Roglai Bible Literal Text
Lu-ka 24
Vloh hadơi, tũq jrang mư-ờp harơi chơmrờp dơlãp sa tơjuh, pơnõq nhũ nao pãq vơnẽq, va tui mơnhàq bơu vơlhũ sì pơnõq nhũ song rơchãc. Nữn pơnõq nhũ bôh plờq patơu song hũ vlữc tơviãq tlah mưng bãc vơnẽq, bôh làiq, nữn dơlãp tũq tơmã pãq dơlãp, pơnõq nhũ ôh bôh rùp atơu Yàc Je-su. Vruãq ròq tơviãq bôh dơlãp tũq pơnõq nhũ ãn sơnơng jadưl sì ka-ồq viãq mưng vruãq nĩ nữn, iãq dih, hũ dua aràc mơnuĩh lakơi chồq ao sơdah gơchràq dòq dữc jẽq phia pơnõq nhũ. Tũq nữn pơnõq nhũ kơtuãq huaĩq sì pa-gruãq bòq trỗt pãq hlùq nữn dua aràc mơnuĩh nữn đơp sì pơnõq nhũ: “Hayơu pơnõq nai duah mơnuĩh hadiuq pãq khrãh mơnuĩh mơtai? Pitrai ôh dòq pãq đĩ, nữn Pitrai hadiuq wỡq vloh! Iỡuq sơdor wỡq vẽq Pitrai song đơp yơu hayơu sì pơnõq adơi sơai dơlãp tũq dòq pãq Ga-li-le, đơp làiq Anàq Mơnuĩh iỡuq kađòc pơjao dơlãp tơngãn dơgrữq mơnuĩh hũ dlàiq dơnũh sì iỡuq kađòc pỡc đĩn pãq dlòc kayơu pỡc, vloh trôh harơi tlơu, iỡuq hadiuq wỡq.” Pơnõq nhũ sơdor wỡq pơnuaĩq Pitrai, sì tũq mưng vơnẽq mai wỡq, pơnõq nhũ akhàt wỡq dơgrữq vruãq nữn ga sa plôh sa aràc mơnuĩh gơnuar pơđar sigỡuq sì dơgrữq mơnuĩh tơmo. Dơgrữq mơnuĩh kamơi nữn dơlãp nữn hũ Ma-ri Ma-đơ-len, Jan-nơ, Ma-ri ami Ja-kơ, sì dơgrữq mơnuĩh kamơi tơmo sigỡuq sì pơnõq nhũ, akhàt wỡq ga dơgrữq mơnuĩh gơnuar pơđar dơgrữq vruãq nữn. Dơgrữq pơnuaĩq akhàt nữn hmỡq yơu la pơnuaĩq ôh hũ viãq pơweh sì dơgrữq mơnuĩh gơnuar pơđar, nữn pơnõq nhũ ôh pãc dơgrữq mơnuĩh kamơi nĩ đơp. Bôh làiq yơu nữn, Pier tơgùq dữc đuaĩq trôh pãq vơnẽq, sì kồq trỗt iãq pãq dơlãp, ung mĩn bôh pơchà lơmuỡn. Yơu nữn la ung nao wỡq sàc, sơnơng krơi vruãq hagĩq song tơviãq jỡc.
Dih, dơlãp sa harơi nữn, hũ dua aràc mơnuĩh dơlãp katih mơnuĩh mơgrũ ãn nao jơlàt trôh pãq palơi tìt dih angãn la Em-ma-ut, pơgãp palơi Je-ru-sa-lem nãm plôh ech-ta-đơ, sì pơnõq nhũ ãn dòq vơyai sì gỡuq mưng dơgrữq vruãq song tơviãq jỡc. Vruãq ròq tơviãq jỡc dơlãp tũq pơnõq nhũ đơp dlài sì vơyai sigỡuq, nữn mĩn Yàc Je-su nao trôh jẽq nao sigỡuq sì pơnõq nhũ. Nữn mơta pơnõq nhũ kađòc vơvãc dơđỡuq nữn pioh ôh thơu kơnãl Pitrai. Tũq nữn, Pitrai đơp sì pơnõq nhũ: “Mưng dơgrữq pơnuaĩq nữn la hayơu sì dua aràc sơai đơp sì gỡuq ãn tũq nao jơlàt yơh?” Pơnõq nhũ dòq dữc mữ pãq đỡn, bòq mơta ka-ùq ka-ãn viãq. Vloh tũq nữn drơ pơnuaĩq, sa aràc mơnuĩh angãn la Kơ-le-o-ba đơp sì Pitrai: “Hũ iỡuq mĩn sa ràc ung la mơnuĩh thuãi dơlãp palơi Je-ru-sa-lem ôh thơu dơgrữq vruãq song tơviãq trôh pãq đỡn dơgrữq harơi nĩ yơh?” Pitrai tơnĩa pơnõq nhũ: “Vruãq hagĩq nữn?” Vloh pơnõq nhũ đơp sì Pitrai: “vruãq nĩ ròq trôh pãq Je-su mơnuĩh Na-sa-ret, nữn la sa aràc mơnuĩh, la mơnuĩh