Alkitab Bahasa Wondama
1 Timotiusi 4
Paulusi diono kavo sanepaja maso Timotiusi nanapi guru veve vata va pasia
Wainunu Sren pai tiopa sasaar toapa, nana raria verama wai mamo, siniotu pa esia ma nari seporasa Kristus. Nari senggor usara wainunu vekor sasara pasi, tutiri waninunu vekariria pai nie aniau pasi. Siniotu viawi titituwa pasia setatopanasi. Siniotu jasia ma, sene sane raro pasi sikumuar to manau, apajoma setatara vitopi vevata pa e vesasara pa. Setaniau kaiwasa ave amamo sendiriau vape moja, e seta pisia vevesiei va. Arora vae pisia jasi ma Allah nienarisi ave amamo siniotu vesanemitiar maso Kristus to manau, e veruin ariri Allah nie vetindija pai to manau pasia, setasi tutir setopana vesie so Allah. Aso pi Allah nienari pasi vura ma siete, apavo varo pisia viaranduna, masisi tasamuaisi to manau tutir tatopana vesie pai maso Allah ave amamo diadi so tatasi. Aso Allah nie kavo pai, tutir nadi pai, viediajara pi jasi vura ma sive sren.
Nanapi siniotu venanaripi maso Kristus Yesus tutiri vesie
Ariria mamo buono sanepaja so pi ninesi vura maso maneta vesanemitiar pasia, apajoma nari vue siniotu venanaripi maso Kristus Yesusi tutiri vesie. Masisi nuenari tojana, au kota bueniniau matau sanemu pa nanapi Allah nie kavo aniau tasanemitiara pasi, e nanapi aniau vetindija rua usara to manau, veito rabua nine. Vue kasau vurusu topanusara arami veve vata va pasi. Bueniau sasera nomu tarai pai ave tuenam ariri Allah nie sanepaja pasi. Tataniau sasera tane tarai kakopa pai ma vesie katu vea, vape tataniau sasera tane tarai wainunu pai ma vesie na pi vura, aso arer ninei ma, vevata mo kior viate so tenam venana raria ninei, e tenam venana raria nari verama wai. Kavavo nine ma vevata e diadi so tasanemitiara mo tutir sane vetutira. Apa jo ma tatosasera e tananaripi to karakuai, aso tapiri sanetiar maso Allah vetenam pai. I ma Vekor Vesie maso kaiwasa vura, retena mo pa so kaiwasa vesanemitiar pasia.
Bueniniau vava jasi vura maso kaiwasa vesanemitiar pasia e buemias e senda aririasi. Buonae esi sanetura au vape moja aso aja vuevoru rami pana. Vesie pa vue ria maso siniotu vesanemitiar pasia, nana kavavo kuevora pasi, nana vava nuenari, nana sanepai siniotu vevesiei pa, nana nomu sanetiar maso Kristus Yesus, e nana nomu tenam veve sren pai. Au ma nari kuerakuai nana buapa Repo pai maso kaiwasa pasia, e tuopa aririasi e bueniau sia, veito nari irama pa. Sanepai to vesie mo, nuenaripi nana paja, Wainunu Sren pai diono maso au pa, nana raria jani penatua na kuaruvi vesanemitiar pasia sesasana sembarami pasi ajai so rumu pai pa, e nabi pasia setopana Allah nie arer pai nanapi au pa. Nuenari ariri pi jasi vura tutiri sane vetutira, ave amamo kaiwasa vura sesajo nomu sanetiar pai vieruana e ria topo pa. Suejor vedioro nomu tarai pai e suejor vedioro nomu kavo aniau pai kota. Ariria mamo nuenari pi jasi vura to karakuai, aso toapa jana nari Allah diono vesie pai maso matau au, tutiri kaiwasa viadiawa nomu kavo aniau pasia.
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.