Santhali Project
लुक 17
का़इ, बिसवा़स आर का़मि
जिसु आच्रेन चेलाकोय मेतात्कोवा, “का़इ ओक्चोवाक् बिडा़उको दो खा़टिगे हिजुक्आ। मेनखान ओकोय होतेते ओनाको हिजुक्कान उनिरे दो हाय। नोको का़टिच्को मोदरे मित्गोटेने ता़किच् ओचोये खोन दो बिचकोम होटोक्रे जानति धिरि आकावायते जालापुरिरेये खादले ओचोक्गे उनि ला़गित् पोरहोवाना।”
“मेन सोनतोरजोङपे, आमरेन बोयहाय का़इ लेखान धोमकावेम, आरे कासतावलेन खान, इका़कातायमे। आर दिनरे एयाय धाव आम बिरुदरेये का़इ लेखान आर एयाय धाव आम ठेन आ़चुर हेच्कातेये मेन, कासतावक् का़ना़ञ, एनडेखान इका़कातायमे बाड़े।”
आदो आपोसतोलको प्रोभुको मेतादेया, “बिसवा़स बाड़े जुटुच्आलेमे।”
खानगे प्रोभुइ मेनकेदा, “तुड़ि जाङ इना़क् बिसवा़स ताहेनतापे खान एनडेखान नोवा लोवा दारेपे मेनकेया, रेहेत् सुदहा़ तोदोक्ते जालापुरिरे रोहोयोक्मे आर ओना दोए बातावकेतापेया।”
मेनखान आपे मोदरे ओकोय मेनाया, “ओने उनि दो सिया़क् से गुक्पि गुतिये ताहेनताय आर गोलाम गोडा खोन ओड़ाक्ते हेच्लेनरेये मेताय, देला जोजोम दुड़ुप् होदोक्मे? बिचकोम बाय मेताया, केदोक् तोयनाता़ञमे आर पाठे केटेच्काते साप्सोरा़ञमे, आ़उरिञ जोमञुय हा़बिच्, आर ओना तायोमते आम दोम जोमञुया? हुकुमादेयाक्कोय का़मिकेत्ते, चेत् उनि गुतियाक् गुने मानावताया? ओनकागे आपे हों सानाम हुकुमाकावात्पेयाक्कोपे का़मिले खान मेनपे, ओका़जुवा़ गुतिको कानाले; ओकाटाक् का़क्मि लेक ताहेंकानतालेया, इना़गेले का़मिआकादा।”
जिसु गेल गोटेन मुरहुच्जोम होड़े बोगेयेत्को
आदो जिसु जेरुसालेमतेको चालाक्कान ताहेंकानरे जिसु दो सा़मा़रिया़ आर गा़लिल तालातेये सेन पारोमोक्कान ताहेंकाना। आर मित्टेच् आतोतेये बोलोक् जोखेच् गेल गोटेन मुरहुच् जोम होड़को दाराम केदेया, ओने ओनको सा़ङगिञरेको तेङगोयेन, आर आँट आड़ाङतेको होहोकेदा, “ए जिसु गुरु माँयाँवालेमे।”
आदो ञेलकेत्कोतेये मेतात्कोवा, “दो सेनकाते नायकेको ठेन उदुगोक्पे।” खानगे चालाक् चालाक्तेगेको साफायेना। आर ओनको मोदरेन मित् होड़ दो बोगेयेने ञेलकेत्ते आ़डिआँट आड़ाङाते इसोर सारहाव साबासिवातेये रुवा़ड़ेना, आर उनियाक् जाङगा फेडरे ताबेरेनतेये गुनमानाव जोहारादेया, आर उनि दो सा़मा़रिया़ होड़े ताहेंकाना। आदो जिसुइ रोड़ रुवा़ड़केदा, “गेलके गेल दो बाको साफालेना? ओनको आरे गोटेच् दोको ओकायेना? नुय एटाक् जा़तरेन छाडा इसोर सारहाव एमाय ला़गित् रुवा़ड़ोक्को दो ओकोय हों बाको ञामलेना? आदो जिसु उनिये मेतादेया, मा बेरेत्काते चालाक्मे, आमाक् बिसवा़सगेये बाञचाव आकात्मेया।”