gơnuar hwơr vãq gơnuar chơnuãq dơlãp vruãq ngãq sì gãm pơnuaĩq đơp pãq anãq Yàc Pô Lơngĩq sì avih vual vơla, sì yơu hayơu sì dơgrữq mơnuĩh gơnuar pioh kaya duh talơvãt prõc sigỡuq sì dơgrữq pô gơnuar apãt akõq pơnõq drơi hũ song pơjao pitrai pioh ãt kaya ngãq gơnĩt dlàiq sì pa-mơtai, sì song pỡc đĩn Pitrai pãq dlòc kayơu pỡc. Dòq pơnõq hlãq kung dòq chơkhãq chàc làiq Pitrai la Pitao trôh dõc tơvuh vual vơla Is-ra-el. Lơniãu nữn, ôh iỡuq mĩn sigỡuq sì avih dơgrữq vruãq pãq dlòc, kaya ròq tơviãq jỡc nữn ròq nao gãt tơpa trôh harơi nĩ la harơi bãc tlơu, mưng tũq dơgrữq vruãq ròq tơviãq trôh. Nữn, dơgrữq tơpuôl mơnuĩh kamơi dòq pãq khrãh pơnõq hlãq viãq ròq ngãq pơnõq hlãq iỡuq kơtuãq, hadơi sì tũq pơnõq nhũ dòq pãq vơnẽq tũq jơ jrang mư-ờp sì ôh bôh rùp atơu Pitrai, pơnõq nhũ mai wỡq, akhàt wỡq la song pabôh hũ mơnuĩh gơnrơh đơp làiq Pitrai ròq dòq hadiuq. Hũ tơkìq aràc dơlãp pơnõq hlãq nao rơwãc vơnẽq sì pơnõq nhũ ròq bôh yơu nữn, iỡuq yơu mơnuĩh kamơi ròq đơp, nữn pơnõq nhũ ôh bôh Pitrai.” Vloh Pitrai đơp sì pơnõq nhũ: “Ơ, dơgrữq mơnuĩh gơla pơtòq sì dơgrữq mơnuĩh suơi thơu pãc dơlãp hatai pioh pãc anĩh nữn dơgrữq pơnuaĩq sì mơnuĩh gơnuar hwơr song đơp! Ôh iỡuq Yàc Dõc Pơ-tlah iỡuq ãt dơgrữq kaya nữn, pioh hũ tơmã dơlãp kaya gơhluh Pitrai hũ yơh?” Vloh pơdòq mưng Môi-se sì mưng avih dơgrữq mơnuĩh gơnuar hwơr, Pitrai akhàt tơviãq ga pơnõq nhũ dơgrữq pơnuaĩq đơp mưng Pitrai dơlãp avih Sơrãq Sơđah. Pơnõq nhũ nao jẽq trôh palơi anĩh pơnõq nhũ ngãq gơnĩt ưng nao, nữn Pitrai ngãq hayơu ưng nao ơtah rlao wỡq tơra. Nữn la pơnõq nhũ jàq pagùq Pitrai, làiq: “Lakơu dòq wỡq sì pơnõq hlãq, kơyua lơngĩq song jẽq mơlãp sì harơi jẽq avih vloh.” Pitrai nao tơmã dòq wỡq sì pơnõq nhũ. Vruãq ròq tơviãq tũq nữn Pitrai song dòq guh pãq ban sigỡuq sì pơnõq nhũ, mãq bẽn yơr, Pitrai ỡn ngai, sì hadơi sì tũq pẽq tơviãq, Pitrai vrơi ga pơnõq nhũ. Tũq nữn, mơta pơnõq nhũ hũ pơh tơviãq sì pơnõq nhũ iãq thơu kơnãl Pitrai, vloh Pitrai sarlỡuq nao thĩt tlah mưng pơnõq nhũ. Pơnõq nhũ đơp sì gỡuq làiq: “Ôh iỡuq hatai pơnõq drơi tluỡiq gơhuar dơlãp tũq Pitrai đơp dlài sì pơnõq drơi ãn nao jơlàt, kung yơu tũq Pitrai akhàt pa-tơviãq pơnuaĩq Sơrãq sơđah, ga pơnõq drơi yơh?” Yơu nữn dơlãp tũq tơgùq dữc kung jơ nữn, pơnõq nhũ mai wỡq pãq palơi Je-ru-sa-lem. Sì pơnõq nhũ pãp sa plôh sa aràc mơnuĩh gơnuar pơđar ãn dòq pơjũm wỡq, sigỡuq sì dơgrữq aràc mơnuĩh hũ mơta sì pơnõq nhũ, pa-thơu làiq: “Yàc song hadiuq wỡq vloh, nữn Pitrai ròq tơviãq mơta Si-môn ròq bôh.” Vloh pơnõq nhũ akhàt ga dơgrữq vruãq song pabôh tũq ãn nao jơlàt, sì ngãq hayơu Pitrai kung akhàt ga pơnõq nhũ thơu dơlãp tũq Pitrai pẽq bẽn.
