Skip to content
BibleKenya

Sikkiligar Bible

ವಿಮೊಚನ 13

ಪೈಲಾರ ಬಚ್ಚಾ಼ವೊನು ಸಮರ್ಪಣೆ

ಯಹೊವಾ ಮೊಶೆನಾ ಕ್ಹಾತೆ ಬೊಲಿನ, "ಇಸ್ರಾಯೆಲೊಮಾ ಹುಟ್ಟಲ ಹರಯಕ್ಕ ಪೈಲಾರ ಗಂಡನೆ ಮಾರಾಹುತಿ ಮ್ಹೆಲು. ಮನಕ್ಹೊಮಾ ರ‍್ಹವಾದೆ, ಪಶುವೊಮಾ ರ‍್ಹವಾದೆ ಹುಟ್ಟಾನು ಪಸ್ಟ ಗರ್ಭನು ಫಲ ಮಾರು ವ್ಹೈ” ಕೈನ ಕದ್ಯೊ.

ಕ್ಹಾಟು ನೈಸೊ ರೊಕ್ಲಾವೊನು ಸನ್ನ

ಮೊಶೆ ಇಸ್ರಾಯೆಲೊನೆ, "ತುಮೆ ದಾಸತ್ವಮಾ ಐಗುಪ್ತ ದೆಶಮಾತೊ ಬಿಡಗಡೆ ಥಯಲ ಆ ದಿನ್ನನೆ ಶೆಂಮಾ ಮ್ಹೆಲ್ಲಿವೊ. ಯಹೊವಾ ತಿನಿ ಮ್ಹೊಟಿ ತಾಕತಕ್ಹು ತುಮೊನೆ ತೆ ಜ಼ಗಾತೊ ಛೊಡಾಯೊಸ. ಆಂ ದಿನ್ನಮಾ ತುಮೆ ಕ್ಹಾಟು ರ‍್ಹಯಲ ಖೌ ನೈ. ಚೈತ್ರ ಮಾಸನಾ ಆಂ ದಿನ್ನಮಾ ತುಮೆ ಭಾರಾ ಆಯಲ ರ‍್ಹವೊಸಿ. ಯಹೊವಾ ತುಮಾರಾ ಪುರ್ವಿಕೊನೆ ವಾತ ದಿದಲ ನಿಂಗತ, ತುಮೊನೆ ದುದ್ದ ವರಿ ಜೆನ ವ್ಹೈನ ಜಾ಼ವಾನು ದೆಶನೆ ಕದ್ಯಾಮ ಕಾನಾನ್ಯವಾಲಾ, ಹಿತ್ತಿಯವಾಲಾ, ಅಮೊರಿಯವಾಲಾ, ಹಿವ್ವಿವಾಲಾ, ಯೆಬುಸಿಯವಾಲಾ ರ‍್ಹಯಲ ದೆಶನೆ ಬಲೈನ ತೆ ತ್ಯುನೊನೆ ದೆತಾಮಾ ತುಮೆ ಆಂ ಮ್ಹೈನಾಮಾ ಸನ್ನ ಕರು. ಕ್ಹಾತ ದಿನ್ನ ತುಮೆ ಕ್ಹಾಟು ನೈ ರ‍್ಹಯಲ ರೊಕ್ಲಾವೊನೆ ಖೌ, ಕ್ಹಾತವಾ ದಿನ್ನಮಾ ಯಹೊವಾನೆ ಮಹಿಮಾ ಕರಾನಾಹುತಿ ಸನ್ನ ಕರು. ತೆ ಕ್ಹಾತ ದಿನ್ನಬಿ ತುಮೆ ಕ್ಹಾಟಾ ನೈ ರ‍್ಹಯಲ ರೊಕ್ಲಾವೊನೆ ಖೌ. ತೆನೈಸೊ, ತುಮ್ನೊಮಾ ಕ್ಹಾಟೊ ಲೊಟ ದಿಕ್ಹು ನೈ. ನೈಸೊ ಕ್ಹಾಟೊ ಲೊಟ ತುಮಾರಾ ಬಾಜು಼ಮಾಬಿ ದಿಕ್ಹು ನೈ. ತೆ ದಿನ್ನಮಾ ತುಮೆ ತುಮಾರಾ ಬಚ್ಚಾ಼ವೊನೆ ಅಪ್ನಾ ಮನಕ್ಹೊ ಐಗುಪ್ತ ದೆಶತಾ ಫರಿನ ಆಯಲ್ಪರ ಯಹೊವಾ ಅಪ್ನಾಹುತಿ ಕರಲ ಶೆಂ ಕರಲಿವಾನೆ ಆಂ ಸನ್ನ ಕರಾಡಾಸ ಕೈನ ಕೌ. ಯಹೊವಾ ತಿನಿ ತಾಕತಕ್ಹು ತುಮೊನೆ ಐಗುಪ್ತ ದೆಶತೊ ಚೊಡಾಯಲಕ್ಹು, ತಿನಾ ನಿಯಮೊನಾಹುತಿ ತುಮೆ ಕೌ. ಆಂ ಆಚರಣೆಬಿ ತುಮಾರಾ ಹತೊಪರ ಗುರತಬಿ ಹಣಿನೆ ಭಾಂದಿಲಿದಲ ಶೆಂನಿ ಪಟ್ಟಿ ನಿಂಗತ ರ‍್ಹೌ. ಅಮ್ಮ ರ‍್ಹತಾಮಾ ಹರಯಕ್ಕ ವರಕ್ಹೆ ನಿಯಮನಾ ಕಾಲಮಾ ತುಮೆ ಆಂ ಆಚರಣೆ ಕರು.

