خرُوج 29

کاہِناں کُوں مخصوص کرݨ کیتے ہدایتاں

1ہارُون تے اُوندے پوتراں کُوں کاہِن دے طور تے میڈی خدمت کیتے مخصوص تے مُقدّس کرݨ دا طریقہ ایہ ہے:

تُوں ہِک بے عیب جوان ڈاند تے ڈُو بے عیب چھترے چُنڑ گِھنیں۔ 2بہترین میدے نال روٹیاں پکاویں جِنہاں ءچ خمیر نہ ہووے۔ سادہ روٹی، تیل رلے اٹّے نال بنڑی ہوئی روٹی تے وَل پتلی روٹی جیندے اُتے تیل لگیا ہووے۔ 3ایہ سبھ کُجھ ٹوکری ءچ رکھ تے جوان ڈاند تے ڈُو چھتریاں نال رب العالمین کُوں پیش کریں۔ 4وَل ہارُون تے اُوندے پوتراں کُوں اِجتماع آلے تمبُو دے دروازے اُتے گِھن آ تے اُنہاں کُوں پانڑی نال غُسل ڈیویں۔ 5اِیندے بعد کاہِن دا لباس یعنی زیر جامہ، چوغہ، بالاپوش تے سینے دا کپڑا گِھن آ تے ہارُون کُوں پواویں۔ بالاپوش کُوں کاریگری نال اُنڑے ہوئے پٹکے دے ذریعے بدھیں۔ 6اُوندے سر اُتے عمامہ رکھ تے اُوندے اُتے سونے دی مُقدّس پتری لاویں۔ 7ہارُون دے سر اُتے مسح1 کرݨ آلا تیل وِیٹ تے اُونکُوں مسح کریں۔

8وَل اُوندے پوتراں کُوں اگُوں گِھن آ تے زیر جامہ پواویں۔ 9اُنہاں کُوں پگاں تے کمر بند بدھیں۔ اِینویں تُوں ہارُون تے اُوندے پوتراں کُوں کاہِن مقرر کریں۔ کاہِن آلی خدمت اُتے ہمیشاں ہارُون تے اُوندی اولاد دا حق ہوسی۔

10وَل تُوں ڈاند کُوں اِجتماع آلے تمبُو دے سامنڑے گِھن آویں تے ہارُون تے اُوندے پوتر اُوندے سر اُتے ہتھ رکھنڑ۔ 11وَل اُونکُوں تمبُو دے دروازے دے سامنڑے رب العالمین دے حضُور ذبح کر ڈیویں۔ 12ڈاند دی تھوڑی جِیہی رَت گِھن تے آپنڑی انگل نال قُربان گاہ دے سینگاں اُتے لاویں تے باقی رَت قُربان گاہ دے تلے آلے حصے اُتے وِیٹ ڈیویں۔ 13آندراں دی ساری چربی، جِگر دی چربی تے ڈوہائیں گُردے چربی سمیت گِھن تے قُربان گاہ اُتے ساڑ ڈیویں۔ 14پر ڈاند دے گوشت، کَھل تے گوبر کُوں ڈیریاں دے باہر ساڑیں۔ ایہ گُناہ تُوں پاک کرݨ آلی قُربانی2 ہے۔

15اِیندے بعد پہلے چھترے کُوں گِھن آویں۔ ہارُون تے اُوندے پوتر آپنڑے ہتھ چھترے دے سر اُتے رکھنڑ، 16وَل اُونکُوں ذبح کر تے اُوندی رَت قُربان گاہ دے چارے پاسُوں چِھنڈک ڈیویں۔ 17چھترے کُوں ٹوٹے ٹوٹے کر تے اُوندیاں آندراں تے پِنیاں کُوں دھوویں۔ وَل اُنہاں کُوں سر، تے باقی ٹوٹیاں نال رَلا تے 18پُورے چھترے کُوں قُربان گاہ اُتے ساڑ ڈیویں۔ ایہ قُربانی رب العالمین کیتے ساڑے ونجنڑ آلا نذرانہ ہے تے اِیندی خوشبو رب العالمین کُوں پسند ہے۔

