Lu-ka 20

1Vruãq ròq trôh sa harơi dih, tũq Pitrai ãn dòq pơto pơđar vual vơla dơlãp sàc talơvãt sì akhàt payơr Pơnuaĩq Siàp, dơgrữq mơnuĩh gơnuar pioh kaya duh talơvãt prõc, sì dơgrữq mơnuĩh gơnuar pơto kaya voh-va sigỡuq sì dơgrữq mơnuĩh pô tơha trôh. 2Pơnõq nhũ đơp sì Pitrai làiq: “Lakơu vrơi pơnõq hlãq thơu mưng gơnuar chơnuãq halơi nữn Pôgrũ ngãq dơgrữq vruãq nĩ, hẽla asơi la mơnuĩh ròq akhàt payơr ga Pôgrũ gơnuar chơnuãq nĩ.” 3Nữn pioh hẽ pơnuaĩq, Pitrai đơp sì pơnõq nhũ: “Kơu kung ròq tơnĩa pơnõq ung sa pơnuaĩq, iỡuq đơp ga kơu thơu. 4Adãt Bãp-tem Jãng hũ la mưng pãq dlòc lơngĩq hẽla la mưng anàq mơnuĩh?” 5Yơu nữn la pơnõq nhũ vơyai sì gỡuq, đơp làiq: “Mơyah làiq pơnõq drơi đơp: ‘Mưng lơngĩq,’ ung nữn ròq tơnĩa: ‘Yơu nữn hayơu pơnõq ung ôh pãc Jãng?’ 6Dòq mơyah làiq pơnõq drơi đơp: ‘Mưng pơjẽh anàq mơnuĩh,’ nữn avih vual vơla ròq prah patơu pơnõq drơi, kơyua vual vơla ròq pãc Jãng la sàc mơnuĩh gơnuar hwơr.” 7Sì vloh nữn pơnõq nhũ drơ làiq pơnõq nhũ ôh thơu adãt bãp-tem nữn la mưng halơi. 8Yàc Je-su đơp sì pơnõq nhũ: “Kơu kung ôh vrơi pơnõq ung thơu mưng gơnuar chơnuãq halơi kơu ngãq dơgrữq vruãq nữn.”

9Vloh Pitrai pơdòq akhàt pa-mơyơu nĩ ga vual vơla: “Sa aràc mơnuĩh dih pơla sa vỡn nho, sì vrơi ga dơgrữq mơnuĩh pơla nho ơpah vỡn nữn, vloh nao trôh pãq lơgar tơmo chàc sa lơwah suơi. 10Tãl trôh vlàt yuãq, ung pơđar sa aràc mơnuĩh halỗt mơnãq trôh sigỡuq sì tơpuôl mơnuĩh pơla nho pioh pơnõq nhũ song vrơi ga ung vơnah hajũc halàq vỡn nho hũ. Nữn hadơi sì tũq poh atòc, tơpuôl mơnuĩh pơla nho ròq pơtiãuq sơai nữn wỡq blàq tơngãn soh. 11Vloh ung pơđar sa aràc mơnuĩh halỗt mơnãq tơmo trôh, nữn sơai nĩ kung yơu nữn, pơnõq nhũ kung pơtiãuq sơai nữn nao wỡq blàq tơngãn soh hadơi nữn poh atòc sì siẽq siẽl. 12Vloh nữn ung pơđar wỡq mơnuĩh halỗt mơnãq bãc tlơu trôh, nữn pơnõq nhũ kung poh kađòc sơai nữn ãt halôh, prah pãq lơniãu blàc. 13Kơyua yơu nữn, mơnuĩh pô vỡn nho đơp: ‘Kơu ròq ngãq hayơu nĩ? Kơu ròq pơđar anàq lakơi anĩt duman kơu hũ trôh. Pơlih pơnõq nhũ ròq ki ngãm di nhũ.’ 14Nữn tũq tơpuôl pơla nho bôh nhũ, pơnõq nhũ vơyai sì gỡuq, làiq: ‘Nĩ la mơnuĩh patui wỡq. Pơnõq drơi iỡuq pa-mơtai nhũ vẽq, pioh apôh hama nhũ nĩ pơlih ròq wỡq pãq tơngãn pơnõq drơi.’ 15Nữn hadơi sì tũq prah nhũ nữn tơviãq pãq lơniãu vỡn nho, pơnõq nhũ pa-mơtai sơai nữn. Yơu nữn, mơnuĩh pô vỡn ròq ngãq hagĩq sì pơnõq nữn? 16Ung nữn ròq trôh pa-mơtai avih tơpuôl mơnuĩh pơla nho nĩ sì pơjao ga mơnuĩh tơmo.” Tũq hmỡq yơu nữn, pơnõq nhũ đơp: “Lakơu ga dơgrữq pơnuaĩq nữn ôh tũq halơi ròq tơviãq tơra.” 17Nữn dơlãp tũq iãq pơnõq nhũ, Pitrai đơp: “Yơu nữn, pơnuaĩq song wãq nĩ hũ gơtha yơu hayơu:

‘Voh patơu mơnuĩh rgơi vữq padỡc prah luơi,

mĩn voh patơu nữn tơviãq jỡc la patơu akiãc sàc’?

18Mơnuĩh halơi lẽq pãq dlòc patơu nữn ròq kađòc pơchãh lìq avih. Dòq asơi sì patơu nữn lẽq iỡuq, nữn nhũ ròq kơ-prãh avih mơnuĩh nữn.”

