Santhali Project
लुक 19
मा़सुल उक्ठा़विच् साखाय रेयाङ
आदो जिसु जेरिखोरे बोलोकातेये सेन पारोमोक्कान ताहेंकाना। आर ञेलमे साखाय ञुतुमान मित् होड़, मुखिया़ मा़सुल उक्ठा़विच् आर किसा़ँड़ होड़े ताहेंकाना। आर जिसु ओकोयटाक् कानाय मेनते ञेलेये खोजकान ताहेंकाना, मेनखान गादेल होड़ इया़ते बाय दाड़ेयादा, एनते गेडरागेये ताहेंकाना। खानगे ञिर लाहाकाते ञेलेया मेनते मित्टेच् लोवा दारेरेये देच्एना, एनते ओंडेगेये सेन पारोमोक् ला़गिदोक्कान ताहेंकाना। आदो जिसु ओना ठा़ँइरेये सेटेरेन खान बेङगेत् राकाप्कातेये मेतादेया, “ए साखाय मा हारेफारे फेड होदोक्मे, एनते तेहेञ दो आम ओड़ाक्रे ताहेन होयोक्तिञा।”
खानगे हारेफारे फेडहोत्एनते रा़सका़तेये आताङ दाराम केदेया। आदो ओना ञेलकाते जोतो होड़को काराच्कुरुजोक्कान ताहेंकाना, मेनकेदाको, “मित्टेन का़इ होड़ ठेने बोलो आकाना डेराक् ला़गित्।”
आर साखाय दो तेङगोयेनते प्रोभुये मेतादेया, “ञेलमे, ए प्रोभु इञाक् धोन रेयाक् आदहा दो रेङगेच् ओरेच्कोञ एमाको काना, आर जाहाँयाक् जाहानाक् फेसादकातेञ हाताव आकात्ताकोवा मेनखान, पोन दोबोड़िञ एम रुवा़ड़काताको काना।”
आदो जिसु उनिये मेतादेया, “तेहेञ दो नोवा घारोंजरे बाञचावगे होय आकाना, एनते नुय हों आबराहामरेन होपोन कानगेयाय। एनते मानवा होपोन दो आत् आकानको ञाञाम आर बाबाञचावगेये हेच् आकाना।”
जिमा़ टाका रेयाङ फेन
(माथाय २५:१४-३०)
आदो ओनाकोको आँजोमकान ताहेंकान जोखेच् मित्टेन फेने ला़इ जुटुच्आत्कोवा, जेरुसालेम सोररेये ताहेंकान इया़ते आर इसोराक् राज दो नेनाहाँक् सोदोर गोदोक्आ मेनतेको बुजहा़वेत् ताहेंकानते। ओनातेये मेनकेदा, “मित्टेन मानोतान गुसटिरेन होड़ मित्टेन सा़ङगिञ दिसा़मतेये चालावेना, मित्टेन राजोसटि ञामजोङ आरे रुवा़ड़ हिजुक् ला़गित्।” आदो आच्रेन गेलगोटेन गुतिको होहो आ़गुकाते गेल मोहोरे एमात्कोवा आरे मेतात्कोवा, “फेर बेपार हाताड़पे आ़उरिञ हिजुक् हा़बिच्।” मेनखान उनिरेन रायोतको दोको कुरुदायकान ताहेंकाना, आर उनि तायोमते मुरुबिको कोलकातेको रोड़ गोत्कादा, बाङमा, “बाले रेबेन काना उनि होड़ आले चेतानरेये राजोक् दो।”
आदो राजोसटि ञामकातेये रुवा़ड़ हेच्एन खान ओनको गुतिको ओने ओनको टाकाय एम आकावात्को ताहेंकान आच् ठेन होहो आ़गुय हुकुमकेदा, जेमोने बाडाय ञाम फेर बेपारकाते ओकोय तिना़क्को लाब आकादा मेनते। आदो पा़हिलिच् हेच् सोरकातेेये मेनकेदा, “ए प्रोभु, आमाक् मोहोर दो आर गेल मोहोर होंए जुटुच् ओचोवाकादा।” आदोए मेतादेया, “बेस आकादाम, ए भागे गुति थोड़ारे पा़तिया़रेम ताहेंकानते गेल नागराहा चेतानरे एकतिया़रियान होयोक्मे।” आदो दोसारिच् हेच्कातेये मेनकेदा, “आमाक् मोहोर दो, ए प्रोभु, मोंड़ें मोहोरे होय ओचोवाकादा।” आदो उनिये मेतादेया, “आम हों मोंड़ें नागराहा चेतानरे एकतिया़रियान होयोक्मे।” आदो एटागिच् हेच्कातेये मेनकेदा, “ए प्रोभु, नोक्ओंयताम मोहोर, ओने ओकाटाक् उरमा़लरेञ दोहो बाय आकात् ताहेंकान, एनतेञ बोतोरामकान ताहेंकाना, आँट होड़ कानतेम, ओका बाम दोहोलेत् ओनाम हालाङेदा, आर ओका बाम एरलेत् ओनाम इरेत्आ।” आदोए मेतादेया, “एया बा़ड़िच् गुति, आमाक् मोचा रेयाक् काथातेगेञ बिचा़रमेया। बाडायकान ताहेंकानाम आँट होड़ का़ना़ञ, ओकाटाक् बा़ञ दोहोलेत्, ओनाञ हालाङेदा, आर ओकाटाक् बा़ञ एरलेत्, ओनाञ इरेत्आ? एनडेखान चेदाक् इञाक् टाका दो बेङकरे बाम बा़इसा़उलाक्आ? आदो हेच्काते सुद सालाक् इञ आ़दा़इकेया होनाङ।” आदो सोररे तेङगोवाकानकोय मेतात्कोवा, “ओना मोहोर दो उनि ठेन खोन हातावपे आर गेल मोहोर मेनाक्तायिच् एमायपे।” खानगेको मेतादेया, “ए प्रोभु, उनिमा गेल मोहोर चोङ मेनाक्ताय।” “मेतापे का़ना़ञ, मेनाक्ताको मित्के मित् होड़ दोको एमाकोवा, मेनखान बा़नुक्ताको होड़ दो मेनाक्ताकोवाक् हों ओनको ठेन खोन रेजोगोक्आ। आर ओनको इञरेन बा़इरिको ओने ओनको आको चेतानरेञ राजोक् बाको रेबेनलेन, नोंडे आ़गुकोपे आर इञ सामाङरे माक् गोच्कोपे।”
