خرُوج 28

کاہِناں دے لباس

1تُوں آپنڑے بِھرا ہارُون تے اُوندے پوتراں ندب، ابِیہُو، الِیعزر تے اِتمر کُوں سڈ، تاں جو او بنی اِسرائیل ءچوں کاہِن دے طور تے میڈی خدمت کرݨ۔ 2آپنڑے بِھرا ہارُون دی عزت تے شان کیتے مُقدّس لباس بنڑوا۔ 3اُنہاں ماہر کاریگراں کُوں جِنہاں کُوں مَیں حِکمت دی رُوح نال بھر ڈِتے، آکھ تے ایہ کپڑے بنڑوا تاں جو ہارُون ایہ پا تے کاہِن دے طور تے میڈی خدمت کرݨ کیتے مخصوص تے مُقدّس کیتا ونجے۔

4کاریگراں کُوں ایہ لباس بنڑاونڑا ہے: سینے دا کپڑا، بالاپوش، چوغہ، اُنڑیا ہویا زیر جامہ، عمامہ تے کمر بند۔ ایہ مُقدّس کپڑے آپنڑے بِھرا ہارُون تے اُوندے پوتراں کیتے بنڑواونڑے ہِن تاں جو او کاہِن دے طور تے میڈی خدمت کر سگنڑ۔ 5اِنہاں کپڑیاں کیتے سونا، نیلے، جامنی تے رتّے رنگ دا دھاگا تے باریک لینن اِستعمال کیتا ونجے۔

ہارُون دا بالاپوش

6بالاپوش کُوں وی سونے تے نیلے، جامنی تے رتّے رنگ دے دھاگے تے باریک لینن نال بنڑایا ونجے۔ اُوندے اُتے کہیں ماہر کاریگر تُوں کڈھائی دا کم کرایا ونجے۔ 7اُوندیاں ڈُو پٹیاں ہووݨ جیہڑیاں مونڈھیاں اُتے رکھ تے بالاپوش دے سامنڑے تے پِچُھوں دے حصے نال لگیاں ہووݨ۔ 8تے ہِک پٹکا کاریگری نال اُنڑیا ہووے جیندے نال بالاپوش کُوں بدھیا ونجے تے جیہڑا بالاپوش دے نال ہِک ٹوٹا ہووے۔ اُوندے کیتے وی سونا تے نیلے، جامنی تے رتّے رنگ دا دھاگا تے باریک لینن اِستعمال کیتا ونجے۔

9وَل ڈُو لال عقیق گِھن تے اُنہاں اُتے بنی اِسرائیل دے بارہاں ناں کُھدواویں۔ 10ہر پتھر اُتے چِھی چِھی ناں، اُنہاں دی پیدائش دی ترتیب دے مطابق کُھدوائے ونجنڑ۔ 11ایہ ناں اُوں طریقے نال پتھراں اُتے کُھدوائے ونجنڑ جِیں طریقے نال مُہر کھود تے بنڑائی ویندی ہے۔ وَل ڈوہائیں پتھر سونے دے خانیاں ءچ جَڑ تے 12بالاپوش دے مونڈھیاں اُتے لاونڑے ہِن۔ جِیں ویلے ہارُون میڈے حضُور آسی تاں پتھراں اُتے لِکھے ہوئے ایہ ناں بنی اِسرائیل دی یادگاری دے طور تے اُوندے مونڈھیاں اُتے ہوسن۔

13سونے دے خانے بنڑاویں 14تے خالص سونے دیاں ڈُو زنجیراں جیہڑیاں ڈوری آلی کار ہِک بئے ءچ مِلیاں ہووݨ۔ وَل اُنہاں ڈُو زنجیراں کُوں سونے دے خانیاں ءچ جَڑ ڈیویں۔

سینے دا کپڑا

15سینے کیتے ہِک خاص کپڑا بنڑاویں جیہڑا فیصلہ کرݨ ءچ میڈی مرضی پتہ کرݨ کیتے اِستعمال تھیندے1۔ ماہر کاریگر اُونکُوں بالاپوش آلی کار سونے تے نیلے، جامنی تے رتّے رنگ دے دھاگے تے باریک لینن نال بنڑاوݨ۔ 16جڈاں کپڑے کُوں ہِک پھیری تہہ کیتا گِیا ہووے تاں اِیندی لمبائی تے چوڑائی نؤں نؤں اِنچ ہووے۔

17اُوندے اُتے چار قطاراں ءچ قیمتی پتھر جَڑے ونجنڑ۔ ہر قطار ءچ ترے ترے قیمتی پتھر ہووݨ۔ پہلی قطار ءچ لعل، زبرجد تے زمُرد، 18ڈُوجھی ءچ فیروزہ، سنگِ نیلم تے حجر القمر، 19تریجھی ءچ زرقون، عقیق تے جامنی یاقُوت، 20چوتھی ءچ پکھراج، لال عقیق تے یشب ہووݨ۔ ہر قیمتی پتھر سونے دے خانے ءچ جَڑیا ہووے۔ 21ایہ بارہاں قیمتی پتھر بنی اِسرائیل دے بارہاں قبیلیاں دی نمائندگی کریندے ہِن۔ ہِک ہِک قیمتی پتھر اُتے ہِک ہِک قبیلے دا ناں کھود تے اِینویں لِکھیا ونجے جِینویں مُہر کھود تے بنڑائی ویندی ہے۔

