خرُوج 30

خوشبودار مصالحہ ساڑن آلی قُربان گاہ

1تُوں کِکر دی لکڑ دی قُربان گاہ1 بنڑاویں جیندے اُتے خ وشبودار مصالحہ ساڑیا ونجے۔ 2اُوندی لمبائی تے چوڑائی ڈیڈھ ڈیڈھ فُٹ تے اُچائی ترے فُٹ ہووے۔ اُوندے چارے کونیاں اُتے سینگ بنڑاویں جیہڑے قُربان گاہ دے ہِکو ٹوٹے نال بنڑائے گئے ہووݨ۔ 3اُوندے اُتے، اُوندے چارے پاسُوں تے اُوندے سینگاں اُتے خالص سونا چڑھاویں۔ اُتے دی جاہ دے آسُوں پاسُوں سونے دی کنگری ہووے۔ 4سونے دے ڈُو کڑے بنڑا تے اُنہاں کُوں اُوں کنگری دے تلے ہِک بئے دے آمنڑے سامنڑے ڈُوہائیں پاسیاں اُتے لاویں۔ اُنہاں کڑیاں ءچ قُربان گاہ کُوں چاوݨ آلیاں سوٹیاں پاتیاں ونجنڑ۔ 5ایہ سوٹیاں کِکر دیاں ہووݨ تے اُنہاں اُتے وی سونا مڑھیا ہووے۔

6تُوں اِیں قُربان گاہ کُوں تمبُو دے مُقدّس کمرے ءچ اُوں پڑدے دے سامنڑے رکھیں جیندے پِچُھوں عہد دا صندوق تے اُوندا ڈھکنڑ ہوسی، یعنی کفارہ دی او جاہ جِتھاں مَیں تیکُوں مِلدا راہساں۔ 7جِیں ویلے ہارُون ہر سویل چراغ دان دے ڈیوے ٹھیک کرے، اُوں ویلے او قُربان گاہ اُتے خوشبودار مصالحہ ساڑے۔ 8سِجھ لہوݨ تُوں بعد جِیں ویلے او ڈیویاں کُوں بلیسی تاں او نال نال خوشبودار مصالحہ ساڑے۔ اِینویں رب العالمین دے سامنڑے خوشبودار مصالحہ مسلسل سڑدا راہوے۔ ایہ خوشبودار مصالحہ خُداوند دے حضُور نسل در نسل ہمیشاں ساڑیا ونجے۔

9اِیں قُربان گاہ اُتے مقررہ خوشبودار مصالحے دے علاوہ بِیا کوئی خوشبودار مصالحہ نہ ساڑیا ونجے۔ اِیندے اُتے نہ تاں کہیں جانور دی قُربانی، نہ غلے دا نذرانہ تے نہ وِیٹے ونجنڑ آلی نذر پیش کیتی ونجے۔ 10ہارُون سال ءچ ہِک پھیری اُوندا کفارہ ڈے تے اُونکُوں پاک کرے۔ اِیندے کیتے او کفارہ دے ڈینہہ گُناہ تُوں پاک کرݨ آلی قُربانی دی کُجھ رَت سینگاں اُتے لاوے۔ ایہ اصُول وی نسل در نسل قائم راہوے۔ ایہ قُربان گاہ رب العالمین کیتے بہُوں مُقدّس ہے۔“

مردم شماری دا نذرانہ

11رب العالمین مُوسیٰ کُوں آکھیا، 12”جِیں ویلے وی تُوں بنی اِسرائیل دی مردم شماری کریں تاں لازم ہے جو گِنڑے گئے بندے رب العالمین کُوں آپنڑی جان دا فِدیہ ڈیوݨ تاں جو اُنہاں ءچ وبا نہ کِھنڈے۔ 13جئیں جئیں کُوں گِنڑیا گِیا ہووے، او چاندی دے ادھے سکے دے برابر رقم ڈیوے۔ پُورے سکے دا وزن مُقدّس تمبُو دے سِکیاں دے برابر یعنی ہِک تولا ہووے۔ ایہ ادھا سِکہ رب العالمین کیتے نذرانہ ہے۔ 14جیندی وی عُمر وِیہہ سال یا اِیں تُوں ودھ ہووے، او نذر دے طور تے ایہ رقم مَیں رب العالمین کُوں ڈیوے۔ 15امیر تے غریب ڈوہائیں اُتنا ای ڈیوݨ کیوں جو اِیہو نذرانہ رب العالمین کُوں پیش کرݨ نال تُہاڈی جان دا کفارہ ڈِتا ویندے۔ 16تُوں کفارے دی ایہ رقم اِجتماع آلے تمبُو دی خدمت کیتے اِستعمال کریں۔ وَل ایہ نذرانہ رب العالمین دے حضُور بنی اِسرائیل دی یادگاری ہوسی جو تُہاڈیاں جاناں دا کفارہ ڈے ڈِتا گئے۔“

