Lu-ka 22

1Adãt bõc Bẽn Ôh Voh Tapơi, hũ angãn la adãt Pơjũm Bõc Nao Gãt, ãn trôh jẽq. 2Dơgrữq mơnuĩh gơnuar pioh kaya duh talơvãt prõc sì mơnuĩh pơto voh-va ãn duah pơnẽq pa-mơtai Pitrai, kơyua pơnõq nhũ huaĩq vual vơla.

3Vloh Satan ãp tơmã Ju-đa, angãn la Is-ka-ri-ôt, la sa aràc dơlãp katih sa plôh dua aràc mơnuĩh gơnuar pơđar. 4Sì, nhũ nao trôh pãp, nhũ sì vơyai sì dơgrữq mơnuĩh gơnuar pioh kaya duh talơvãt prõc sì mơnuĩh apãt sa rơtôh ling pãq sàc talơvãt mưng ngãq hayơu nhũ pơlih hũ pơjao Pitrai ga pơnõq nhũ. 5Pơnõq nhũ sơh sơr viãq sì sa hatai vrơi ga nhũ jĩn. 6Nhũ sa hatai sì duah tũq lơwah pioh pơjao Pitrai ga pơnõq nhũ tũq ôh bôh vual vơla.

7Vloh harơi adãt bõc Bẽn ôh voh Tapơi ròq trôh, la harơi sì aràc iỡuq pioh pa-mơtai avo anàq adãt Pơjũm Bõc Nao Gãt. 8Pitrai pơđar Pier sì Jãng nao, sì đơp làiq: “Iỡuq nao rơchãc vẽq adãt Pơjũm Bõc Nao Gãt ga pơnõq drơi, pioh pơnõq drơi bõc sigỡuq.” 9Pơnõq nhũ đơp sì Pitrai: “Pôgrũ ưng pơnõq hlãq rơchãc kaya bõc pãq halơi?” 10Vloh Pitrai đơp làiq sì pơnõq nhũ: “Nĩ, tũq pơnõq adơi sơai ròq tơmã dơlãp palơi, sa aràc mơnuĩh lakơi gui va kadoh ia ròq pãp adơi sơai. Iỡuq nao tui mơnuĩh nữn tơmã dơlãp sàc sì sơai nữn nao tơmã. 11Sì adơi sơai ròq đơp sì pô sàc làiq: ‘Pôgrũ đơp ung: “Pãq adũq thuãi anĩh Pôgrũ pơlih bõc adãt Nao Gãt sigỡuq sì dơgrữq mơnuĩh mơgrũ Pôgrũ hũ dòq pãq hlơi?”’ 12Ung nữn ròq pơto ga adơi sơai sa adũq prõc dòq pãq adũq dlòc hũ lơĩh kaya angui. Iỡuq pồq kaya bõc pãq đỡn.” 13Vloh nữn, tũq ròq tơviãq nao, pơnõq nhũ bôh vruãq iỡuq drưh yơu Pitrai song đơp sì pơnõq nhũ. Nữn pơnõq nhũ rơchãc pơkhrà kaya bõc adãt Pơjũm Nao Gãt.

14Tũq jơ bõc ròq trôh, Pitrai dòq guh pãq ban, sì dơgrữq mơnuĩh gơnuar pơđar dòq guh sigỡuq sì Pitrai. 15Pitrai đơp sì pơnõq nhũ: “Kaya chơkhãq khiãng, Pôgrũ ưng bõc Adãt pơjũm bõc Nao Gãt nĩ sigỡuq sì pơnõq adơi sơai hlơu sì tũq Pôgrũ ãt pơđìq pơđua. 16Kơyua Pôgrũ đơp sì pơnõq adơi sơai thơu, làiq Pôgrũ viãq ròq ôh ngãq gơnĩt bõc adãt nĩ wỡq tãl trôh tũq adãt nữn hũ wil tãl dơlãp lơgar Yàc Pô Lơngĩq hũ.” 17Nữn hadơi sì tũq Pitrai mãq chơwàt, sì ỡn ngai, Pitrai đơp: “Iỡuq tồq mãq chơwàt nĩ sì pa-mơpha ga gỡuq. 18Kơyua Pôgrũ đơp sì pơnõq adơi sơai, mưng nĩ wỡq sa hadơi, Pôgrũ viãq ròq ôh mơnhũm voh nho nĩ, tãl trôh tũq lơgar Yàc Pô Lơngĩq trôh.” 19Hadơi sì mãq bẽn sì ỡn ngai, Pitrai pẽq sì vrơi ga pơnõq nhũ, đơp: “Nĩ la rùp phàp pôgrũ, kơyua pơnõq adơi sơai sì pơjao vrơi. Iỡuq ngãq kaya nĩ pioh sadơr trôh Pôgrũ.” 20Kung ngãq yơu nữn sì mãq chơwàt, hadơi sì tũq ròq bõc, Pitrai đơp: “Chơwàt nĩ la kaya hẽ grữh vơhrơu dơlãp dơrah pôgrũ, la drah ãt hõq tơviãq kơyua adơi sơai. 21Bôh làiq, iãq dih, plàq tơngãn mơnuĩh sòq jơdrãq pôgrũ hũ chẽq pãq dlòc ban sigỡuq sì pôgrũ. 22Kơyua làiq Anàq Mơnuĩh ròq ngãq tui yơu kaya song ngãq gơnĩt, nữn dleh dlàr ga mơnuĩh nữn, la mơnuĩh sòq jơdrãq dì Pitrai!” 23Pơnõq nhũ pơdòq tơnĩa gơlah dì gỡuq mơnuĩh yơu nữn pơlih hũ asơi nữn la mơnuĩh dơlãp tơpuôl pơnõq nhũ, la mơnuĩh ròq ưng ngãq gơnĩt vruãq nữn.

