Sikkiligar Bible
ವಿಮೊಚನ 14
ಲಾಲ ಸಮುಂದರ ದಾಟಾನು
ಯಹೊವಾ ಮೊಶೆನಾ ಕ್ಹಾತೆ ಬೊಲಿನ, "ಇಸ್ರಾಯೆಲೊ ಪಾಚಾ ಫರಿನ ಗೈನ ಪಿಹಹಿರೊತನಾ ಪುರ್ವ ದಿಕ್ಕಮಾ ಮಿಗ್ದೊಲಿನೆ ಲಾಲ ಸಮುಂದರನಾ ವಚ್ಮಾ ಬಾಳ್ಚೆಫೊನನೆ ಕ್ಹಾಮಾ ರ್ಹೌ ಕೈನ ತ್ಯುನೊನೆ ಕೆ. ತಿನಾ ಕ್ಹಾಮಾ ಸಮುಂದರನಾ ಬಾಜು಼ಮಾಜ಼ ತ್ಯುನೆ ರ್ಹೌ. ಫರೊಹನ ತೆ ದೆಕಿನ ಇಸ್ರಾಯೆಲೊನಾಹುತಿ, ‘ತ್ಯುನೊನೆ ವಾಟ ಚು಼ಕಿಸ, ಕ್ಹಾರಿ ಬಗಲಬಿ ಉಸಕನಿ ಜಿಮಿನ ತ್ಯುನಾ ಸುತ್ತೆಬಿ ಛೆ’ ಕೈನ ಕೈಲಿವಸ. ಮಿ ಫರೊಹನನು ಮನಸ ಕಟಿನ ಕರುಸ. ತಿನಾಹುತಿ ತೆ ತ್ಯುನೊನೆ ಪಾಚೊ಼ ಲಾಗಿನ ಆವಸ. ತೆಳಾಮಾ ಮಿ ಫರೊಹನಮಾಬಿ, ತಿನಾ ಸೈನ್ಯಮಾಬಿ ಮಹಿಮಾ ಕರಲ್ಯುಸ ‘ಮಿಜ಼ ಯಹೊವಾ ವ್ಹೈ’ ಕೈನ ಐಗುಪ್ತವಾಲಾವೊನೆ ಗ್ವತ್ತ ಥಾವಸ” ಕೈನ ಕದ್ಯೊ. ಯಹೊವಾ ಆಗನ್ಯಾ ಕರಲ ನಿಂಗತ ಇಸ್ರಾಯೆಲೊ ಚಾ಼ಲಿಲಿದ್ಯಾ. ಇಸ್ರಾಯೆಲೊ ನ್ಹಾಟಿನ ಗಯಾಸ ಕೈನ ಸುದ್ದಿ ಐಗುಪ್ತನೊ ರಾಜೊ಼ ಥಯಲ ಫರೊಹನನೆ ಗ್ವತ್ತ ಥಯಲ್ಪರ, ತ್ಯುನಾ ವಿಷಯಮಾ ಫರೊಹನ ವರಿ ತಿನಾ ಅದಿಕಾರಿಯೊನಾ ಮನಸಬಿ ತ್ಯುನೊನೆ ವಿರುದ್ದ ಥೈನ ಕಟಿನ ಥಯುತು. ತ್ಯುನೆ, "ಆಂ ಸುವೈ ಹಮೆ ಕರಲ? ಅಪೊನೆ ಆಳೊ ಥೈನ ರ್ಹಯಲ ಇಸ್ರಾಯೆಲೊನೆ ಜಾ಼ವಾನೆ ಛೊ಼ಡಿಪಡ್ಯಾತೊ” ಕೈಲಿದ್ಯಾ. ತೆಳಾಮಾ ಫರೊಹನ ತಿನಾ ರಥನಿ ತಾಕತ ಸಿದ್ದ ಕರಲಿನ ತಿನಾ ಸೈನಿಕೊನಾ ಕ್ಹಾತೆ ಚಾಲ್ಯೊ. ಶ್ರೆಷ್ಟ ಥಯಲ ಛೆ ಕ್ಹೊ ರಥೊನೆ, ಐಗುಪ್ತ ದೆಶನಾ ಕ್ಹಾರಾ ರಥೊನೆ ಲಿನ ಪಾಚೊ಼ ಲಾಗಿನ ಗಯೊ. ತೆ ಕ್ಹಾರಾ ರಥೊಮಾ ಅದಿಕಾರಿಯೊನೆ ಬಲೈಲಿದ್ಯೊ. ಯಹೊವಾ ಐಗುಪ್ತ ದೆಶನೊ ರಾಜೊ ಥಯಲ ಫರೊಹನೊ ಮನಸನೆ ಕಟಿನ ಕರಲಕ್ಹು ತೆ ಯುದ್ದನಾ ಸನ್ನದ ಥಯಲ ಇಸ್ರಾಯೆಲೊನೆ ಪಾಚೊ ಲಾಗಿನ ಗಯೊ. ಐಗುಪ್ತನಾ ಕದ್ಯಾಮ ಫರೊಹನನಾ ಘೊಡಾ, ರಥೊ, ತಿನೆ ಚ಼ಲಾವಾಲಾ, ಸೈನ್ಯನಾ ಕ್ಹಾರಾ ತ್ಯುನಾ ಪಾಚಾ಼ ಗೈನ ಇಸ್ರಾಯೆಲೊ ಪಿಹಹಿರೊತಿನಾ ನಜಿಕ ಬಾಳ್ಚೆಪೊನಿನಾ ಕ್ಹಾಮಾ ರ್ಹಯಲ ಲಾಲ ಸಮುಂದರನಾ ದಂಡಿಪರ ಉತರತಾ ಟೈಮಾ ತ್ಯುನೆ ನಜಿಕ ಆಯಾ. ಫರೊಹನ ನಜಿಕ ರ್ಹತಾಮಾ ಇಸ್ರಾಯೆಲೊ ಡೊಳಾ ಉಚೈನ ತ್ಯುನಾ ಪಾಚಾ ಆಯಲ ಐಗುಪ್ತವಾಲಾವೊನೆ ದೆಕಿನ, ಘನ್ನಾ ಬುಚ್ಕಿನ ರೊತಾ ಮದತನಾಹುತಿ ಯಹೊವಾನೆ ಮೊರೆ ಮ್ಹೆಲ್ಯಾ. ತ್ಯುನೆ ಮೊಶೆನೆ, "ಐಗುಪ್ತ ದೆಶಮಾ ಮಜಾ಼ರೊ ನೈ ರ್ಹಯಲಕ್ಹು ಉಸುಕನಾ ಜಿಮಿನಮಾ ಮರಾದೆ ಕೈನ ಹಮೊನೆ ನ್ಹ್ಯಾ ಬಲೈಲಿನ ಆಯೊಸ ಸು? ಕಾ ತು ಹಮೊನೆ ಅಮ್ಮ ಕರಿನ ಐಗುಪ್ತ ದೆಶತೊ ಶಾನೆ ಬಲೈಲಿನ ಆಯೊ? ಹಮೆ ಐಗುಪ್ತ ದೆಶಮಾ ರ್ಹತಾಮಾಜ಼, ‘ತು ಹಮಾರಾ ಗೊಡವೆನೆ ಔನಕೊ. ಹಮೆ ಐಗುಪ್ತೊನೆ ದಾಸ ಥೈನಜ಼ ರ್ಹಯೆಸ’ ಕವಾನು ತುನೆ ಕದ್ಯಾನತ್ತಿ ಸು? ಹಮೆ ಆಂ ಉಸಕನಿ ಜಿಮಿನಮಾ ಮರಾತಿ ಐಗುಪ್ತೊನೆ ದಾಸ ಥೈನ ರ್ಹವಾನುಜ಼ ಚೊ಼ಕು ವ್ಹೈ” ಕೈನ ಕದ್ಯೊ. ತಿನಾಹುತಿ ಮೊಶೆ ತೆ ಮನಕ್ಹೊನೆ, "ತುಮೆ ಬುಚ್ಕೊ ನಕೊ. ಗಪ್ಪ ಹುಬ್ರೈನ ಯಹೊವಾ ಆಂ ಟೈಮೆ ತುಮೊನೆ ವಚಾ಼ಡಾನಾ ತರಿಕಾನೆ ದೆಕೊ! ತುಮೆ ಆಂ ಟೈಮಮಾ ದೆಕಾನು ಐಗುಪ್ತೊನೆ ಹಬ್ದಾತಾ ಕೆಳಾಮಾಜ ದೆಕ್ತಾ ನೈ. ಯಹೊವಾಜ ತುಮಾರಾಹುತಿ ಯುದ್ದ ಕರಸ. ತುಮೆ ಗಪ್ಪಚುಪ್ಪ ಹುಬ್ರೆವೊ” ಕೈನ ಕದ್ಯೊ. ತೆಳಾಮಾ ಯಹೊವಾ ಮೊಶೆನೆ ಕದಲ ಸುವೈ ಕದ್ಯಾಮ, "ತು ಮನೆ ಮೊರೆ ಮ್ಹೆಲಾನು ಸುವೈ? ಅಗಾ ಜಾ಼ವೊ ಕೈನ ಇಸ್ರಾಯೆಲೊನೆ ಕೆ. ತು ತಾರಾ ಲಾಕ್ಡಿನೆ ಉಚೈನ ಸಮುಂದರಪರ ಹತ್ತ ಉಚೈನ ತಿನೆ ಭಾಗ ಕರ, ತೆಳಾಮಾ ಇಸ್ರಾಯೆಲೊ ಸಮುಂದರನಾ ವಚ್ಮಾ ಕ್ಹುಕ್ಹಾಯಲ ಜಿಮಿನಪರ ಚಾ಼ಲಿನ ಜಾ಼ವಸ. ಮಿ ಐಗುಪ್ತವಾಲಾವೊನಾ ಮನಸೊ ಕಠಿನ ಕರುಸ ತಿನಾಹುತಿ ತ್ಯುನೆ ಇವ್ನಾ ಪಾಚಾ಼ ಸಮುಂದರನಾ ಮ್ಹೈ ಜಾ಼ವಸ; ತೆಳಾಮಾ ಮಿ ಫರೊಹನಮಾಬಿ ತಿನಾ ಪುರಾ ಸೈನ್ಯಮಾಬಿ ರಥೊಮಾಬಿ ಘೊಡಾವೊಮಾಬಿ ಪ್ರಸಿದ್ಧಿ ಥೌಸ. ಮಿ ಫರೊಹನಮಾಬಿ ತಿನಾ ರಥೊಮಾಬಿ, ಘೊಡಾವೊಮಾಬಿ ಪ್ರಸಿದ್ಧಿ ಥಯಲ್ಪರ ಮಿಜ಼ ಯಹೊವಾ ವ್ಹೈ ಕೈನ ಐಗುಪ್ತವಾಲಾ ತಿಳದಿಲಿವಸ ಕದ್ಯೊ.
