Santhali Project
लुक 20
आयाक् एकतिया़रि रेयाङे कुलिओचोक्कान
(माथाय २१:२३-२७; मा़रकुस ११:२७-३३)
आदो जिसु मित् दिन कोयजोङ ओड़ाक्रे होड़कोय चेत्आकोकान आर भागे सोमबाते पोरचाराकोकान ताहेंकानरे माराङ नायकेको आर आ़न गुरुको दो मुरुबिको साँवतेको हेच् सोरेना, आरको मेतादेया, “ला़इयालेमे ओका एकतिया़रिते नोवाको दोम का़मियेदा, से नोवा एकतिया़रि एम आकावात्मेयिच् दोए ओकोय काना?”
आदो जिसुइ रोड़ रुवा़ड़ात्कोवा, “इञ हों मित् काथाञ कुलिपेया, ला़इया़ञपे, जोहानाक् बा़प्तिसमा दो सेरमा सेच् खोन ताहेंकाना से मानवा खोन?”
ओनको दो आको मोतोरे हुदिस गुना़न बाड़ाकातेको मेनकेदा, “आबोबो मेनले खान, सेरमा सेच् खोन, एनडेरेमाय मेन चाक् बापे पा़तिया़वादेया? मेनखानबो मेनले खान, मानवा सेच् खोन, एनडेरेमा जोतो दिसा़म होड़ धिरितेको तिञबोन, एनते जोहान दो ना़बिये ताहेंकाना मेनते जोतो होड़गेको खा़टि आकावाना।” आदोको रोड़ रुवा़ड़ादेया, “बाले बाडाया ओका खोन चोङ।”
आदो जिसुइ मेतात्कोवा, “एनडेखान इञ हों बा़ञ ला़इयापेया ओका एकतिया़रिते नोवाकोञ का़मियेदा।”
बेपा़तिया़र दारखा चाचासको रेयाङ फेन
(माथाय २१:३३-४६; मा़रकुस १२:१-१२)
आदो जिसु होड़को नोवा फेन ला़इयाकोय एहोप् एना, “मित् होड़ दो दारखाय बागवानकेदा आर चाचासको ठेन बा़इसा़उ ओटोकाते ढेर दिन ला़गित् एटाक् दिसा़मतेये चालावेना। आदो दारखा सामटाव दिन सेटेरेन खान ओनको चाचासको ठेन मित्टेन गुतिये कोल केदेया, जेमोन दारखा बागवान रेयाक् जो रेयाक्को एमाय, मेनखान चाचासको दो उनि दालकेदेते एकेन तिको कोल गोत्कादेया। आदो आरहों एटाक् गुतिये कोल केदेया, मेनखान उनि होंको दाल उर केदेया, बेआ़बरुककाते एकेन तिको कोल गोत्कादेया। आदो आरहों तेसारिच्ए कोल केदेया, मेनखान उनि हों दाल घावकातेको ओडोक गोत्कादेया। खान दारखा बागवानरेन किसा़ँड़े मेनकेदा, चेत्इञ चेकाया? इञरेन दुला़ड़िया़ होपोनगेञ कोलेया, जा़निच् उनि दोको मानोतेया। मेनखान चाचासको दो उनिको ञेलकेदे खान आको मोदरेको चेपेत्एना, नुय कानगेयाय ओवारिस दो, देलाबोन गोजेया, जेमोन आ़इदा़रि दो आबोवाक्गे होयोक्।”
खानगे दारखा बागवान बाहरेते ओडोक गिडिकातेको गोच् केदेया। आदो तोबे दारखा बागवानरेन किसा़ँड़ दो चेत्ए चेकाकोवा?
उनि दो हेच्काते ओनको चाचासकोय मारावकोवा, आर दारखा बागवान दो एटाक्कोय एमाकोवा। आदो नोवा आँजोमकातेको मेनकेदा, ओना दो आलो बाड़े होयोक्मा।
मेनखान जिसु दो बेङगेत्आत्कोतेये मेतात्कोवा। एनडेखान नोवा ओल आकानाक् दो चेत्काना?
“ओकाटाक् धिरि, ओड़ाक् बेक्नावकोको निहा़ँत गिडिकात्,
ओनागे कोनाच रेयाक् आसोल धिरि दो होयेना।”
ओना धिरिरे ञुरुक् मित्के मित् होड़ दोको गेजेर उता़रोक्आ आर जाहाँयरे ओना ञुरुक्, उनि दोए होलोङ उता़रोक्आ।
का़इसा़र खाजना एमाय रेयाङ
(माथाय २२:१५-२२; मा़रकुस १२:१३-१७)
आदो आ़न गुरुको आर माराङ नायकेको इना़ घा़ड़िच्गे उनिरे हात लागावको मेनवाना, मेनखान होड़कोको बोतोरात्कोवा एनतेको बुजहा़उकेदा आको रेयाङगे नोवा फेन दोए रोड़केदा मेनते। आदोको ता़नखिकेदेते भिदिया़कोको कोलकेत्कोवा, ओने ओनको आकोते भागेको उदुगोक्कान ताहेंकान, जिसुवाक् काथाको साबताया मेनते जेमोन दिसा़म चालाविच् हा़किम गोबोल आर एकतिया़रिरेको सोपरोते आ़तको ञामकान ताहेंकाना। आदोको कुलि केदेया, “ए गुरु, आलेले बाडाया ठिक ठिकेम रोड़ेदा आरेम चेत्आकोकाना आर मेंत्हाँ दो बाम बेङगेत्आक्काना, बिचकोम इसोराक् होर सा़रियाक्गेम चेत्आकोकाना। का़इसा़र दो खाजना एमोक् गानोक्ताबोना से बाङा?”
