خرُوج 12

فسح دی عید

1رب العالمین مِصر ءچ مُوسیٰ تے ہارُون کُوں آکھیا، 2”ہُنڑ تُوں ایہ مہینہ تُہاڈے کیتے سال دا پہلا مہینہ ہوسی۔ 3بنی اِسرائیل دی پُوری جماعت کُوں ڈساؤ جو اِیں مہینے دے ڈاہویں ڈینہہ ہر گھر دا سربراہ آپنڑے خاندان کیتے بھیڈ یا بکری دا لیلا گِھنے۔ 4جے خاندان دے افراد پُورا لیلا کھاوݨ کیتے گھٹ ہووݨ تاں او آپنڑے سبھ تُوں قریبی ہمسائے نال رَل تے لیلا گِھننڑ۔ تُساں ہر ہِک بندے دے کھاوݨ دی مقدار دے مطابق لیلے دا حساب لوائے۔ 5تُہاڈا چُنڑیا ہویا لیلا بے عیب تے ہِک سال دا نَر بچّہ ہووے۔ او بھیڈ یا بکری دا لیلا تھی سگدے۔

6مہینے دے چوڈھویں ڈینہہ تئیں اُوندی ڈیکھ بھال کرو۔ اُوں ڈینہوار بنی اِسرائیل دی پُوری جماعت سِجھ لہندے ویلے آپنڑے آپنڑے لیلے ذبح کرے۔ 7ہر خاندان آپنڑے جانور دی کُجھ رَت گِھن تے جِتھاں لیلا کھادا ویسی، اُونکُوں اُوں گھر دے دَر دی درسال دے اُتلے تے سجے کھبے پاسے لاوے۔ 8ضروری ہے جو لوک لیلے کُوں بُھن تے اُوں رات ای کھاوݨ۔ نال ای او کوڑے ساگ پتر تے بے خمیری روٹیاں وی کھاوݨ۔ 9لیلے دا ماس کچا نہ کھوائے، نہ اُونکُوں پانڑی ءچ بڑکائے بلکہ یکے جانور کُوں سر، پیراں تے اندر دے حصیاں سمیت بھاہ تے بُھنائے۔ 10لازم ہے جو یکا گوشت اُوں رات کھادا ونجے۔ جے سویل تئیں کُجھ گوشت بچ ونجے تاں اُونکُوں ساڑ ڈیوائے۔ 11کھاندے ویلے سفر کیتے آپنڑی تیاری کر رکھائے، آپنڑی جُتی پاتی رکھائے تے ہتھ ءچ سوٹی پکڑے ہوئے جلدی نال کھوائے۔ ایہ رب العالمین دی تعظیم ءچ منائی ونجنڑ آلی فسح دی عید1 ہے۔

12مَیں اُوں رات مِصر ءچوں لنگھساں تے پلیٹھی دے ہر بال کُوں جانُوں مار ڈیساں، بھانویں اِنسان دا ہووے یا ڈنگر دا۔ اِینویں مَیں مِصر دے یکے دیوتیاں دے خلاف عدالت کریساں کیوں جو رب العالمین مَیں ہاں۔ 13پر تُہاڈے گھراں اُتے لگی ہوئی رَت تُہاڈا خاص نشان ہوسی۔ جیہڑے جیہڑے گھر دے دَر اُتے مَیں او رَت ڈیکھساں اُونکُوں چھوڑ تے لنگھ ویساں۔ جِیں ویلے مَیں مِصر اُتے حملہ کریساں تاں ہلاک کر ڈیوݨ آلی آفت تُہاڈے اُتے نہ آسی۔ 14ایہ ڈینہہ تُہاڈے کیتے یاد رکھنڑ آلا ڈینہہ ہوسی۔ اِینکُوں نسل در نسل تے ہر سال، مَیں رب العالمین دی خاص عید دے طور تے منائے۔

