خرُوج 26

اِجتماع آلا تمبُو

1تے تُوں مُقدّس تمبُو1 کیتے ڈاہ پڑدے بنڑاویں۔ اُنہاں کیتے باریک لینن تے نیلے، جامنی تے رتّے رنگ دا دھاگا اِستعمال کریں۔ پڑدیاں ءچ کہیں ماہر کاریگر تُوں کڈھائی دا کم کروا تے کروبی فرشتیاں دی صورت بنڑاویں۔ 2ہر پڑدے دی لمبائی بِتالیہہ (42) فُٹ تے چوڑائی چِھی فُٹ ہووے۔ سبھ پڑدے ہِکو ناپ دے ہووݨ۔ 3پنج پڑدے لمبائی دے رُخ ہِک بئے نال جوڑے ونجنڑ تے اِینویں ای بئے پنج وی۔ اِینویں ڈُو وڈے پڑدے تیار تھی ویسن۔ 4نیلے دھاگے دے کاج بنڑا تے ہِک وڈے پڑدے دے لمبائی دے رُخ لاویں تے اِینویں ای ڈُوجھے وڈے پڑدے دے ہِک پاسے لمبائی دے رُخ لاویں۔ 5ہِک وڈے پڑدے دے لمبائی دے رُخ پنجھاہ کاج تے ڈُوجھے اُتے وی اِتنے ای کاج۔ اِنہاں ڈوہائیں پڑدیاں دے کاج ہِک بئے دے آمنڑے سامنڑے ہووݨ۔ 6وَل سونے دیاں پنجھاہ ہُکاں بنڑا تے آمنڑے سامنڑے دے کاج ہِک بئے نال جوڑ ڈیویں۔ اِینویں ڈوہائیں وڈے پڑدے جُڑ تے تمبُو دا کم ڈیسن۔

7بکری دے والاں نال وی یارہاں پڑدے بنڑاویں جِنہاں کُوں کپڑے آلے تمبُو اُتے رکھیا ونجے۔ 8ہر پڑدے دی لمبائی پِنتالیہہ فُٹ تے چوڑائی چِھی فُٹ ہووے۔ 9پنج پڑدے لمبائی دے رُخ ہِک بئے نال جوڑے ونجنڑ تے اِینویں ای باقی چِھی وی۔ اِنہاں چِھی پڑدیاں دے چِھینویں پڑدے کُوں تمبُو دے سامنڑے آلے حصے اُتے ڈُونڑا تے تہہ کریں۔

10بکری دے والاں دے ڈوہائیں وڈے پڑدیاں دے پِنتالیہہ فُٹ آلے ہِک ہِک پاسے اُتے پنجھاہ پنجھاہ کاج بنڑاویں۔ 11وَل پِتّل دیاں پنجھاہ ہُکاں بنڑا تے اُنہاں نال ڈوہائیں کُوں جوڑ ڈیویں تاں جو او ہِک بنڑ ونجے۔ 12جِیں ویلے بکری دے والاں دا ایہ تمبُو کپڑے دے تمبُو دے اُتے لایا ویسی تاں ادھا پڑدہ باقی راہسی۔ او تمبُو دے پِچھلے پاسے لٹکیا راہوے۔ 13تمبُو دے سجے تے کھبے پاسے بکری دے والاں دا تمبُو کپڑے دے تمبُو دی نسبت ڈیڈھ ڈیڈھ فُٹ لمبا ہوسی۔ اِینویں او ڈوہائیں پاسُوں لٹکے ہوئے کپڑے دے تمبُو کُوں ڈھکی رکھیسی۔

14اِنہاں ڈوہائیں تمبُواں دی حفاظت کیتے ڈُو غلاف بنڑاویں۔ چھتریاں دیاں رنگیاں ہوئیاں رتّیاں کَھلاں جوڑ تے، تے اُنہاں اُتے اعلیٰ قِسم دیاں کَھلاں مِلا تے رکھیاں ونجنڑ2۔

