Skip to content
BibleKenya

Alkitab Bahasa Wondama

1 Timotiusi 6

Siniotu Kristen veve womi pasia ma, tindija mamo setator sene tuan pasia ve siniotu setatuana to vesie mo, ave amamo siniotu pasia sesisiajara Allah sano pa, pivai tane aniau pasi vape moja. Womi vene tuan veve Kristen pasia ma, kasa sanetura sene tuan pasia va, aso sia vura ma sembe siniotu Kristen siana pavo. Vape tindija mamo sia ma senanari sene tuan pai tutiri vesie rawai ea, aso tuan pasia vura ma siniotu vesanemitiar Allah sanepai pasia na e sesamuai berkat nanapi womi venanaripi to vesie.

Nanapi aniau veve sasara pai e sane vesie pipi pai

Ninesi vura ma bueniau wasi e buono kavo sanepaja. Masisi siniotu pesi dieniniau aniau vevesiei e ria usara va so aniau veve vata pai nana Syen pai tane Yesus Kristusi, tutiri tane aniau agama pai, siniotu ninei ma siniotu vesanandiki nina e rui piesa va! Nie sanepaja pai kieriria, i ma miajara kievo vavera e diono variriwi nanapi kavo sosiau pasi. Vava jani viediajara siniotu pasia sesanemi pa sikariria so siniotu vevesiei, semasavu nana sene kuaruvi pai, e senggavo vavera, e setanasisiau vekariria, e semanau sembavaririwi va. Siniotu jasia ma sene sanepaja pa situp e sive vata ea va to manau. Semamo ma setojo, toapa diadi sesamuai pi vepau nana agama pai.

Ariria mamo agama pai reto diono pi vepau vesiri, masisi siniotu siruina toapa sane pa vesie maso vitopi nieu pa. Aso tanggor piesa va so dunia nei raropa, nana rabua tambe diadi pa, e kasa tanggor piesa kota so vorira ne va, nana rabua tamboru pa. Apavo, masisi tasamuai pisia e avavar, mamo simasi to manau. Vape siniotu viojo siemuai pi vepau pasia, sia ma setere sotoura pai, e setawa so jevi pesi, nana sene sanepaja saserai venganggau tutiri kariria pai. Sanepaja jani sionae siniotu pasia senggariria e senai. Aso nanapi sane vesie pipi pa sivediajara kariria saserai vura pa. Siniotu pa esia ma setusar pipi apavo senda airiri sanetiar pai ea va, avori setere marior borai vionae sesanemi pasi sikariria.

Nanapi kavo arer vesioria pasi

Vape au ma Allah nie siniotu ni au, apavo nari vue kasau vurusu pi borai jasi vura. Buosasera ave tuenam ariri Allah nie majar pai e kuor usara Allah, sanetiar maso Kristus, sanepai siniotu vevesiei, muenasi nana marior pai, e nomu buai pai mieriat maso siniotu vevesiei. Buo sasera vevata mo, ave amamo tuenam ariri siniotu Kristen mamo buewara vait tenam vevata mo to woroi pai. Aso jo ma Allah siau au ave amamo au ma suemuai tenam to woroi mo pai nana rabua tuopa na aropo kaiwasa vura, toapa au ma sanetiar maso Kristus. E nine ma, na aropo Allah viono tenam maso pi vura nienari pasi, e na aropo Yesus Kristusi vetopana kavo vetindija pai, maso Pontius Pilatusi, e jemiasa au toapa nine:1 Nuenari pareta ninesi vura to tindija mo, tutiri ruewain esa va, veito nana raria Syen Yesus Kristusi ria ea ma pa. Riama pa ma, nari Allah matauni kutu ariri raria pai. Miesari vea piaja nana pi vura, e bieba mo, vie Raja so raja vura, e vie Syen so tuan vura. Miesari vea, andi vioru va, i ma tienam nana sasaar pai e kasa esi dieriasi va. Aja siniotu pesi siejori varami, pivai kasa siejori va. Tatuana pai e paja pai maso I, veito woroi-woroi mo! Amin.

Au ma buono kavo sanepaja maso siniotu vene pi vepau nana dunia nei pasia ave sesanandiki sia vape moja e sepir sanetiar pi vekarakuai va pasi vape moja, pi vetoapa pipi vepau pai. Vape tindija mamo sepir sanetiar so Allah, viono pi saserai vura maso tata to rawai mo, ave amamo tasamuaisi tutiri sane vesasie. Buono kavo sanepaja maso siniotu vene pi vepau pasia, ave amamo semberuana viate pai, ave senanari vava viate pa vepau, sesanemi vesie setono pi tutir sembovo maso siniotu vevesie. Tutiri senanari toapa jana mamo, sia ma senduir sene pi vepau pasi ave amamo sive pi umaja viate pai maso so raria nari verama wasi. E tutiri jana nari sesamuai tenam to woroi mo, andina tenam vevata mo paina.

Timotiusi, pi vitosi Allah siwi so au to manau pa mamo, bueramasi to vesie mo. Tueriri au vurusu kavo vevata va pasi e vetatuana Allah va tutir vekavo vavera nanapi vava venganggau setojo ve “ruina pai”, vape tindija mamo piva. Aso siniotu pa esia, senggor usara “ruina pai”, apajoma senda sasara veito sembavu vurusu aniau Kristen sesanemitiar na papo pai.

Nari ive nadi ave Syen diono vesie maso mia vura.

Source notes (1)
  1. Cross-reference Yoh. 18:37

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.