خرُوج 31

مُقدّس تمبُو بنڑاوݨ کیتے کاریگر

1وَل رب العالمین مُوسیٰ کُوں آکھیا، 2”مَیں مُقدّس تمبُو کُوں بنڑاوݨ کیتے یہُوداہ دے قبیلے دے بضلی ایل بِن اُوری بِن حور کُوں چُنڑ گِھدے۔ 3مَیں اُونکُوں آپنڑی رُوح نال معمُور کر تے حِکمت، سمجھ تے ہر طرحاں دی کاریگری دا علم ڈِتے۔ 4او سونے، چاندی تے پِتّل دیاں شیواں مہارت نال بنڑا سگدے۔ 5او قیمتی پتھر کُوں کٹ تے جَڑن تے لکڑ کُوں گھڑن دی قابلیت رکھیندے۔ او بہُوں سارے بئے کماں ءچ وی مہارت رکھیندے۔

6نال ای مَیں دان دے قبیلے دے اہلیاب بِن اَخیسمک کُوں مقرر کیتے تاں جو او ہر کم ءچ اُوندا ہتھ ونڈاوے۔ اِیں تُوں علاوہ مَیں یکے سمجھدار کاریگراں کُوں اِیں قابل بنڑائے جو او سبھ کُجھ بنڑا سگنڑ جِنہاں دا مَیں تیکُوں حُکم ڈِتے، 7یعنی اِجتماع آلا تمبُو، کفارے دے ڈھکنڑ سمیت عہد دا صندوق تے تمبُو دا بِیا سارا سامان، 8میز تے اُوندا سامان، خالص سونے دا چراغ دان تے اُوندا سامان، خوشبودار مصالحہ ساڑن آلی قُربان گاہ، 9ساڑے ونجنڑ آلیاں قُربانیاں پیش کرݨ دی قُربان گاہ تے اُوندا سامان، غُسل آلا حوض تے اُوندی چوکی جیندے اُتے او رکھیا ویندے، 10او لباس جیہڑا ہارُون کاہِن تے اُوندے پوتر کاہِن دے طور تے خدمت کرݨ کیتے پیندے ہِن، 11مسح کرݨ آلے تیل تے مُقدّس تمبُو کیتے خوشبودار مصالحہ۔ ایہ سبھ کُجھ او اِینویں بنڑاوݨ جِینویں مَیں تیکُوں حُکم ڈِتے۔“

سبت یعنی ارام دا ڈینہہ

12رب العالمین مُوسیٰ کُوں آکھیا، 13”بنی اِسرائیل کُوں ڈسا جو میڈے سبت1 دا ڈینہہ ضرور منائے، کیوں جو ایہ ڈینہہ میڈے تے تُہاڈے وچال نسل در نسل ہِک واضح نشان راہسی تاں جو تُہاکُوں پتہ لگے جو مَیں رب العالمین ہاں جیہڑا تُہاکُوں مخصوص تے مُقدّس کریندا ہاں۔ 14سبت دا ڈینہہ ضرور منائے کیوں جو ایہ تُہاڈے کیتے مخصوص تے مُقدّس ہے۔ جیہڑا کوئی وی اِیندی بے حُرمتی کرے، اُونکُوں ضرور مار ڈِتا ونجے تے جے کوئی اِیں ڈینہوار کم کرے، اُونکُوں بنی اِسرائیل ءچوں کڈھ ڈِتا ونجے۔ 15چِھی ڈینہہ کم کیتا ونجے پر ستواں ڈینہہ ارام دا ڈینہہ ہے۔ او رب العالمین کیتے مخصوص تے مُقدّس ہے۔ جیہڑا کوئی اِیں ڈینہوار کم کرے، اُونکُوں مار ڈِتا ونجے۔

16بنی اِسرائیل نسل در نسل سبت دا ڈینہہ مناوݨ تے ابدی عہد سمجھ تے اُوندا لحاظ رکھنڑ۔ 17ایہ میڈے تے بنی اِسرائیل دے وچال ابدی نشان ہوسی کیوں جو مَیں رب العالمین چِھی ڈینہہ ءچ اسمان تے زمین کُوں بنڑایا جڈاں جو ستویں ڈینہہ کم تُوں فارغ تھیّا تے تازہ دم2 تھیّا۔“

رب شریعت دیاں تختیاں ڈیندے

18سِینا پہاڑ اُتے مُوسیٰ کُوں ایہ سبھ کُجھ ڈساوݨ تُوں بعد رب العالمین اُونکُوں شریعت دیاں ڈُو تختیاں ڈِتیاں۔ پتھر دیاں اُنہاں تختیاں اُتے یکے گالھیں خُدا خود لِکھیاں۔