Rasul 26

Paulusi kievo e niavori nana raja Agripa aropo pa

1Agripa kievo maso Paulusi e diojo, “Jono kasau ave kuevo vori au.” Apa Paulusi siasana vara pa avori kievo vori toapa nine, 2“Aisinia baba panau, raja Agripa, sane raro ne vesasie vesiri, aso nana raria ninei diadi so ikavo vori jau na aropo Tuani au nanapi kaiwasa Yahudi pasia sene kavo setimbe karaka ja nesi vura, 3rawai vesiri mo pa, aso Tuani au ma ruini ariri siniotu Yahudi ne amane buai tawawari pasi e vava vionae amane sanepaja nesi simasi vaveri va. Apajoma, isau maso Tuani au e buediawa ariri amane kavo nesi, tutiri sane raro vemanasi.

4Siniotu Yahudi pasia vura senduini ine rara tenam nei, nana rabua ivavoru pa, aso rabua aja ivavoru pa, itenam tutir matau ine kaiwasa nei nana Yerusalem.1 5Senduini ja to woroi vesiri. E masisi semajar, diadi so setopa sasara maso siniotu veruir na nine sia toapa, itenam ariri siniotu Farisi pasia nanapi amanda usara pareta saserai vekarakuai mo pai nana amane agama nei.2 6E raria ninei josa nana ruir vekutu kavo pai aso ipir sanetiar toapa Allah nari vieruana nie arer tiopana maso tatapumi pasia nana papo pa. 7Arer jani andi amane usapui sura e muandu na kaiwasa Israel pasia sepir sanetiari kota pa, apajoma tawana sesom maso Allah diru e sasar pa. E aisinia baba panau, raja Agripa, aso isanemitiar arer jani pa, kaiwasa Yahudi pasia sembe karaka jau pa. 8Aso vitopi kaiwasa Yahudi pa mia mesanemitiar va toapa Allah dionae siniotu vevoru pasia setenam riwanea pa? 9Papo pa matau ja kota, isanemipai toapa ja ma nari inanari pi saserai ave amamo jono marior maso kaiwasa verausara Yesus vevava nana Nazaret pai.3 10E vava jani ma inanariri nana Yerusalem to manau. Tutiri surat viono sanetiar nana imam veveru pasia, jonae siniotu vesanemitiar maso Allah pasia sepau sesua nana bui pai to manau. E ja kota imajar toapa, sesamuai hukuman voru pai. 11Pau vesiri jono marior maso sia na anio ari agama Yahudi pasi, ave amamo ituva sia ave sesisiajar Yesus. E sane raro ne kasiou vesiri maso sia, apa veito jusar sia, raso bendar vevesiei pasi nana wana kota.”

Paulusi tiopan usara toapa siejo Yesus

12“Tutiri sanepaja jani pa, ikor surat viono sanetiar pai nana imam veveru pasia e ira so Damsyik.4 13Aisinia baba panau, raja Agripa, nana rabua aja inana ria pai so Damsyik pa, raria rabua tojana, worabua vae isajo sasaar pesi nana rora wa disanggapara rawai wor pai nie vebesa pai. Sasaar jani disambiara wawariri jau e siniotu verausara ja pasia. 14Amatawa vura avav so kakopa pa. Avori jediawa raupui pesi kievo maso jau nana kavo Ibrani e diojo, ‘Saulusi, Saulusi! Buotopi buono marior maso Ja pa? Au ma nari buono pota so mataun au, aso ruewaini Allah nie sanepaja pai ariri kuda pai kiembarai kior usara tuan pai nie aitato vemasai pai pa.’ 15Janama iruar e jojo, ‘Teini au, Syen?’ E Syen kievo e diojo, ‘Ja ma Yesus buono marior soa paina. 16Buatau e buosa! Iveruana ine tarai nei maso au ave amamo irusasana au e nuenaripi maso Jau. Ave amamo nari tuopanusara maso siniotu vevesiei pasia vitopi suejo nana raria ninei pa nanapi Ja pa, e vitopi nari joisara maso au, nana raria nari verama wasi. 17Nari jonae tueisu vurusu kaiwasa Yahudi pasia tutir kaiwasa Yahudi va pasia. Nari Jemiasa au e rua maso sia, 18ave sivu sendemi pasi, ave amamo sesuvi vurusu vekumuar pai e sesua nana vesasaar pai; amamo setaisu vurusu Bilis nie paja pai, avori senana Allah nie paja pai. Apa sia ma sesanemitiar maso jau, i ma vie ampun sene tatar pasi, e nari sembe kaiwasa Allah diria.’ ”