ಪೈಲಾರ ಹುಟ್ಟಲ

ಯಹೊವಾ ತುಮೊನೆ ವರಿ ತುಮಾರಾ ಪುರ್ವಿಕೊನೆ ಪ್ರಮಾಣ ಕರಲ ನಿಂಗತ ಆಂ ಕಾನಾನ ದೆಶನೆ ಆವಾಲಗಾಡಿನ ತೆ ದೆಶನೆ ತುಮೊನೆ ದಿದಲ್ಪರ, ತುಮ್ನೊಮಾ ವರಿ ತುಮಾರಾ ಪಶುವೊಮಾ ಪಸ್ಟ ಗರ್ಭನು ಫಲ ಗಂಡನಾ ಪಕ್ಷನೆ ತೆ ಯಹೊವಾನು ಭಾಗ ವ್ಹೈ ಕೈನ ತಿಳದಿಲಿನ ತೆ ತಿನೆ ಸಮರ್ಪಿತ ಕರು. ತೆನೈಸೊ ಪಸ್ಟ ಹುಟ್ಟಲ ಗದ್ಡಾನಾ ಬಚ್ಚಾ಼ನಾ ಬದಲಿ ಬಕ್ರಾನಾ ಬಚ್ಚಾ಼ನೆ ಛೊಡೈ ಲೆಸಕೊಸಿ. ತಿಮ್ಮಜ಼ ನೈ ಛೊಡಾಯಮ ತಿನಿ ಗರ್ದನ ತೊಡಿನ ಖಲಾಸ ಕರು. ಮನಕ್ಹನಾ ಪೈಲಾ ಗಂಡ ಬಚ್ಚಾ಼ವೊನೆ ಯಹೊವಾನಾ ಹುತಿ ಛೊಡೈಲ್ಯುಜ಼. ಅಗಾ ತುಮಾರಾ ಬಚ್ಚಾ಼, ಅನು ಅರ್ಥ ಸುವೈ? ಕೈನ ತುಮೊನೆ ಪುಚ್ತಾ಼ಮಾ ತುಮೆ ತ್ಯುನೊನೆ, ‘ಹಮೊನೆ ದಾಸತ್ವಮಾ ರ‍್ಹಯಲ ಐಗುಪ್ತ ದೆಶತೊ ಯಹೊವಾ ತಿನಾ ಮ್ಹೊಟಿ ತಾಕತಕ್ಹು ಛೊ಼ಡಾಯೊ. ಫರೊಹನ ಹಟಾ ಧರಿನ ಹಮೊನೆ ನೈ ಜಾ಼ವಾನೆ ದಿನ ರ‍್ಹತಾಮಾ ಯಹೊವಾ ಐಗುಪ್ತ ದೆಶಮಾ ಮನಕ್ಹೊನಾ ಪೈಲಾರ ಬಚ್ಚಾ಼ನೆ, ಪಶುವೊನಾ ಪೈಲಾರ ಬಚ್ಚಾ಼ವೊನೆ ರ‍್ಹೈತಬಿ ತೆ ದೆಶಮಾ ಪೈಲಾರ ರ‍್ಹಯಲ ಕ್ಹಾರುಜ಼ ಕತ್ರಿ ಪಡ್ಯೊ. ತಿನಾಹುತಿ ಗಂಡ ಥೈನ ಹುಟ್ಟಾನು ಪಸ್ಟ ಗರ್ಭನು ಫಲ ಹಮೆ ಯಹೊವಾನೆ ಸಮರ್ಪಣೆ ಕರಾನು ಮನಕ್ಹೊಕಂತು ರ‍್ಹಯಲ ಪೈಲಾರ ಗರ್ಭಫಲನೆ ರ‍್ಹೈತಬಿ ತಿನಾ ಬದಲಿ ದಿನ ಛೊಡೈಯೆಸ”’ ಕೈನ ಕೌ. ಯಹೊವಾ ಖಾಂದಾನಿ ತಾಕತುಕ್ಹು ತುಮೊನೆ ಐಗುಪ್ತ ದೆಶತಾ ಛೊಡಾಯಲ ಸಂಗತಿಯೊನೆ ತು ಶೆಂಮಾ ಮ್ಹೆಲ್ಲಿವಾಹುತಿ ಗುರತ ಥೈನ ತಿನೆ ತುಮಾರಾ ಹತೊನ ಉಪ್ಪರ, ಹಣಿನಾ ಉಪ್ಪರಬಿ ಶೆಂನಿ ಪಟ್ಟಿ ನಿಂಗತ ರ‍್ಹೌಜ಼.

