Santhali Project
लुक 18
रा़ँडि मायजिउ आर बिचा़रिच् रेयाक् फेन
आदो जिसु मित्टेन फेने ला़इयात्कोवा, सानाम घा़ड़िच्को कोयजोङ आर आलोको मोन खाटोक्गे जा़रुड़ काना मेनते, “मेनखान मित्टेन नागराहारे मित्टेन बिक्चा़रिच्ए ताहेंकाना, ओने उनि दो इसोर बाय बोतोरायकान आर होड़ हों बाय बा़सुताकोकान ताहेंकान। आर ओना नागराहारे मित्टेन रा़ँडि मायजिवे ताहेंकाना आर उनि ठेन सेन सेनतेये मेतायकान ताहेंकाना, दे इञरेन मुदोइ खोन बिचा़र छिन्डा़उका़ञमे।” “आदो तिनउडि दिन हा़बिच् चोङ बाय रेबेनलेना, मेनखान तायोमते दो मोने मोनेतेये मेनकेदा, इसोर बा़ञ बोतोरायकान आर होड़ बा़ञ बा़सुताकोकानरे हों, एनरेहों उनि रा़ँडि मायजिवे आ़ड़िसेदिञकानतेञ बिचा़र छिन्डा़उकाया। बाङखान सेसरे पासेच् हेच् हेच्तेये आ़ड़िस चाबायिञ।”
आर प्रोभुए मेनकेदा, “आँजोमपे उनि बेधोरोम बिक्चा़रिच् चेत्ए मेनेदा। खान इसोर दो सिञ ञिंदा़को दोहायायकान आच्रेन बाछावको रेयाक् बाय बिचा़र छिन्डा़उकाताकोवा ओने ओनको ला़गित्ए जिवि हाताड़ेत्कान? मेतापे का़ना़ञ, हाकोपाकोगे ओनकोवाक्ए बिचा़र छिन्डा़उकाताकोवा। एनरेहों मानवा होपोने हेच्लेनरे, चेत् धा़रतिरे बिसवा़से ञामा?”
फा़रिसि आर मा़सुल उक्ठा़विच् रेयाक् फेन
आर आदोम आदोमको ओने ओनको दो भागेगेयाको मेनतेको भोरसा आकान आर एटाक्को दोको निहा़ँतेत्को ताहेंकान, जिसु नोवा फेने ला़इयात्कोवा “बार होड़ कोयजोङ ला़गित् कोयजोङ ओड़ाक्तेकिन राकाप् चालावेना, मित् दो फा़रिसि आर एटाक्इच् दो मा़सुल उक्ठा़विच्, उनि फा़रिसि दो तेङगोकाते आच् मोनेरे नोनकाय कोयाना, ए इसोर गुनमानाव जोहाराम का़ना़ञ, आर आर होड़को लेकाञ बाङकानते, लुलुटको, बेपा़तिया़रको, लोटघा़क्टिको, से नुय मा़सुल उक्ठा़विच् लेका हों बाङ। हापतारे बार छोट इञ उपा़सेदा, जाहानाक्कोगे होयोक्कानतिञ सानामाक्गे गेल हा़टिञ रेयाक् मित् हा़टिञ इञ एमोक्काना।” “मेनखान मा़सुल उक्ठा़विच् दो फाराकरे तेङगोवाकान सेरमासेच् बेङगेत् राकाप् हों बाय दिललाक्आ, मेनखान कोड़ाम चेटाक् चेटाक्आतेये मेनकेदा, ए इसोर, माँयाँवा़ञमे बाड़े, इञ का़यिच् दो।” “मेतापे का़ना़ञ, उनि एटागिच् बाङकाते बिचकोम उनिगे सा़रि ओचोवाकान आयाक् ओड़ाक्तेये रुवा़ड़ चालावेना, एनते आच्ते उसुलोक् मित्के मित् होड़ दोए चोपोत् ओचोक्आ, आर आच्ते चोपोदोक्इच् दोए उसुल ओचोक्आ।”
जिसु का़टिच् गिदरा़कोय भोराकोकान
(माथाय १९:१३-१५; मा़रकुस १०:१३-१६)
आदो बाले गिदरा़को होंको आ़गु सोरायकान ताहेंकाना जेमोने जोटेत्को आर चेलाको दो ओना ञेलकातेको धोमकावेत्कोकान ताहेंकाना। मेनखान जिसु दो ओनको देलावात्कोतेये मेनकेदा, “का़टिच् गिदरा़को इञ ठेन हेच् ओचोवाकोपे आर आलोपे मानाकोवा, एनते इसोराक् राज दो नोनकानकोवाक् कानगेया। सा़रि सा़रिगेञ मेतापेकाना, जाहाँयगे का़टिच् गिदरा़ लेका इसोराक् राज बाय आताङ, उनि दो ओनारे ओहोगेये बोलोलेना।”
किसा़ँड़ होड़ रेयाङ
(माथाय १९:१६-२९; मा़रकुस १०:१७-३०)
आदो मित्टेन मुखिया़ होड़ जिसुये कुलि केदेया, “हेंदा भागे गुरु, चेत् इञ चेकालेरे जायजुग जियोन दोञ आ़इदा़रिजोङा?”