بے خمیری روٹی دی عید

15سَت ڈینہہ تئیں تُساں روٹی خمیر دے بغیر کھاونڑی ہے۔ پہلی ڈینہوار آپنڑے گھراں ءچوں یکا خمیر کڈھ ڈیوائے۔ جیکر کوئی اِنہاں سَت ڈینہاں دے دوران خمیری روٹی کھاوے تاں اُونکُوں بنی اِسرائیل ءچوں کڈھ ڈیوائے۔ 16اِیں عید دی پہلی تے ستویں ڈینہوار مُقدّس اِجتماع کرائے۔ اِنہاں سارے ڈینہاں ءچ کوئی کم نہ کرائے صرف آپنڑے کھانڑے تیار کرائے۔ 17بے خمیری روٹی2 دی عید مناوݨ لازم ہے کیوں جو اُوں ڈینہوار مَیں تُہاڈے لشکر کُوں مِصر ءچوں کڈھ آساں۔ اِیں کیتے اِیں ڈینہوار کُوں ہر سال نسل در نسل منائے۔ 18پہلے مہینے دی چوڈھویں ڈینہوار دی شام تُوں گِھن تے ہِکویہویں ڈینہوار دی شام تئیں بے خمیری روٹی کھوائے۔ 19سَت ڈینہوار تئیں تُہاڈے گھراں ءچ خمیر نہ ہووے۔ جیہڑا وی اِیں دوران خمیر کھاوے اُونکُوں بنی اِسرائیل دی جماعت ءچوں کڈھ ڈِتا ونجے، بھانویں او اِسرائیلی ہووے یا پردیسی۔ 20غرض اِیں عید دے دوران خمیر نہ کھوائے، جِتھاں وی تُساں راہندے ہیوے اُتھاں روٹی خمیر دے بغیر ای کھوائے۔“

پہلی فسح

21وَل مُوسیٰ بنی اِسرائیل دے سارے بزُرگاں کُوں سڈوا تے آکھیا، ”ونجو آپنڑے خانداناں کیتے بھیڈ یا بکری دے لیلے چُنڑ تے اُنہاں کُوں فسح دی عید کیتے ذبح کرو۔ 22زُوفے3 دا گُچھا گِھن تے اُونکُوں اُوں رَت ءچ بوڈ ڈیوائے جیہڑی مُنگر ءچ ہوسی۔ وَل اُونکُوں گِھن تے رَت درسال دے اُتے تے سجے کھبے لوائے۔ سویل تئیں کوئی آپنڑے گھرُوں نہ نِکلے۔ 23جِیں ویلے رب العالمین مِصریاں کُوں مارݨ کیتے مُلک ءچوں لنگھسی تاں او درسال دے اُتے تے سجے کھبے لگی ہوئی رَت ڈیکھ تے اُنہاں گھراں کُوں چھوڑ ڈیسی۔ او ہلاک کرݨ آلے فرشتے کُوں اِجازت نہ ڈیسی جو او تُہاڈے گھراں ءچ وَنج تے تُہاکُوں ہلاک کرے۔

24تُساں آپنڑی اولاد سمیت ہمیشاں اِنہاں ہدایات اُتے عمل کرائے۔ 25ایہ رسم اُوں ویلے وی ادا کرائے جِیں ویلے اُوں مُلک ءچ داخل تھی ونجو جیہڑا رب العالمین تُہاکُوں ڈیسی۔ 26تے جِیں ویلے تُہاڈے بال تُہاڈے کنُوں پُچھنڑ جو ’اساں ایہ عید کیوں منیندے ہیں؟‘ 27تاں اُنہاں کُوں اکھائے جو ’ایہ فسح دی قُربانی ہے جیہڑی اساں رب العالمین کُوں پیش کریندے ہیں کیوں جو جیہڑے ویلے رب العالمین مِصریاں کُوں ہلاک کریندا پِیا ہا تاں اُوں ساکُوں زندہ چھوڑ ڈِتا‘۔“

ایہ سُنڑ تے بنی اِسرائیل خُدا کُوں سجدہ کیتا۔ 28وَل اُنہاں سبھ کُجھ اُونویں ای کیتا جِینویں رب العالمین مُوسیٰ تے ہارُون کُوں ڈسایا ہا۔

29ادھی رات کُوں رب العالمین فرعون بادشاہ تُوں گِھن تے جیل دے قیدیاں تئیں مِصریاں دے سبھ پلیٹھی دے بالاں کُوں جانُوں مار ڈِتا۔ جانوراں دے پلوٹھے وی مر گئے۔ 30فرعون، اُوندے افسر تے مِصر دے سارے لوک رات کُوں اُٹھی تے زور زور نال رووݨ پِٹنڑ لگ پئے کیوں جو مِصر ءچ ایجھا کوئی گھر نہ ہا جِتھاں کوئی نہ مریا ہووے۔

اِسرائیلیاں دی ہجرت

31اجنڑ رات ای ہئی جو فرعون مُوسیٰ تے ہارُون کُوں سڈوا تے آکھیا، ”ہُنڑ تُساں تے باقی بنی اِسرائیل میڈی قوم ءچوں نِکل ونجو تے آپنڑی درخاست دے مطابق رب العالمین دی عبادت کرو۔ 32جِینویں تُساں آکھیا ہیوے آپنڑیاں بھیڈاں بکریاں تے ڈاند گائیں کُوں وی آپنڑے نال گِھن ونجو تے میڈے کیتے وی دُعائے خیر کرائے۔“

33باقی مِصریاں وی بنی اِسرائیل کُوں زور ڈے تے آکھیا، ”جلدی نال مُلک ءچوں نِکل ونجو نہ تاں اساں سارے مر ویسوں۔“

