Skip to content
BibleKenya

Alkitab Bahasa Wondama

Rasul 23

Paulusi dieduata kaiwasa venana Mahkamah Agama pasia avori kievo e diojo, “Eh ine maneta pa mia, veito raria ninei, iruina ive sasara va maso Syen Allah na sane rarone, nanapi ine tenam nei.” Vape Imam baba pai Ananiasi, diemiasa siniotu viosa siwara Paulusi pasia sebasar Paulusi sore pai. Apa Paulusi kievo maso Imam baba jani e diojo, “Nari Allah biasar au, au ma matau buono au ve siniotu veve sren vape buawi vavera. Au muesoi na jana ave kutu kavo maso jau, ariri Allah nie hukum Torat pai, vape mataun au ruewaini Allah nie hukum Torat jani e buemiasa siniotu pasia e sebasar jau!”1 E siniotu viosa siwara Paulusi pasia senggavo e setojo, “Au ma sisiajar Allah nie Imam Baba pai!” Paulusi ruar so sia e diojo, “Eh maneta pa mia, ja ma iruini va toapa i ma Imam baba nina. Vevata nana Repo pai ma sive aivuire tonine, ‘Kuevo sisiajar veveru nana nomu kaiwasa pasia vape moja!’”2 Paulusi ruini toapa kaiwasa venana Mahkamah jani, esia ma siniotu Saduki siana e esia kota ma siniotu Farisi siana. Apa kievo maso Mahkamah Agama pasia e diojo, “Eh Maneta pa mia, ja ma siniotu Farisi ni jau, usapui nana siniotu Farisi. Ina aropo Mahkamah nei, aso isanemitiar toapa nari siniotu vevoru pa sebata sia riwanea.”3 Nanapa kievo tojana pa, siniotu Farisi pasia e siniotu Saduki pasia senggavo vavera, apa siniotu na Mahkamah pasia semasavu ve muandu. Aso siniotu Saduki pasia ma sesanemitiar so siniotu vevoru pasia kasa setenam riwanea va, e varo siniotu rora, varo wainunu kota, vape siniotu Farisi pasia ma sesanemitiar vava jasi vura.4 Apa sawau pimasa pai viediadi. Avori siniotu Farisi veruin sasavu kavo aniau na Torat pa esia, sebata sia e senggavo to karakuai e setojo, “Nana ama mamo siniotu ninei ma nienari sasara pesa va vesiri! Esa mamo wainunu pai pivai siniotu rora pai kievo maso i to manau!” Aso siniotu jasia sembaririwi to baba vesiri, apa veito veveru nana verut pimamuna pai mietai, masisi sendora Paulusi to vioru pe. Apa veveru nana verut pimamuna pai diemiasa nie verut pimamuna pasia ave sembiar avav e senda senggor Paulusi nana kasau rabua sia e senggori raso markas pai. Nana diru vesousara pai pa, Syen Yesus diosa siwara Paulusi e kievo maso i e diojo, “Kuerakuai sanemu pa, au ma tuopanusara vitopi ruina nana Jau na Yerusalem to manau. Toapa jana au ma nari tuopanusara nanapi Jau so Roma kota.”

