Skip to content
BibleKenya

Roglai Bible Literal Text

Lu-ka 23

Avih tơpuôl pơnõq nhũ tơgùq dữc, va Pitrai trôh pãq anãq Phi-lat. Pơnõq nhũ pơdòq yãq Pitrai, làiq: “Pơnõq hlãq bôh mơnuĩh nĩ paluơ pa-gơla vual vơla pơnõq hlãq, sì mãq pakỡuq pơnõq nhũ pioh sơkãq jia ga Se-sa, sì pa-angãn krơi nhũ la Yàc Dõc Pơ-tlah, nữn la pitao.” Tũq nữn, Phi-lat tơnĩa Pitrai, làiq: “Hũ iỡuq sơai la Pitao vual vơla Ju-đa yơh?” Sì tũq drơ sì ung nữn, Pitrai đơp: “Mĩn ung song đơp yơu nữn.” Hadơi nữn, Phi-lat đơp sì dơgrữq mơnuĩh gơnuar pioh kaya duh talơvãt prõc sì tơpuôl lũ: “Kơu ôh bôh mơnuĩh nĩ hũ dlàiq hagĩq mưng rùp phuỗt ung nĩ.” Nữn pơnõq nhũ miẽt đơp làiq: “Mơnuĩh nĩ pasũl pachôh vual vơla, pơto akhàt vãq avih lơgar Ju-đe, pơdòq mưng lơgar Ga-li-le tãl trôh pãq anĩh nĩ.” Tũq Phi-lat hmỡq yơu nữn, ung tơnĩa khao Pitrai iỡuq lơĩh la vual vơla Ga-li-le. Tũq thơu làiq Pitrai dòq gah gơnuar apãt akõq Pitao He-rôt, ung nữn pơjao Pitrai ga pitao He-rôt, mĩn Pitao kung ãn dòq pãq palơi Je-ru-sa-lem dơlãp dơgrữq harơi nữn.

Tũq He-rôt bôh Yàc Je-su, ung nữn sơh sơr viãq kơyua ung nữn ưng pãp Pitrai mưng suơi vloh, kơyua song hmỡq đơp mưng Pitrai, sì ung nữn chơkhãq khiãng ưng iãq bôh krung krơi halơi nữn Pitrai song ngãq. Kơyua yơu nữn, ung nữn tơnĩa Pitrai dơlãp lũ pơnuaĩq, nữn Pitrai ôh drơ wỡq ga ung sa pơnuaĩq halơi. Dòq dơgrữq mơnuĩh gơnuar pioh kaya duh talơvãt prõc sì dơgrữq mơnuĩh gơnuar pơto voh-va dòq dữc pãq đỡn trôh tơnĩa lũ nữn yãq dlàiq Pitrai. Vloh gãm He-rôt sigỡuq sì tơpuôl ling ung nữn hũ sì tlao siẽq siẽl Pitrai, sì hadơi nữn tlao vlơi Pitrai, pa-chồq ao vơngà gơchràq ga Pitrai, ung nữn pơjao Pitrai wỡq ga Phi-lat. Tũq nữn, nữn He-rôt sì Phi-lat ròq tơviãq jỡc gỡuq mayơu sì gỡuq, dơlãp harơi nữn, kơyua halơu nữn dòq ãn kađòc kaya sòq drãq pãq khrãh dua gah mơnuĩh pơjẽh pơtiàt.

