2 Timotiusi 1

Paulusi tiopana tabea maso Timotiusi

1-2Timotiusi, ine atuma isanemipaja panau! Nana jau Paulusi, ivui surat ninei maso au. Nana Allah nie majar pai, siasana jau e ive rasul so Yesus Kristusi e diemiasa jau ave itopanusara tenam Allah dierera pai. Tenam jani tasamuai aso tambe siri tutir Yesus Kristusi.1

Ive nadi maso Allah Tatamami pai tutir Yesus Kristusi tane Syen surono vesie pai, e sanepaja e mari ma vesie pai maso au.

Paulusi tiopana vesie maso Allah e diono kavo sanepaja maso Timotiusi

3Itopana vesie maso Allah inanaripi soa pai tutiri sane raro veve sren masi tutiri ine tapu pasia senanari na papopa. E tawana isanempai au nana nadi, diru ma sasar. 4Isanempai nomu rerukaru pasi na rabua tumasiepar pa, apajoma jojo isamuai au riwanea, ave amamo sane ne dionu tutiri vesasie pai. 5Ja ma isanempai maso nomu sanetiar maso Kristus vevata mo pa, ariri tapumui Lois tutir siniamui Eunikei sune sanetiar pasi. E isanemitiar toapa au kota sanetiar jani niana au.2 6Apavo jono sanepaja maso au, ave amamo tuetap nuenari nomu nanaripi pai ariri paja Allah diono maso au to manau pai. Suemuai paja jani nana rabua isasana vara nesi ajai so au pa. 7Aso Wainunu Allah diono maso tata nei ma, Wainunu vionae tamatai nina va. Sovera ea mamo Allah nie Wainunu pai ma dionae tapaja, tatonu tutiri nie vesie pai, e tatawan tane tarai pasi.

8Apavo muemaja tuopanusara tane Syen pai vape moja, e muemaja kota so isamuai bui pa vape moja, aso Yesus pana. Vape, tutir paja pai nanapi Allah, ariria mamo kuotae suemuai marior pai so Kavo Vesie pai. 9Allah diono vesie pai maso tata e siau tata ave tambe kaiwasa so matauni. Nienari tojana, aso tananari piesa to manau pa na va, vape i ma diono ariri Nie sane vesie pai e Nie sanepaja. I ma diono nie vesie pai maso tata nanapi Kristus Yesusi, nana aja dunia nei vie diadi varami pa. 10E raria ninei, Allah dioisara nie sane vesie pai maso tata nanapi tane Raja Vekor Vesie pai Yesus Kristusi riama pa. Yesus dionae voru pai nie paja niai e kior tenam woroi mo pai nanapi Kavo Vesie pai.

11Ave vetopana Kavo Vesie pai pa, jo ma Allah rusasana jau ave ive Rasul tutir guru.3 12Apajoma isamuai marior ninesi vura, vape imamaja va, aso iruin Kristus vevata mo e isanemitiari pa. Isanemitiar toapa piaja so siejo vedioro vitopi siwa maso ja pa, veito raria vemanau wai. 13Rua ariri aniau veve vata jono maso au to manau pasi. E kuerakuai rutawana sanetiar pai tutir sanepaja tasamuai pasi aso tambe siri tutir Yesus Kristusi. 14Tutir Wainunu Sren vemasoi na tata pai, ariria mamo suejo vedioro pi viate Allah siwi maso au to manau pasi.

15Au ma ruini toapa kaiwasa venana uta Asia pasia vura, sembavuru ja to manau, tojana kota Figelus e Hermogenes sandu. 16Vape Onesiforus nie anio raro pasia tawana setonae sane ne vesasie. Isau Syen vieruana nie sanepaja maso sia. Toapa jana kota, Onesiforus ma miemaja va so siemuai jau nana bui pai raropa. 17Nana riama so Roma pa, i ma tawana siesera ja vea apa veito siemuai jau. 18E ruini toapa i ma sanepai jau to pau vesiri, na Efesus pa. Isau Syen vieruana nie sanepaja pai maso i nana raria Syen kutu kavo maso siniotu vura pa.