خرُوج 22

ملکیت دے بارے ءچ قانُون

1جیکر کوئی بندہ ڈاند یا بھیڈ چوری کر تے اُونکُوں کوہ ڈیوے یا ویچ ڈیوے تاں اُونکُوں چوری دے ہر ڈاند دے بدلے ءچ پنج ڈاند تے ہر چوری دی بھیڈ دے بدلے ءچ چار بھیڈاں واپس کرنڑیاں پوسن۔

2جیکر کوئی چور رات کُوں گھر ءچ وڑدے ویلے ماریا ونجے تاں مارݨ آلے قتل دے ذمہ دار نہ ہوسن۔ 3پر جیکر سِجھ نِکل آیا ہووے تاں مارݨ آلیاں اُتے اُوندے خون دا جُرم ہوسی۔

چور کُوں چوری کیتی گئی ہر شے دا نُقصان بھرنڑا پوسی۔ جیکر اُوندے کولھ ڈیوݨ کیتے کُجھ نہ ہووے تاں وَل اُونکُوں ویچ ڈِتا ونجے۔

4جیکر چوری دا جانور چور کولُھوں زندہ برآمد تھی ونجے تاں چور کُوں ڈُونڑا ہرجانہ ڈیونڑا پوسی بھانویں او ڈاند، بھیڈ، بکری یا کھوتا ہووے۔

5جیکر کوئی آپنڑے جانور کُوں آپنڑے کھیت یا انگُور دے باغ ءچ چھوڑ تے چرݨ ڈیوے تے چردے چردے او کہیں بئے کھیت ءچ وڑ ونجے تاں جانور دا مالک نُقصان دے بدلے آپنڑے انگُور دے باغ تے کھیت دی بہترین پیداوار ءچوں ڈیوے۔

6جیکر کہیں بھاہ بالی ہووے تے او کنڈے دار جھاڑیاں دے ذریعے ہمسائے دے کھیت تئیں کِھنڈ تے اُوندے اناج دے ڈھیر یا پکی ہوئی فصل یا کھیت کُوں برباد کر ڈیوے تاں بھاہ بالنڑ آلے کُوں نُقصان بھرنڑا پوسی۔

7جیکر کہیں بندے آپنڑے ہمسائے دے کولھ کُجھ پیسے یا مال رکھوایا ہووے تے ایہ شیواں ہمسائے دے گھرُوں چوری تھی ونجنڑ تے بعد ءچ چور پکڑیا ونجے تاں چور کُوں ڈُونڑا معاوضہ ڈیونڑا پوسی۔ 8پر جیکر چور نہ پکڑیا ونجے تاں گھر دا مالک جیندے کولھ امانت رکھوائی گئی ہئی، خُدا 1 دے حضُور کھڑایا ونجے تاں جو پتہ لگ سگے جو اُوں ایہ چوری آپ تاں نئیں کیتی۔

9جیکر کہیں شے دے ڈُو دعویٰ دار آپس ءچ بِھڑدے ہووݨ مثلاً ڈاند، کھوتا، بھیڈ، بکری، کپڑے یا کوئی گُمی ہوئی شے تاں معاملہ خُدا دے حضُور پیش کیتا ونجے۔ خُدا جِینکُوں قصُوروار کھڑاوے، او بئے کُوں معاوضے ءچ ڈُونڑا ادا کرے۔

10جیکر کہیں آپنڑے ہمسائے دے کولھ کوئی ڈاند، کھوتا، بھیڈ، بکری یا کوئی بِیا جانور امانت دے طور تے رکھیا ہووے تے او جانور مر ونجے یا زخمی تھی ونجے یا کوئی آپنڑے نال گِھن ونجے جِیں ویلے کوئی ڈیدھا نہ ہووے، 11تاں ایہ معاملہ اِینویں حل کیتا ونجے جو جیندے کولھ امانت رکھوائی گئی ہئی، او رب العالمین دی قَسم کھا تے آکھے جو مَیں ہمسائے دے جانور کُوں ہتھ نئیں لایا۔ جانور دے مالک کُوں ایہ قبول کرنڑا پوسی تے قَسم کھاوݨ آلے کُوں کوئی معاوضہ نہ ڈیونڑا پوسی۔ 12پر جیکر جانور واقعی چوری تھی گیا ہووے تاں جیندے حوالے جانور کیتا گِیا ہا، اُونکُوں قیمت ادا کرنڑی پوسی۔ 13تے جیکر کہیں جنگلی جانور اُونکُوں پھاڑ سٹیا ہووے تاں اُونکُوں ثبوت دے طور تے پھاڑے ہوئے حصے گِھن آونڑے ہوسن، پر معاوضہ نہ ڈیونڑا پوسی۔

