1 Timotiusi 5

Nanapi maneta vesanemitiar pasia

1Kuesiou siniotu vebaba rawai au pasia vape moja, vape bueniau sia ave setadiawa nomu kavo pasi ariri tamamui nina. Buono ariri atuma vavoru pasia ariri mambeneta, 2e buono vavi baba pasia ariri nomu sinia. E buono vavi vavoru pasia ariri nomu netakatu, nanapi sanemu viate pai.

Nanapi inar pasia

3Tuetuana inar vetenam mesari vevata mo pasia. 4Vape masisi inar pesi siemuai atuma pivai tapu pasia, retena pa ma nari bueniau sia ave amamo sesajo sene anio raropa mesari, e setoisara sovera sanepaja riwanea maso sene baba ma setapumi pasia. Aso vava jasi siono sane vesie maso Allah. 5Inar vetenam mesari vevata mo pesi, e viero siniotu vesajori, i ma pir sanetiar vea maso Allah. Diru sasaar ma vie nadi e siau maso Allah ave sanepai. 6Vape inar vesasera vea so tenam nana sane vesie pai, ma tienam rami, vape vioru to manau. 7Tuopana kavo sanepaja ninesi maso kaiwasa na kuaruvi vesanemitiar pasia, ave amamo setenam nana sasara pesa vape moja. 8Vape masisi siniotu pesi kiembarai viawawati nie mambeneta pasia, rawai mo pa matauni nie anio raropai, amamo siniotu jani ma, piorasa nie sanetiar pai. I ma kieriria rawai nana siniotu vesanemitiar va pasia.

9Buoto buonae inar pesi sano pa sua nana ator kuaruvi inar pai mamo, nie tenam pai ma taun siniotu toru to manau, papo pa ma sawa pa siri vea, 10siemuai sano nana nanaripi vesie, masisi ariri diewawata nie atuma pasia veito sebaba tutir vesie, sane vesie siemuai siniotu verama e setena nana nie anio pai, nienari vesie maso siniotu vesanemitiar pasia, sanepai siniotu venana marior pasia, e nanaripi vepau viate pasi ma, nienari aririasi to vata mo.

11Inar aja vevavoru pasia ma, buonae sesanomi pasi sisua na ator kuaruvi inar pai vape moja. Aso masisi sanepaja nana tarai kakopa pai andija kierakuai mo, seto sendiriau ea, mamo sembavu vurusu sene nanaripi maso Kristusi. 12Apavo sesamuai hukuman maso matau sia, aso seporasa arer setarera maso Kristusi pasi. 13Avori inar vavoru nine sia ma senggawawaru e sengge sene kasau pasi ma sesua e sesuvi na siniotu sene anio pasi. E vinggariria mo pa, semajara senggavoro siniotu vevesiei e senggoto siniotu vevesiei sene kavo pasi e senggavo kavo saradidioi vea. 14Apavo jojo, inar vavoru pasia sendiriau ea, sesamuai atuma e senanari ariri sene anio raro pasi, ave amamo siniotu vekambarai tata pasia, sesamuai ria va so setona e tasanomi nesi sikariria. 15Aso inar pa esia ma senda sasara e senda usara Bilis pai to manau. 16Vape masisi vavi Kristen pesi, nie neta veve inar pesia nana nie anio raro pa, amamo vavi jani, andi siejo inar jasia, ave amamo inar jasia setono marabati maso kuaruvi vesanemitiar pasia vape moja. Toapa jana mamo, kuaruvi vesanemitiar pai diadi so sesajoro inar vesamuai anio raro va pasia.

Nanapi kavo aniau vevesiei pasi

17Penatua na kuaruvi vesanemitiar pasia ma senanaripi tutir vesie, tindija mamo sesamuai tatuana pai tutir vait verawai mo, retena mo masoa pa, vetopana Allah nie kavo e vianiniau tutir tetap pasia. 18Aso nana Repo nei ve aivuire tonine, “Sapi vetapatata gandum pasi ave mor pasi sitapati vurusu rawa pai, au ma tuevana sapi pai sore pa vape moja.” E tonine kota, “Siniotu venanaripi pasia ma, nari sesamuai sene vaiti pasi nana senanarisi pa.”1 19Buediawa siniotu pa esi vie karaka veveru pesi nana kuaruvi vesanemitiar pai vape moja, vape masisi siniotu pa sumbe muandu pivai rawai, sesajo toapa penatua pai nienari sasara, avori buediawa.2 20Veveru venanari tatar pai ma, ariria mamo buevakaduri na aropo kuaruvi vesanemitiar pasia vura, ave amamo siniotu vevesiei pasia sematai senanari tatar. 21Na aropo Allah, e Yesus Kristusi, tutir siniotu rora Allah diria pasia, jerer to rawai mo, ave amamo rua ariri isatuiri ninesi tutir buenasisiau esi va, e kasa nuavori esi kota va. 22Rukakara au vape moja, ave amamo suasana varamu pasi rawai ajai so siniotu pesi ave nienaripi maso Allah. Masisi siniotu vevesiei pesi vie tatar mamo, au ma kuor usara nie tatar pasi vape moja. Suejo vedioro nomu tarai pai ave vue sren vea.

23Bunu kambu vei vea vape moja; vape bunu sua anggur pa katu esa kota, ave sanemu vepota pai pienam, aso puepota ora pana.

24Siniotu pa esia ma sene tatar pasi, aja sesamuai vekutu kavo nanapi sene tatar pasi varami, siveruana papo to manau. Vape siniotu pa esia ma sene tatar pasi siveruana vepuija. 25Toapa jana kota, siniotu pa esia ma sene nanaripi viate pasi ma saira e siveruana, vape siniotu pa esia ma sene nanaripi viate pasi nari siveruana riwanea.