ತೆಳಾಮಾ ಇಸ್ರಾಯೆಲವಾಲಾ ದಂಡನಾ ಅಗೊ ಜಾ಼ತೊ ರ್ಹಯಲ ದೆವದುತ ತಿನಿ ಜ಼ಗಾ ಛೊಡಿನ ತ್ಯುನಾ ಪಾಚೊ಼ ಆಯೊ; ತ್ಯುನು ಅಗು ರ್ಹಯಲ ಮೆಘಸ್ತಂಬಬಿ ತ್ಯಾಂತು ಐನ ತ್ಯುನಾ ಪಾಚೂ಼ ಹುಬ್ರಯು. ತೆ ಮೆಘಸ್ತಂಭಬಿ ಐಗುಪ್ತವಾಲಾವೊನಾ ಪಾಳೆಯನೆ, ಇಸ್ರಾಯೆಲವಾಲಾವೊನಾ ಪಾಳೆನೆಬಿ ವಚ್ಮಾ ಐನ ತೆ ಐಗುಪ್ತವಾಲಾವೊನೆ ಅಂದಾರು ಕರ್ಯು ಇಸ್ರಾಯೆಲವಾಲಾವೊನಾ ಹುತಿ ರಾತಮಾಬಿ ಉಜಾಲು ಕರ್ಯು; ತೆ ರಾತಕ್ಹಾರಿ ಯಕ್ಲನಾ ನಜಿಕ ಯಕ್ಲಾ ಆಯಾ ನೈ. ಮೊಶೆ ಸಮುಂದರನ ಉಪ್ಪರ ಹತ್ತ ಅಗೊ ಕರೆಲ್ಪರ, ಯಹೊವಾ ತೆ ರಾತ ಕ್ಹಾರಿ ಮೂಡಣ ದಿಕ್ಕತು ಜೊ಼ರ ವಾರೊ ಆವಾಲಗಾಡಿನ ಸಮುಂದರನಾ ಪಾನಿನೆ ಯಕ್ಕ ಜ಼ಗಾ ಢಕ್ಲಿನ ತಿನಾ ಥಳಮಾ ಕ್ಹುಕ್ಹಿ ಜಿಮಿನ ದಿಕ್ಹಾ ವರಕ್ಹು ಕರ್ಯೊ. ಪಾನಿ ಬೆ ಭಾಗ ಥಯು. ಇಮ್ಮ ಇಸ್ರಾಯೆಲವಾಲಾ ಸಮುಂದರನಾ ವಚ್ಮಾ ಕ್ಹುಕ್ಹಿ ಜಿಮಿನಪರ ಚಾ಼ಲಿನ ಗಯಾ. ಪಾನಿ ತ್ಯುನಾ ಸಿದಾಬಗಲ ವರಿ ರೊಡ್ಡಾಬಗಲಮಾ ಗೊಡಿನಿಂಗತ ಹುಬ್ರೈ ಪಡ್ಯುತು. ಐಗುಪ್ತವಾಲಾ ಕದ್ಯಾಮ ಫರೊಹನನಾ ಘೊಡಾ, ರಥೊ, ರಥೊ ಚ಼ಲಾವಾಲಾ ತ್ಯುನೊನೆ ಪಾಚಾ಼ ಲಾಗಿನ ತ್ಯುನಾ ಪಾಚಾ಼ಜ಼ ಸಮುಂದರನಾ ಮ್ಹೈ ಗಯಾ. ಪಾಟನಾ ಟೈಮಾ ಯಹೊವಾ ತೆ ಅಗ್ನಿ ಸ್ತಂಭ ವರಿ ಮೆಘ ಸ್ತಂಭೊಮಾತೊ ಐಗುಪ್ತವಾಲಾವೊನಾ ದಂಡನೆ ದೆಕಿನ ತ್ಯುನೊಮಾ ಗಲಿಬಿಲಿ ಉಂಟ ಕರ್ಯೊ. ಯಹೊವಾ ತ್ಯುನಾ ರಥೊನಾ ಗಾಲಿಯೊ ಕಾಡಿ ಪಡ್ಯಲಕ್ಹು ಐಗುಪ್ತವಾಲಾ ಘನಾ ಕಸ್ಟಕ್ಹು ರಥೊನೆ ಸಾಗ್ಸಿಲಿನ ಜೌ಼ ಲಾಗ್ಯು. ತೆಳಾಮಾ ಐಗುಪ್ತವಾಲಾ, "ಅಪೆ ಇಸ್ರಾಯೆಲೊನಾ ಕ್ಹಾಮಾ ಹುಬ್ರೆತಾ ನೈ, ನ್ಹಾಟಿನ ಗಯೆ; ಯಹೊವಾ ತ್ಯುನಾಹುತಿ ಅಪೊನೆ ವಿರದ್ದ ಥೈನ ಯುದ್ದ ಕರಾಡೊಸ” ಕೈನ ಕೈಲಿದ್ಯಾ. ತೆಕ್ಲಾಮಾಜ಼ ಯಹೊವಾ ಮೊಶೆನೆ, "ಸಮುಂದರನಾ ಉಪ್ಪರ ತಾರಾ ಹತ್ತನೆ ಅಗೊ ಕರ; ತೆಳಾಮಾ ತಿಮಾನು ಪಾನಿ ಪೈಲಾನಿಂಗತ ಐನ ಐಗುಪ್ತವಾಲಾವೊನೆ, ತ್ಯುನಾ ರಥೊನೆ, ರಥೊ ಚ಼ಲಾವಾಲಾವೊನೆ ಡುಬಾವಸ” ಕೈನ ಕದ್ಯೊ. ತೆಳಾಮಾ ಮೊಶೆ ಸಮಂದರಪ ಹತ್ತ ಅಗೊ ಕರ್ಯೊ. ಪಾಟ ಥಾತಾಮಾ ಸಮುಂದರನು ಪಾನಿ ಪೈಲಾ ನಿಂಗತ ಭರಿಗಯು ಐಗುಪ್ತವಾಲಾ ನ್ಹಾಟಿನ ಜಾ಼ತಾಮಾ ತಿನಾ ಕ್ಹಾಮಾಜ ಆಯಾ. ಇಮ್ಮ ಯಹೊವಾ ಐಗುಪ್ತವಾಲಾವೊನೆ ಸಮುಂದರಮಾ ಢಕ್ಲಿ ಪಡ್ಯೊ. ಪಾನಿ ಪೈಲಾ ನಿಂಗತ ಐನ ತೆ ರಥೊನೆ, ರಥೊ ಚ಼ಲಾವಾಲಾವೊನೆ, ತ್ಯುನಾ ಪಾಚಾ಼ ಸಮುಂದರನಾ ಮ್ಹೈ ಗಯಲ ಫರೊಹನನಾ ಸೈನ್ಯವಾಲಾ ಕ್ಹಾರಾವೊನೆ ಡುಬೈ ಪಡ್ಯುತು. ತ್ಯುನಾಮಾ ಯಕ್ಲೊಬಿ ಉಗ್ರ್ಯೊ ನೈ. ತೆನೈಸೊ ಇಸ್ರಾಯೆಲವಾಲಾ, ಸಮುಂದರನಾ ಮ್ಹೈ ಕ್ಹುಕಿ ಜಿಮಿನಪರ ಚಾಲಿನ ಗಯಾ; ಪಾನಿ ತ್ಯುನಾ ಸಿದಾಬಗಲ ವರಿ ರೊಡ್ಡಾಬಗಲ ಗೊಡಿ ನಿಂಗತ ಹುಬ್ರೈಯುತು. ತೆ ದಿನ್ನಮಾ ಯಹೊವಾ ಇಸ್ರಾಯೆಲವಾಲಾವೊನೆ ಐಗುಪ್ತವಾಲಾವೊನಾ ಹತ್ತಮಾತೊ ವಚಾ಼ಡ್ಯೊ. ಐಗುಪ್ತವಾಲಾ ಮರಿನ ಸಮುಂದರನಾ ದಂಡಿಮಾ ಪಡಲ ಇಸ್ರಾಯೆಲವಾಲಾ ದೆಕ್ಯಾ. ಯಹೊವಾ ಐಗುಪ್ತವಾಲಾವೊಮಾ ಕರಲ ಆಂ ಮ್ಹೊಟು ಕಾಮ ಇಸ್ರಾಯೆಲವಾಲಾ ದೆಕಿನ ಯಹೊವಾನೆ ಬುಚ್ಕಿ಼ನ ತಿನಾಮಾಬಿ ತಿನೊ ಸೆವಕ ಥಯಲ ಮೊಶೆಪರಬಿ ಬರೊಕ್ಹೊ ಮ್ಹೆಲ್ಯಾ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.