Santhali Project
लुक 21
रेङगेच् रा़ँडि मायजिवाक् दान
(माथाय १२:४१-४४)
आदो जिसु बेङगेत् राकाप्काते किसा़ँड़ होड़को दान सुनदुकरे आकोवाक् दान दोक्होकाने ञेलकेत्कोवा। आर मित्टेन रेङगेच् रा़ँडि मायजिउ ओनारे बारया तामबा सिकि दोक्होकाने ञेल केदेया, आरे मेनकेदा, सा़रि सा़रिगेञ मेतापेकाना, नुय रेङगेच् रा़ँडि मायजिउगे जोतोको खोन बा़ड़तिये दोहोकेदा। एनते नोको जोतो दो आकोवाक् सारेड़ोक् धोन खोन दानको दोहोकेदा, मेनखान नुय मायजिउ दो आयाक् ओकुला़नाक् खोन जा उडिच्गे ताहेंकानताय जोतोगेये दोहोकेदा, हें, आयाक् सानाम आ़सुलोक्आक्गे।
जुग मुचा़त् दिन रेयाक् चिनहा़को
(माथाय २४:१-४१; मा़रकुस १३:१-३१)
आर आदोम होड़ कोयजोङ ओड़ाक् रेयाङको रोड़ेत् ताहेंकाना, चेत्लेका मोज धिरिको आर दान आकात् जिनिसकोते साजाव आकाना मेनते, उनरे जिसुइ मेनकेदा, “नोवाको ओनेपे ञेलेत्कानाक् रेयाक् दो दिनको दाराकाना ओने उनरे मित् धिरि हों एटाक् धिरि चेतानरे बाङगे बा़गि ओचोक्आ, ओने ओकाटाक् बाङ छोडाव ञुरहा़क्।”
आदोको कुलि केदेया, “हेंदा गुरु, नोवाको दो तिस होयोक्आ? आर नोवाको होयोक् ला़गिदोक्रे चिनहा़ दो चेत्?”
आदो जिसुइ मेतात्कोवा, “मेन सोनतोरोक्पे, जेमोन आलोपे बुला़उ ओचोक्, एनते आ़डि होड़ इञ ञुतुमते हेच्कातेको मेना, इञ कानगेया़ञ, आर ओकते दो सोर आकाना, ओनको तायोमते आलोपे चालाक्आ। आर ला़ड़हा़इको आर हुलमालकोपे आँजोमलेरे आलोपे बिलबिला़उक्आ, एनते नोवाको होय माड़ाङोक् दो जा़रुड़गेया, मेनखान मुचा़त् दो बाङ होय होदोक्आ।”
उनरे ओनको होड़े ला़इयात्कोवा, “मित् जा़त दो एटाक् जा़त उपा़रते आर मित् राजोसटि दो एटाक् राजोसटि उपा़रतेको तेङगोना, हेड़ान बोतोरगे धा़रति लाड़ावक्आ, आर जायगा जायगारे आकाल आर माहामा़रिको होयोक्आ, आर सेरमा खोन बोतोरानाक्को आर माराङ चिनहा़को होयोक्आ।” “मेनखान नोवाको जोतो लाहारे दो इञाक् ञुतुम खा़तिरते आपेरे हातको लागावा आरको खेदपेया, सुना़गोग आर हाजोतकोरेको सोपरोतपेया, आर राजाको आर दिसा़म चाक्लावको सामाङरेपे इदि ओचोक्आ। ओना दो आपे ला़गित् गोहा एमोक् आ़तगे होयोक्आ। ओनाते आपेयाक् मोनरे बाड़े निट जोङपे रोड़ दोगोक् ला़गित् आलोपे चिन्ता़ माड़ाङजोङा चेत्ले मेना मेनते। एनते इञगे मोचा आर आकेलिञ एमापेया, ओने ओकाटाक् आपे बिरुदरे तेङगोनको तेङगो दाराम से रोड़ ता़क्किच् बाको दाड़ेयाक्। मेनखान एङगा आपाको, बोयहाको, पेड़ाको, आर गातेको होतेतेगेपे सोपरोत ओचोक्आ, आर आपे मोदरेन आदोमको दोको गोच् ओचोपेया। आर इञाक् ञुतुम इया़ते जोतो होड़को कुरुदापेया। मेनखान आपेयाक् बोहोक् रेयाक् मित्टेच् उप् हों बाङगे लोकसानोक्आ। आपेयाक् सोबोरितेगे जिविपे लाबजोङा।”
