ವಿಮೊಚನ 12

ಪಸ್ಕ ಸನ್ನ

1ಐಗುಪ್ತ ದೆಶಮಾ ಯಹೊವಾ ಮೊಶೆ ವರಿ ಆರೊನನಾ ಕ್ಹಾತೆ ಬೊಲಿನ ಕದಲ ಸುವೈ ಕದ್ಯಾಮ, 2ಕ್ಹಾರಾ ಮ್ಹೈನಾವೊಮಾ ಆಂಜ಼ ತುಮೊನೆ ಪೈಲಾನೊ ಮ್ಹೈನೊ ಥಯಲ ರ‍್ಹೌ. ಆಂಜ಼ ತುಮೊನೆ ಹರಿಯಕ್ಕ ವರಕ್ಹನೊ ಪೈಲಾನೊ ಮ್ಹೈನೊ ಥೈನ ರ‍್ಹವಸ. 3ಅನಾ ವಿಷಯಮಾ ತುಮೆ ಇಸ್ರಾಯಲನಾ ಕ್ಹಾರಾ ಸಮುಹನೆ ಅಮ್ಮ ಅಪ್ಪಣೆ ಕರು, ‘ಆಂ ಮ್ಹೈನಾನಾ ದಕ್ಹವಾ ದಿನ್ನಮಾ ತುಮಾರಾ ತುಮಾರಾ ಖಾಂದಾನನಾ ಹರಯಕ್ಕ ಘರವಾಲಾ ಯಕ್ಕೆಕ ಬಕ್ರಾನಾ ಬಚ್ಚಾ಼ನೆ ರ‍್ಹವಾದೆ, ಬೌಕುಡ ಬಚ್ಚಾ಼ನೆ ರ‍್ಹವಾದೆ ಲ್ಯೂ. 4ಕುಟುಂಬ ನ್ಹಾನು ರ‍್ಹಯಮ, ಯಕ್ಕ ಬಕ್ರಾನಾ ಬಚ್ಚಾ಼ನೆ ಪುರಾ ಖಾವಾನೆ ನೈ ಥಯಲಕ್ಹು ಬಾಜು಼ನಾ ಘರವಾಲಾವೊನಾ ಕ್ಹಾತೆ ಮಳಿನ ಯಕ್ಕೆಕ್ಲೊ ಕೆಕ್ಲು ಖಾವಸ ಕವಾನು ತಿಳ್ದಿಲಿನ ಮನಕ್ಹೊನಾ ಸಂಖ್ಯಾ ಲಿಂಗತ ಬೌಕುಡನಾ ಬಚ್ಚಾ಼ವೊನೆ ಲಿವಾದೆ. 5ತೆ ಬಚ್ಚು ದೊಶ ನೈಸೊ ಯಕ್ಕ ವರಕ್ಹನು ಗಂಡ ಬಚ್ಚು ರ‍್ಹೌ. ತುಮೆ ಬಕ್ರಾವೊಕ್ಹು ರ‍್ಹವಾದೆ ನೈತೊ ಬೌಕುಡಕ್ಹು ರ‍್ಹವಾದೆ ತಿನೆ ಲೆ ಸಕೊಸಿ. 6ಆಂ ಮ್ಹೈನಾನಾ ಚೌದಾವಾ ದಿನ್ನ ಲಕ್ಕಾ ತಿನೆ ಮ್ಹೆಲ್ಲಿನ, ತೆ ದಿನ್ನ ಕ್ಹಾಂಜ಼ನಾ ಟೈಮಮಾ ಇಸ್ರಾಯಲನಾ ಕ್ಹಾರಾ ಸಮೂಹವಾಲಾವೊನಾ ಕ್ಹಾತೆ ಮಳಿನ ತಿನೆ ಕಾಟು. 7ತ್ಯುನೆ ತಿನಾ ರಗತಮಾ ದಕ್ಹು ಲಿನ ತ್ಯುನೆ ತೆ ಅನ್ನ ಖಾವಾನಾ ಘರನಾ ಬಾಕಲನಾ ಬೆ ಚೌಕಟನಾ ಪಟ್ಟಿಯೊನೆಬಿ, ವರಿ ಉಪ್ಪರಲ್ಯಾ ಪಟ್ಟಿನೆಬಿ ಲಗಾಡು. 