22سینے دے کپڑے کیتے خالص سونے دیاں ڈُو زنجیراں بنڑاویں جیہڑیاں ڈوری آلی کار مِلیاں ہوئیاں ہووݨ۔ 23اِنہاں کُوں لاوݨ کیتے ڈُو کڑے بنڑا تے سینے دے کپڑے دے اُتلے ڈُو کونیاں اُتے لاویں۔ 24وَل ڈوہائیں زنجیراں اِنہاں ڈوہاں کڑیاں نال لاویں۔ 25اِنہاں دے ڈُوجھے سرے بالاپوش دے مونڈھیاں آلیاں پٹیاں دے سامنڑے دے ڈُو خانیاں دے نال جوڑ ڈیویں۔ 26سینے دے کپڑے دے تلویں ڈُو کونیاں اُتے وی سونے دے ڈُو کڑے لاویں۔ او اندر بالاپوش دِر لگے ہووݨ۔ 27وَل ڈُو بئے کڑے بنڑوا تے بالاپوش دے مونڈھیاں آلیاں پٹیاں اُتے لاویں۔ ایہ وی سامنڑے لگے ہووݨ پر تلے بالاپوش دے پٹکے اُتے۔ 28سینے دے کپڑے دے تلویں کڑے نیلی ڈوری نال بالاپوش دے اُنہاں تلویں کڑیاں نال بدھے ونجنڑ۔ اِینویں سینے دا کپڑا پٹکے دے اُتے بالاپوش نال چنگی طرحاں لگا راہسی۔

29جِیں ویلے وی ہارُون مُقدّس کمرے ءچ داخل تھیسی تاں او بنی اِسرائیل دے ناں آپنڑے دل تے سینے دے کپڑے ءچ نال گِھن تے رب العالمین دے حضُور آسی۔ اِینویں قوم دی یادگاری ہمیشاں راہسی۔

30سینے دے کپڑے ءچ ڈوہائیں قُرعے بنام اُورِیم تے تُمیّم رکھے ونجنڑ۔ رب العالمین دے سامنڑے آندے ویلے او وی ہارُون دے دل اُتے ہووݨ۔ اِینویں جِیں ویلے ہارُون رب العالمین دے حضُور آسی تاں بنی اِسرائیل دے بارے ءچ فیصلہ کرݨ کیتے رب العالمین دی مرضی پتہ کرݨ دا وسیلہ ہمیشاں اُوندے دل اُتے ہوسی۔

ہارُون دا چوغہ

31تُوں چوغہ وی اُنڑیں جیندے اُتے بالاپوش پاتا ونجے۔ او پُورے نیلے دھاگے نال بنڑایا ونجے۔ 32اُوندا گریبان اُنڑے ہوئے کالر نال مضبوط کیتا ونجے تاں جو او پھٹ نہ سگے۔ 33نیلے، جامنی تے رتّے رنگ دے دھاگے نال انار بنڑا تے اُنہاں کُوں چوغے دے گھیرے ءچ لا ڈیویں۔ اُنہاں دے وچال سونے دیاں ٹلیاں لاویں۔ 34چوغے دے پُورے گھیرے ءچ انار تے ٹلیاں واری واری لاویں۔

35ہارُون خدمت کریندے ویلے ہمیشاں چوغہ پاوے۔ جِیں ویلے او مُقدّس کمرے ءچ رب العالمین دے حضُور آسی تے اُتھوں نِکلسی تاں ٹلیاں دی اواز آوے تاں جو او مر نہ ونجے۔

عمامے دی پتری، زیر جامہ تے پانڑی

36خالص سونے دی پتری بنڑا تے اُوندے اُتے ایہ الفاظ کھود تے لِکھیں، ’رب العالمین کیتے مخصوص تے مُقدّس۔‘ ایہ الفاظ اِینویں کھود تے لِکھے ونجنڑ جِینویں مُہر کھود تے بنڑائی ویندی ہے۔ 37اُونکُوں نیلی ڈوری نال عمامے دے سامنڑے آلے حصے اُتے لایا ونجے 38تاں جو او ہارُون دے متھے اُتے پِیا راہوے۔ جِیں ویلے بنی اِسرائیل آپنڑے نذرانے گِھن آ تے رب العالمین کیتے مخصوص کرݨ پر جے کہیں خطا پارُوں قصُوروار ہووݨ تاں اُنہاں دا ایہ قصُور ہارُون اُتے آ ویسی۔ اِیں کیتے ایہ پتری ہر ویلے اُوندے متھے اُتے ہووے تاں جو رب العالمین بنی اِسرائیل کُوں قبول کر گِھنے۔

39زیر جامے کُوں باریک لینن نال اُنڑیں تے اِینویں ای عمامہ وی۔ وَل کمر بند بنڑاویں تے اُوندے اُتے کڈھائی دا کم کیتا ونجے۔

کاہِناں دا لباس

40ہارُون دے پوتراں دی عزت تے شان کیتے زیر جامے، کمر بند تے پگاں بنڑاویں۔ 41ایہ سبھ کُجھ آپنڑے بِھرا ہارُون تے اُوندے پوتراں کُوں پواویں۔ اُنہاں دے سِراں اُتے تیل وِیٹ تے، مقرر تے مخصوص تے مُقدّس کریں تاں جو او کاہِن دے طور تے میڈی خدمت کر سگنڑ۔

42اُنہاں کیتے لینن دے پجامے وی بنڑاویں تاں جو او تلُوں ننگے نہ تھیوݨ۔ اُنہاں دی لمبائی کمر تُوں پَٹ تئیں ہووے۔ 43جِیں ویلے وی ہارُون تے اُوندے پوتر اِجتماع آلے تمبُو ءچ داخل تھیوݨ یا مُقدّس کمرے ءچ خدمت کیتے قُربان گاہ دے کولھ آوݨ تاں او ایہ پاوݨ، نہ تاں گُناہ گار تھی تے مر ویسن۔ ایہ ہارُون تے اُوندی اولاد کیتے ابدی اصُول ہے۔