34بنی اِسرائیل دے مَلے ہوئے اٹّے ءچ خمیر نہ ہا۔ اُنہاں اُونکُوں اٹّا مَلنڑ دے تھانواں ءچ رکھ تے آپنڑے کپڑیاں ءچ ولھیٹ گِھدا تے سفر کریندے ویلے آپنڑے مونڈھیاں اُتے رکھ گِھدا۔ 35بنی اِسرائیل مُوسیٰ دی ہدایات اُتے عمل کر تے آپنڑے مِصری ہمسائیاں دے کولھ گئے تے اُنہاں کنُوں کپڑے تے سونے چاندی دیاں شیواں منگیاں۔ 36رب العالمین اُنہاں لوکاں اُتے مِصریاں کُوں مہربان کر ڈِتا ہا، اِیں کیتے مِصریاں اُنہاں دی درخاست مَن گِھدی۔ اِینویں بنی اِسرائیل مِصریاں کُوں لُٹ گِھدا۔

37بنی اِسرائیل رعمسِیس شہر تُوں نِکل تے سُکات پُج گئے۔ عورتاں تے بالاں دے علاوہ اُنہاں دے کوئی چِھی لکھ مرد ہَن۔ 38او آپنڑے بھیڈاں بکریاں تے ڈاند گائیں دے وڈے وڈے اِجڑ وی نال گِھن گئے۔ بہُوں سارے اِیہو جِیہے لوک وی اُنہاں نال نِکلے جیہڑے اِسرائیلی نہ ہَن۔ 39رستے ءچ اُنہاں اُوں بے خمیرے اٹّے دیاں روٹیاں بنڑائیاں جیہڑا او نال گِھن تے نِکلے ہَن۔ اٹّے ءچ خمیر اِیں کیتے نہ ہا جو اُنہاں کُوں اِتنی جلدی مِصر ءچوں کڈھ ڈِتا گِیا جو او آپنڑے کیتے کھانڑا تیار نہ کر سگے۔

40بنی اِسرائیل چار سو ترِیح سالاں تئیں مِصر ءچ ریہے۔ 41جڈاں چار سو ترِیح سال پُورے تھئے، ٹھیک اُوں ڈیہنوار رب العالمین دا ایہ لشکر مِصر ءچوں نِکلیا۔ 42اُوں خاص رات رب العالمین خود پہرا ڈِتا تاں جو بنی اِسرائیل مِصر ءچوں نِکل سگنڑ۔ اِیں کیتے بنی اِسرائیل کیتے لازم ہے جو او نسل در نسل اِیں رات کُوں مناوݨ کیتے رب العالمین دی تعظیم ءچ جاگدے راہوݨ۔

فسح دی عید کیتے ہدایتاں

43رب العالمین مُوسیٰ تے ہارُون کُوں آکھیا، ”فسح دی عید دے اصُول ایہ ہِن:

کہیں وی پردیسی کُوں فسح دی عید دا کھانڑا کھاوݨ دی اِجازت نئیں۔ 44جیکر تُساں کہیں غُلام کُوں مُل گِھن تے اُوندا ختنہ کیتے تاں او فسح دا کھانڑا کھا سگدے۔ 45پر پردیسیاں تے مزدُوراں کُوں فسح دا کھانڑا کھاوݨ دی اِجازت نئیں۔ 46ایہ کھانڑا ہِکے گھر دے اندر کھاونڑا ہے۔ نہ تاں گوشت گھر تُوں باہر گِھن تے وَنجائے تے نہ لیلے دی کہیں ہڈی کُوں توڑائے۔ 47لازم ہے جو بنی اِسرائیل دی پُوری جماعت ایہ عید مناوے۔

48جیکر کوئی پردیسی تُہاڈے نال راہندے تے رب العالمین دے ناں تے فسح دی عید ءچ شامل تھیوݨ چاہوے تاں لازم ہے جو پہلے اُوندے خاندان دے ہر مرد دا ختنہ کیتا ونجے۔ وَل او اِسرائیلی آلی کار کھانڑے ءچ شامل تھی سگدے پر جِیندا ختنہ نہ تھیّا ہووے اُونکُوں فسح دا کھانڑا کھاوݨ دی اِجازت نئیں۔ 49اِیہو شرع ہر ہِک اُتے لاگو تھیسی بھانویں او اِسرائیلی ہووے یا پردیسی۔“

50یکے بنی اِسرائیل اِینویں ای کیتا جِینویں رب العالمین مُوسیٰ تے ہارُون کُوں آکھیا ہا۔ 51اُوں ڈینہوار رب العالمین سارے بنی اِسرائیل کُوں خانداناں دی ترتیب دے مطابق مِصر ءچوں کڈھ آیا۔