24Vloh yơu nữn, dơlãp tơpuôl pơnõq nhũ kung hũ pơnuaĩq pơrjai gỡuq pãq khrãh pơnõq nhũ mưng mơnuĩh halơi dơlãp pơnõq nhũ hũ iãq la prõc rlao avih. 25Vloh nữn, Pitrai đơp sì pơnõq nhũ: “Dơgrữq pitao ia lơgar angui kaya prãn khãc apãt akõq anàq mơnuĩh, sì dơgrữq mơnuĩh apãt gơnuar pãq dlòc vual vơla nữn hũ angãn la ‘mơnuĩh vrơi kaya anĩt.’ 26Nữn pơweh sì adơi sơai la ôh hũ yơu nữn. Vlữq wỡq làiq, mơnuĩh prõc rlao avih dơlãp pơnõq adơi sơai iỡuq tơviãq jỡc yơu mơnuĩh tìt rlao avih, sì mơnuĩh apãt akõq tơviãq jỡc yơu mơnuĩh duh vruãq. 27Kơyua mưng mơnuĩh halơi prõc rlao, mơnuĩh dòq guh bõc hẽla mơnuĩh duh vruãq? Ôh iỡuq la mơnuĩh dòq guh bõc yơh? Nữn vloh pôgrũ dòq pãq khrãh adơi sơai yơu sa aràc mơnuĩh duh vruãq. 28Nữn pơnõq adơi sơai la dơgrữq mơnuĩh song avih hatai tui sigỡuq sì pôgrũ dơlãp dơgrữq kaya lòc pôgrũ hũ. 29Pôgrũ kung vrơi ga pơnõq adơi sơai, yơu Ama pôgrũ song vrơi lơgar ga pôgrũ, 30pioh pơnõq adơi sơai pơlih hũ bõc mơnhũm sigỡuq sì ban Pôgrũ dơlãp lơgar Pôgrũ hũ, sì dòq guh pãq dlòc sơvan chahrơna sa plôh dua pơjẽh pơtiàt Is-ra-el.

31Ơ Si-môn, ơ Si-môn, iãq dih, Kamlai Sa-tan đồq tapơi pơnõq adơi sơai yơu vơdai mi. 32Nữn Pôgrũ song iơu lakơu ga sơai pioh ga voh-tui sơai ôh lơhiãq thĩt. Sì sơai, tũq song gơlàiq mai wỡq, iỡuq ngãq ga dơgrữq adơi sơai drơi prãn khãc.” 33Nữn Pier drơ sì Pitrai: “Talơvãt Yàc, hlãq rơchãc lơĩh nao sigỡuq sì Pitrai mưng dòq dơlãp sàc jam sì tãl trôh pãq kaya mơtai.” 34Nữn Pitrai đơp: “Ơ Pier, pôgrũ đơp sì sơai, harơi nĩ mơnũq tơno ròq ka ôh kơ-iòc, hlơu sì tũq sơai kơmlah tlàq bôh thơu Pôgrũ tlơu bãc.”