मेनखान जिसु दो ओनकोवाक् फोरफुनदि बाडाय ओरोमकेत्तेये मेतात्कोवा,
“मित्टेच् सिकि उदुक्आ़ञपे, नोवारे दो ओकोयाक् मुठा़न आर ञुतुम ओल मेनाक्आ?” ओनकोको मेनकेदा, “का़इसा़राक्।”
आदो जिसुइ मेतात्कोवा, “एनडेखान का़इसा़राक् दो का़इसा़र एमकातायपे, आर इसोराक् दो इसोरगे एमायपे।”
खानगे होड़को सामाङरे काथा दो बाको साप् दाड़ेयात्ताया आर उनियाक् रोड़ रुवा़ड़ते हाहाड़ायेनतेको हापेयेना।
जिवेत् बेरेदोक् आर बापलाक् रेयाङ कुलिजोङ
(माथाय २२:२३-३३; मा़रकुस १२:१८-२७)
आदो सा़दुकिको मोदरेन तिन उडिच् होड़ चोङ जिसु ठेनको हेच्एना, ओने ओनकोको मेन, बाङमा जिवेत् बेरेदोक् दो बा़नुक् आनाङ। आरको कुलि केदेया, “ए गुरु मोसेये ओल ओटोआकावात्बोना, जाहाँयरेन बा़हुवान दादाततेत्ए गुजुक् आर गिदरा़ बाको ताहेनताय खान बोकोततेत् दो हिलिततेत्ए दोहोयेया आर दादाततेत् ला़गित् बोंसे तेङगोकोवा। आदो एयाय बोयहाको ताहेंकाना। आर पा़हिलिच् दो बा़हुवानते बिन गिदरा़वानगेये गोच्एना। आदो दोसारिच् उनिये साङघाकेदेया। आर इना़काते तेसारिच्, आर ओनकागे ओनको एयाय होड़ बेगोर गिदरावानतेगेको गोच्एना। तायोमते उनि मायजिउ होंए गोच्एना। आदो एनडेखान जिवेत् बेरेदोक्रे उनि मायजिउ दो ओनको मोदरे ओकोयटाक्रेन ओड़ाक् होड़े होयोक्आ? एनते ओनको एयाय होड़गे चोङ ओड़ाक् होड़ मेनतेको दोहोलेदे।”
आदो जिसुइ मेतात्कोवा, “नोवा जुगरे होड़को दोको बा़हुजोङकाना आरको जाँवाँयोक्काना। मेनखान हाना जुग रेयाक् आर गोच्को खोन जिवेत् बेरेदोक् रेयाक् बाखरा ञाम ला़गित् लेक बुजहा़उक्को दो बा़हु हों बाको बा़हुजोङा, आर जाँवाँय हों बाको जाँवाँयोक्आ। एनते गोच् हों बाको गुजुक्आ आरदो, एनते दुत बाराबा़रिको ताहेना आर जिवेत् बेरेदोक्रेन होपोनको होयेनते इसोररेन होपोन कानाको। मेनखान गोच्को जिवेत् बेरेदोक् रेयाक् दो मोसे होंचोय सोदोराकात् जा़नुम झा़वा़ ठेनाक् काथारे ओने उनरे प्रोभु दो आबराहामरेन इसोर आर इसाहाकरेन इसोर आर जाकोबरेन इसोरे मेतायकान। उनि दो गोच्कोरेन इसोर दोए बाङ काना, मेनखान जिवेत्कोरेनगे एनते सानामकोगे उनि ला़गित्को जिवेत्गेया।”
आदो आदोम आदोम आ़न गुरुकोको रोड़ रुवा़ड़ादेया, “ए गुरु, भागेगेम रोड़ आकादा।” एनते जाहानाक् कुलिये ला़गित् आरदो बाको दिललाक्आ।
मा़सि दो ओकोयरेन होपोन कानाय?
(माथाय २२:४१-४६; २३:१-७; मा़रकुस १२:३५-४०)
आदो जिसुइ मेतात्कोवा, चेकातेको मेनेदा, मा़सि दो दा़उदरेन होपोन कानाय? एनते दा़उदमा आच्गे चोङ सेरेञको रेयाक् पुथिरेये मेनेत्,
“प्रोभु दो इञरेन प्रोभुए मेतादेया,
इञाक् एतोमरे दुड़ुप्मे,
आमरेन बा़इरिको
आमाक् जाङगा लेबेदोक् गाँडो आ़उरिञ होय ओचोको हा़बिच्।”
“दा़उदमा उनिगे प्रोभुए मेतायकान, आदो चेकाते उनिरेन होपोन कानाय?”
आ़न गुरुको बिरुदते चेतावना
(माथाय २३:१-३६; मा़रकुस १२:३८-४०)
आदो जोतो होड़को आँजोमकान ताहेंकानरे जिसु दो आच्रेन चेलाकोय मेताकोवा, “आ़न गुरुको खोन सोनतोरोक्पे, ओने ओनको तिलपा़ङ तालपाङ आङगरोप होरोक्काते दाँड़ाँ बाड़ाय आर हाट बाजारकोरे जोहार आर सुना़गोगरे लाहा दुड़ुप्आक्को आर भोजरे मानोत रेयाक् ठा़ँइरे दुड़ुबोक्को कुसिक्कान। आर रा़ँडि मायजिउकोवाक् ओड़ाक् दुवा़रको जोम उजा़ड़ेत् आर होड़ बेदा झा़ल झा़लको कोयजोङ, ओनको दो बा़ड़ति सा़जा़योक् हुकुमको ञामा।”
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.