خرُوج 23

اِنصاف تے رحم

1کُوڑی خبر نہ کِھنڈاویں۔ کہیں شریر بندے نال رَل تے کُوڑی گواہی نہ ڈیویں۔ 2جڈاں بِھیڑ غلط کم کریندی ہووے تاں اُوندی پیروی کر تے غلط کم نہ کریں تے عدالت ءچ بِھیڑ نال رَل تے اِنصاف دے خلاف کُوڑی گواہی نہ ڈیویں۔ 3تے عدالت ءچ کہیں غریب دی طرفداری وی نہ کریں۔

4جیکر تیکُوں تیڈے دُشمنڑ دا ڈاند یا کھوتا اوارہ پِھردا نظر آوے تاں اُونکُوں ضرور مالک کولھ گِھن ونجیں۔ 5جیکر تُوں آپنڑے دُشمنڑ دے کھوتے کُوں بھار تلے دبیا ہویا ڈیکھیں تاں اُوں تُوں مُنہ پھیر تے نہ لنگھ ونجیں بلکہ اُوندی مدد ضرور کریں۔

6عدالت ءچ آپنڑی قوم دے غریب لوکاں دا حق نہ ماریں۔ 7کُوڑے معاملے تُوں دُور راہویں تے جیہڑا بے گُناہ یا حق تے ہووے اُونکُوں سزائے موت نہ ڈیویں کیوں جو مَیں قصُوروار کُوں بے قصُور نہ کھڑیساں۔ 8رشوت نہ گِھنیں کیوں جو رشوت، اکھیں آلے کُوں وی اندھا کر ڈیندی ہے تے حق دار دے گالھیں کُوں پلٹ ڈیندی ہے۔

9پردیسی اُتے ظلم نہ کریں۔ تُساں تاں پردیسیاں دی حالت تُوں چنگی طرحاں واقف ہیوے کیوں جو تُساں وی مِصر ءچ پردیسی ہَوے۔

ستواں سال تے ستواں ڈینہہ

10تُوں چِھی سال تئیں آپنڑی زمین ءچ بیج رَہا تے اُوندی پیداوار جمع کریں۔ 11پر ستویں سال زمین کُوں بیج رہائے بغیر چھوڑ ڈیویں۔ جیہڑا کُجھ وی اُگے اُونکُوں قوم دے غریب لوک کھاوݨ تے جیہڑا اُنہاں تُوں بچ ونجے اُونکُوں جانور کھاوݨ۔ آپنڑے انگُور تے زیتون دے باغاں نال وی اِینویں ای کریں۔

12چِھی ڈینہہ تئیں آپنڑا کم کار کریں پر ستویں ڈینہہ ارام کریں تاں جو تیڈا ڈاند تے تیڈا کھوتا وی ارام کر سگنڑ تے تیڈی لونڈی دا پوتر تے تیڈے نال راہوݨ آلا پردیسی وی تازہ دم تھی ونجے۔

13جیہڑی وی ہدایت مَیں ڈِتی ہے، اُوندے اُتے عمل کریں۔ ڈُوجھے معبُوداں دی عبادت نہ کریں بلکہ اُنہاں دا ناں وی تیڈی زبان اُتے نہ آوے۔

خاص عیداں

14[اے بنی اِسرائیل] سال ءچ ترے پھیری میڈی تعظیم ءچ عید مناویں۔ 15پہلے بے خمیری روٹی آلی عید مناویں۔ ابیب دے مہینے1 ءچ سَت ڈینہہ تئیں جِینویں مَیں حُکم ڈِتے تیڈی روٹی ءچ خمیر نہ ہووے کیوں جو اِیں مہینے ءچ تُوں مِصر ءچوں نِکلیا ہَویں۔ کوئی وی خالی ہتھ میڈے حضُور نہ آوے۔

16وَل تُوں آپنڑے کھیت ءچ رہائی ہوئی فصل دے پہلے پھل نال فصل کپنڑ آلی عید مناویں۔

وَل سال دے آخر2ءچ جِیں ویلے تُوں انگُور تے باقی باغاں دے پھل جمع کیتے ہوسن تاں پھل جمع کرݨ آلی عید مناویں۔ 17اِینویں تیڈے سارے مرد سال ءچ ترے پھیری رب تعالیٰ دے سامنڑے حاضر تھیوݨ۔

18جِیں ویلے تُوں کہیں جانور کُوں قُربان کر تے اُوندی رَت میکُوں پیش کریں تاں اُوندے نال اِیہو جیہی روٹی پیش نہ کریں جیندے ءچ خمیر ہووے تے جیہڑا جانور تُوں میڈیاں عیداں اُتے پیش کریں، اُوندی چربی آندی سویل تئیں باقی نہ بچّے۔