जिसु दोए मेतादेया, “चेदाक् भागे दोम मेता़ञकाना? ओकोय हों बाको भागेया मित् गोटेन छाडा, मेताक्मे, इसोरगे। हुकुमको दोम बाडायगेया, आलोम लाटघाटा, आलोम खुना, आलोम कोमबड़ोया, एड़े गोहा आलोम एमा, एङगाम आ़पुम गानावकिनमे।”
उनिये मेनकेदा, “नोवाको जोतोञ दोहो आ़गु आकादा गिदरा़ खोनगे।”
जिसु दो ओना आँजोमकातेये मेतादेया, “नित हों मित् गोटेच्ते दोम खाटो बाढोगेया, जाहानाक्कोगे मेनाक्ताम जोतो आ़खरिञमे आर रेङगेच् ओरेच्को हा़टिञाकोमे, आदो सेरमारे धोन होयोक्तामा, आर देला पाँजाञमे।” मेनखान उनि दो नोवाकोय आँजोमकेत् खान बेबा़ड़िच्ए भाबनायेना, एनते आ़डितेत्गे किसा़ँड़े ताहेंकाना।
आदो जिसु उनि ञेलकातेये मेनकेदा, “धोन मेनाक्ताको होड़ दो हेड़ान मुसकिलते इसोराक् राजतेको बोलोक्आ। मित्टेन किसा़ँड़ होड़ इसोराक् राजतेये बोलोक् खोन दो मित्टेन उँट, सुइ भुगा़क्तेये बोलोताबोक्गे आलगावा।”
खानगे आँजोमकेत् होड़को मेनकेदा, “एनडेखान दो ओकोये बाञचाव दाड़ेकोक्आ?”
मेनखान जिसुइ मेनकेदा, “मानवा खोन बाङ हुइदाड़ेयाक्आक्को दो इसोर ठेन खोन हुइ दाड़ेयाक्आ।”
आदो पातरासे मेनकेदा, “ञेलमे, आले दो आपनाराक्को बा़गिकाते आमले पाँजा आकात्मेया।”
जिसु दोए मेतात्कोवा, “सा़रिगेञ मेतापेकाना, ओकोय इसोराक् राज इया़ते ओड़ाक्, से ओड़ाक् होड़, से बोयहाको, से एङगा आपा से गिदरा़को बा़गि आकात्कोवा, ओनको मित्के मित् होड़ दो, नोवा जुगरे आयमा दोबोड़ आर हानापुरिरे जायजुग जियोनको ञामजोङा।”
जिसु आयाक् गुजुक् रेयाङ तेसार छोटे ला़इ लाहायेत्
(माथाय २०:१७-१९; मा़रकुस १०:३२-३४)
आदो जिसु ओनको गेलबारको आच् ठेन होहो सोरकेत्कोतेये मेतात्कोवा, “ञेलपे जेरुसालेमतेबोन राकाप् चालाक्काना, आर ना़बिको होतेते ओल आकान सानामाक्को दो मानवा होपोनरे पुरा़उक्आ। एनते उनि दो जिहुदि बाहरेरेनको ठेने सोपरोत ओचोक्आ, आरे सिड़ोग ओचोक्आ, आरे पोसड़ा माङगाल ओचोक्आ आरको थोवाया। आर कोडराकातेको गोजेया आर पे माँहाँ हिलोक्रेये जिवेत् बेरेदोक्आ।”
मेनखान ओनको दो नोवाको रेयाक् चेत् हों बाको बुजहा़उलाक्आ आर नोवाको काथा दो ओनको खोन दानाङगे ताहेंयेना आर ओना रोड़ाक्को दो बाको ओरोमलाक्आ।
जिसु काँड़ाँ होड़े बोगेयेदे
(माथाय २०:२९-३४; मा़रकुस १०:४६-५२)
आर नोनका होयेना, जिसु जेरिखोते हेच् सोरोक्कान ताहेंकानरे मित्टेन काँड़ाँ होड़ होर आड़ेरे दुड़ुप्काते कोयये ञामकान ताहेंकाना। आर गादेल होड़को पारोम चालाक्कान आँजोमकातेये कुलियाना चेत् चेकाक् काना मेनते?
आदोको ला़इयादेया, नासारेतरेन जिसुइ सेन पारोमोक् काना।
खानगे होहोवातेये मेनकेदा, “ए जिसु दा़उदरेन होपोन माँयाँवा़ञमे बाड़े।”
आदो लाहाते चालाक्कान ताहेंकानको दोको धोमकावकेदेया जेमोने हापेकोक् मेनखान उनि दो आरतेत्गे आँटतेये होहो इदिकेदा, “ए दा़उद होपोन माँयाँवा़ञमे बाड़े।”
आदो जिसु तेङगोकातेये हुकुमकेदा आच् ठेन आ़गुये ला़गित्, आरे हेच् सोरेन खाने कुलि केदेया,
“चेत् इञ चेकावामेम ञामकाना?” उनि दोए मेनकेदा, “ए प्रोभु जेमोन इञ ञेञेल।”
जिसुइ मेतादेया, “मा ञेञेलमे आमाक् बिसवा़सगेये बोगे आकात्मेया।”
खान इना़ तापतेगेये ञेल गोत्केदा आर इसोर सारहाव साबासिवाते उनि सोङगेतेये चालावेना। आर जोतो होड़ ओना ञेलकाते इसोरको सारहावकेदेया।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.