Pơtui hadơi wỡq, Phi-lat iơu pơjũm pơtõm dơgrữq mơnuĩh gơnuar pioh kaya duh talơvãt, dơgrữq mơnuĩh apãt akõq sì vual vơla, ung đơp sì pơnõq nhũ: “Pơnõq ung va mơnuĩh trôh ga kơu mơnuĩh lakơi nĩ paluơ pa-gơla vual vơla, sì iãq nĩ, hadơi sì tũq khao tơnĩa nhũ nữn pãq anãq pơnõq ung, kơu ôh duah bôh hagĩq dơlãp mơnuĩh nĩ sỗq dlàiq hagĩq sì pơnõq ung dòq yãq sì jơdrãq nhũ. Nữn ôh iỡuq yơu nữn, He-rôt kung ôh bôh hagĩq, kơyua pitao song pơjao nhũ nữn wỡq ga pơnõq hlãq, sì iãq vẽq, ôh hũ kaya hagĩq ròq hũ ngãq ga nhũ la đang mang sì mơtai. Kơyua yơu nữn, hadơi sì tũq ngãq dlàiq nhũ nữn, hlãq ròq pơrlao nao.” [Vơnah tơmo, tơma dơlãp tũq adãt, ung hũ kaya pagùq iỡuq pơrlao sa aràc mơnuĩh jam ga pơnõq nhũ.] Nữn pơnõq nhũ sa hatai priãu tơgùq pròc, làiq: “Iỡuq ơteh nhũ nữn tơgùq, sì pơrlao Ba-ra-ba ga pơnõq hlãq!” (Mơnuĩh nĩ kađòc mãq va tơma jam kơyua mưng dlàiq ngãq sơrôh srãh nhũn sabôn nữn dơlãp palơi prõc sì kơyua dlàiq pa-mơtai mơnuĩh.) Tũq nữn, Phi-lat ưng đơp sì pơnõq nhũ wỡq sa bãc tơra, kơyua ưng pơrlao Yàc Je-su. Nữn pơnõq nhũ priãu tơgùq làiq: “Iỡuq pỡc đĩn vẽq! Pỡc đĩn nhũ pãq dlòc kayơu pỡc!” Vloh ung nữn đơp sì pơnõq nhũ bãc tlơu: “Kơyua kaya mơsãc hlơi, sì mơnuĩh nĩ song ngãq? Kơu duah ôh bôh dlàiq hagĩq đang mang sì mơtai dơlãp nhũ nữn. Kơyua yơu nữn, tũq ngãq dlàiq poh atòc vloh, kơu ròq pơrlao nhũ.” Nữn pơnõq nhũ miẽt priãu prõc sãp sì ngãq gơnĩt Pitrai iỡuq pỡc đĩn vẽq, sì sãp đơp pơnõq nhũ jỡc pha rlao. Phi-lat ròq đơp sì ngãq gơnĩt pioh hũ tui yơu pơnuaĩq pơnõq nhũ lakơu ngãq. Tũq nữn, ung nữn pơrlao mơnuĩh kađòc krỡq dơlãp sàc jam kơyua mưng dlàiq ngãq sơrôh srãh sì pa-mơtai mơnuĩh, la mơnuĩh sì pơnõq nhũ lakơu, nữn ung nữn pơjao Yàc Je-su luơi ngãq tui hatai pơnõq nhũ.

Dơlãp tũq aràc va Pitrai nao, kơyua nữn ròq mãq sì pơgùq Si-môn, sa aràc mơnuĩh Si-ren dih, trôh mưng hama, nữn pơnõq nhũ mãq gơlãp kayơu pỡc mơnuĩh nữn gơlãp nao tui hadơi Yàc Je-su.

Hũ sa tơpuôl vual vơla viãq lũ nao tui Pitrai, sì dơgrữq mơnuĩh kamơi sia chõq ga Pitrai. Nữn tũq gơlàiq weh iãq pơnõq nhũ, Yàc Je-su đơp: “Ơ anàq kamơi Je-ru-sa-lem, juơi sia mưng kơu, vlữq wỡq làiq, iỡuq sia vẽq kơyua mưng rùp phàp drơi sì kơyua anàq tơcho pơnõq nai. Mưng iãq dih, dơgrữq harơi ròq jẽq trôh, sì dơlãp dơgrữq harơi nữn, hũ mơnuĩh nữn ròq đơp: ‘Lơngai ga mơnuĩh kamơi ròq kơtuãl, sì pơ-srang anàq ôh đeh, sigỡuq sì tasơu ôh ia vrơi anàq mõm.’ Tũq nữn, mơnuĩh ròq pơdòq đơp sì dơgrữq bò chỡq: ‘Iỡuq jơlưh trỗt pãq pơnõq hlãq,’ sì gãm dơgrữq tabồq: ‘Iỡuq pơvãc gãp vẽq pơnõq hlãq.’ Kơyua mơyah làiq mơnuĩh nữn ngãq yơu nữn dơlãp akhà kayơu dòq sãt la-ngơu, sì vruãq ròq bôh hayơu pãq kayơu thô nữn?”

Tũq nữn, hũ dua aràc mơnuĩh dlàiq dơnũh tơmo kung kađòc va nao pioh pa-mơtai sigỡuq sì Pitrai.

Tũq pơnõq nhũ trôh sa anĩh angãn la “Anĩh Tơlàc Akõq,” nữn pơnõq nhũ pỡc đĩn Pitrai pãq đỡn, sigỡuq sì dua aràc mơnuĩh hũ dlàiq — sa aràc gah hơnuãq dòq sa aràc gah iãu Pitrai. Vloh pơnõq nhũ suãq katih pa-mơpha gỡuq ao lơniãu Pitrai. Vual vơla dòq dữc pãq đỡn dio iãq, dòq dơgrữq mơnuĩh apãt akõq kung tlao vlơi siẽq siẽl Pitrai, làiq: “Nhũ song dõc mơnuĩh tơmo, iỡuq dõc pơ-tlah krơi drơi vẽq, mơyah làiq nhũ la Pitao Dõc Pơ-tlah Yàc Pô Lơngĩq hũ, la Pitao Pitrai duỡt ruah.” Tơpuôl ling kung siẽq siẽl Pitrai, trôh jẽq vrơi ia mơsãp ga Pitrai mơnhũm, vloh đơp: “Mơyah làiq hã la Pitao vual vơla Ju-đa nữn iỡuq dõc krơi drơi vẽq.” Dòq gah dlòc akõq Pitrai kung hũ wãq làiq: “Nĩ la Pitao vual vơla Ju-đa.”