जिसु जेरुसालेमतेये बोलोक्कान
(माथाय २१:१-११; मा़रकुस ११:१-११; जोहान १२:१२-१५)
आदो नोवाको मेनकाते जिसु दो ओनको लाहा लाहातेये चालाव इदियेना, जेरुसालेमते राकाप् चालाक्कान। आर जा़इतुन ञुतुमानाक् बुरु ठेनाक् बेथफागे आर बेथानिया़ सोरेन खान, चेलाको मोदरेन बार होड़े कोलकेत्किना, मेतात्किनाय, “आबेन सामाङ सेनाक् आतोते दो चालाक्बेन, ओनारे बोलोक्तोरागे मित्टेच् गादहा होपोन तोल आकादेबेन ञामेया, ओने उनिरे ओकोय होड़ हों तिस हों बाको देच्आकान, आर राड़ाकाते आ़गुयेबेन। आर जाहाँयगेये कुलिलेबेन, बाङमा चेत् इया़तेबेन राड़ायेदे काना? खान नोनका मेनबेन, प्रोभु दो नुय जा़रुड़ाकावादेया।”
आर उनकिन कोलकिन दो मेतात्किन लेकागे सेनकातेकिन ञाम केदेया। आदो गादहा होपोनकिन राड़ायेदेकान ताहेंकानरे उनिरेन किसा़ँड़ दोको मेतात्किना, “गादहा होपोन दो चाक्बेन राड़ायेदे काना?”
उनकिन दोकिन मेनकेदा, “प्रोभु दो नुय जा़रुड़ाकावादेया।” आदो जिसु ठेनकिन इदि केदेया, आर आ़किनाक् किचरिच् गादहा होपोनरे पालानकाते जिसु किन देच् केदेया। आरे चालाक्कान ताहेंकानरे आकोवाक् किचरिच् होर होरतेको आटेत् इदिकेदा।
आदो सोरोक्कान ताहेंकानरे जा़इतुन बुरु रेयाक् आनाड़गो ठेन आ़डि गादेल चेलाको रा़सका़काते आँट आड़ाङते इसोर सासारहावको एहोप्एना आकोको ञेल आकात् ताहेंकान जोतो दाड़े का़मिको इया़ते, मेनकेदाको, “भोरानगेयाय प्रोभु ञुतुमते दाराकानिच् राजा दो, सेरमारे सुलुक आर चोट उता़रकोरे ठोनोक।”
आदो गादेलरेन आदोम आदोम फा़रिसिको मेतादेया, “ए गुरु आमरेन चेलाको धोमकावकोम।”
आदोए रोड़ रुवा़ड़ात्कोवा, “मेतापे का़ना़ञ, नोको हापेगेको ताहेंलेन खान, धिरिको होहोया।”
जिसु जेरुसालेमे राक्आक् कान
आदोए सोरेन खान नागराहा ञेलकाते राक्आतेये मेनकेदा, “निया़ दिनरे आम हों सुलुकाम ला़गिदोक्आक्कोम बाडायले खान होनाङ, मेनखान नितोक् ओनाको दो आम खोन दानाङ आकाना। एनते नोनकान दिन आमरे हिजुक् काना ओने उनरे आमरेन बा़इरिको दो आमको पा़चरि एसेत्मेया, आरको घेराव आ़चुरमेया, आर सानाम सेच् खोनको एसेत् चिपा़मेया, आरको ओत बाराबा़रिमेया, आम आर आमरे मेनाक्को आमरेन गिदरा़को हों आर आमरे धिरि चेतान धिरि हों बाको बा़गियाक्आ, एनते हिरिलेत्मे ओकते दो बाम बाडाय ओरोमलाक्आ।”
कोयजोङ ओड़ाक्ए साफायेत्
(माथाय २१:१२-१७; मा़रकुस ११:१५-१९; जोहान २:१३-१६)
आर जिसु कोयजोङ ओड़ाक्रे बोलोकाते आ़खरिञको लागा ओक्डोके पोरतोनकेदा, मेतात्कोवाय, “सोसतोररे ओल आकाना इञाक् ओड़ाक् दो कोयजोङ ओड़ाक् होयोक्आ, मेनखान आपे दो ओनापे डा़कु दाँदेराकादा।”
आर दिना़मगे जिसु कोयजोङ ओड़ाक्रेये चेत्आकोकान ताहेंकाना आर माराङ नायकेको आर आ़न गुरुको आर दिसा़म होड़कोरेन मुखिया़को हों उनि गोजे ला़गित् दावको ञाम बाड़ायेत् ताहेंकाना। मेनखान चेत्को चेकाया ओना दो बाको ञामतोत् दाड़ेयादा, एनते जोतो होड़ उनिरे जामाड़ाकानको आँजोमेत् ताहेंकानताया।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.