Rasul 25

Paulusi siasana nie kavo pai maso aropo Kaisar

1Festusi riama so Kaisarea nana provinsi Yudea to manau e niana wana raria toru, janama suvi vurusu Kaisarea e ria so Yerusalem. 2Na wana imam veveru pasia e veveru na Yahudi pasia sendama so Festusi ave setopa ariri sene kavo setimbe karaka Paulusi pasi. 3Sesau so Festusi, ave sanepai sia mamo, diemiasa siniotu pasia e senggor Paulusi so Yerusalem. Aso setato kavo to manau, ave amamo semu Paulusi nana ria rabua pa, nana riara so Yerusalem pa. 4Vape Festusi ruar e diojo, “Paulusi ma aja niana bui pai na Kaisarea, e woroi va so nari isovera ea so wana pa. 5Apavo, vesie pa mene veveru pasia senda usara jau so Kaisarea. E masisi Paulusi nienari sasara pesa vevata mo, amamo sia nari sembe karaki na wana.”

6Festusi niana Yerusalem pa vare raria rim e toru pivai raria sura ea, avori Festusi siovera ea so Kaisarea. Kausapa pa diono ruir vekutu kavo pai e diemiasa siniotu pasia ave senggor Paulusi raso aropo pa. 7Siniotu Yahudi pasia sendama nana Yerusalem, e senduir na andiraro vekutu kavo pai. Manau na Paulusi riama so ruir pai, sendara setosa wawariri. Avori sembe karaka Paulusi e setojo nienari sasara vebaba pa pau. Vape sembaro paja so setoisara nie sasara vitosi setimbe karaki pa. 8Apa Paulusi kievo vori e diojo, “Inanari sasara pesa va kota e irawaini Syen Allah nie hukum Torat pasi va, pivai irawain Anio Syen pai va, pivai irawaini Kaisar Roma pai va kota.” 9Vape Festusi dio diona ve siniotu Yahudi pasia sesanemi pa siete maso i. Apavo Festusi duta maso Paulusi e diojo, “Apavo muajar mamo rua so Yerusalem ave nari ikutu nomu kavo pai na wana na aropo jau, toapa vevata nuenari sasara ariri sembe karaka au pa, ite piva e?” 10Apa Paulusi ruar e diojo, “Nine ma josa na aropo Kaisar Roma pai nie uta vekutu kavo pai, e nari kutu ine kavo nei nana uta nine. Tuani matau ruini toapa, jau ma jono sasara maso siniotu Yahudi pasia va. 11Masisi ive sasara vevata e inanari kariria vevediajara e isamuai hukuman voru pai, ja ma imajar so ivoru. Vape masisi kavo setimbe karaka ja nesi ma sive vevata va mamo, sa esi kota siwi jau maso sia va. Apavo isau so Kaisar pai vea e kutu ine kavo nei.” 12Avori Festusi kievo tutir nie viono kavo sanepaja pasia to manau pa, Festusi kievo e diojo “Suau so Kaisar pai andi kutu nomu kavo pai pavo, au ma nari rua so aropo Kaisar.”

Paulusi niana aropo Agripa tutiri Bernike

13Raria pa toi janama, Raja Agripai tutiri raruo vavi pai Bernike sunda so Kaisarea, ave sutopana vesie maso Festusi. 14Semasoi na jana raria pa toi, avori Festusi tiopanusara Paulus nie kavo pai so raja Agripai e diojo, “Nana rabua Feliksi mienau nana gubernur e ria pa. Siniotu pesi na nine. Andi Feliksi dioni sua e miesoi na bui pa raropa. 15Nana rabua inana Yerusalem pa, imam veveru pasia tutir veveru na Yahudi pasia seto sembe karaka siniotu ninei e sesau so jau ave amamo jono hukuman maso i. 16Vape iruar maso sia toapa, nanapi Roma nie hukum pai, siniotu sembe karaka pesi ruir tutir siniotu veve karaki pasia papo e nari siemuai kasau ave niavori nana aropo siniotu veve karaki pasia. Avori siniotu Roma ne nari amatono siniotu sembe karaka pai siemuai hukum. 17Apavo, nana raria sendama to manau pa, ja ma jenota woroi ea va. Kausapa pa ma, sawawarae jono ruir vekutu kavo pai e jemias siniotu pasia ave senggori maso jana. 18Nana rabua siniotu veve karaki pasia setosa pa, setopana kavo vekariria pesa va, ariri imamo to manau pa. 19Amana sia ma senggavo vavera nanapi matau sene agama pai vea so siniotu vesanomi na Yesus pai. Siniotu ninei ma vioru to manau, vape Paulusi kierakuai vea e diojo siniotu jani tienam riwanea. 20Aso ivaro ria nanapi toanetoi diadi iruin tindija mo nanapi kavo jani. Apa jutana Paulusi ave sane vesie ria so Yerusalem ave amamo jutani so nie kavo jani na wana. 21Vape Paulusi siasana nie kavo pai so veveru vetariai rawai ea. I ma siau ave niana bui pai vea e dienota veito Kaisar wai nari kutu ariri nie kavo pai. Apajoma jemiasa siniotu pasia setonae miesoi nana bui pai, veito isamuai kasau ave jenatui maso Kaisar.” 22Avori Agripa kievo maso Festusi e diojo, “Ja kota isanemi vesie jediawa siniotu jani matauni.” E Festusi ruar e diojo, “Kausapa Tuani nari buediawa.”

23Kausapa pa Agripa tutiri Bernike sundama so ruir vekutu kavo pai, siniotu venana jasia setatuan maso sandu e setono mei pimasa vesiri. Avori sesua so andiraro vekutu kavo pai tutiri veveru nana verut pimamuna pasia e siniotu vesamuai sano na bendar jasia. Janama Festusi diemiasa verut pimamuna pasia ave senggor Paulusi sua so andiraro vekutu kavo pai. 24Avori Festusi kievo e diojo, “Aisinia baba panau raja Agripa, tutir siniotu veruir na nine mia vura! Siniotu Yahudi nesia vura venana Yerusalem to venana nine kota, sembe karaka siniotu ninei maso jau. Setananar e setojo, ‘Siniotu ninei ma kasa tienam e woroi ea va!’ 25Vape isamuai sasara pesa nana i va ave vediajara e siemuai hukuman voru pai va. E aso matauni siau to manau, ave siasana nie kavo pai so Kaisar pai, apavo ikutu kavo nei to manau ave amamo jenatui so Kaisar pa! 26Vape aja isamuai raupui vetindija pesa nanapi nie kavo nei ave amamo ivui na surat pesi maso raja Kaisar pai varami. Apajoma, ikori ma diosa nana mendaromi nesi pa, rawai ma so raja Agripa. Toapa jana isanempai toapa, nanapi mesasera ariri nie kavo nei mamo, nari isamuai raupui pesa ave ivui nana surat pesi maso Kaisar pa. 27Aso nanapi ine sanepaja nei mamo vesie va maso jenatu siniotu vena bui pai, tutiri itopana nie sasara e setimbe karaki pasi va.”