19آپنڑی زمین دی فصل دا پہلا تے بہترین پھل رب العالمین آپنڑے خُدا دے گھر گِھن آویں۔

بکری دے لیلے کُوں اُوندی ماء دے کھیر ءچ نہ پکاویں۔

رب دا فرشتہ راہنمائی کریسی

20ڈیکھ مَیں تیڈے اگُوں اگُوں ہِک فرشتہ بھجیندا ہاں جیہڑا رستے ءچ تیڈی حفاظت کریسی تے تیکُوں اُوں جاہ تئیں پُچیسی جیہڑی مَیں تیڈے کیتے تیار کیتی ہے۔ 21اُوندے سامنڑے احتیاط کریں تے اُوندی گالھ منیں۔ اُوندی نافرمانی نہ کریں کیوں جو او تیکُوں معاف نہ کریسی، اِیں واسطے جو او میڈا نمائندہ ہے۔ 22پر جیکر تُوں اُوندی سُنڑسیں تے او سبھ کُجھ کریسیں جیہڑا مَیں ڈسیندا ہاں تاں مَیں تیڈے دُشمنڑاں دا دُشمنڑ تے تیڈے مخالفاں دا مخالف ہوساں۔

23میڈا فرشتہ تیڈے اگُوں اگُوں ٹُرسی تے تیکُوں کنعان مُلک تئیں پُچا ڈیسی، جِتھاں اموری، حِتّی، فرِزّی، کنعانی، حِوّی تے یبُوسی قوماں وسدیاں ہِن تے مَیں اُنہاں کُوں ہلاک کر ڈیساں۔ 24اُنہاں دے معبُوداں کُوں سجدہ نہ کریں، نہ اُنہاں دی عبادت کریں تے نہ اُنہاں دیاں رسماں اُتے عمل کریں بلکہ اُنہاں دے بُتاں کُوں سَٹ ڈیویں تے اُنہاں دے پتھر آلے مخصوص تھمبیاں کُوں وی ٹُکڑے ٹُکڑے کر ڈیویں۔

25تُوں رب العالمین آپنڑے خُدا دی عبادت کریں، وَل مَیں رب العالمین تیڈی روٹی تے پانڑی اُتے برکت ڈیساں تے ساریاں بیماریاں تیڈے تُوں دُور کر ڈیساں۔ 26وَل تیڈے مُلک ءچ کہیں دا حمل ضائع نہ تھیسی تے نہ کوئی بانجھ راہسی تے مَیں تیکُوں وڈی حیاتی ڈیساں۔

27مَیں تیڈے اگُوں اگُوں دہشت بھجیساں تے جِتھاں وی تُوں ویسیں مَیں سبھ قوماں ءچ خوف پیدا کر ڈیساں۔ میڈے پارُوں تیڈے یکے دُشمنڑ ڈر تے پِچُھوں بھج ویسن۔ 28مَیں تیڈے اگُوں ڈیمبُو بھجیساں جیہڑے حِوّی، کنعانی تے حِتّی لوکاں کُوں مُلک ءچوں کڈھ ڈیسن۔ 29پر مَیں اُنہاں کُوں ہِکے سال ءچ مُلک تُوں نہ کڈھیساں نہ تاں پُورا مُلک اُجڑ ویسی تے جنگلی جانور ودھ تے تیڈے کیتے نُقصان دا سبب بنڑسن۔ 30بلکہ مَیں اُنہاں کُوں تھوڑا تھوڑا کر تے کڈھیندا راہساں۔ اِیں دوران تیڈی تعداد ودھ ویسی تے تُوں ہولے ہولے مُلک اُتے قبضہ کر گِھنسیں۔

31مَیں بحر ِ قُلزم تُوں گِھن تے فِلِستیاں دے سمندر تئیں تے بیابان تُوں گِھن تے فرات دریا تئیں تیڈیاں حداں مقرر کریساں کیوں جو مَیں اُوں مُلک دے لوکاں کُوں تیڈے قبضے ءچ کر ڈیساں تے تُوں اُنہاں کُوں آپنڑے اگُوں مُلک ءچوں کڈھ ڈیسیں۔ 32تُوں نہ اُنہاں نال تے نہ اُنہاں دے معبُوداں نال کوئی عہد کریں۔ 33تُوں اُنہاں کُوں آپنڑے مُلک ءچ راہوݨ نہ ڈیویں، نہ تاں اُنہاں پارُوں تُوں میڈا گُنہگار تھیسیں۔ جیکر تُوں اُنہاں دے معبُوداں دی عبادت کریسیں تاں ایہ تیڈے کیتے پھندا بنڑ ویسی‘۔“