Yahudi va pasia to manau, nana nanaripi Paulusi nienari pasi. Setadiawa Paulusi kievo to manau pa, sia vura sesanandik Allah. Avori nana sia esi kievo maso Paulusi e diojo, “Maneta panau Paulusi, ruina toapa kaiwasa Yahudi nesia sepau vesiri sesanemitiar maso Yesus to manau. E esia ma senggorusara Allah nie hukum Torat pasi. E rabua nine ma setadiawa toapa au ma bueniniau siniotu Yahudi vemasoi nana kasau rabua kaiwasa vevesiei pasia, ave amamo setavini Allah nie hukum Musai tiopana, aso bueniau sia ave sembe sunat sene atuma pasia va e senda ariri Yahudi pa sene buai tawawari pasi vape moja. Apavo nomu sanepaja pai mamo toane? Sia ma ariria nari setadiawa toapa au ma ruama so nine to manau. Apavo, vesie pa nuenari ariri vitopi amanggavora ne, aso nana kasau ama, siniotu pa sembe at asiaja sena nine, sesauwora maso Allah to manau.3 Apavo kuor siniotu at jasia e nari buonae vue sren nomu tarai pai tutiri sia e au ma vuaiti vori pisom maso sia, ave amamo senggasa rurandau vena sendumi pasi. Toapa jana pa, nari siniotu vura senduina, toapa raupui setadiawa nana au pa, sive vata va, aso au ma aja rua usara Allah nie hukum Torat pasi kota. Vape nanapi kaiwasa Yahudi va vesanemitiar Yesus to manau pasia ma, amambui surat so sia to manau, nana amanggutu toapa, seta pisia veve pisom so karuar to manau pasi vape moja, seta piaum vevoru sendu kotara veraomi vape moja aso asija sive veria, e membe kasau nana nanaripi kavo vavi pai.”4 Raria vesousara pai pa Paulusi ria e kioro siniotu at pasia e dionae vie sren nie tarai pai tutiri sia. Avori sesua na Anio Syen ave setopa sasara maso imam pai ariri sembe sren sia pa, nari raria toni mienau pa, ave amamo sia siri-siri diono nie piaum pasi ve pisom pa.
Setapu Paulusi na Anio Syen
Nanapa raria rim e muandu pasi deriasi simanau pa, siniotu Yahudi vera nana provinsi Asia pasia, sesajo Paulusi na Anio Syen, apa senggavo amias kaiwasa pasia ave senggasiou, avori setapu Paulusi. Avori setananar e setojo, “Eh kaiwasa Israel pa mia vura, mesanemipai ama! Siniotu ninei ma dieniniau kaiwasa vura nanapi aniau vevesiei verawaini kaiwasa Israel pasia tutir Allah nie hukum Torat pasi, e riewaini Anio Syen pai. E raria ninei Paulusi kior siniotu Yahudi va pasia so Anio Syen nei e setono rariai maso uta veve sren jani!” Aso sesajo Trofimusi siniotu Efesus pai ria tutiri Paulusi na Yerusalem to manau. Apa semamo ma, Paulusi kior Trofimusi so raro Anio Syen pai to manau.5
Apa kaiwasa venana bendar jasia senggasiou vesiri e sesawau, e kaiwasa pa setapai ma sesorum Paulusi. Avori setapuri, e sepapari nana Anio Syen so vorira pa, e sawawara vesiri viarama pasia sesiori rature baba vederiaisi Anio Syen pasi vura. Nanapa kaiwasa pasia setato ave semu Paulusi pa, veveru nana verut pimamuna nana rai Romawi pai siemuai raupui, toapa kaiwasa venana Yerusalem pasia sengguja e sesawau pa. Apa veveru nana verut pimamuna pai kior verut pimamuna pa esia, tutir veveru nana verut pimamuna viosa usari pa esia, e sawawara e senda so uta kaiwasa pasia setono sewau pai niana pa. Nanapa kaiwasa pasia sesajo veveru nana verut pimamuna pai tutiri nie verut pimamuna pasia pa, semanau sendora Paulusi. Veveru nana verut pimamuna pai ria dieriasi Paulusi, avori diemiase nie verut pimamuna pasia senggasie vara pasi na rante pa muandu, avori veveru nana verut pimamuna pai duta ariri nanapi Paulusi ma teinina e vitosi nienarisi pa. Vape kaiwasa pasia setananara kavo vemasi vaveri va, esia setananar tonine, e esia setananar towana. Apavo veveru nana verut pimamuna pai ruin va, ariri vitoini vie diadi pa, aso raupui nana kaiwasa pasia sesawau mo pana. Apa diemias nie verut pimamuna pasia senggor Paulusi so markas pai. Nanapa senggor Paulusi raso te pai pa, kaiwasa vepau pa senggasiou e setawa papidiara sia vavera apa verut pimamuna pa sendu sasana Paulusi. Kaiwasa vepau jasia senda usara Paulusi nana karupa e setananar e setojo, “Memuni veito vioru!”
Paulusi siau ave amamo kievo e niavori
Nanapa verut pimamuna pasia senggor Paulusi e seto sesua so markas pai, Paulusi duta so veveru nana verut pimamuna pai e diojo, “Tuani, diadi ikavo katu tutir au e?”
Veveru nana verut pimamuna pai dutani e diojo, “Au ma ruin kavo Yunani e? Tojana pavo, jotosa au ma siniotu Mesir, papopa viono marova e ruir siniotu pa sembe siaran ata viono mamu tutir verut pimamuna pasia, e kior sia so mapar kurumi pai, andi au e?”
Paulusi ruar maso i e diojo, “Ja ma siniotu Yahudi, ja ma ivava nana bendar Tarsus, bendar veve sano na Kilikia pai; Isau so au, e buono kasau ave ikavo so kaiwasa nei.” Apa veveru nana verut pimamuna pai diono kasau so Paulusi e kievo, Paulusi diosa na te pai e siasana vara pa maso kaiwasa pasia ave sepeja. Avori Paulusi kievo so sia nana kavo Ibrani e diojo,
Source notes (5)
- Cross-reference Kis. 6:5, 8:5
- Cross-reference Kis. 11:28
- Cross-reference Bil. 6:13-21
- Cross-reference Kis. 15:29
- Cross-reference Kis. 20:4
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.