35Pitrai đơp sì pơnõq nhũ: “Tũq pôgrũ pơđar pơnõq adơi sơai nao nữn ôh va tui kadũc jĩn, kadũc vuh, hẽla chơkhõq kalìq juãq, pơnõq adơi sơai ôh siẽuq kaya hagĩq, iỡuq lơĩh?” Pơnõq nhũ drơ: “Ôh siẽuq hagĩq ôh.” 36Vloh Pitrai đơp wỡq sì pơnõq nhũ: “Nữn tũq nĩ, asơi hũ kadũc jĩn, iỡuq mãq vẽq, gãm sì hũ kadũc kung yơu nữn. Mơnuĩh halơi ka-ôh hũ đao, iỡuq pa-vlơi ao lơniãu drơi sì vlơi vẽq. 37Kơyua pôgrũ đơp sì pơnõq adơi sơai thơu làiq pơnuaĩq song hũ wãq nĩ iỡuq hũ tơviãq iỡuq viãq anĩh pôgrũ: ‘Sì nhũ kađòc pa-tơmã sigỡuq sì mơnuĩh ôh ngãq tui voh-va.’ Kơyua viãq dơgrữq pơnuaĩq đơp mưng pôgrũ iỡuq tơviãq jỡc wil tãl.” 38Vloh yơu nữn, pơnõq nhũ drơ: “Talơvãt Yàc, iãq nĩ, pãq nĩ hũ dua bẽq đao.” Pitrai đơp sì pơnõq nhũ: “Yơu nữn la tãl vloh.”

39Hadơi sì tũq tơviãq, Pitrai nao trôh pãq chỡq Ô-li-ve yơu lơđãp, dòq dơgrữq mơnuĩh mơgrũ kung nao tui Pitrai. 40Tũq song nao trôh anĩh, Pitrai đơp sì pơnõq nhũ: “Iỡuq iơu lakơu pioh tlah huaĩq kađòc tơmã dơlãp kaya ơniãi.” 41Pitrai tơviãq nao atah tlah mưng anĩh pơnõq nhũ pơgãp prah sa voh patơu, sì aguãl ta-ồq trỗt, Pitrai iơu lakơu, 42làiq: “Talơvãt Ama, mơyah làiq Ama ưng, lakơu suãq chơwàt nĩ tlah mưng Anàq. Bôh làiq yơu nữn, ôh iỡuq hatai ưng Anàq, vlữq wỡq, nữn tui hatai Ama ròq jỡc.” 43[Hũ sa aràc mơnuĩh gơnrơh mưng dlòc lơngĩq pabôh tơviãq pãq anãq Pitrai, pơtãl prãn ga Pitrai. 44Dòq dơlãp kaya dleh dlàr pơđìq pơđua, Pitrai iơu lakơu arèc-aròc, sì ia vơ-uh Pitrai tơviãq jỡc yơu dơgrữq dơrah tơ-ioh trỗt pãq ala hlùq.] 45Dơlãp tũq tơgùq dữc mưng anĩh iơu lakơu, Pitrai nao trôh pãq anĩh dơgrữq mơnuĩh mơgrũ, Pitrai bôh pơnõq nhũ ãn dòq pìq kơyua ka-ùq ka-ãn. 46Pitrai đơp sì pơnõq nhũ: “Hayơu pơnõq adơi sơai dòq pìq? Tơgùq iơu lakơu vẽq, pioh ga adơi sơai ôh kađòc tơmã dơlãp kaya ơniãi.”

47Tũq Pitrai ãn dòq đơp, iãq dih, hũ sa tơpuôl lũ sì mơnuĩh hũ angãn la Ju-đa, sa dơlãp sa plôh dua aràc mơnuĩh gơnuar pơđar, va akõq tơpuôl nhũ. Nhũ trôh jẽq Yàc Je-su pioh chũm Pitrai. 48Nữn Yàc Je-su đơp sì nhũ: “Ơ Ju-đa, sơai sòq jơdrãq Anàq Mơnuĩh mưng kaya chũm yơh?” 49Tũq dơgrữq mơnuĩh tòp dar Pitrai thơu vruãq jẽq tơviãq trôh, pơnõq nhũ tơnĩa: “Talơvãt Yàc, pơnõq hlãq hũ iỡuq poh wỡq mưng đao jỡc lơĩh?” 50Hũ sa aràc mơnuĩh dih dơlãp katih tơpuôl pơnõq nhũ ròq tãq halỗt mơnãq pô gơnuar pioh kaya talơvãt prõc hũ, sì tãq tloh tơnĩa gah hơnuãq mơnuĩh nữn. 51Nữn drơ wỡq làiq, Yàc Je-su đơp: “Iỡuq luơi kar nữn tãl vloh.” Sì tũq rawỡq tơnĩa nữn, Pitrai pasồq ga sơai nữn. 52Hadơi nữn, Yàc Je-su đơp sì dơgrữq mơnuĩh trôh mãq Pitrai, nữn la dơgrữq mơnuĩh gơnuar pioh kaya talơvãt prõc, sì dơgrữq mơnuĩh pô apãt akõq ling iãq sàc talơvãt, sì dơgrữq pô tơha, làiq: “Pơnõq ung trôh sì apãt đao sì gai mơjrà yơu mãq mơnuĩh tlẽq yơh? 53Dơgrữq harơi, tũq kơu dòq sigỡuq sì pơnõq ung dơlãp sàc talơvãt, pơnõq ung ôh vrơi tơngãn mãq kơu. Nữn nĩ la tũq jơ pơnõq ung hũ sì gơnuar prãn kaya sồp kơnãm.”