Tũq nữn, tũq pơnõq nhũ ãn đơp dơgrữq vruãq nữn, mĩn Pitrai dòq dữc pãq khrãh pơnõq nhũ, nữn đơp sì pơnõq nhũ: “Dadu lơngai ga pơnõq adơi sơai.” Nữn kơyua kơtuãq sì tơviãq jỡc huaĩq tatơh, nữn pơnõq nhũ sơnơng la ãn bôh vơngãq phùt. Pitrai đơp sì pơnõq nhũ: “Hayơu pơnõq adơi sơai jadưl, sì kơyua hagĩq dòq dỡq dỡng pãq dơlãp hatai pơnõq adơi sơai? Iỡuq iãq tơngãn Pôgrũ sì tơkai Pôgrũ hũ, làiq mĩn la Pôgrũ nĩ. Iỡuq rawỡq trôh Pôgrũ sì iãq mưng. Kơyua vơngãq ôh hũ rơlo sì tơlàc, yơu pơnõq adơi sơai tồq kơnãl thơu bôh Pôgrũ ãn dòq nĩ.” Đơp vloh pơnuaĩq nữn, Pitrai vrơi ga pơnõq nhũ iãq tơngãn sì tơkai Pôgrũ. Dơlãp tũq pơnõq nhũ sì ka-ôh khĩn pãc sì kơtuãq kơyua mơnuĩh mơgrũ sơh sơr viãq, nữn Pitrai đơp sì pơnõq nhũ: “Dòq pãq đĩ, pơnõq adơi sơai hũ kaya hagĩq bõc lơĩh?” Tũq nữn, pơnõq nhũ va vrơi ga Pitrai sa tleh akàt ãp; Hadơi sì tũq mãq, Pitrai bõc pãq anãq pơnõq nhũ.
Vloh Pitrai đơp sì pơnõq nhũ: “Nĩ la dơgrữq pơnuaĩq Pôgrũ hũ sì Pôgrũ song đơp sì pơnõq adơi sơai tũq dòq sì pơnõq adơi sơai, làiq dơgrữq pơnuaĩq song wãq mưng Pôgrũ dơlãp voh-va Môi-se, dơgrữq srãq gơnuar hwơr sì dơgrữq srãq Đơp chrih iỡuq jỡc pa-sơmũ.” Tũq nữn, Pitrai pơh dlò ga pơnõq nhũ pioh pơnõq nhũ thơu pãc Sơrãq Sơđah, sì Pitrai đơp sì pơnõq nhũ: làiq: “Yơu hũ pơnuaĩq wãq: Yàc dõc pơ-tlah iỡuq ãt pơđìq pơđua, sì mưng kaya mơtai hadiuq wỡq tãl trôh harơi tlơu, vloh kaya mơvai tlàq dlàiq pioh hũ tơleh dlàiq iỡuq hũ akhàt mãq angãn Pitrai vrơi ga avih dơgrữq vual vơla, pơdòq mưng palơi Je-ru-sa-lem. Pơnõq adơi sơai la mơnuĩh ngãq chưng mưng dơgrữq vruãq nữn. Pôgrũ ròq pơyua pơnuaĩq ròq grữh sì Ama pôgrũ pơđar trôh pãq pơnõq adơi sơai. Nữn pơnõq adơi sơai iỡuq dòq dơlãp palơi chàc tãl trôh tũq pơnõq adơi sơai hũ tồq mãq gơnuar chơnuãq mưng anĩh dlòc.” Vloh Pitrai va pơnõq nhũ tơviãq blàc tãl trôh pãq palơi Be-tha-ni, sì tũq nữn yơr tơngãn drơi tơgùq, Pitrai vrơi lơngai ga pơnõq nhũ. Vruãq ròq bôh dơlãp tũq Pitrai vrơi lơngai ga pơnõq nhũ, Pitrai luơi pơnõq nhũ sì hũ đìq pãq dlòc lơngĩq. Hadơi sì tũq duh talơvãt Pitrai, pơnõq nhũ mai wỡq pãq Je-ru-sa-lem, gãm sì kaya sơh sơr viãq, sì avih dơgrữq pơnõq nhũ miẽt dòq dơlãp sàc talơvãt, sơuỗt mơyòp Yàc Pô Lơngĩq.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.