خرُوج 27

جانور پیش کرݨ دی قُربان گاہ

1تُوں کِکر دی لکڑ دی ہِک قُربان گاہ بنڑاویں۔ اُوندی اُچائی ساڈھے چار فُٹ جڈاں جو لمبائی تے چوڑائی ساڈھے سَت سَت فُٹ یعنی چورس ہووے۔ 2اُوندے چارے کونیاں اُتے ہِک ہِک سینگ بنڑاویں۔ سینگ تے قُربان گاہ ہِکے ٹوٹے دے ہووݨ تے ساریاں اُتے پِتّل مڑھیں۔ 3اُوندا سارا سامان پِتّل دا ہووے یعنی سواہ کُوں چا تے گِھن ونجنڑ آلیاں بالٹیاں، بیلچے، کٹورے، سیخاں تے بکھدے ہوئے کولیاں کیتے تھاں۔

4قُربان گاہ کیتے پِتّل دا جنگلا بنڑاویں جیہڑا اُتوں کُھلا ہووے۔ جنگلے دے چارے کونیاں اُتے کڑے لائے ونجنڑ۔ 5قُربان گاہ دی ادھی اُچائی اُتے ہِک کنارہ لاویں تے قُربان گاہ کُوں جنگلے ءچ اِیں کنارے تئیں رکھیا ونجے۔ 6قُربان گاہ چاوݨ کیتے کِکر دیاں ڈُو سوٹیاں بنڑا تے اُنہاں اُتے پِتّل مڑھیں۔ 7اُنہاں کُوں قُربان گاہ دے ڈوہائیں پاسُوں دے کڑیاں ءچ پاویں۔

8پُوری قُربان گاہ لکڑ دے تختیاں نال بنڑاویں پر او اندرُوں کھوکھلی ہووے۔ اُونکُوں عین اُوں نمونے دے مطابق بنڑاویں جیہڑا مَیں تیکُوں پہاڑ اُتے ڈکھیندا پِیا ہاں۔

تمبُو دا صحن

9مُقدّس تمبُو کیتے صحن بنڑاویں۔ اُوندی چاردیواری باریک لینن دے پڑدے نال بنڑائی ونجے۔ چاردیواری دی لمبائی جنُوب دِر ہِک سو پنجھاہ فُٹ ہووے۔ 10پڑدے کُوں چاندی دیاں ہُکاں تے پٹیاں نال لکڑ دے وِیہہ تھمبیاں نال لاتا ونجے۔ ہر تھمبا پِتّل دیاں خانے آلیاں چوکیاں ءچ کھڑا ہووے۔ 11اِینویں ای چار دیواری شمال دِر ہِک سو پنجھاہ فُٹ لمبی تے اِیندے کیتے وِیہہ تھمبے تے وِیہہ چوکیاں تے چاندی دیاں ہُکاں تے پٹیاں ہووݨ۔ 12تمبُو دے پِچُھوں صحن دے مغرب دِر دی چوڑائی پنجھتر فُٹ ہووے تے پڑدے کیتے لکڑ دے ڈاہ تھمبے تے ڈاہ چوکیاں ہووݨ۔

13سامنڑے مشرق دِر وی جِتُھوں سِجھ اُبھردے، صحن دی چوڑائی پنجھتر فُٹ ہووے۔ 14اِتھاں چار دیواری دا دروازہ ہووے۔ پڑدے دروازے دے سجے پاسے ساڈھے باویہہ فُٹ چوڑے ہووݨ 15تے اُوندے کھبے پاسُوں وی اُتنے ای چوڑے ہووݨ۔ اُونکُوں ڈوہائیں پاسُوں ترے ترے لکڑ دے تھمبیاں نال لایا ونجے جیہڑے پِتّل دیاں چوکیاں اُتے کھڑے ہووݨ۔ 16دروازے دا پڑدہ ترِیح فُٹ چوڑا بنڑاویں۔ او نیلے، جامنی تے رتّے رنگ دے دھاگے تے باریک لینن نال بنڑایا ونجے تے اُوندے اُتے کڈھائی دا کم کیتا ہووے۔ اِیں پڑدے کیتے لکڑ دے چار تھمبے تے پِتّل دیاں چار چوکیاں ہووݨ۔

17صحن دے یکے تھمبے پِتّل دیاں چوکیاں اُتے کھڑے ہووݨ تے پڑدے چاندی دیاں کُنڈیاں تے پٹیاں نال تھمبیاں اُتے لائے ونجنڑ۔ 18چار دیواری دی لمبائی ہِک سو پنجھاہ فُٹ، چوڑائی پنجھتر فُٹ تے اُچائی ساڈھے سَت فُٹ ہووے۔ تھمبیاں دیاں یکیاں چوکیاں پِتّل دیاں ہووݨ۔ 19جیہڑا وی باقی سامان مُقدّس تمبُو ءچ اِستعمال کیتا ویندے، یکا پِتّل دا ہووے۔ تمبُو تے چار دیواری دیاں کِلاں وی پِتّل دیاں ہووݨ۔

چراغ دان دا تیل

20بنی اِسرائیل کُوں حُکم ڈیویں جو او تیڈے کولھ کُٹے ہوئے زیتون دا خالص تیل گِھن آوݨ تاں جو مُقدّس کمرے دے چراغ دان دے ڈیوے باقاعدہ بلدے راہوݨ۔ 21چراغ دان کُوں اِجتماع آلے تمبُو ءچ اُوں پڑدے دے سامنڑے رکھیں جیندے پِچُھوں عہد دا صندوق ہے۔ ہارُون تے اُوندے پوتر چراغ دان سنبھالنڑ تاں جو او شام تُوں گِھن تے سویل تئیں رب العالمین دے سامنڑے بلدا راہوے۔ بنی اِسرائیل دا ایہ اصُول نسل در نسل قائم راہونڑا چاہیدے۔