ಮೆಘ ಸ್ತಂಬ ವರಿ ಅಗ್ನಿ ಸ್ತಂಬ

ಫರೊಹನ ಇಸ್ರಾಯೆಲೊನೆ ಜಾ಼ವಾನಾಹುತಿ ಅಪ್ಪಣೆ ದಿದಲ್ಪರ, ಪಿಲಿಷ್ಟಿನಾ ದೆಶನಿ ವಾಟ ನಜಿಕ ರ‍್ಹೈತಬಿ ಕ್ಹುದಾ ತೆ ವಾಟಮಾ ತ್ಯುನೊನೆ ಜಾ಼ವಾನೆ ದಿದ್ಯೊ ನೈ. ಕಾಕದ್ಯಾಮ, "ಕ್ಹುದಾ, ಮನಕ್ಹೊ ಯುದ್ದ ದೆಕಿನ ಘಾಬ್ರಾ ಥೈನ ಮನಸ್ಸ ಬದಲಿ ಕರಲಿನ ಐಗುಪ್ತನೆ ಪಾಚಾ಼ ಫರಿನ ಜಾ಼ಸ” ಕೈನ ಕದ್ಯೊ. ಅಮ್ಮ ರ‍್ಹತಾಮಾ ಯಹೊವಾ ಮನಕ್ಹೊನೆ ಲಾಲ ಸಮುಂದರನಾ ನಜಿಕ ರ‍್ಹಯಲ ಉಸಕನಿ ಜಿಮಿನನೆ ಬಳಸಿಲಿನ ಗಯೆ ನಿಂಗತ ಕರ‍್ಯೊ. ತೆನೈಸೊ ಇಸ್ರಾಯೆಲೊ ಯುದ್ದ ಸನ್ನದ ಥೈನ ಐಗುಪ್ತ ದೆಶನಾ ಮ್ಹೈತಾ ಫರಿನ ಆಯಾ. ತೆನೈಸೊ ಯೊಸೆಫ ಇಸ್ರಾಯೆಲೊನೆ, "ಕ್ಹುದಾ ಸಂಶೊವಾಚಿ ತುಮೊನೆ ದೆಕಿಲಿನ ತಿನಾ ವಾಗ್ದಾನೊನೆ ಪುರಾ ಕರಾಲೊ ಥಯಲಹುತಿ ತುಮೆ ಜಾ಼ತಾಮಾ ಮಾರೊ ಮುರ್ದೊ ತುಮಾರಾ ಕ್ಹಾತೆ ಲಿನ ಜೌ಼” ಕೈನ ಕ್ಹರಿಬಿ ಘಲಾಯಲ ಖಮ್ಮ ನಿಂಗತ ಮೊಶೆ ಯೊಸೆಫನಾ ಹಡ್ಕಾ ತಿನಾ ಕ್ಹಾತೆ ಲಿನ ಗಯೊ. ತ್ಯುನೆ ಸುಕ್ಕೊತತಾ ಪ್ರಯಾಣ ಕರಿನ ಉಸುಕನಾ ಗಾಮನಾ ಕೊನಾಮಾ ರ‍್ಹಯಲ ಎತಾಮಮಾ ಝುಪ್ಡು ಘಾಲಿನ ರ‍್ಹಯಾ. ಯಹೊವಾ ಪಾಟನಾ ಟೈಮಾ ವಾಟ ದೆಕ್ಲಾಡಾನಾಹುತಿ ಮೆಘಸ್ತಂಭಮಾಬಿ ರಾತನಾ ಟೈಮಾ ಉಜಾಲು ದಿವಾನಾಹುತಿ ಅಗ್ನಿಸ್ತಂಭಮಾಬಿ ರ‍್ಹೈನ ತೆ ಚ಼ಲಾಡಾಡೊತೊ. ತೆ ತರಿಕಾಮಾ ತ್ಯುನೆ ರಾತ ದಿನ್ನ ಪ್ರಯಾಣ ಕರ‍್ಯಾ. ಪಾಟನಾ ಟೈಮಮಾ ಮೆಘಸ್ತಂಭ ಥೈನ, ರಾತಮಾ ಟೈಮಮಾ ಅಗ್ನಿಸ್ತಂಭ ಥೈನ ಮನಕ್ಹೊನೆ ಛೊ಼ಡ್ಯಾ ಬಗರ ತ್ಯಾಜ಼ ರ‍್ಹತೊತೊ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.