غُسل کیتے پِتّل دا حوض

17رب العالمین مُوسیٰ کُوں آکھیا، 18”تُوں پِتّل دی چوکی بنڑاویں جیندے اُتے غُسل کرݨ کیتے پِتّل دا حوض بنڑا تے رکھیا ونجے۔ اُونکُوں صحن ءچ اِجتماع آلے تمبُو تے قُربان گاہ دے وچال رکھ تے پانڑی نال بھر ڈیویں۔ 19ہارُون تے اُوندے پوتر آپنڑے ہتھ پیر اُوں پانڑی نال دھووݨ۔ 20اِجتماع آلے تمبُو ءچ داخل تھیوݨ تُوں پہلے او آپنڑے آپ کُوں دھووݨ نہ تاں مر ویسن۔ اِیں طرحاں جِیں ویلے وی او قُربان گاہ اُتے میڈی خدمت ءچ ساڑے ونجنڑ آلے نذرانے پیش کرݨ 21تاں لازم ہے جو پہلے ہتھ پیر دھووݨ، نہ تاں مر ویسن۔ ایہ اصُول ہارُون تے اُوندی اولاد کیتے نسل در نسل ہمیشاں تئیں قائم راہوے۔“

مسح کرݨ کیتے تیل

22رب العالمین مُوسیٰ کُوں آکھیا، 23”مسح دے تیل کیتے بہترین قِسم دے مصالحے اِستعمال کیتے ونجنڑ، یعنی چِھی کلو مُر، ترے کلو خوشبو آلی دار چینی، ترے کلو خوشبو آلی گھاہ، 24تے چِھی کلو تیز پتے۔ ایہ شیواں مُقدّس تمبُو دے سِکیاں دے وزن دے حساب نال تول تے چار لِیٹر زیتون دے تیل ءچ سٹیں۔ 25تُوں سبھ کُجھ مِلا تے خوشبو آلا تیل تیار کریں۔ او مُقدّس ہے تے صرف اُوں ویلے اِستعمال کیتا ونجے جِیں ویلے کوئی شے یا بندہ میڈے کیتے مخصوص تے مُقدّس کیتا ونجے۔

26اِیہو تیل گِھن تے اِجتماع آلا تمبُو تے اُوندا سارا سامان مسح کریں یعنی تمبُو، عہد دا صندوق، 27میز تے اُوندا سامان، چراغ دان تے اُوندا سامان، خوشبودار مصالحہ ساڑن آلی قُربان گاہ، 28ساڑے ونجنڑ آلیاں قُربانیاں پیش کرݨ دی قُربان گاہ تے اُوندا سامان، غُسل آلے حوض تے اُوندی چوکی۔ 29اِینویں تُوں ایہ شیواں مخصوص تے مُقدّس کریسیں تے اِیندے نال او بہُوں مُقدّس تھی ویسن۔ جیہڑی شے وی اُنہاں نال لگسی، او مخصوص تے مُقدّس تھی ویسی۔

30ہارُون تے اُوندے پوتراں کُوں وی اِیں تیل نال مسح کر تے مُقدّس کریں تاں جو او کاہِن دے طور تے میڈی خدمت کرݨ۔ 31بنی اِسرائیل کُوں آکھ ڈے جو ایہ تیل نسل در نسل ہمیشاں کیتے میڈے واسطے مخصوص کرݨ آلا مُقدّس تیل ہے۔ 32اِیں کیتے اِینکُوں آپنڑے کیتے اِستعمال نہ کرائے تے نہ اِیں طریقے نال آپنڑے کیتے تیل بنڑائے۔ ایہ تیل مُقدّس تیل ہے تے تُہاڈے کیتے وی مُقدّس ہووے۔ 33جیہڑا اِیں طریقے نال تیل بنڑیندے یا کہیں عام بندے کُوں لیندے، اُونکُوں بنی اِسرائیل ءچوں کڈھ ڈِتا ونجے۔“

خوشبودار مصالحہ بنڑاوݨ دا طریقہ

34رب العالمین مُوسیٰ کُوں آکھیا، ”خوشبودار مصالحہ اِیں ترتیب نال بنڑانویں: مصطگی، اونیکا، بریجا تے خالص لُبان برابر برابر 35مِلا تے خوشبودار مصالحہ بنڑاویں۔ ایہ عِطر بنڑاوݨ آلے دا کم ہوسی۔ ایہ خوشبودار مصالحہ سلُونڑا، خالص تے مُقدّس ہوسی۔ 36اِیندے ءچوں کُجھ باریک پِیس تے اِجتماع آلے تمبُو ءچ عہد دے صندوق دے سامنڑے رکھیں جِتھاں مَیں تیکُوں مِلدا راہساں۔

ایہ خوشبودار مصالحہ تُہاڈے کیتے بہُوں مُقدّس ہووے۔ 37تُوں اِیں طریقے نال آپنڑے کیتے خوشبودار مصالحہ نہ بنڑاویں۔ اِیں خوشبودار مصالحے کُوں رب العالمین کیتے مخصوص تے مُقدّس سمجھیں۔ 38جیہڑا وی آپنڑے ذاتی اِستعمال کیتے اِیں قِسم دا خوشبودار مصالحہ بنڑاوے، اُونکُوں بنی اِسرائیل ءچوں کڈھ ڈِتا ونجے۔“