Sikkiligar Bible
ವಿಮೊಚನ 11
ಮೊಶೆಕ್ಹು ಪೈಲಾರ ದಿಕ್ರಾನಾ ಮರಣನಾಹುತಿ ಹುಶಾರ್ಕಿ
ತೆಳಾಮಾ ಯಹೊವಾ ಮೊಶೆನೆ, "ಫರೊಹನನೆ ವರಿ ಐಗುಪ್ತವಾಲಾವೊನೆ ಹಜಿಯಕ್ಕ ಮಿ ಉಪದ್ರವ ಆವಾ ಲಗಾಡುಸ. ತೆ ಆಯಲ್ಪರ ತೆ ತುಮೊನೆ ನ್ಹ್ಯಾಂತೊ ಜಾ಼ ಕೈನ ಅಪ್ಪಣೆ ದಿವಸ. ತೆ ತುಮೊನೆ ನ್ಹ್ಯಾಂತೊ ನ್ಹಟಾಡಸ. ತಿನಾಹುತಿ ದಾಣ್ಗಾ ಬಾಕ್ಡಿಯೊ ಕ್ಹಾರಾ ತ್ಯುನಾ ತ್ಯುನಾ ಆಜ಼ು಼ ಬಾಜು಼ವಾಲಾವೊಕ್ಹು ಕ್ಹೊನಾನಾ ರುಪ್ಪಾನಾ ಸಾಮನೊ ಮಾಂಗಿಲಿವ ಕೈನ ಮನಕ್ಹೊನೆ ಸ್ಪಷ್ಟ ಥೈನ ಕೆ” ಕದ್ಯೊ. ವರಿ ಯಹೊವಾ ಇಸ್ರಾಯೆಲೊನಾ ಉಪ್ಪರ ಐಗುಪ್ತವಾಲಾವೊಮಾ ಮರ್ಗಾ ಹುಟ್ಸಾ ಲಗಾಡ್ಯೊ. ತೆನೈಸೊ ಐಗುಪ್ತ ದೆಶಮಾ ಫರೊಹನನಾ ಪ್ರಜಾ ಪರಿವಾರವಾಲಾ ವರಿ ಮನಕ್ಹೊ ಮೊಶೆನೆ ಮಹಾ ಶ್ರೆಷ್ಠ ದಾಣ್ಗೊ ವ್ಹೈ ಕೈನ ನೆಮಸ್ಯಾ. ತೆಳಾಮಾ ಮೊಶೆ ಫರೊಹನನೆ, "ಯಹೊವಾ ಅಪ್ಪಣೆ ದಿವಾನು ಸುವೈ ಕದ್ಯಾಮ, ‘ಮಿ ಅರ್ದಿ ರಾತಮಾ ಐಗುಪ್ತನಾ ವಚ್ಮಾ ದಾಟಿನ ಜೌ಼ಸ. ತೆಳಾಮಾ ಸಿಂಹಾಸನಪರ ಬೈಟಲ ಫರೊಹನನೊ ಪೈಲಾರ ದಿಕ್ರೊಬಿ, ನಾಕಾನಾ ದಗ್ಡಾನಾ ಪಾಚಾ ಬೈಟಲ ದಾಸಿನಾ ಪೈಲಾರ ದಿಕ್ರಾ ಲಕ್ಕಾ ಐಗುಪ್ತ ದೆಶಮಾ ರ್ಹಯಲ ಪೈಲಾರ ಕ್ಹಾರಾ ಬಚ್ಚಾ ಮರಸ. ಪಶುವೊಮಾಬಿ ಪೈಲಾರ ರ್ಹಯಲ ಕ್ಹಾರಾ ಮರಸ. ತೆಳಾಮಾ ಪುರಾ ಐಗುಪ್ತ ದೆಶಮಾ ಮ್ಹೊಟು ಗೊಳಾಟ ಥಾವಸ. ತ್ಯವು ಗೊಳಾಟ ಹಜು಼ನ ಲಕ್ಕಾ ದೆಶಮಾ ಕೆಳಾಮಾಜ ಥಯು ನ್ಹೊತು. ಅಗುಬಿ ಥಾತು ನೈ. ತೆ ಥಯಲ್ಪರ ಐಗುಪ್ತವಾಲಾವೊನೆಬಿ ಇಸ್ರಾಯಲವಾಲಾವೊನೆಬಿ ಯಹೊವಾ ವ್ಯತ್ಯಾಸ ಕರ್ಯೊಸ ಕವಾನು ತುಮೊನೆ ತಿಳ್ದಾ ವರಕ್ಹು ಇಸ್ರಾಯೆಲೊಮಾ ರ್ಹಯಲ ಮನಕ್ಹೊನಾ ಕ್ಹಾಮಾ ರ್ಹವಾದೆ, ಪಶುವೊನಾ ಕ್ಹಾಮಾ ರ್ಹವಾದೆ ಯಕ್ಕ ಕುತ್ರುಬಿ ವದರ್ತು ನೈ.’” ತೆಳಾಮಾ ತಾರಾ ಅದಿಕಾರಿಯೊ ಕ್ಹಾರಾ, ಮಕನ ಐನ ಅಡ್ಡ ಪಡಿನ, ತು ವರಿ ತಾರಾ ಅದಿನಮಾ ರ್ಹಯಲ ಮನಕ್ಹೊ ಕ್ಹಾರಾ ಹಮೊನೆ ಛೊಡಿನ ಜೌ಼’ ಕೈನ ಮಾಂಗಸ. ಪಾಚ಼ಲ್ತೊ ಮಿ ಗೈ ಪಡುಸ” ಕೈನ ಕದ್ಯೊ. ಮೊಶೆ ಆಂ ವಾತ ಕೈನ ಸಿಟ್ಟ ಥೈನ ಫರೊಹನನೆ ಛೊಡಿನ ಗೈ ಪಡ್ಯೊ. ಯಹೊವಾ ಮೊಶೆನೆ, "ಐಗುಪ್ತ ದೆಶಮಾ ಮಾರಾ ಮಹಾತ್ಕಾರ್ಯ ಹಜಿನ ಜಾಸ್ತ ಥಾವಾನಾಹುತಿ ಫರೊಹನ ತುಮಾರಿ ವಾತ ಐಕ್ತೊ ನೈ” ಕೈನ ಕದ್ಯೊ. ಮೊಶೆ ವರಿ ಆರೊನ ಫರೊಹನನಾ ಕ್ಹಾಮಾ ತೆ ಕ್ಹಾರಾ ಮಹಾತ್ಕರ್ಯ ಕರ್ಯಾ. ತೆನೈಸೊ ಯಹೊವಾ ಫರೊಹನನಾ ಮನಸನೆ ಕಟಿನ ಕರಲಕ್ಹು ಫರೊಹನ ಇಸ್ರಾಯಲವಾಲಾವೊನೆ ತಿನು ದೆಶ ಛೊಡಿನ ಜಾ಼ವಾನಾಹುತಿ ಅಪ್ಪಣೆ ದಿದ್ಯಾವಾಚಿ ರ್ಹಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.