इसोराक् राज हिजुक् रेयाङ
(माथाय २४:२३-२८,३७-४१)
आदो इसोराक् राज तिस हिजुक्आ मेनते फा़रिसिकोको कुलिकेदे खान जिसुइ रोड़ रुवा़ड़ात्कोवा, इसोराक् राज दो आ़रिबा़न्धिक् लेका दो बाङ हिजुक्काना, आर मेन हों बाको मेना, नोक्ओंय नोंडे, से, हाने हानडे, एनते ञेलपे, इसोराक् राज दो आपेरेगे।
आदो चेलाकोय मेतात्कोवा, नोनकान दिनको हिजुक्आ ओने उनरे मानवा होपोन रेयाक् दिनको मोदरे मित् दिन ञेञेलपे गागोजोक्आ, मेनखान बापेञेला। आरको मेतापेया, हाने हानडे, नोक्ओंय नोंडे, आलोपे चालाक्आ आर आलोपे पाँजाकोवा, एनते बिजलि चेत्लेका बिजलिलेरे सेरमा रेयाक् मित् नाखा खोन सेरमा रेयाक् एटाक् नाखा हा़बिच् मालकावक्आ ओनकागेये होयोक्आ मानवा होपोन हों आयाक् दिनरे। मेनखान पा़हिल दो आ़डि ओकोच् दुक जोजोम आर नोवा पिड़हिरेनको ठेन निहा़ँत ओचोक् होयोक्ताया। आर चेत्लेका नोहावाक् दिनकोरे होयलेना, ओनकागे मानवा होपोन रेयाक् दिनकोरे हों होयोक्आ। ओनको दोको जोम ञुयेत्कान ताहेंकाना, बा़हुजोङकान ताहेंकानाको ओना दिन हा़बिच्, ओने नोहा जाहाजरेये बोलोयेन आर डुबा़दाक् हेच्काते सानामकोय नोसटोकेत्को। ओनकागे चेत्लेका लोत जोखेच्रे होयलेना, ओनको दोको जोम ञुयेत्कान, किरिञ आ़खरिञेत्कान, रोहोयेत्कान आरको ओड़ाक्एत्कान ताहेंकाना, मेनखान लोत सोदोम खोने ओडोक चालावेन दिनरे सेरमा खोन सेङगेल आर गोनधोक ए जा़ड़िकेत्ते सानामे नोसटोकेत्कोवा। ओनकागे मानवा होपोने सोदोरोक् दिनरे हों होयोक्आ।
एनहिलोक् दो जाहाँय छातरेये ताहेन आर आयाक् जिनिसको दो ओड़ाक्रे, उनि दो ओनाको इदितोराय ला़गित् आलोय फेडोक्मा, आर गोडारे ताहेनिच् हों ओनकागे तायोमाक्कोसेच् आलोय आ़चुर रुवा़ड़ोक्मा। लोत रिनिच् दिसा़येपे। जाहाँयगे आयाक् जिवि जोगावताये खोज, उनि दो ओनाय खुवा़वा, आर जाहाँयगेये खुवा़उताय, उनि दो ओना जिवेत्ए दोहोयताया। मेतापे का़ना़ञ, ओना ञिंदा़ बार होड़ मित् पारकोमरेकिन ताहेना, मित् होड़ दोए इदि ओचोक्आ आर दोसारिच् दोए बा़गि ओटोक्आ। बारया मायजिउ मित् जानतिकिन रिरित्आ, मित् दोए इदि ओचोक्आ आर एटागिच् दोए बा़गि ओचोक्आ। खेतरे बार होड़किन ताहेना, मित् दोए इदि ओचोक्आ आर एटागिच् दोए बा़गि ओटोक्आ।
आदोको मेतादेया, “हेंदा प्रोभु ओकारे?” जिसु दोए मेतात्कोवा, “जाहाँरेगे मा़ँड़िं ओंडेगे गिदि होंको जारवाक्आ।”
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.