“मेनखान पालटोन फा़दकोते जेरुसालेम घेरावक्कानपे ञेललेरे, खान बाडायपे ओना रेयाक् उजा़ड़ोक् दो सोर आकाना मेनते। उनरे जिहुदा़ दिसा़मरे ताहेनको दो बुरुतेको ञिरजोङमा, आर नागराहा भितरिरे ताहेनको दोको ओडोक चालाक्मा, आर दिहा़तरे ताहेनको दो ओनारे आलोको बोलोक्मा। एनते ओनाको दो हालाहा़लि रेयाक् दिनकोगे, एनते ओल आकात् जोतोवाक्को जेमोन पुरा़उक्। ओनाको दिनरे भा़रति होड़मोको आर गिदरा़ नुनुवाकोकानकोरे दो हाय हाय, एनते धा़रतिरे माराङ दुरलोय आर नोको होड़कोरे एदरेगे होयोक्आ, आर तारवाड़ि धारतेको गुरोक्आ आर जोतो दिसा़मको ठेनको चालोनोक्आ, आर जेरुसालेम दो जिहुदि बाहरेरेनको होतेते लेबेत् गा़ँजा़उक्आ, जिहुदि बाहरेरेनकोवाक् ओकतेको आ़उरि पुरा़उक् हा़बिच्। सिञ चाँदो, ञिंदा़ चाँदो आर इपिलकोरे दो चिनहा़को होयोक्आ आर धा़रतिरे दो जा़त जा़तकोरे हादोसगे होयोक्आ, जालापुरि आर ढेवको रेयाक् हुदहुदते, होड़कोवाक् जिवि दो ओटाङोक्ताकोवा, धा़रतिरे दाराकानाक्को रेयाक् बोतोर आरको केकलेसेदोक्आ, एनते सेरमा रेयाक् दाड़ेको दालदालावक्आ। उनरे मानवा होपोन दो आ़डि दाड़े आर ठोनोकानते रिमिलरे हिजुक् कानको ञेलेया। मेनखान नोवाको होयोक् एहोबोक्रे सोजहेते तेङगोनपे आर बोहोक् राकाबतापे, एनते आपेयाक् बाञचावक् दो हेच् सोरोक्काना।”
लोवा दारे खोन सिखा़उना
(माथाय २४:३२-३५; मा़रकुस १३:२८-३१)
आदो जिसु मित्टेच् फेने ला़इयात्कोवा, “लोवा दारे आर सानाम दारेको ञेलपे, ओनाको सागेनलेनरे, ओना ञेलते आपेतेगेपे बाडायेदा निरोन दिन सोरगेया मेनते। ओनकागे आपे हों ओनाको होयोक्कानपे ञेललेरे बाडायपे इसोराक् राज दो सोर आकाना मेनते।”
“सा़रिगेञ मेतापेकाना, नोवाको जोतो आ़उरि होयोक् हा़बिच् नोवा पिड़हिरेनको दो ओहोगेको पारोम चाबालेना। सेरमा आर धा़रति दो चाबाक्आ, मेनखान इञाक् काथाको दो ओहोगे चाबालेना।”
“मेनखान आपनार दो सोनतोराकान ताहेनपे, बाङखान पासेच् जोम तुरेदोक्ते, ञुबुलुक्ते आर जियोन रेयाक् दा़ँदिते मोन तेनोक्तापे, आर ओना दिन दो आचकागे ओडाव पा़सि लेका आपेरे हेच् पाड़ावक्आ। एनते ओना दिन दो धा़रतिरे ताहेनकान सानामकोरे ओनकागे हिजुक्आ। मेनखान आपे दो सानाम ओकते कोयजोङ तुलुच् जागवाराकाय ताहेनपे, जेमोन ओनाको सानाम हिजुक् ला़गिदोक् कानाक्को खोनपे पासकावक् आर मानवा होपोन सामाङरेपे तेङगो दाड़ेयाक्।”
जिसु दिना़मगे सिञ दो कोयजोङ ओड़ाक्रेये चेत्आकोकान ताहेंकाना। आर ञिंदा़ दो जा़इतुनको मेताक् बुरुते ओडोकसेनकातेये ताहें आङगाक्कान ताहेंकाना। सानाम होड़को दो जोतोगे आ़डि सेताक्रे जिसु ठेन कोयजोङ ओड़ाक्तेको हिजुक्कान ताहेंकाना आँजोमताय ला़गित्।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.