خرُوج 25

اِجتماع آلا تمبُو بنڑاوݨ کیتے ہدیے

1رب العالمین مُوسیٰ کُوں آکھیا، 2”بنی اِسرائیل کُوں ڈسا جو او ہدیے گِھن آوݨ۔ ہدیے دیاں شیواں اُنہاں سبھ تُوں گِھنو جیہڑے دل نال ڈیوݨ۔ 3اُنہاں کولُھوں ایہ شیواں گِھنو: سونا، چاندی تے پِتّل، 4نیلا، جامنی تے رتّے رنگ دا دھاگا، باریک لینن، بکری دے وال، 5چھترے دیاں رنگ کیتیاں ہوئیاں رتّیاں کَھلاں، اعلیٰ قِسم1 دیاں کَھلاں، کِکر دی لکڑ، 6چراغ دان کیتے زیتون دا تیل، مسح2 کرݨ آلے تیل کیتے تے خوشبودار دُھونڑی3 کیتے مصالحے، 7لال عقیق تے بئے قیمتی پتھر جیہڑے کاہِن ِ اعظم دے بالاپوش4 تے سینے دے کپڑے اُتے لائے ویسن۔

8اِنہاں شیواں نال لوک میڈے کیتے مُقدّس جاہ بنڑاوݨ تاں جو مَیں اُنہاں دے وچال راہواں۔ 9مَیں تیکُوں اُوں مُقدّس تمبُو تے اُوندے سارے سامان دا نمونہ ڈِکھیساں تے تُوں سبھ کُجھ ٹھیک اُوں طریقے نال بنڑانویں۔

عہد دا صندوق

10لوک کِکر دی لکڑ دا ہِک صندوق بنڑاوݨ۔ اُوندی لمبائی پونڑے چار فُٹ، تے چوڑائی تے اُچائی ڈوہائیں سوا ڈُو ڈُو فُٹ ہووے۔ 11تُوں پُورے صندوق دے اندرُوں باہرُوں خالص سونے دی پتلی چادر چڑھاویں۔ تے اُوندے اُتے سونے دی کِنگری لاویں۔ 12صندوق کیتے سونے دے چار کڑے سانچے ءچ ڈھال تے اُنہاں کُوں صندوق دے چارے پاویاں اُتے لاویں۔ ڈوہائیں پاسُوں ڈُو، ڈُو کڑے ہووݨ۔ 13وَل کِکر دیاں ڈُو سوٹیاں بنڑا تے اُنہاں اُتے سونا چڑھاویں۔ 14سوٹیاں کُوں ڈوہائیں پاسُوں کڑیاں ءچ پاویں تاں جو اُنہاں نال صندوق کُوں چاتا وَنج سگے۔ 15ایہ سوٹیاں صندوق دے کڑیاں ءچ پئیاں راہوݨ۔ اُنہاں کُوں کڈھائیں وی کڑیاں تُوں اَنج نہ کریں۔ 16صندوق ءچ شریعت دیاں او ڈُو تختیاں رکھیں جیہڑیاں مَیں تیکُوں ڈیساں۔

17صندوق دا ڈھکنڑ5 خالص سونے دا بنڑاویں۔ اُوندی لمبائی پونڑے چار فُٹ تے چوڑائی سوا ڈُو فُٹ ہووے۔ ایہ کفارے دی جاہ ہوسی۔ 18سونے نال ڈُو کروبی فرشتے گھڑ تے بنڑاویں جیہڑے ڈھکنڑ دے ڈوہائیں سِریاں اُتے کھڑے ہووݨ۔ 19ایہ ڈوہائیں فرشتے تے ڈھکنڑ ہِکو ٹوٹے نال بنڑاویں۔ 20فرشتے دے پر اُتلے پاسے اِینویں کِھنڈے ہووݨ جِینویں او ڈھکنڑ کُوں ڈھکی کھڑے ہووݨ۔ اُنہاں دے مُنہ آمنڑے سامنڑے ہووݨ تے او ڈھکنڑ دو ڈیدھے ہووݨ۔

21ڈھکنڑ کُوں صندوق اُتے لا تے صندوق ءچ عہد دی شریعت دیاں تختیاں رکھیں جیہڑیاں مَیں تیکُوں ڈیساں۔ 22اُتھاں ڈھکنڑ دے اُتے ڈوہائیں کروبی فرشتیاں دے وچال مَیں آپنڑے آپ کُوں تیڈے اُتے ظاہر کر تے تیڈے نال الویساں تے تیکُوں بنی اِسرائیل کیتے یکے حُکم ڈیساں۔

نذر دیاں روٹیاں دی میز

23کِکر دی لکڑ دی ہِک میز بنڑاویں۔ اُوندی لمبائی ترے فُٹ، چوڑائی ڈیڈھ فُٹ تے اُچائی سوا ڈُو فُٹ ہووے۔ 24اُوندے اُتے خالص سونا چڑھاویں تے اُوندے آسُوں پاسُوں سونے دی کِنگری لاویں۔ 25میز دے اُتلے پاسُوں ہِک پتری لاویں، جیندی اُچائی ترے اِنچ ہووے تے جیندے اُتے سونے دی جھالر لگی ہوئی ہووے۔ 26سونے دے چار کڑے ڈھال تے میز دے چارے کونیاں اُتے لگے چار پاویاں نال لاویں۔ 27ایہ کڑے میز دی پتری دے تلے لاویں تاں جو اُنہاں ءچ او سوٹیاں پاتیاں ونجنڑ جِنہاں نال میز کُوں چاتا ویسی۔ 28ایہ سوٹیاں وی کِکر دیاں ہووݨ تے اِنہاں اُتے سونا چڑھیا ہووے۔ اِنہاں نال میز کُوں چاتا ویسی۔

29اُوندے تھال، پیالے تے نذر دے طور تے وِیٹے ونجنڑ آلیاں چیزاں کیتے جگ تے مُنگر وی خالص سونے نال بنڑاویں۔ 30میز اُتے او روٹیاں ہر ویلے میڈے حضُور پئیاں راہوݨ جیہڑیاں میڈے کیتے نذر کیتیاں ہووݨ۔

چراغ دان

31تُوں خالص سونے دا چراغ دان وی بنڑاویں۔ اُوندا پاوا تے ڈنڈی گھڑ تے بنڑاویں۔ اُوندیاں کٹوریاں جیہڑیاں پُھلاں تے کلِیاں دی شکل دیاں ہووݨ، پاوے تے ڈنڈی نال ہِکو ٹوٹے دیاں ہووݨ۔ 32ڈنڈی دے سجے کھبے کُل چِھی شاخاں ہووݨ، ترے شاخاں سجے تے ترے شاخاں کھبے پاسُوں۔ 33ہر شاخ اُتے ترے ترے پیالیاں لگیاں ہووݨ جیہڑیاں بادام دیاں کلِیاں تے پُھلاں دی شکل آلی کار ہووݨ۔ 34چراغ دان دی ڈنڈی اُتے وی اِیں قِسم دیاں پیالیاں لگیاں ہووݨ پر گِنتری ءچ چار۔ 35اِنہاں ءچوں ترے پیالے شاخاں نِکلنڑ آلی جاہ تے ہووݨ یعنی ڈُو شاخاں دے تلے ہِک پیالہ۔ 36شاخاں تے پیالیاں بلکہ پُورا چراغ دان خالص سونے دے ہِکو ٹوٹے نال گھڑ تے بنڑاویں۔

37چراغ دان کیتے سَت ڈیوے بنڑا تے اُنہاں کُوں شاخاں اُتے اِینویں رکھیں جو او سامنڑے دی جاہ تے روشنی کرݨ۔ 38بتی کُترݨ آلیاں قینچیاں تے چھوٹے تھاں وی خالص سونے دے بنڑاویں۔ 39چراغ دان تے اُوندے یکے سامان کیتے ہِک مَنڑ خالص سونا6 لاویں۔ 40خیال کریں جو سبھ کُجھ ٹھیک اُوں نمونے دے مطابق بنڑایا ونجے جیہڑا مَیں تیکُوں اِتھاں پہاڑ اُتے ڈکھیندا پِیا ہاں۔