Lu-ka 21

1Tũq angơìq iãq tơgùq, Pitrai bôh dơgrữq mơnuĩh mơda pioh jĩn pơnõq nhũ tơmã dơlãp adũq sàc talơvãt. 2Vloh Pitrai bôh sa aràc mơnuĩh kamơi vlơu rơbah dih pioh tơmã dua tleh jĩn tìt. 3Sì Pitrai đơp: “Iỡuq viãq, Pôgrũ đơp sì pơnõq adơi sơai thơu Làiq mơnuĩh kamơi vlơu rơbah nĩ song vuh tơmã lũ rlao avih dơgrữq mơnuĩh tơmo, 4kơyua avih dơgrữq mơnuĩh dih song va pioh tơmã dơgrữq kaya dơlah dơlai drơi hũ. Dòq mòq nĩ, mưng anĩh rơbah siẽuq drơi hũ, song pioh avih kaya mơnã sì mòq hũ.”

5Dơlãp tũq dơgrữq mơnuĩh ãn đơp mưng sàc talơvãt, làiq sàc talơvãt hũ pơsiàp mưng dơgrữq patơu mơkrơ siàp sì dơgrữq kaya pioh, nữn Pitrai pơđar: 6“Dơgrữq kaya sì pơnõq adơi sơai bôh nữn, ròq trôh harơi sì tũq nữn, ôh hũ dòq voh patơu halơi ròq hũ dãq pãq dlòc voh patơu tơmo nữn ôh kađòc jơlưh.” 7Tũq nữn, pơnõq nhũ tơnĩa Pitrai làiq: “Nữn yơh, ơ Pôgrũ, tũq halơi ròq hũ dơgrữq vruãq nữn, sì khrung krơi yơu halơi tũq dơgrữq vruãq nữn jẽq ròq tơviãq trôh?” 8Vloh Pitrai đơp làiq: “Iỡuq gơrhia huaĩq pơnõq adơi sơai tlah kaya ãt pa-gơla. Kơyua lũ mơnuĩh ròq mãq angãn Pôgrũ, sì đơp: ‘Mĩn la Kơu,’ sì ‘Tũq harơi luôĩq song jẽq.’ Juơi nao tui pơnõq nhũ. 9Vruãq tơmo, tũq pơnõq adơi sơai hmỡq đơp mưng kalìt mơsôh mơtãq sì ngãq gơprãh gơprĩc, nữn juơi huaĩq tơtơh, kơyua dơgrữq vruãq nữn iỡuq trôh hlơu, bôh làiq kaya luôĩq dũt ôh iỡuq la mư tũq nữn ôh.”

10Hadơi nữn, Pitrai đơp sì pơnõq nhũ: “Vual vơla nĩ ròq tơgùq jơdrãq wỡq vual vơla tơmo, sì lơgar nĩ jơdrãq sì lơgar dih. 11Ròq hũ vih dơgrữq kaya sađồq mơgơi voh tơnãh prõc sì lũ kaya ờq lơpa siẽuq, sigỡuq sì ruãq chuỡq sỡm-rơi dòq lũ anĩh. Ròq hũ dơgrữq nỡm krơi kir amir sì khrung krơi prõc mưng dlòc lơngĩq. 12Nữn hlơu dơgrữq vruãq nữn, anàq mơnuĩh ròq chẽq tơngãn pơnõq nhũ pãq dlòc pơnõq adơi sơai sì ròq mãq pakỡuq pơnõq adơi sơai, tũq pơjao pãq sàc pơtõm sì vuh tơmã sàc jam, va adơi sơai trôh pãq anãq dơgrữq Pitao sì pãq pô chahrơna lơgar prõc kơyua mưng angãn Pitrai. 13Kaya nữn ròq tơviãq jỡc hũ tũq lơwah luơi ga pơnõq adơi sơai va pơnuaĩq ngãq chưng. 14Yơu nữn, iỡuq ngãq gơnĩt dơlãp hatai pơnõq adơi sơai ôh pơkhrà rơchãc ngãq hayơu pioh pơnuaĩq dõc jơga rùp drơi, 15kơyua pôgrũ ròq vrơi ga pơnõq adơi sơai pơnuaĩq đơp sì kaya jãc rgơi nữn sì avih dơgrữq mơnuĩh sòq jơdrãq dì pơnõq adơi sơai ôh tũq halơi jơdrãq wỡq hẽla đơp pa-vlữq jỡc. 16Nữn pơnõq adơi sơai ròq tơviãq jỡc ròq kađòc pơjao kơyua mưng ami ama, pơnõq adơi sơai, gỡuq gãt sì ban mayơu, vloh nữn aràc ròq pa-mơtai sa tơkìq mơnuĩh dơlãp adơi sơai. 17Pơnõq adơi sơai ròq kađòc dơgrữq mơnuĩh mơvai lơmùq kơyua mưng angãn Pôgrũ. 18Nữn sa dãc bồq pãq dlòc akõq pơnõq adơi sơai kung ôh lơhiãq thĩt. 19Dlãp kaya gơjãp hatai ãt-ỡl drơi hũ, pơnõq adơi sơai ròq hũ iãq vơngãq yuà drơi.