19“Apavo, aisinia baba panau, raja Agripa, ja ma tawana isasera vea ave ikorusara sajajo Syen dioisara maso jau to manau pai. 20Vape itopa sasara maso kaiwasa pasia, ave amamo semanau sene tatar pasi e sesiwi sia maso Allah, tutir semberuana nana sene tenam pasi, toapa semanau sene tatar pasi to manau. Itopana vava jani retena nana bendar Damsyik, vepui ea pa nana Yerusalem, e nana Yudea vetutira, e maso kaiwasa Yahudi va pasia.5 21Apajoma kaiwasa Yahudi pasia setapu jau nana Anio Syen e sesasera ria ave semu jau. 22Vape Allah sanepai jau, veito raria ninei. Apa ja ne josa nana nine pa, ave itopanusara pi isajora e iruina maso siniotu vura, baba to katu. E pi itopana nesi ma masi vaveri nana papopa ariri nabi pasia e Musai setopana to manau pasi, 23toapa andina Raja Vekor vesie Allah dierera paina i ma nari siemuai marior veito vioru, andi vie siniotu retena vetenam riwanea nana voru pai e, andi tiopana sasaar pai -- andina Allah diono vesie -- maso kaiwasa Yahudi pasia to kaiwasa Yahudi va pasia.”6

Paulusi tuva Agripa ave sanetiar

24Aja Paulusi kievo rami ave niavori pa, Festusi kievo tutiri raupui vebaba e diojo, “Paulusi, au ma vue pisavi to manau! Bueniau pi pa pau veja to manau apajoma sionae vue pisavi ne!” 25Vape Paulusi ruar e diojo, “Aisinia baba panau, Festusi ja ma ive siniotu pisavi va! Kavo itopana nesi ma sive vata, e sisuvi nana ine sanepaja vetindija pai. 26Raja Agripa, mataun ruini ariri vava ninesi vura vevata mo. Apajoma diadi so ikavavo tutiri imatai va na aropo Raja Agripa au pa. Isanemitiar toapa nana vava ninesi vura, Raja Agripa ruinasi to manau, aso vava jasi sive ruana nana uta vetutira. 27Aisinia baba raja Agripa panau, iruina vevata toapa raja au ma sanetiar kavo nabi pasia setopana pa!” 28Avori Agripa kievo maso Paulusi e diojo, “Apavo buotosa, nari diadi so buonae ive siniotu Kristen nana oras katu nine e?” 29E Paulusi ruar e diojo, “Ive nadi maso Allah, ave amamo sawawara te woroi, raja au tutir siniotu viadiawa ikavo nana raria ninei, mia vura diadi so memasi vaveri tutiri jau, vape mesamuai wangga nesi pa ma moja.” 30Paulusi kievo to manau pa, raja Agripa e Gubernur tutir Bernikei e esi pasia vura, sebata sia. 31Sendari so vorira wa to manau pa, senggavo vavera tutir esi pasia e setojo, “Siniotu ninei ma nienari vava vekariria pesa va ave siemuai hukuman voru pai, pivai siemuai hukuman bui pai.” 32Avori Raja Agripa kievo maso Festusi e diojo, “Masisi siniotu ninei siasana nie kavo nei maso raja Kaisar va, tindija mamo i ma diadi suvi nana bui pai to manau.”