15تُوں کِکر دی لکڑ دے تختے بنڑاویں تاں جو او مُقدّس تمبُو دیاں کندھاں دا کم ڈیوݨ۔ 16ہر تختے دی اُچائی پندھراں فُٹ تے چوڑائی سوا ڈُو فُٹ ہووے۔ 17ہر تختے دے تلے ڈُو ڈُو چُولاں ہووݨ جیہڑیاں ہر تختے کُوں اُوندیاں چوکیاں نال جُڑیسن تاں جو تختہ کھڑا راہوے۔ 18مُقدّس تمبُو دی جنُوبی کندھ کیتے وِیہہ تختے بنڑاویں 19تے نال ای چاندی دیاں خانے آلیاں چالیہہ چوکیاں وی۔ ہر تختے دے تلے ڈُو چوکیاں ہوسن تے ہر چوکی دے خانے ءچ ہِک چُول لگسی۔ 20اِیں طریقے نال مُقدّس تمبُو دی شمالی کندھ کیتے وِیہہ تختے بنڑاویں۔ 21تے نال ای چاندی دیاں چالیہہ چوکیاں وی۔ ہر تختے دے تلے ڈُو چوکیاں ہوسن۔ 22مُقدّس تمبُو دی پِچھلی یعنی مغربی کندھ کیتے چِھی تختے بنڑاویں۔ 23اِیں کندھ کُوں شمالی تے جنُوبی کندھاں نال جوڑن کیتے کونے آلے ڈُو تختے بنڑاویں۔ 24اِنہاں ڈوہائیں تختیاں ءچوں تلُوں گِھن تے اُتے تئیں کونا ہووے تاں جو ہِک دے ذریعے شمالی کندھ مغربی کندھ نال، تے بئے دے ذریعے جنُوبی کندھ مغربی کندھ نال جُڑ ونجے۔ اُنہاں دے اُتوں دے سرے کڑیاں نال مضبوط کیتے ونجنڑ۔ 25اِینویں پِچھلے یعنی مغربی تختیاں دی پُوری گِنتری اَٹھ ہوسی تے اُنہاں کیتے چاندی دیاں چوکیاں دی گِنتری سولہاں ہوسی۔ ہر تختے دے تلے ڈُو چوکیاں ہوسن۔

26اِیں تُوں علاوہ کِکر دی لکڑ دے شتِیر بنڑاویں۔ مُقدّس تمبُو دے جنُوبی پاسے کیتے پنج، 27تے شمالی پاسے کیتے پنج، تے پِچھلے یعنی مغربی پاسے کیتے پنج۔ [او ہر کندھ دے تختیاں اُتے اِینویں لائے ونجنڑ جو او اُنہاں کُوں ہِک بئے نال جوڑن۔] 28اَدھ آلا شتِیر کندھ دی ادھی اُچائی تے کندھ دے ہِک سرے تُوں بئے سرے تئیں لایا ونجے۔ 29تختیاں کُوں سونے نال منڈھیں، وَل شتیِراں کُوں تختیاں نال جوڑن کیتے سونے دے کڑے بنڑا تے شتیِراں کُوں وی سونے نال منڈھیں۔

30پُورے مُقدّس تمبُو کُوں اُوں نمونے دے مطابق بنڑاویں جیہڑا مَیں تیکُوں پہاڑ اُتے ڈکھیندا پِیا ہاں۔

مُقدّس تمبُو دے دروازے دے پڑدے

31وَل ہِک بِیا پڑدہ بنڑاویں۔ اِیندے کیتے وی باریک لینن تے نیلے، جامنی تے رتّے رنگ دا دھاگا اِستعمال کریں۔ اُوندے اُتے وی کہیں ماہر کاریگر تُوں کروبی فرشتیاں دی صورت بنڑواویں۔ 32اِینکُوں سونے دیاں کُنڈیاں نال کِکر دی لکڑ دے چار تھمبیاں نال لٹکاویں۔ اُنہاں تھمبیاں اُتے سونا چڑھایا ونجے تے چاندی دیاں چار خانے آلیاں چوکیاں اُتے کھڑایا ونجے۔ 33ایہ پڑدہ مُقدّس کمرے کُوں سبھ تُوں مُقدّس کمرے تُوں اَنج کریسی۔ پڑدے کُوں ہُکاں نال لٹکاوݨ تُوں بعد اُوندے پِچُھوں آلے سبھ تُوں مُقدّس کمرے ءچ عہد دا صندوق رکھیں۔ 34وَل عہد دے صندوق اُتے ڈھکنڑ ڈیویں جیہڑا کفارے دی جاہ ہے۔

35جیہڑے میز اُتے میڈے کیتے نذر دیاں روٹیاں پئیاں راہندیاں ہِن، او اِیں پڑدے دے باہر مُقدّس کمرے ءچ شمال آلے پاسے رکھیا ونجے۔ اُوندے سامنڑے جنُوب آلے پاسے چراغ دان رکھیا ونجے۔

36وَل تمبُو دے دروازے کیتے وی باریک لینن تے نیلے، جامنی تے رتّے رنگ دا دھاگا اِستعمال کر تے پڑدہ بنڑایا ونجے تے اِیندے اُتے کڈھائی دا کم کیتا ونجے۔ 37اِیں پڑدے کُوں سونے دیاں کُنڈیاں نال کِکر دے پنج تھمبیاں نال لٹکایا ونجے۔ اُنہاں تھمبیاں اُتے وی سونا چڑھایا ونجے تے او پِتّل دیاں پنج چوکیاں اُتے کھڑے ہووݨ۔