54Vloh, hadơi sì tũq pơnõq nhũ mãq Pitrai, pơnõq nhũ va nao, sì va trôh sàc mơnuĩh gơnuar pioh kaya talơvãt prõc. Dòq Pier nao tui hadơi Pitrai ơtah ơtah. 55Tũq nữn pơnõq nhũ ròq chôh sa-kơnãm apôi pãq khrãh làt blàc sì dòq guh sì gỡuq, nữn Pier kung dòq guh sigỡuq sì pơnõq nhũ. 56Tũq nữn, nai halỗt mơnãq kamơi dih, tũq bôh ung ãn dòq guh jẽq apôi nữn iãq mững gơnĩt di ung, nai đơp làiq: “Ung nĩ kung dòq sigỡuq sì mơnuĩh dih.” 57Nữn ung kơmlah, làiq: “Ơ sơai nai, hlãq ôh thơu ung nữn ôh.” 58Sa asĩt hadơi, hũ mơnuĩh tơmo, nữn bôh ung, sì đơp: “Sơai kung la mơnuĩh sigỡuq sì pơnõq nhũ.” Nữn Pier kơmlah làiq: “Nĩ sơai, ôh iỡuq hlãq.” 59Pơgãp sa tũq jơ hadơi, hũ sa aràc mơnuĩh tơmo wỡq tơra ngãq gơnĩt làiq: “Iỡuq la sơai nĩ kung dòq sigỡuq sì mơnuĩh dih, kơyua sơai nữn kung la vual vơla Ga-li-le.” 60Nữn Pier đơp: “Nĩ sơai dih, hlãq ôh thơu sơai ãn đơp hagĩq.” Mư tũq nữn, dơlãp tũq ung ãn dòq đơp, sa drơi mơnũq tơno kơ-iòc. 61Tũq nữn Yàc weh iãq Pier, sì Pier sơdor wỡq pơnuaĩq Yàc hũ, hayơu Pitrai ròq đơp sì drơi làiq: “Harơi nĩ, hlơu sì tũq mơnũq kơ-iòc, sơai ròq kơmlah pôgrũ tlơu bãc.” 62Sì tũq nữn ròq tơviãq nao pãq lơniãu, ung sia lơngũt.

63Dơgrữq mơnuĩh iãq chơkhãq Pitrai song tlao siẽq siẽl, poh atòc Pitrai. 64Kavỡq mơta Pitrai vloh, pơnõq nhũ đơp palòc Pitrai làiq: “Đơp hwơr vẽq! Asơi la mơnuĩh poh ung?”

65Pơnõq nhũ đơp sì Pitrai lũ pơnuaĩq đơp pơtãt sì tlao siẽq siẽl wỡq. 66Trôh tũq rìc sơdah mư-ờp, dơgrữq pô tơha dơlãp vual vơla, gãm sì dơgrữq mơnuĩh gơnuar pioh kaya duh talơvãt prõc sì dơgrữq mơnuĩh gơnuar pơto voh-va, ròq pơtõm gỡuq wỡq sì pơnõq nhũ va Pitrai trôh pãq Tơpuôl Pô chahrơna nhũ, 67nữn đơp: “Mơyah làiq ung la Yàc Dõc Pơ-tlah, nữn iỡuq vrơi pơnõq hlãq thơu.” Nữn Pitrai đơp sì pơnõq nhũ: “Mơyah làiq Kơu đơp sì pơnõq ung, viãq la pơnõq ung ôh pãc; 68Dòq mơyah làiq kơu tơnĩa, nữn viãq pơnõq ung ròq ôh drơ pơnuaĩq. 69Nữn mưng nĩ tãl trôh hadơi, Anàq Mơnuĩh ròq dòq guh gah hơnuãq gơnuar chơnuãq Yàc Pô-lơngĩq hũ.” 70Tũq nữn, pơnõq nhũ ròq đơp: “Yơu nữn, ung la Anàq Yàc Pô Lơngĩq yơh?” Vloh Pitrai vrơi pa-thơu ga pơnõq nhũ: “Mĩn pơnõq ung ãn đơp làiq kơu la Pitao nữn.” 71Yơu nữn pơnõq nhũ đơp: “Pơnõq drơi dòq iỡuq chàc mơnuĩh ngãq chưng hagĩq wỡq? Kơyua mĩn pơnõq drơi song hmỡq mưng chơbuai nhũ đơp tơviãq.”