Sa dơlãp dua aràc mơnuĩh dlàiq ãn kađòc ơteh pãq đỡn kung đơp siẽq siẽl Pitrai, làiq: “Ung ôh iỡuq la Yàc Dõc Pơ-tlah yơh? Iỡuq dõc vẽq rùp phuỗt drơi sì pơnõq kơu wỡq.” Nữn tũq hẽ wỡq pơnuaĩq làiq, mơnuĩh dlàiq dih gơrloh pơkhè nhũ: “sơai nữn đơp: Hã kung ôh thơu huaĩq dì Yàc Pô Lơngĩq tũq hã ãn dòq kađòc sigỡuq sì kaya ngãq dlàiq yơh? Bôh làiq pơnõq drơi yơu nĩ la iỡuq vloh, kơyua pơnõq drơi ãn tồq wỡq kaya ngãq gơnĩt sì vruãq drơi ròq ngãq, nữn dòq mơnuĩh nĩ ôh ngãq sỗq suẽl kaya hagĩq.” Vloh sơai nữn đơp wỡq: “Pôgrũ Je-su, tũq halơi Pôgrũ tơmã dơlãp lơgar Pitrai vloh, lakơu sadơr trôh hlãq.” Pitrai hẽ sì sơai làiq: “Iỡuq viãq, kơu đơp sì sơai, harơi nĩ sơai ròq hũ dòq sì kơu dơlãp Ba-ra-đi.”

Tũq nữn pơgãp di tũq jơ bãc nãm vloh, kaya sồp kơnãm tơviãq trôh gãp tlỗp vãq lơgar tãl trôh tũq jơ bãc salơpãn. Ia harơi tơviãq jỡc kơnãm wỡq. Dòq pơchà dơrning dơlãp sàc talơvãt kađòc tarơhẽt tơviãq jỡc dua vơnah. Hadơi sì priãu sãp prõc, Yàc Je-su đơp: “Talơvãt Ama, Anàq pơjao vơngãq yua Anàq dơlãp tơngãn Ama.” Hadơi nữn, tũq đơp vloh pơnuaĩq nĩ, Pitrai tloh yua luôĩq hadơi. Tũq nữn, hadơi tũq pô apãt sa rơtôh ling bôh vruãq song tơviãq jỡc, ung sơuỗt mơyòp Yàc Pô Lơngĩq, làiq: “Mơnuĩh nĩ viãq la tơpãq rĩng.” Tũq avih tơpuôl lũ pơtõm gỡuq nao iãq kơyua mưng vruãq ơteh pãq kayơu pỡc nữn, chưng pahanh nĩ dơgrữq kaya hagĩq ròq bôh, nữn pơnõq nhũ sađũq dơda sì gơlàiq mai wỡq. Dòq avih dơgrữq mơnuĩh rơđãp thơu Pitrai sigỡuq sì dơgrữq mơnuĩh kamơi nao tui Pitrai mưng lơgar Ga-li-le, nữn ròq dòq dữc ơtah sì dio iãq dơgrữq vruãq nữn.

Dih, hũ sa aràc mơnuĩh angãn Jô-sep, la mơnuĩh gơnuar vruãq, la mơnuĩh siàp sì tơpãq rĩng (ung ròq ôh bôh sa hatai tơpuôl mơnuĩh sì duh vruãq pơnõq nhũ hũ), ung dòq mưng A-ri-ma-the, la sa palơi gah mơnuĩh Ju-đa, la mơnuĩh ãn dòq chơkhãq chàc lơgar Yàc Pô Lơngĩq hũ. Tũq trôh pãp Phi-lat, ung nữn ròq lakơu rùp atơu Yàc Je-su. Sì hadơi sì tũq pa-trỗt rùp atơu Pitrai vloh, ung pơpòq rùp atơu mưng pơchà lơmuỡn, sì va dor nhũ dơlãp sa vơnẽq hũ boh lơvàc dơlãp voh patơu, anĩh ka-ôh aràc asơi va dor. Harơi nữn la harơi rơchãc pơkhrà, sì harơi Sa-bat jẽq trôh. Tũq nữn, dơgrữq mơnuĩh kamơi, la dơgrữq mơnuĩh song nao sigỡuq sì Pitrai mưng lơgar Ga-li-le tũq nao gah hadơi, pơnõq nhũ iãq bôh vơnẽq sì aràc chẽq hayơu rùp atơu Pitrai. Vloh tũq ròq mai wỡq, pơnõq nhũ rơchãc dơgrữq kaya sì mơnhàq bơu vơlhũ.

Trôh harơi Sa-bat, pơnõq nhũ padơi dleh tui kaya pơđar-va ngãq gơnĩt.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.