Siniotu Yahudi pasia setato kavo ave semu Paulusi

Kausapa pa ma kaiwasa Yahudi pasia setono ruir manana pesi e senggavo nana nari semu Paulusi. Apa sesauwora toapa kasa setapi e setunu kambu va, veito nari semu Paulusi mo pino. Siniotu viono ruir so vio vemu Paulusi pasia sepau pa sembe siniotu muandu e rawai. Senda maso imam veveru pasia tutir veveru na Yahudi pasia avori senggavo e setojo, “Amasauwora na aropo Allah to manau toapa, kasa amatapi e amatunu kambu va, veito nari amamu Paulusi mo pino. Toapa jana mia vura tutir siniotu na Mahkamah Agama metanatu surat pesi so veveru nana verut pimamuna Roma pai, ave kior sovera Paulusi maso mia ea, ariri metove mesasera riwana nie kavo pasi to vesie mo. Amataramani so amamuni na aja riama so mia varami pa.” Vape Paulusi ano pai, nana raruo vavi pai diediawa sene sanepaja jani pa. Apavo riama so uta markas pai e tiopa sasara maso Paulusi. Avori Paulusi siau veveru nana verut pimamuna viosa usari pa siri e kievo maso i e diojo, “Kuor atuma katiei ninei maso veveru nana verut pimamuna pai, aso dio tiopana piesa maso i.” Veveru nana verut pimamuna viosa usari jani kior atuma katiei pai maso veveru nana verut pimamuna pai e diojo, “Paulusi, siniotu venana bui pai, siau maso jau, ave ikor atuma katiei ninei maso au, aso dio tiopana piesa maso au.” Apa veveru nana verut pimamuna jani rut na atuma katiei pai vara pa , avori kiori e sumesari sunda tara dere pa e dutani e diojo, “Vitopi buo tuopana maso ja pa?” Atuma katiei jani ruar maso veveru nana verut pimamuna pai e diojo, “Siniotu Yahudi pasia setato kavo e sesau so au, ave kuor Paulusi maso Mahkamah Agama pasia nana kausapa, ariri setove sesasera riwanea nie kavo pasia to vesie mo. Vape kavo senggavora pasi ma sive vata va. Apavo buediawa sene sau ninei vape moja, aso siniotu pa sembe siniotu muandu rawai asiaja setaniwa, ave amamo setosa vedioro Paulusi nana ria wai e semuni. Sia ma sesauwora to manau toapa, sa setapi va e sa setunu kambu va, veito semu Paulusi mo pino. Nine ma setarama e setanota Tuani nomu ruar pai vei vea.” Janama veveru nana verut pimamuna pai kievo maso atuma katiei pai e diojo, “Kavo pa tuopana to manau so ja pavo, tuopa maso esia kota vape moja.” Avori diemiasa atuma katiei pai vievu.

Setanatu Paulusi so Kaisarea

Janama veveru nana verut pimamuna pai siau maso veveru nana verut pimamuna viosa usari pa muandu e kievo so sandu e diojo, “Muriri siniotu verut pimamuna pa sembe utin muandu, tutiri verut pimamuna vesa nana kuda pa sembe siniotu toru e sura, e verut pimamuna sanai pa sembe utin muandu ave sendara so Kaisarea nana oras rim e ata diru ninei. Muriri kuda pa toi kota so Paulusi sia nana pa, e menggori tutir vesie raso Gubernur Feliksi.” Avori veveru nana verut pimamuna jani vui surat pesi e riotu toapa nine,

“Aisinia baba pa Gubernur Feliksi, tabea so au, nanapi jau Klaudius Lisias.

Siniotu ninei ma kaiwasa Yahudi pasia setapuri to manau e seto semuni, vape nana kasau irama tutir verut pimamuna pasia pa amambediori e amatavini, aso jediawa toapa i ma siniotu Roma veve warga nina pana. Ave jo iruini ariri sasara vitoni viediajara e sembe karaki pa, apa ikori so sene Mahkamah Agama pai. Sia ma sembe karaki, nanapi matau sene hukum Torat pasi. Vape isamuai sasara pesa va ave vediajara e siemuai hukuman voru pai pivai hukuman bui pesi va. Janama jediawa toapa siniotu Yahudi pasia setato kavo ave seto semuni. Apa sawawarae jemias verut pimamuna pasia e senggori maso au. E jemiasa veve karaki pasia to manau, ave amamo senggor sene kavo setimbe karaki pasi maso Tuani au.”

Avori verut pimamuna pasia senanari ariri amias sesamuai pai e senggor Paulusi nana diru pa, raso Antipatris. Nana kausapa pa setamiasa verut pimamuna vesa nana kuda pasia e setinda sene rara pai tutiri Paulusi, e esi pasia ma sesovera so uta markas pai. Nanapa verut pimamuna vesa nana kuda pasia sendama so Kaisarea, e setono surat jani maso Gubernur pai avori sesiwi Paulusi maso i. E manau na Gubernur pai diapa surat pai pa, duta maso Paulusi e diojo, “Au ma vueva nana uta topina?” Paulusi ruar e diojo, “Ja ma ivava nana Kilikia.” Gubernur pai kievo e diojo, “Nari jutana ariri nomu kavo nei, nana raria siniotu veve karaka au nesia, sendama so nine pa.” Avori diemias verut pimamuna pasia e senggor Paulusi setaramani na Raja Herodesi nie anio pai.

Source notes (4)
  1. Cross-reference Mat. 23:27-28
  2. Cross-reference Kel. 22:28
  3. Cross-reference Kis. 26:5; Flp. 3:5
  4. Cross-reference Mat. 22:23; Mrk. 12:18; Luk. 20:27

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.