8ತೆಜ಼ ರಾತಮಾ ತೆ ಮಾಕ್ಹ ಖೈಪಡು. ತಿನೆ ಆಗಮಾ ಬಾಳಿನ ಕ್ಹಾಟು ನೈ ರ‍್ಹಯಲ ರೊಕ್ಲಾ ವರಿ ಕಡು ಥಯಲ ಭಾಜಿನಾ ಕಡ್ಡು ಕುಡಾನನಾ ಕ್ಹಾತೆ ಅನ್ನ ಖೌ. 9ತಿನೆ ಕಚ್ಚು ಕರಿನ ಪಾನಿಮಾ ಉಕಳೈನ ಖೌನೈ. ತಿನು ಮಾತು, ಪಗೊ, ಪೆಟಮಾನು ಕ್ಹಾರು, ಇವ್ನಾ ಕ್ಹಾತೆಜ಼ ಆಗಮಾ ಬಾಳಿನ ಖೌ. 10ಮರ್ನಾ ದಿನ್ನೆ ಪಾಟಲಕ್ಕಾ ತಿಮಾ ದಕ್ಹುಬಿ ಉಗ್ರಾಡು ನೈ. ಪಾಟಲಕ್ಕಾ ಉಗ್ರಲ ಆಗಮಾ ಬಾಳಿ ಪಡು. 11ತೆ ಅನ್ನ ಖಾವಾನು ಕಿಮ್ಮ ವೈ ಕದ್ಯಾಮ: ಗಾಮೆ ಜಾವಾಲಾ ಲಿಂಗತ ತುಮೆ ಕಂಬರನೊ ಪಟ್ಟೊ ಭಾಂದಿಲಿನ, ಚಪ್ಪಲೊ ಘಾಲ್ಲಿನ, ಲಾಕಡಿ ಧರಿನ, ಜಲ್ದಿ ಖೌ. ಆಂ ಯಹೊವಾನೆ ಮಹಿಮಾ ಕಾರಾನು ಪಸ್ಕ ಸನ್ನ ವೈ. 12ತೆ ರಾತೆ ಮಿ ಐಗುಪ್ತ ದೆಶನಾ ಉಪ್ಪರ ದಾಟಿನ ಗೈನ ಮನಕ್ಹೊಮಾ ರ‍್ಹವಾದೆ, ಪಶುವೊಮಾ ರ‍್ಹವಾದೆ, ಪೈಲಾರ ರ‍್ಹಯಲ ಕ್ಹಾರು ಖಲಾಸ ಕರುಸ. ಐಗುಪ್ತ ದೆಶನಾ ಕ್ಹಾರಾ ದೆವತೆನೆಬಿ ನ್ಯಾಯಾ ಕರುಸ. ಮಿಜ಼ ಯಹೊವಾ ವ್ಹೈ. 13ತೆನೈಸೊ ತುಮೆ ರ‍್ಹವಾನಾ ಕ್ಹಾರಾ ಘರೊನಾ ಬಾಕಲನೆ ಲಗಾಡಲ ರಗತ ತುಮೊನೆ ಗುರುತ ಥಾವಸ. ತೆ ರಗತನೆ ಮಿ ದೆಕ್ತಾಮಾ ತುಮೊನೆ ಕಯುಜ಼ ನಷ್ಟ ಕರೆವಾಚಿ ಅಗೊ ದಾಟಿನ ಜೌ಼ಸ. ಮಿ ಐಗುಪ್ತವಾಲಾವೊನೆ ಖಲಾಸ ಕರಾನಾ ಟೈಮಮಾ ತುಮೊನೆ ಕಯುಜ಼ ಹಾನಿ ಥಾತು ನೈ. 14ಆಂ ದಿನ್ನ ತುಮೊನೆ ಶೆಂ ರ‍್ಹವಸ. ಯಹೊವಾನಾ ಮಹಿಮಾನೆ ತೆ ಸನ್ನನೆ ತಲತಲಾಂತರ ಲಕ್ಕಾ ಕರು. ತಿನೆ ಹಮೆಶಾನೊ ನಿಯಮ ವ್ಹೈ ಕೈನ ಹಮೆಶಾಬಿ ಕರು.

