Rasul 24

Siniotu Yahudi pasia sembe karaka Paulusi so Gubernur Feliksi

1Manau na raria veve rim pai pa, Imam Baba Ananiasi tutiri veveru na siniotu Yahudi pasia senda so Kaisarea tutiri siniotu veruin sasavu nanapi hukum Romawi pesi vesanomi na Tertulus. Sendara so aropo Gubernur Feliksi e setopana ariri kavo setimbe karaka Paulusi pasi. 2Avori Gubernur pai siau Paulusi so aropo pa, janama Tertulus tiopana ariri kavo vie karaka Paulusi nana pasi e diojo, “Aisinia baba Gubernur panau! Nanapi nomu pareta pai pa, amane uta nei mienasi. E nanapi nomu ruini ariri sanepaja vetindija pa, pi nuenari nesi sipau siete vesiri maso amane kaiwasa nei. 3Ninesi vura ma tawana e nana topina vea, amatatuanasi tutiri baba vesiri maso jai au. 4Vape ave amamo amangge Tuan nomu oras vepau ninesi vape moja, isau maso au ave buediawa amane kavo katu amatimbe karaki nei. 5Amasamuai siniotu ninei ariri pota vekariria vekatar. Na dunia nei vetutira, i ma dionae kaiwasa Yahudi pasia semanasi va, e andi vieru nana kuaruvi verausara aniau na siniotu Nazaret pasia. 6Andi kota ma tieto e diono rariai so Anio Syen pai, apajoma amatapuri. [Amato amanggutu kavo maso i ariri matau amane hukum agama pasi. 7Vape veveru nana verut pimamuna na rai pai, Lisias diewari vurusu ama, 8e diemiasa siniotu veve karaki pasia sendama so aropo Tuan au.] Masisi Tuan suesera ariri siniotu ninei nie kavo pasi, nari Tuan mataun buediawa toapa amane kavo amatimbe karaki nesi vura ma, sive vata.” 9Siniotu Yahudi venana jasia kota sembe karaka Paulusi, e sendausara toapa kavo vitopi Tertulus kievora pasi vura ma sive vata.

10Avori gubernur pai disatuiri na vara pa maso Paulusi toapa diadi so kievo. Apa Paulusi kievo e diojo, “Iruina toapa Tuan au vue siniotu vekutu kavo na uta nine, woroi pa taun toi to manau. Apajoma sanene vesie so ikavo vori jau nana aropo Tuan au. 11Au ma nari suesera e ruini ariri mo, toapa nana aja raria sura e muandu verawai pai varami, irama so Yerusalem ave ive nadi. 12E kaiwasa Yahudi pasia sesajo ja ma ivaririwi tutir siniotu pesia va, pivai iruiri siniotu ave amatono sawau kota va, nana Anio Syen pai e na anio ari agama Yahudi pasi kota, pivai na topina vea nana bendar raro pa. 13Sia kota diadi va so setoisara pi veveruana maso au, toapa kavo vitopi sembe karaka ja soa pa. 14Vape itopana vava nine maso Tuan au toapa, ja ma isom Allah amane tapu pasia ariri Yesus nie aniau pai, vape siniotu Yahudi pasia setojo sive vata va. Vape isanemitiar kota kavo vevui nanapi hukum Torat tutir nabi pasia vura sene surat pasia. 15Masi ariri sia, ja kota ipir sanetiar maso Allah, toapa siniotu vevoru pa sia vura, nari setenam sovera ea nana voru pai -- siniotu viate tutir siniotu vekariria kota. 16Apajoma tawana isasera ria e inanari vava viate, ave sane raro ne varo rariai maso Allah e maso siniotu pasia. 17Manau na taun pa toi ma inana Yerusalem va, e isovera ea so wana tutir ikor pipi amanduira pasi so ine kaiwasa vevaro pi pasia e jono pisom maso Allah.1 18Nana rabua aja inanari pi jasi pa, siniotu Yahudi pa sembe toi senda nana provinsi Asia, sesamuai jau nana Anio Syen pai, nana ive sren ine tarai nei to manau pa e varo siniotu vepau vena tutir jau, e raria jani kota jono sawau va. 19Vape siniotu Yahudi pa esia, sendama nana Asia. Sia ma tindija mamo sendama so Tuan au e setopana kavo setimbe karaka ja pasi, masisi sesamuai ine sasara pesa. 20Vape masisi senggambarai senanari ariri vava jana, siniotu venana nine sia, setopana ariri ine sasara vitosi sesamuai nana ja pa, nana rabua setutana jau na aropo Mahkamah Agama pa. 21Sesamuai kavo ikavora pa siri to vea nana aropo sia, ikavo toapa: Raria ninei metuta ariri ine kavo pasi, aso ja ma isanemitiar toapa siniotu vevoru pasia nari setenam sovera ea.”2

22Vape Feliksi, i ma ruin ariri Syen Yesus nie aniau pasi to pau, sioeta ruir jani e kievo e diojo, “Masisi veveru nana verut pimamuna Lisias riama mamo, nari ja ikutu ariri kavo nei vue sasara te pivai.” 23Avori Feliksi diemiasa nie veveru nana verut pimamuna viosa usari pasia setarama vedior Paulusi vea, vape kasa senggasiesi nana wangga va e setono kasau maso nie maneta pasia ave setono pi vitopi Paulusi dio siauwa nana sia pa.

Paulusi kievo maso Feliksi tutir vinie Drusila sandu pa

24Raria pa toi janama Feliksi riama tutiri vinie vesanomi na Drusila pai; i ma siniotu Yahudi nina. Avori Feliksi diemiasa siniotu pasia e senggor Paulusi, janama Feliksi diediawa Paulusi kievo nanapi sanetiar maso Yesus Kristusi pa. 25Vape nana rabua Paulusi kievo nanapi tenam vetindija pai e tiawan sanepaja vekariria pai e nanapi hukuman Allah na raria Vemanau pai, apa Feliksi mietai avori diojo, “Au ma diadi so rua na raria ninei. Masisi isamuai raria viate pesi ea, nari jemias siniotu e sesau au ea.” 26Raria jani Feliksi piri sanetiar toapa nari siemuai pipi nana Paulusi. Apajoma tawana diemiasa siniotu pasia senggor Paulusi ave kievo tutiri pa. 27Vape taun muandu to manau pa, Perkius Festusi vie gubernur, riwa Feliksi. E ave amamo Feliksi dio dionae siniotu Yahudi pasia sesanemi pa siete, apa dionae Paulusi niana bui pai vea.