19وَل ڈُوجھے چھترے کُوں گِھن آویں۔ ہارُون تے اُوندے پوتر آپنڑے ہتھ چھترے دے سر اُتے رکھنڑ 20وَل اُونکُوں ذبح کر ڈیویں۔ اُوندی تھوڑی جیہی رَت گِھن تے ہارُون تے اُوندے پوتراں دے سجے کَن دی لو اُتے لاویں۔ اِینویں رَت کُوں اُنہاں دے سجے ہتھ تے سجے پیر دے انگوٹھے اُتے وی لاویں۔ باقی رَت قُربان گاہ دے چارے پاسُوں چِھنڈک ڈیویں۔ 21جیہڑی رَت قُربان گاہ اُتے چِھنڈکی ونجے، اُوندے ءچوں کُجھ گِھن تے مسح3 کرݨ آلے تیل نال رَلا تے ہارُون تے اُوندے کپڑیاں اُتے چِھنڈک ڈیویں۔ اِیں طریقے نال اُوندے پوتراں تے اُنہاں دے کپڑیاں اُتے وی چِھنڈک ڈیویں۔ اِینویں او تے اُوندے پوتر خدمت کیتے مخصوص تے مُقدّس تھی ویسن۔

22ایہ چھترے ہارُون تے اُوندے پوتراں کُوں کاہِن مقرر کرݨ کیتے ہِن۔ اِیں واسطے چھترے دی چربی، موٹی پُچھڑ، آندراں دی چربی، جِگر دی چربی، ڈوہائیں گُردے چربی سمیت تے سجا پَٹ اَنج کرنڑیں۔ 23تے اُوں ٹوکری ءچوں جیہڑی رب العالمین دے حضُور تمبُو دے دروازے اُتے پئی ہے، ہِک سادہ روٹی، ہِک تیل رلے اٹّے نال بنڑی ہوئی روٹی تے ہِک پتلی روٹی جیندے اُتے تیل لایا گِیا ہووے، کڈھ گِھنیں۔ 24ایہ ساریاں شیواں گِھن تے ہارُون تے اُوندے پوتراں دے ہتھ ءچ ڈیویں تے او اِنہاں کُوں ہلائے ونجنڑ آلی قُربانی دے طور تے رب العالمین دے سامنڑے ہلاوݨ4۔ 25وَل ایہ شیواں اُنہاں تُوں واپس گِھن تے ساڑے ونجنڑ آلی قُربانی دے نال قُربان گاہ اُتے ساڑ ڈیویں۔ ایہ قُربانی رب العالمین کیتے ساڑے ونجنڑ آلا نذرانہ ہے تے اِیندی خوشبو رب العالمین کُوں پسند ہے۔

26تُوں اُوں چھترے دا سینہ گِھنیں جیندے نال ہارُون کُوں مقرر کیتا گئے تے اُونکُوں ہلائے ونجنڑ آلی قُربانی دے طور تے رب العالمین دے سامنڑے ہلاویں۔ ایہ تیڈا حصہ ہوسی۔ 27تُوں ہارُون تے اُوندے پوتراں کُوں کاہِن مقرر کرݨ کیتے اِستعمال تھیوݨ آلے چھترے دے ٹوٹے مخصوص تے مُقدّس کرنڑے ہِن۔ اُوندے سینے کُوں رب العالمین دے سامنڑے ہلائے ونجنڑ آلی قُربانی دے طور تے ہلایا ونجے تے اُوندے پَٹ کُوں چاوݨ آلی قُربانی دے طور تے چاتا ونجے۔ 28ہارُون تے اُوندی اولاد کُوں بنی اِسرائیل دی طرفُوں ہمیشاں تئیں ایہ مِلنڑ دا حق ہے۔ جِیں ویلے وی بنی اِسرائیل رب العالمین کُوں آپنڑی سلامتی دی قُربانی5 پیش کرݨ تاں ایہ ڈُو حصے کاہِناں کُوں مِلسن۔

29ہارُون تُوں بعد اُوندے مُقدّس لباس اُوندی اولاد ءچوں اُوں مرد کُوں ڈِتے ویسن جِینکُوں ہارُون دی جاہ تے مخصوص تے مقرر کیتا ویسی۔ 30جیہڑا پوتر اُوندی جاہ تے کاہِنِ اعظم مقرر کیتا ویسی تے خدمت کرݨ کیتے اِجتماع آلے تمبُو ءچ آسی، او سَت ڈینہہ تئیں ایہ لباس پیسی۔