ಕ್ಹಾಟು ನೈಸೊ ರೊಕ್ಲಾನೊ ಸನ್ನ

15ಕ್ಹಾತ ದಿನ್ನ ಲಕ್ಕಾ ತುಮೆ ಕ್ಹಾಟು ನೈ ರ‍್ಹಯಲ ರೊಕ್ಲಾವೊನೆ ಕ್ಹೌ. ಪಸ್ಟನಾ ದಿನ್ನಮಾಜ಼ ಕ್ಹಾಟೊ ಲೊಟ ತುಮಾರಾ ಘರಮಾತಾ ಕಾಡಿ ಪಡು. ಕಾಕದ್ಯಾಮ ಪಸ್ಟನಾ ದಿನತಾ ಕ್ಹಾತಂವಾ ದಿನ್ನಲಕ್ಕಾ ಕ್ಹಾಟೊ ರೊಕ್ಲೊ ಖಾವಾಲೊ ಇಸ್ರಾಯೆಲೊಮಾತೊ ಕಾಡಿಪಡು. 16ತೆನೈಸೊ ಪಸ್ಟ ದಿನ್ನಮಾಜ಼ ಪರಿಶುದ್ದ ಕ್ಹುದಾನಾ ಆರಾದನಾ ಕರಾನಾಹುತಿ ಸಭೆ ಮಳೌ. ಕ್ಹಾತಂವಾ ದಿನ್ನಮಾಬಿ ಕ್ಹುದಾನಾ ಆರಾದನಾ ಕರಾನಾಹುತಿ ಸಭೆ ಮಳೌ. ಆಂ ಭಂಬಿ ದಿನ್ನೊಮಾ ಕಯಾಜ಼ ಕಾಮೊ ಕರು ನೈ. ಖಾವಾನೆ ಚಾ಼ಯೆ ಥಯಲ ಕರಸಕೊಸಿ ತೆನೈಸೊ ಬಿಜು಼ ಕಯು ಕಾಮ ಕರು ನೈ. 17ತುಮೆ ಕ್ಹಾಟು ನೈ ರ‍್ಹಯಲ ರೊಕ್ಲಾನೊ ಸನ್ನ ಕರು. ಕಾಕದ್ಯಾಮ ಆಂ ದಿನ್ನಮಾ ಮಿ ತುಮೊನೆ ಐಗುಪ್ತ ದೆಶಮಾತೊ ಭಾರೊ ಆವಾ ಲಗಾಡಲಹುತಿ ತುಮೆ, ತುಮಾರಾ ಖಾಂದಾನವಾಲಾ ಆಂ ದಿನ್ನ ಆಚರಣೆ ಕರು. ಆಂ ಹಮೆಶಾಬಿ ಸನ್ನ ನಿಂಗತ ಕರು. 18ಪಸ್ಟನಾ ಮ್ಹೈನಾನಾ ಚೌದಾವಾ ದಿನ್ನನಾ ಕ್ಹಾಂಜ಼ತಾ ತೆಜ಼ ಮ್ಹೈನಾನಾ ಇಕ್ಹಪ್ಪರ ಯಕ್ಕವಾ ದಿನ್ನನಾ ಕ್ಹಾಂಜ಼ಲಕ್ಕಾ ತುಮೆ ಕ್ಹಾಟು ನೈ ರ‍್ಹಯಲ ರೊಕ್ಲೊಜ಼ ಕ್ಹೌ. 