14جیکر کوئی آپنڑے ہمسائے تُوں پُچھ تے اُوندا جانور اِستعمال کرے تے مالک دی غیر موجودگی ءچ جانور کُوں دھک لگ ونجے یا او مر ونجے تاں جانور اِستعمال کرݨ آلے کُوں معاوضہ ڈیونڑا پوسی، 15پر جے جانور مالک دی موجودگی ءچ مر ونجے تاں معاوضہ نہ ڈیونڑا پوسی۔ جیکر اُوں جانور کرائے تے گِھدا ہا تاں نُقصان کرائے ءچوں پُورا تھی ویسی۔

اِخلاقی تے مذہبی قانُون

16جیکر کہیں کُنواری دی منگنڑیں نہ تھئی ہووے تے کوئی مرد اُونکُوں ورغلا تے اُوندے نال بدفعلی کرے تاں او حق مہر ڈے تے اُوندے نال شادی کرے۔ 17پر جیکر چھوہیر دا پِیُو اُوں مرد نال پرناوݨ تُوں اِنکار کر ڈیوے، وَل وی مرد کُوں حق مہر دے برابر رقم ڈیونڑی پوسی۔

سزائے موت آلے جُرم

18تُوں جادُوگرنی کُوں زندہ نہ راہوݨ ڈیویں۔

19جیہڑا کوئی کہیں جانور دے نال جنسی بدفعلی کرے، اُونکُوں سزائے موت ڈِتی ونجے۔

20جیہڑا رب العالمین دے علاوہ ڈُوجھے معبُوداں کُوں قُربانیاں پیش کرے، اُونکُوں قوم ءچوں کڈھ تے ہلاک کیتا ونجے۔

کمزوراں دی حفاظت دے حُکم

21جیہڑا پردیسی تیڈے مُلک ءچ مہمان ہے، نہ تاں اُوندے نال بُرا سلوک کریں تے نہ اُونکُوں دباویں کیوں جو تُساں وی مِصر ءچ پردیسی ہَوے۔

22کہیں بیوہ یا یتیم نال بُرا سلوک نہ کریں۔ 23جیکر تُوں اِینویں کریں تے او میڈے تُوں فریاد کرݨ تاں مَیں ضرور اُنہاں دی سُنڑساں۔ 24مَیں وڈی کاوڑ ءچ تُہاکُوں تلوار نال مروا ڈیساں تے تُہاڈے ذالیں بیوہ تے تُہاڈے بال یتیم تھی ویسن۔

25جیکر تُوں میڈے لوکاں ءچوں کہیں غریب کُوں قرضہ ڈیویں تاں اُوندے تُوں سُود نہ گِھنیں۔

26جیکر تُوں آپنڑے ہمسائے دی چادر گِروی رکھیں تاں سِجھ لہوݨ تُوں پہلے واپس کر ڈیویں، 27کیوں جو اُوندے کولھ سمنڑ کیتے صرف اِیہو چادر ہے۔ وَل او کیا گِھن تے سمسی؟ تے جِیں ویلے او میڈے تُوں فریاد کریسی تاں مَیں اُوندی سُنڑساں کیوں جو مَیں مہربان ہاں۔

نذرانے دے بارے ءچ قانُون

28خُدا کُوں بُرا بھلا نہ آکھیں، نہ آپنڑی قوم دے سردار اُتے لعنت کریں۔

29تُوں ویلے سر میکُوں آپنڑے کھیت تے باغ دی پیداوار ءچوں نذرانے پیش کریں تے آپنڑا پلیٹھی دا پوتر میڈے کیتے مخصوص کریں2۔ 30آپنڑے ڈانداں، بھیڈاں تے بکریاں دے پلوٹھے وی میکُوں ڈیویں۔ جانور دا پلوٹھا سَت ڈینہہ آپنڑی ماء نال راہوے تے اٹھویں ڈینہہ میکُوں ڈے ڈِتا ونجے۔

31تُساں میڈے مخصوص تے مُقدّس لوک ہوسو، اِیں کیتے اِیہو جِیہے جانور دا گوشت نہ کھوائے جِینکُوں کہیں جنگلی جانور پھاڑ سٹیا ہووے۔ اِیہو جِیہا گوشت کُتیاں دے اگُوں کھاوݨ کیتے سَٹ ڈیوائے۔