31جیہڑا چھترا ہارُون تے اُوندے پوتراں کُوں کاہِن مقرر کرݨ کیتے ذبح کیتا گئے، اُوندے گوشت کُوں مُقدّس جاہ تے پکاویں۔ 32وَل ہارُون تے اُوندے پوتر اِجتماع آلے تمبُو دے دروازے اُتے چھترے دا گوشت تے ٹوکری ءچ رکھیاں ہوئیاں بے خمیری روٹیاں کھاوݨ۔ 33او ایہ شیواں کھاوݨ جِنہاں نال اُنہاں دا کفارہ ڈِتا گئے تاں جو او کاہِن مقرر تے مخصوص کیتے ونجنڑ۔ پر کہیں بئے کُوں ایہ شیواں کھاوݨ دی اِجازت نئیں کیوں جو ایہ مُقدّس ہِن۔ 34تے جیکر ولدی سویل تئیں اِیں گوشت یا کھانڑے ءچوں کُجھ بچ پووے تاں اُونکُوں ساڑ ڈِتا ونجے۔ اُونکُوں کھاوݨ منع ہے کیوں جو او مُقدّس ہے۔

35جِیں ویلے تُوں ہارُون تے اُوندے پوتراں کُوں کاہِن مقرر کریسیں تاں میڈی ہدایت اُتے عمل کریں تے سَت ڈینہہ تئیں اُنہاں کُوں کاہِن بنڑاوݨ دی رسم ادا کریں۔ 36اِیں دوران گُناہ تُوں پاک کرݨ آلی قُربانی دے طور تے روز دا ہِک ڈاند ذبح کیتا ونجے۔ اِینویں قُربان گاہ دا کفارہ ڈِتا ویسی تے اُونکُوں ہر طرحاں دی ناپاکی تُوں پاک کیتا ویسی۔ اِیں تُوں ہٹ تے اُوندے اُتے مسح کرݨ آلا تیل وِیٹیا ونجے۔ اِیندے نال او میڈے کیتے مخصوص تے مُقدّس تھی ویسی۔ 37سَت ڈینہہ تئیں قُربان گاہ دا کفارہ ڈے تے اُونکُوں پاک صاف کریں تے اُونکُوں تیل نال مخصوص تے مُقدّس کریں۔ اِینویں قُربان گاہ بہُوں مُقدّس تھی ویسی۔ جیہڑا وی اُونکُوں ہتھ لیسی، او وی مخصوص تے مُقدّس تھی ویسی۔

ہر روز دیاں قُربانیاں

38تُوں ہر روز ہِک ہِک سال دے ڈُو بھیڈے لیلے قُربان گاہ اُتے ساڑیں۔ 39ہِک کُوں سویلے تے ڈُوجھے کُوں سِجھ لہوݨ دے فوراً بعد۔ 40پہلے لیلے دے نال ڈیڈھ کلو6 بہترین میدہ پیش کیتا ونجے جیہڑا کُٹے ہوئے زیتون دے ہِک لِیٹر تیل7 نال ملایا گِیا ہووے۔ وِیٹے ونجنڑ آلی نذر دے طور تے ہِک لِیٹر انگُور دا رَس وی قُربان گاہ اُتے وِیٹ چھوڑیں۔ 41ڈُوجھے لیلے دی قُربانی نال وی غلے دا نذرانہ تے وِیٹے ونجنڑ آلی نذر پیش کیتی ونجے۔ ایہ قُربانی رب العالمین کیتے ساڑے ونجنڑ آلا نذرانہ ہے تے اِیندی خوشبو رب العالمین کُوں پسند ہے۔

42ساڑے ونجنڑ آلی ایہ قُربانی نسل در نسل باقاعدگی نال اِجتماع آلے تمبُو دے دروازے اُتے مَیں رب العالمین دے حضُور پیش کیتی ونجے۔ اُتھاں مَیں تیکُوں مِلساں تے تیڈے نال گالھیں کریساں۔ 43اُتھاں مَیں بنی اِسرائیل کُوں وی مِلدا راہساں تے او جاہ میڈے جلال نال مخصوص تے مُقدّس تھی ویسی۔ 44اِینویں مَیں اِجتماع آلے تمبُو تے قُربان گاہ کُوں مخصوص تے مُقدّس کریساں۔ تے ہارُون تے اُوندے پوتراں کُوں مخصوص تے مُقدّس کریساں تاں جو او کاہِن دے طور تے میڈی خدمت کرݨ۔

45وَل مَیں بنی اِسرائیل دے وچال راہساں تے اُنہاں دا خُدا ہوساں۔ 46او جاݨ گِھنسن جو مَیں رب العالمین اُنہاں دا خُدا ہاں جئیں اُنہاں کُوں مِصر ءچوں کڈھیا تاں جو مَیں اُنہاں دے وچال راہواں۔ مَیں رب العالمین اُنہاں دا خُدا ہاں۔