19ತೆ ಕ್ಹಾತ ದಿನ್ನ ಲಕ್ಕಾ ತುಮಾರಾ ಘರೊಮಾ ಕ್ಹಾಟೊ ಲೊಟ ರ‍್ಹೌನೈ. ಕ್ಹಾಟು ರ‍್ಹಯಲ ಕುನ್ನ ಖಾವಸ ತೆ ಬಿಜಾ಼ ದೆಶನೊ ರ‍್ಹವಾದೆ ಸ್ವಂತ ದೆಶವಾಲೊ ರ‍್ಹವಾದೆ ಇಸ್ರಾಯಲನಾ ಸಮೂಹಮಾತಾ ಕಾಡಾಲಗಾಡು. 20ತುಮೆ ತುಮಾರಾ ಘರೊಮಾ ಕ್ಹಾಟಾ ನೈ ರ‍್ಹಯಲ ರೊಕ್ಲಾವೊನೆ ಖೌ, ತೆನೈತೊ ಕ್ಹಾಟು ಕಲಾಯಲ ಕಯುಜ಼ ಖೌನೈ’” ಕೈನ ಆಗನ್ಯಾ ಕರ‍್ಯೊ.

ಪಸ್ಟ ಪಸ್ಕ ಸನ್ನ

21ತೆಳಾಮಾ ಮೊಶೆ ಇಸ್ರಾಯಲನಾ ಕ್ಹಾರಾ ಮ್ಹೊಟಾ ಮನಕ್ಹೊನೆ ಬಲೈನ ತ್ಯುನೊನೆ, "ತುಮೆ ತುಮಾರಾ ತುಮಾರಾ ಕುಟುಂಬನಾಹುತಿ ಮಂದೆಮಾತಾ ಬಕ್ರಾನಾ ಬಚ್ಚಾ಼ವೊನೆ ಇನಿಲಿನ ಪಸ್ಕ ಸನ್ನನೆ ಕಾಟೊ. 22ಹಿಸ್ಸೊಪ ಝಾಡನಾ ಟೊಂಗಿ ಲಿನ ತಪಾಲಾಮಾ ರ‍್ಹಯಲ ರಗತಮಾ ತಿನೆ ಡುಬೈನ ಬಾಕಲನಾ ಉಪ್ಪರ ಅಡಿ ರ‍್ಹಯಲ ಪಟ್ಟಿನೆಬಿ, ತಿನಾ ಬಾಜು಼ಮಾ ರ‍್ಹಯಲ ಭಂಬಿ ಪಟ್ಟಿಯೊನೆ ಲಗಾಡು. ತೆ ಥಯಲ್ಪರ ತುಮಾರಾಮಾ ಯಕ್ಲೊ ಪಾಟ ಥಯೆಲಕ್ಕಾ ಘರನು ಬಾಕಲ ಛೊಡಿನ ಭಾರಾ ಜೌ಼ನೈ. 23ಯಹೊವಾ ಐಗುಪ್ತವಾಲಾವೊನೆ ಖಲಾಸ ಕರಾನಾಹುತಿ ತೆ ದೆಶನಾ ವಚ್ಮಾ ದಾಟಿನ ಜಾ಼ವಸ. ತೆಳಾಮಾ ತುಮಾರಾ ತುಮಾರಾ ಘರನಾ ಬಾಕಲೊನಾ ಉಪ್ಪರಲ್ಯಾ ಪಟ್ಟಿಯೊಮಾ, ಬೆ ಪಟ್ಟಿಯೊಮಾ ತೆ ರಗತನೆ ದೆಕಿನ ಅಗೊ ದಾಟಿನ ಜಾ಼ವಸ. ತುಮಾರೊ ಜ಼ಲಮ ಕಾಡಾನಾಹುತಿ ಮರಣನೊ ದುತ ತುಮಾರಾ ಘರೊಮಾ ಆತೊಜ಼ ನೈ. 