Skip to content
BibleKenya

Alkitab Bahasa Wondama

Rasul 22

Paulusi kievavo maso kaiwasa Yahudi pasia

“Jai mia tutir maneta pa mia vura! Nari itopana piesa ave inavori jau maso mia. Ite metadiawa!” Nanapa setadiawa Paulusi kievo nana kavo Ibrani pa janama sepeja vesiri. Avori Paulusi dinggavora e diojo, “Ja ma siniotu Yahudi ni jau, ive diadi na Tarsus nana uta Kilikia, vape ibaba na bendar ninei na Yerusalem, e guru baba Gamaliel dieniniau jau ariri vesie mo nanapi hukum Musai diono so tatapumi pasia. Apa vevata mo inanaripi maso Syen Allah masi ariri mia na raria ninei.12 Ja ma jono marior maso siniotu verausara aniau vavoru nanapi Yesus pasia to manau veito semboru. Mua to vavi, itapu sia vura e jonae sesua nana bui pai.3 Imam Baba pai matauni, tutir siniotu na Mahkamah Agama Yahudi pasia vura, diadi sembe ruana kavo nine nanapi vitopi itopanusara ninesi ma sive vata. Aso sia setono surat amias maso jau ave amamo ikori so kaiwasa Yahudi venana Damsyik pasia e ira so wana to manau. Ave amamo tutiri surat ninei, diadi so itapu siniotu vesanemitiar aniau vavoru jani, e ikor sia so Yerusalem ave sesamuai hukuman.

Vape nana ine rara pai pa, ira ideriaisi Damsyik, nana raria rabua, worabua vae itandoro sasaar pesi nana rora wa disanggapara wawariri jau. Apa itau avav so kakopa wa, avori jediawa raupui pesi kievo maso jau e diojo: Saulusi, Saulusi! Buotopi buono marior pai so ja pa? Avori jutani e jojo: Teini Au, Syen? Apa ruar maso jau e diojo: Ja ma Yesus siniotu Nazaret, buono marior soa paina. Siniotu vera tutiri ja pasia sesajo sasaar jani, vape setadiawa raupui vekavo so ja pai va. Avori juta riwanea e jojo: Syen panau, apavo nari vitopi inanari pa? Syen ruar e diojo: Buatau e ruara so Damsyik. Na jana nari esi tiopa maso au nanapi vitopi Allah diojo nuenari vura pa. Apa re nesi sitabuabu aso visanggapara pai piot pa. Apavo ine maneta amanda pasia, sendut na vara ne; e setadidini jau e isua so Damsyik. Na jana siniotu pesi sano pa Ananiasi. I ma vevata mo ria usara Allah nie sanepaja pai ariri tutiri Allah nie hukum Torat pasi. E siniotu Yahudi venana bendar Damsyik pasia vura setatuani vesiri. Riama siejo jau, e diosa siwara jau e kievo e diojo: Saulusi ine maneta panau, sivu remu pasi e suejo ea! E kasau ninei kota, isajo riwan ea e jeduati. Avori Ananiasi kievo maso jau e diojo: Tatapumi pa sene Allah pai diri au to manau, ave amamo ruin ariri Nie sanepaja pai, e suejo Yesus, Nie Womi pai vevata, e ave amamo buediawa nie kavo kievora pasi. E au ma nari vue saksi, ave tuopanusara pi suejora e buediawa pasi maso kaiwasa vura. Nine ma buenota e woroi ea va. Suobatau e suau maso siniotu pesi ave suemuai kambu masi. Vuenadi maso Syen ave riera au vurusu nomu tatar pasi.

Janama isovera so Yerusalem, e aja ive nadi na Anio Syen pai rami, na kasau jana jonu tutiri Wainunu Sren pai. Isajo Syen pai, kievo maso jau tonine, ‘Saira vuevu vurusu Yerusalem, aso siniotu venana nine sia kasa sesanemitiar maso Ine kavo kuevora pasi va.’ Apa ikavo e jojo, ‘Syen, sia ma senduin vevata mo, toapa isua na anio ari agama Yahudi pasi ave itapu kaiwasa vesanemitiar maso Au pasia e irora sia avori jonae sesua na bui pai raro pa. Toapa jana kota nanapa Stefanusi, nomu saksi pai, semuni to vioru pa, ja kota inana jana e imajar so semuni pa. E nana raria semuni pa, ja ma jerama sene sasu pasi.’4 Vape Syen kievo ea maso jau e diojo, ‘Rua vea, aso nari ja jemias au e rua so kaiwasa Yahudi va pasia nana uta viaroi.’ ”

Kaiwasa pa asiaja setadiawa usara Paulusi kievo pa, vape ineri kavo vepui kievora pasi, setananar to karakuai, “Tamu siniotu vetoapa nine vea. I ma tatoni e tienam vape moja!”

Nana markas pai raropa

Sia ma setananar vea tutiri seso sene sasu vorira pasi, e setotapa wabu pasi so vavo wa aso senggasiou mo pana. Veveru nana verut pimamuna pai diemias nie verut pimamuna pasia senggor Paulusi so markas pai ave amamo setutani tutiri sendasi ariri pi vitoni viediajara e siniotu Yahudi pasia setananar tojana maso i pa. Vape nanapa verut pimamuna pasia senggasie vara pa sandu to manau pa ave amamo seto sendasi, Paulusi kievo maso veveru nana verut pimamuna viosa usari na jani e diojo, “Menduini toapa hukum Roma pai dierandu mendora siniotu veve warga Roma, aso aja metutana ariri nie sasara pasi varami.” Veveru nana verut pimamuna viosa usari pai diediawa Paulusi kievo to nine pa, ria so veveru nana verut pimamuna pai e kievo e diojo, “Tuani, siniotu ninei ma warga Roma nina! Tata ma vare tandawaini hukum pai!” Apa veveru nana verut pimamuna pai riama so Paulusi e dutani e diojo, “Ite tuopan sasara maso jau, toapa vevata mo e au ma warga Roma ni au e?” Paulusi ruar e diojo, “Vata, siniotu veve warga Roma ni jau.” E veveru nana verut pimamuna pai kievo maso i e diojo, “Imesari ma ivori tutir ivait to pau vesiri ave amamo ive siniotu veve warga Roma.” E Paulusi ruar e diojo, “Vape ja ma siniotu veve warga Roma aso ive diadi na nine.” Apa verut pimamuna pasia seto sesasera Paulusi nie sasara pasi, sawawara e sesosipui sia e veveru nana verut pimamuna pai mietai kota aso diemias e setaviti to manau, arora vae Paulusi i ma siniotu Roma nina.

Paulusi niana aropo Mahkamah Agama pai

Vape veveru nana verut pimamuna pai dio siesera ve ruin ariri pi vitoini vediajara e siniotu Yahudi pasia sembe karaka Paulusi pa. Apa kausapa pa ma diemiasa imam veveru pasia e Mahkamah Agama pasia vura ave sendama senduir. Avori sesuviri Paulusi vurusu sene markas pai e senggori diosa na aropo sia vura.

Source notes (4)
  1. Cross-reference Kis. 5:34-39
  2. Cross-reference Kis. 9:1-19a, 26:4-18
  3. Cross-reference Kis. 8:3
  4. Cross-reference Kis. 7:58

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.