خرُوج 24

عہد کُوں مننڑ دا وعدہ

1رب العالمین مُوسیٰ کُوں آکھیا، ”تُوں ہارُون تے اُوندے پوتر ندب تے ابِیہُو تے بنی اِسرائیل دے ستّر بزُرگاں کُوں نال گِھن تے میڈے کولھ اُتے آ۔ تُساں دُور ای کھڑ تے میکُوں سجدہ کرائے۔ 2صرف تُوں کلھا میڈے کولھ آ، تے باقی نیڑے نہ آوݨ۔ قوم دے باقی لوک تیڈے نال پہاڑ اُتے نہ چڑھن۔“

3جِیں ویلے مُوسیٰ قوم دے کولھ وَنج تے رب العالمین دے سارے گالھیں تے حُکم اُنہاں کُوں ڈسائے تاں جواب ءچ یکیاں آکھیا، ”اساں رب العالمین دے اِنہاں سارے گالھیں اُتے عمل کریسوں۔“

4وَل مُوسیٰ رب العالمین دے سارے گالھیں لِکھ گِھدیاں۔ ولدی ڈینہوار اُوں صُبح سویلے اُٹھی تے پہاڑ تلے ہِک قُربان گاہ بنڑائی۔ تے بنی اِسرائیل دے بارہاں قبیلیاں کیتے پتھر دے بارہاں تھمبے کھڑے کیتے۔ 5وَل اُوں بنی اِسرائیل دے کُجھ جواناں کُوں بھیجیا جِنہاں رب العالمین دی تعظیم ءچ ساڑے ونجنڑ آلیاں قُربانیاں پیش کیتیاں تے جوان ڈانداں کُوں سلامتی دیاں قُربانیاں دے طور تے پیش کیتا۔ 6مُوسیٰ قُربانیاں دی رَت گِھن تے ادھی رَت مُنگراں ءچ رکھی تے ادھی قُربان گاہ اُتے چِھنڈک ڈِتی۔

7وَل اُوں او کتاب گِھدی جیندے ءچ رب العالمین نال کیتے گئے عہد دیاں ساریاں شرطاں لِکھیاں ہَن تے پڑھ تے لوکاں کُوں سُنڑایاں۔

ولدے ءچ اُنہاں آکھیا، ”اساں رب العالمین دے اِنہاں سارے گالھیں اُتے عمل کریسوں تے اُوندے تابع راہسوں۔“ 8اِیندے بعد مُوسیٰ مُنگراں ءچوں رَت گِھن تے لوکاں اُتے چِھنڈکی تے آکھیا، ”ایہ رَت اُوں عہد اُتے مُہر ہے جیہڑا رب العالمین تُہاڈے نال کیتے تے جیہڑا اُوندے سبھ گالھیں دے مطابق ہے۔“

9اِیندے بعد مُوسیٰ، ہارُون، ندب، ابِیہُو تے بنی اِسرائیل دے ستّر بزُرگ سِینا پہاڑ اُتے چڑھے 10تے اُنہاں بنی اِسرائیل دے خُدا کُوں ڈِٹھا1۔ اُوندے پیراں تلے نیلم پتھر جِیہا فرش ہا جیہڑا اسمان آلی کار صاف شفاف ہا۔ 11بے شک بنی اِسرائیل دے بزُرگاں خُدا کُوں ڈِٹھا، وَل وی خُدا اُنہاں کُوں ہلاک نہ کیتا بلکہ اُنہاں اُوندے حضُور ءچ کھادا تے پِیتا۔

پتھر دیاں تختیاں

12اِنہاں گالھیں تُوں بعد رب العالمین مُوسیٰ کُوں آکھیا، ”میڈے کولھ پہاڑ اُتے آ، تے کُجھ دیر کیتے اُتھاں کھڑ تھیویں۔ مَیں تیکُوں پتھر دیاں تختیاں ڈیساں جِنہاں اُتے مَیں آپنڑی شریعت تے حُکم لِکھے ہِن تاں جو تُوں بنی اِسرائیل کُوں سکھاویں۔“

13مُوسیٰ آپنڑے مددگار یشُوع نال ٹُر پِیا تے خُدا دے پہاڑ اُتے چڑھ گِیا۔ 14پہلے اُوں بزُرگاں کُوں آکھیا، ”جئیں تئیں اساں واپس نہ آ ونجُوں، تُساں ساڈے اِنتظار ءچ اِتھائیں کھڑے رہوائے۔ ہارُون تے حور تُہاڈے کولھ ہِن۔ کوئی وی مسئلہ ہووے تاں اِنہاں ڈوہاں کولھ وَنجائے۔“

15جِیں ویلے مُوسیٰ اُتے گِیا تاں بدّل پہاڑ کُوں ڈھک ڈِتا۔ 16رب العالمین دا جلال سِینا پہاڑ اُتے لہہ آیا۔ چِھی ڈینہہ تئیں بدّل سِینا پہاڑ کُوں ڈھکی رکھیا تے ستویں ڈینہوار رب العالمین بدّل ءچوں مُوسیٰ کُوں اواز ڈِتی۔ 17رب العالمین دا جلال بنی اِسرائیل کُوں اِینویں لگیا جِینویں پہاڑ دی چوٹی اُتے ساڑ تے سواہ کر ڈیوݨ آلی بھاہ ہووے۔ 18ٹُردے ٹُردے مُوسیٰ بدّل ءچ وڑ گِیا تے او چالیہہ ڈینہہ تے چالیہہ رات پہاڑ اُتے ریہا۔