24ಆಂ ತುಮೊನೆಬಿ, ತುಮಾರಾ ಸಂತತಿವಾಲಾವೊನೆಬಿ ಹಮೆಶಾನು ನಿಯಮ ವ್ಹೈ ಕೈನ ಕರು. 25ಯಹೊವಾ ತಿನಾ ವಾಗ್ದಾನನಾ ಪ್ರಕಾರ ತುಮೊನೆ ದಿವಾನಾ ದೆಶೆ ತುಮೆ ಆಯಲ್ಪರ, ಆಂ ಆಚರಣೆ ಕರುಜ಼. 26ಅಗಾ ತುಮಾರಾ ಬಚ್ಚಾ, ತುಮೆ ಕರಾನಾ ಆಂ ಆಚರಣೆ ಸುವೈ?’ ಕೈನ ತುಮೊನೆ ಪುಚ್ತಾಮಾ, 27ತುಮೆ ತ್ಯುನೊನೆ, ‘ಯಹೊವಾ ಐಗುಪ್ತವಾಲಾವೊನೆ ಖಲಾಸ ಕರಲ್ಪರ ಐಗುಪ್ತ ದೆಶಮಾ ರ‍್ಹಯಲ ಇಸ್ರಾಯಲನಾ ಘರೊಮಾ ಗಯಾ ಬಗರ ಅಗೊ ದಾಟಿನ ಹಮಾರಾ ಘರವಾಲಾವೊನೆ ವಚಾ಼ಡಲಕ್ಹು ಅಪೆ ಯಹೊವಾನು ಆಂ ಪಸ್ಕ ಸನ್ನ ಕರುಜ಼ ಕೈನ ಕವೊ”’ ಕದ್ಯೊ. ತೆಳಾಮಾ ಮನಕ್ಹೊ ಉಂದಾ ಗುಡ್ಗಾ ಘಾಲಿನ ಯಹೊವಾನೆ ಆರಾದನಾ ಕರ‍್ಯಾ. 28ಇಸ್ರಾಯೆಲೊ ತ್ಯಾಂತಾ ಗೈನ ಯಹೊವಾ ಮೊಶೆ ವರಿ ಆರೊನ ಆಗನ್ಯಾ ಕರಲ ನಿಂಗತಜ಼಼ ಕರ‍್ಯಾ.

ಪೈಲಾರ ಬಚ್ಚಾ಼ವೊನು ಮರಣ

29ಅರ್ದಿ ರಾತಮಾ ಯಹೊವಾ ಐಗುಪ್ತ ದೆಶನಾ ಸಿಂಹಾಸನಪರ ರ‍್ಹಯಲ ಫರೊಹನನೊ ಪೈಲಾರ ದಿಕ್ರಾತೊ ಜೈಲಮಾ ರ‍್ಹಯಲ ಆಳೊನಾ ಪೈಲಾರ ದಿಕ್ರಾ ಲಕ್ಕಾ, ಐಗುಪ್ತ ದೆಶಮಾ ರ‍್ಹಯಲ ಕ್ಹಾರಾ ಪೈಲಾರ ಬಚ್ಚಾ಼ವೊನೆ ಖಲಾಸ ಕರಿಪಡ್ಯೊ. ಪಶುವೊನಾ ಪೈಲಾರ ಬಚ್ಚಾ಼ವೊನೆ ಖಲಾಸ ಕರಿಪಡ್ಯೊ. 30ತೆ ರಾತೆ ಫರೊಹನ, ತಿನಾ ಅದಿಕಾರಿಯೊನಾ ವರಿ ಐಗುಪ್ತನಾ ಕ್ಹಾರಾ ಉಟಿನ ದೆಕ್ತಾಮಾ ಮುರ್ದೊ ನೈ ರ‍್ಹಯಲ ಘರ ಯಕ್ಕಬಿ ನ್ಹೊತು. ಐಗುಪ್ತ ದೆಶಮಾ ಮ್ಹೊಟು ಗೊಳಾಟ ಥಯು. 