20Nữn mơyah làiq tũq halơi pơnõq adơi sơai bôh palơi Je-ru-sa-lem kađòc wàc tòp dar kơyua mưng dơgrữq tơpuôl ling, vloh tũq nữn iỡuq thơu làiq kaya pa-lơhiãq palơi nữn song jẽq vloh. 21Tũq nữn, asơi dòq dơlãp phũm Ju-đe, iỡuq dỡuq pãq chỡq, asơi dòq dơlãp palơi, iỡuq tơviãq vẽq, sì asơi dòq pãq blàc hamã, juơi tơmã dơlãp palơi. 22Kơyua jơ tũq nĩ la dơgrữq harơi sãl đồq tơngãn pioh ga avih dơgrữq pơnuaĩq song hũ wãq tơviãq jỡc iỡuq viãq. 23Nữn, dleh dlàr ga mơnuĩh kamơi ãn mơtiàt sì dơgrữq mơnuĩh kamơi ãn vrơi ga anàq mõm dơlãp dơgrữq harơi nữn! Kơyua ròq hũ kaya dleh dlàr prõc dơlãp lơgar, sì kaya anõc mơvai prõc trỗt pãq dlòc sì vual vơla nĩ. 24Pơnõq nhũ ròq lơvuh mơtai pãq ala mơta đao sì pơnõq nhũ kađòc va nao ngãq halỗt vãq avih lơgar, sì palơi Je-ru-sa-lem ròq kađòc dơgrữq vual vơla lơniãu juãq jơlì tãl trôh tũq halơi dơgrữq vual vơla lơniãu hũ jỡc wil tãl.

25Ròq hũ dơgrữq nỡm krơi pãq dlòc ia harơi, ia vlàt sigỡuq sì dơgrữq pitỗq, sì ròq tơwir dlò, dơgrữq vual vơla pãq ala hlùq dòq dơlãp kaya ka-ùq ka-ãn kơyua mưng ia tơsìq sì sađồq mơgơi rơyàq tơgùq. 26Anàq mơnuĩh ròq sangỡq ta-rluơi kơyua huaĩq tơtơh sì dòq chàc dơgrữq kaya dleh dlàr ròq jẽq trôh dơlãp vual vơla pãq dlòc voh hlùq, kơyua dơgrữq gơnuar chơnuãq pãq dlòc lơngĩq ròq sơđô mơgơi. 27Hadơi nữn, pơnõq nhũ ròq bôh Anàq Mơnuĩh ròq trôh dơlãp sa-pỗc huãl sigỡuq sì gơnuar prõc sì kaya gơhluh prõc rlao. 28Nữn tũq dơgrữq vruãq nữn pơdòq tơviãq trôh, iỡuq tơgùq dữc sì angơìq tơgùq dlòc akõq drơi, kơyua kaya dõc pơ-tlah pơnõq adơi sơai hũ ãn trôh jẽq.”

29Pitrai đơp vrơi ga pơnõq nhũ sa pơnuaĩq pa-mơyơu: “Iỡuq iãq kayơu vãl sì avih dơgrữq kayơu tơmo. 30Tũq halơi nhũ tơviãq akhà halàq, nữn pơnõq adơi sơai thơu, dơlãp tũq ròq iãq bôh krơi, làiq vlàt tluỡiq ròq jẽq vloh. 31Kung yơu nữn, tũq pơnõq adơi sơai bôh dơgrữq vruãq nĩ ròq trôh, pơnõq adơi sơai iỡuq thơu làiq lơgar Yàc Pô Lơngĩq ròq jẽq. 32Iỡuq viãq, pôgrũ đơp pioh adơi sơai làiq rài hadơi nĩ viãq ròq ôh gãt tơpa tãl trôh tũq dơgrữq vruãq dih ròq tơviãq trôh. 33Lơngĩq sì tơnãh ròq gãt tơpa, nữn dơgrữq pơnuaĩq pôgrũ viãq hũ ròq ôh tũq halơi gãt tơpa.

34Nữn iỡuq rơmiãq jàc rùp drơi, pioh ga hatai pơnõq adơi sơai tlah kađòc gui tơrãq dơlãp vruãq bõc mơnhũm, kaya mơvũq mơvẽl sì dơgrữq kaya mơ-ôh rơchãc mưng rài nĩ, tơviãq jỡc harơi nữn pơlih dơvruh dơvrah pãq dlòc pơnõq adơi sơai 35yơu dãq jơlưh trỗt, kơyua kaya nữn la kaya ròq tơviãq trôh ga dơgrữq anàq mơnuĩh hadiuq pãq dlòc vãq vih voh hlùq. 36Nữn iỡuq mơ-uãh chơkhãq gãm, dơgrữq tũq jơ, iơu lakơu tồq ga pơnõq adơi sơai hũ tãl prãn pioh gãt tơpa avih dơgrữq kaya dleh dlàr nữn, sì pioh dòq dữc pãq anãq Anàq Mơnuĩh.”

37Yơu nữn la tơmã khrãh harơi, Pitrai pơto akhàt dơlãp sàc talơvãt, dòq trôh tũq jơ tlãp, hadơi sì tũq tơgùq đìq pãq chỡq angãn la Ô-li-ve Pitrai padơi dleh pãq đỡn sa mơlãp. 38Sì avih tãl aràc mơnuĩh mai trôh pãq Pitrai tũq sơdah mư-ờp pioh hmỡq Pitrai pãq dơlãp sàc talơvãt.