Alkitab Bahasa Wondama
2 Timotiusi 2
Siniotu venanaripi so Syen pai ma vieva ariri verut pimamuna vekorusara
Timotiusi, ine atuma panau! Ariria mamo au ma puaja nana vesie Allah diono maso tata pai, aso tata ma tambe siri tutiri Yesus Kristusi. Aniau papo pa buediawa to manau nana jau na aropo kaiwasa vepau pasia, nari bueniau wasi maso siniotu diadi so sanetiara pasia e diadi so setaniau wasi maso siniotu vevesiei pesia kota.
Au ma nari kuotae muerior ariri Kristus Yesusi nie verut pimamuna viate pai. Siniotu pesi venanaripi ariri verut pimamuna, kasa kuso matauni nie nanaripi tenam pai va, aso i ma dio diono sane vesie maso nie veveru nana verut pimamuna pai. Siniotu vemei bar pesi, kasa siemuai pen nana mei pesi va, masisi ria ariri mei jani nie pareta pasi va pana. Siniotu venanari romi to karakuai pai, tindija mamo andi siemuai buo pitatana retena na nie nanaripi pai. Sanepai ariri vitosi ikavora nesi, aso nari Syen diono paja maso au ave ruin aririasi vura pa.
Sanepai ninei: Kavo Vesie itopana jani ma, kavo nanapi Yesus Kristusi, usapui nana Dauti. I ma Kristusi vetenam sovera nana voru pai to manau. Aso itopana Kavo Vesie ninei pa, isamuai marior pai, veito isamuai wangga masisi siniotu vekariria. Vape Allah nie kavo pai ma, sa kiesie kepana nana wangga va. Apavo imanasi vea e iruara pi jasi vura maso siniotu Allah diria to manau pasia, ave sia kota sesamuai vesie pai nana Kristus Yesusi, e tutiri nie sasaar pimasa pai to woroi-woroi mo. Vevata mo ariri kavo ninesi,
“Masisi tamboru to manau tutir I mamo,
nari tatenam tutir I kota.
Masisi tamanasi to karakuai mamo,
nari tambe pareta tutiri kota.
Masisi taporasi,
nari piorasa tata kota.1
Masisi tanggor usari va,
I ma kierakuai kior usara tata.
Aso I ma kasa piorasa matauni va.”
Timotiusi siemuai kavo sanepaja ave kior usara nana nie nanaripi pai
Ariria mamo buono kavo sanepaja maso kaiwasa na kuaruvi vesanemitiar pasia nana pi ninesi vura. Na aropo Allah, buono kavo sanepaja so sia, ave amamo senggavo vavera nana kavo sosiau pasi vape moja, aso jasi ma siete va, e sionae siniotu viadiawa pasia senggariria. Ariria mamo suesera to karakuai, ave Allah siejo au ariri siniotu venanaripi maso i vevata mo. Suesera ariria ave amamo muemaja nana nomu nanaripi pai vape moja, vape bueniau Allah nie aniau pasi to tindija mo. Tueriri au vurusu kavo viate va pasi e vesisiajara Allah pasi. Kavavo vetoapa ninesi ma sionae siniotu pai dinganggau rawai ea. Sene aniau pasi sikatar e sivava ariri pota kanker. Nana rabua sia mamo Himeniusi tutiri Filetusi sandu kota susuviri kavavo vetoapa jasi. Sia ma senda sara vurusu kavo aniau vetindija pai, toapa jana setonae kaiwasa esi pasia sene sanetiar pasi sikariria. Senggavo toapa sobata nanapi voru pai ma siokara to manau. Vape umaja vekarakuai Allah viauna pai ma, kasa mienawar va. E nana rawa vavo veve umaja vekarakuai ve aivuire tonine, “Syen siejo riruin nie siniotu pasia”, e “Siniotu vesom Syen, tindija mamo siniotu jani mienau nienari vekariria pai.”
Nana anio raro vebaba pasi mamo, pi saserai venana anio raro pa asija, esasi ma senanarisi na emas pivai perak, vape esasi kota ma senanarisi nana ai pivai kakopa. Esasi ma setonasi maso vava viate, e esasi kota setonasi so vava viate mo va. Masisi siniotu pesi ruasa rurana nie tarai vurusu kariria pasi, siniotu jani ma vie pi viate rawai so Syen. I ma vie atapua, e nienaripi so nie Syen pai. I ma vie masis nie tarai pai ave nienaripi na nanaripi viate pasi vura. Tueriri au vurusu atuma vavoru pasia sene sane vesie pai. Suesera vea ave tuenam ariri Allah nie majar pai, sanetiar maso Kristus e sanepai siniotu vevesiei, tutiri sane vemari pai. Tuenam toapa jana tutiri viananara e vesau sanepai maso Syen pasia nanapi sane veve sren pai. Kuoto siniotu vekavo vavera pasia vape moja. Sia ma senganggau e sendui pi vepau va. Au ma ruin toapa jasi vura ma nari siono variriwi vea. Siniotu venanaripi maso Syen pai, tindija mamo diono variriwi va; i ma nari mieriat vesie maso kaiwasa vura, e diadi dieniniau siniotu tutir vesie e mienasi vea. E tutiri sane vemariat, diedidini siniotu vekavo vavera pasia nanapi kavo vetindija pasi, aso i ma pir sanetiar ave Allah diono kasau maso siniotu jasia amamo semanau sene tatar pasi e senduin aniau vetindija pai. Toapa jana amamo senduin riwanea, e setaisu vurusu Bilis pai nie jevi vekasie sia pai e tuva sia senda usara nie majar pai.
Source notes (1)
- Cross-reference Mat. 10:33; Luk. 12:9
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.