31ಫರೊಹನ ತೆ ರಾತೆ ಮೊಶೆ ವರಿ ಆರೊನನೆ ಬಲೈನ ತ್ಯುನೊನೆ, "ತುಮೆ ಉಟಿನ ಮಾರಾ ಮನಕ್ಹೊನಾ ವಚ್ಮಾತಾ ಗೈಪಡೊ. ತುಮೆ ಮಾಂಗಿಲಿದಲ ತಿಮ್ಮ ಯಹೊವಾನೆ ಆರಾದನಾ ಕರಾನಾಹುತಿ ತುಮೆ ವರಿ ಇಸ್ರಾಯೆಲೊ ಗೈಪಡೊ. 32ತುಮೆ ಮಾಂಗಿಲಿದಲ ನಿಂಗತ ತುಮಾರಾ ಬೈಲೊ, ಬೌಕುಡ, ಬಕ್ರಾನಾ ಹಿಂಡನೆ ಲಿನ ಜಾ಼ವೊ. ತೆನೈಸೊ ಮನೆಬಿ ಆಶಿರ್ವಾದ ಕರೊ” ಕದ್ಯೊ. 33ಐಗುಪ್ತವಾಲಾ, "ಹಮೆ ಕ್ಹಾರಾ ಮರೆಸ” ಕೈಲಿನ ಇಸ್ರಾಯೆಲೊನೆ ತ್ಯುನಾ ದೆಶತಾ ಭೆಗಿನ ವಳಾವಾನೆ ಮನಸ ಕರಿನ ತ್ಯುನೊನೆ ಜ಼ಬರದಸ್ತಿ ಕರ‍್ಯಾ. 34ತಿನಾಹುತಿ ಮನಕ್ಹೊ ಲೊಟನೆ ಕ್ಹಾಟು ಘಾಲಾತಿ ಪೈಲಾಜ ಮಕ್ಹಳಾನಾ ಸಾಮನೊನಾ ಕ್ಹಾತೆ ಲೊಟನಾ ಮುದ್ದಾನೆ ಫಡಕಾಮಾ ಗಾಟ ಭಾಂದಿನ, ತ್ಯುನಾ ಕ್ಹಾಂದಾಪರ ಘಾಲಿಲಿನ ಗೈ ಪಡ್ಯಾ. 35ತಿನಾಹುತಿ ಮನಕ್ಹೊ ತ್ಯುನಾ ಸಾಮನೊಮಾ ಕ್ಹಾಟು ನೈ ರ‍್ಹಯಲ ಲೊಟ ಭರಿನ, ಫಡ್ಕಾಮಾ ಸುತ್ತಿನ ಖಾಂದಾಪರ ಘಲ್ಲಿನ ಗಯಾ. 36ಯಹೊವಾ ತ್ಯುನಾ ಉಪ್ಪರ ಐಗುಪ್ತಮಾ ದಯಾ ಹುಟ್ಸಾಯಲಕ್ಹು ತ್ಯುನೆ ಪುಚ್ಚಲ ಕ್ಹಾರುಜ಼ ಐಗುಪ್ತವಾಲಾ ದಿದ್ಯಾ. ಅಮ್ಮ ಇಸ್ರಾಯೆಲೊ ಐಗುಪ್ತನಾ ಆಸ್ತಿನೆ ಕಾಳಿ ಲಿದ್ಯಾ.

ಐಗುಪ್ತತಾ ಇಸ್ರಾಯೆಲನಾ ಮನಕ್ಹೊ ಜಾ಼ವಾನು

37ಇಸ್ರಾಯೆಲೊ ರಾಮ್ಸೆಸ್ ಗಾಮತಾ ಗೈನ ಸುಕ್ಕೊತಿನೆ ಆಯಾ . ಬಾಕ್ಡಿಯೊ ಬಚ್ಚಾ ನೈಸೊ ದಾಣ್ಗಾಜ಼ ಕಮ್ಸಿಕಮ್ಮ ಛೆ ಲಾಕ ಮನಕ್ಹೊ ವ್ಹತ್ತಾ. 38ತ್ಯುನಾ ಕ್ಹಾತೆ ಘನಾ ಜ಼ನಾ ಬಿಜಾ಼ ಮನಕ್ಹೊ ಐಪಡ್ಯಾತಾ. ಬೈಲೊ ಬಕ್ರಾನಾ ಹಿಂಡ ಬೌಕುಡೊ ತ್ಯುನಾ ಕ್ಹಾತೆ ಗೈ ಪಡ್ಯಾ. 39ತ್ಯುನೆ ಐಗುಪ್ತ ದೆಶತಾ ಲಾಯಲ ಮಕ್ಹಳಲ ಲೊಟಕ್ಹು ಕ್ಹಾಟು ನೈ ರ‍್ಹಯಲ ರೊಕ್ಲಾ ಕರಲಿದ್ಯಾ. ತ್ಯುನೆ ಐಗುಪ್ತ ದೆಶತಾ ಗಯಲ ದಕ್ಹು ಥೈತಬಿ ಟೈಮ ಮಳಲಕ್ಹು ಲೊಟನಾ ಮುದ್ದಾಮಾ ಕ್ಹಾಟಾನೆ ಕಲಾಯಲ ನ್ಹೊತಾ ವರಿ ಬಿಜಾ಼ ಕಯಾಜ಼ ಅನ್ನನೆ ತಯ್ಯಾರ ಕರಲಿದ್ಯಾ ನ್ಹೊತಾ. 40ಇಸ್ರಾಯೆಲೊ ಐಗುಪ್ತ ದೆಶಮಾ ಚಾರಕ್ಹೊನ ಮೂವತ್ತ ವರಕ್ಹ ತ್ಯಾಜ ವ್ಹತ್ತಾ. 41ಚಾರಕ್ಹೊನ ಮೂವತ್ತ ವರಕ್ಹ ಗಯಲ್ಪರ ತೆಜ಼ ದಿನ್ನಮಾ ಯಹೊವಾನಾ ಕ್ಹಾರಾ ಕುಲನಾ ಮನಕ್ಹೊ ಐಗುಪ್ತ ದೆಶನೆ ಛೊಡಿನ ಗೈ ಪಡ್ಯಾ. 42ಯಹೊವಾ ತೆಜ ರಾತಮಾ ತ್ಯುನೊನೆ ಐಗುಪ್ತ ದೆಶತೊ ಭಾರೊ ಆವಾ ಲಗಾಡಲಹುತಿ ತ್ಯುನೆ ತೆ ರಾತಮಾ ತಿನಾ ಮಹಿಮಾನಿ ಜಾಗರಾಣಿ ಕರ‍್ಯಾ. ಇಸ್ರಾಯೆಲೊ ಕ್ಹಾರಾ ತಲತಲಾಂತರ ಲಕ್ಕಾ ಯಹೊವಾನೆ ಜಾಗರಾಣಿನೆ ಕರಾನಿ ರಾತ ಆಂಜ಼ ವ್ಹೈ.

ಪಸ್ಕ ಸನ್ನನು ನಿಯಮ

43ಯಹೊವಾ ಮೊಶೆ ವರಿ ಆರೊನನೆ ಕದಲ ಸುವೈ ಕದ್ಯಾಮ, "ಪಸ್ಕ ಸನ್ನನೆ ಕರಾನು ಕಿಮ್ಮ ವ್ಹೈ ಕದ್ಯಾಮ, ಬಿಜೊ಼ ಕುನಬಿ ಯಕ್ಲೊ ತಿಮಾ ಪಸ್ಕ ಸನ್ನನು ಅನ್ನ ಖೌ ನೈ. 44ತೆನೈಸೊ ತುಮೆ ಖರುದಿ ಲಿದಲ ಹರಯಕ್ಕ ಗುಲಾಮ ಸುನ್ನತಿ ಕರೈಲಿದಲ ರ‍್ಹಯೊಮ ಕರ ಸಕಸ. 45ಬಿಜಾ ದೆಶವಾಲಾ, ದಕ್ಹಾ ದಿನ್ನನಾ ಕುಲಿವಾಲಾ ತಿನೆ ಖೌ ನೈ. 46ತ್ಯುನಾ ತ್ಯುನಾ ಘರೊಮಾ ತಿನೆ ಕ್ಹೌ. ತಿಮಾ ದಕ್ಹು ಮಾಕ್ಹ ರ‍್ಹೈತಬಿ ಘರತೊ ಭಾರೊ ಲಿನ ಜೌ಼ನೈ. ತೆ ಪಶುನಾ ಯಕ್ಕ ಹಡಕುಬಿ ತೊಡುನೈ. 47ಇಸ್ರಾಯಲನಾ ಕ್ಹಾರಾ ಸಮೂಹನಾ ಆಂ ಸನ್ನ ಕರು. 48ತುಮಾರಾ ಕ್ಹಾತೆ ರ‍್ಹಯಲ ಬಿಜಾ ದೆಶವಾಲೊ ಯಹೊವಾನಾ ಆಂ ಪಸ್ಕ ಸನ್ನನೆ ಆಚರಣೆ ಕರು ಕೈನ ಆಸ ಕರ‍್ಯಾಮ ತೆ, ತಿನೆ ಮಳಲ ದಾಣ್ಗಾ ಕ್ಹಾರಾ ಸುನ್ನತಿ ಕರಲ್ಯು. ತೆ ಥಯಲ್ಪರ ತೆ ಆಂ ಸನ್ನನೆ ಆಚರಣೆ ಕರಾನೆ ಕ್ಹಾಮೊ ಆವಾದೆ. ತ್ಯವೊ ಸ್ವಂತ ದೆಶವಾಲೊ ನಿಂಗತ ರ‍್ಹವಸ. ತೆನೈಸೊ ಸುನ್ನತಿ ನೈ ಕರೈಲಿದಲವಾಲೊ ತೆ ಅನ್ನ ಖೌ ನೈ. 49ಇಸ್ರಾಯೆಲೊನೆಬಿ ಸ್ವಂತ ದೆಶವಾಲಾವೊನೆಬಿ, ತುಮಾರಾಮಾ ರ‍್ಹಯಲ ಬಿಜಾ ದೆಶವಾಲಾವೊನೆ ಯಕ್ಕಜ ನಿಯಮ ರ‍್ಹೌ” ಕದ್ಯೊ. 50ಯಹೊವಾ ಮೊಶೆ ವರಿ ಆರೊನನೆ ಆಗನ್ಯಾ ಕರಲ ನಿಂಗತ ಇಸ್ರಾಯೆಲೊ ಕ್ಹಾರಾ ಕರ‍್ಯಾ. 51ತೆಜ಼ ದಿನ್ನಮಾ ಯಹೊವಾ ಇಸ್ರಾಯೆಲೊನೆ ತ್ಯುನಾ ತ್ಯುನಾ ಕುಲನಾ ಮನಕ್ಹೊನೆ ಐಗುಪ್ತ ದೆಶತೊ ಭಾರೊ ಲಾಯೊ.