19Vloh nữn, dơgrữq mơnuĩh pô pơto voh-va sigỡuq sì dơgrữq pô gơnuar pioh kaya duh talơvãt prõc duah pơnẽq mãq tơngãn sì pa-mơtai Pitrai mư dơlãp jơ nữn, sì pơnõq nhũ huaĩq vual vơla, kơyua pơnõq nhũ thơu làiq Pitrai pa-mơyơu mưng pơnõq nhũ. 20Dơlãp tũq pơnõq nhũ dio iãq Pitrai gơnĩt, sì pơnõq nhũ pơđar dơgrữq mơnuĩh dio iãq krơi ngãq yơu la mơnuĩh tơpãq dãng, pioh pơnõq nhũ pơlih mãq kaya sỗq Pitrai dơlãp pơnuaĩq đơp, pioh pơjao Pitrai ga mơnuĩh gơnuar apãt akõq sì mơnuĩh pô prõc lơgar. 21Dơgrữq mơnuĩh nữn tơnĩa Pitrai làiq: “Ơ Pôgrũ, pơnõq hlãq thơu nữn la pôgrũ đơp sì pơto savĩq tơpãq dãng, ôh huaĩq mơnuĩh halơi, nữn pôgrũ pơto mưng pơnuaĩq Yàc Pô Lơngĩq hũ dơlãp pơnuaĩq tơpãq. 22Sơkãq jia ga Se-sa la kaya pơweh sì pơnõq drơi iỡuq lơĩh?” 23Nữn kơyua tồq thơu kaya vlữq lor, Pitrai đơp sì pơnõq nhũ hũ: 24“Vrơi ga kơu iãq sa tleh priãq đơ-ni-e. Nhũ hũ rùp sì angãn mơnuĩh halơi?” Pơnõq nhũ drơ: “Se-sa hũ.” 25Nữn yơh la Pitrai đơp sì pơnõq nhũ: “Yơu nữn, iỡuq vrơi wỡq ga Se-sa dơgrữq kaya hagĩq Se-sa hũ, sì vrơi wỡq ga Yàc Pô Lơngĩq dơgrữq kaya hagĩq Yàc Pô Lơngĩq hũ.” 26Pơnõq nhũ ôh tũq halơi mãq kaya sỗq dlàiq pơnuaĩq drơ pãq anãq vual vơla jỡc, nữn kơyua pơnõq nhũ mãq ngãq krơi mưng pơnuaĩq hẽ Pitrai hũ, nữn avih pơnõq nhũ dòq suà.

27Hadơi nữn, tũq pơnõq hũ sa asit mơnuĩh pơweh gah Sa-đu-se tũq nữn nao jẽq, nữn la dơgrữq mơnuĩh đơp làiq ôh hũ kaya hadiuq wỡq, pơnõq nhũ trôh sì tơnĩa Pitrai, 28làiq: “Ơ Pôgrũ, Môi-se ròq wãq ga pơnõq drơi, mơyah làiq sơai mơnuĩh halơi nữn khiãng sơdiuq, vloh nữn mơtai, mơnuĩh nữn ôh-ka hũ anàq, nữn sơai mơnuĩh nữn ròq ưng mãq nhũ la mơnuĩh dòq vlơu ưng ngãq sơdiuq pioh pajỡc anàq patui pơjẽh pơtiàt ga sơai drơi. 29Yơu nữn, sàc dih hũ tơjuh aràc adơi sơai, sì hadơi sì tũq ưng mãq sơdiuq, mơnuĩh sơai kơchoa ròq mơtai ôh hũ anàq; 30sì mơnuĩh bãc dua, 31vloh mơnuĩh bãc tlơu mãq sơai kamơi nữn ngãq sơdiuq; miẽt yơu nữn sì avih tơjuh aràc mơnuĩh nữn kung ôh hũ anàq, sì mơtai avih. 32Luôĩq hadơi nữn, mơnuĩh kamơi kung mơtai. 33Yơu nữn, dơlãp harơi hadiuq wỡq, mơnuĩh kamơi nữn ròq la sơdiuq mơnuĩh halơi dơlãp katih pơnõq nhũ? Kơyua mưng avih tơjuh aràc adơi sơai pơnõq nhũ song mãq sơai kamơi ngãq sơdiuq.” 34Yàc Je-su đơp sì pơnõq nhũ: “Anàq tơcho rài nĩ nữn la pơhuãq, pa-khiãng. 35Dòq dơgrữq mơnuĩh halơi hũ karhia angãn la đang mang sì hũ tồq rài hadơi sì kaya hadiuq wỡq mưng kaya mơtai nữn ôh pơgãp ưng kamơi kung ôh tơnĩa kamơi vlơi sàc. 36Kơyua mưng pơnõq nhũ kung ôh pơlih mơtai jỡc tơra, kơyua pơnõq nhũ ròq yơu mơnuĩh gơnrơh; sì pơnõq nhũ la dơgrữq mơnuĩh anàq Yàc pô lơngĩq hũ, la anàq tơcho kaya hadiuq wỡq. 37Dòq mưng mơnuĩh mơtai hadiuq wỡq nữn yơu Môi-se ròq vrơi pabôh dơlãp bôr druơi, tũq ung angãn Yàc la Yàc Pô Lơngĩq A-bra-ham hũ, Yàc Pô Lơngĩq Y-sac hũ, sì Yàc Pô Lơngĩq Ja-kôp hũ. 38Pitrai ôh iỡuq la Yàc Pô Lơngĩq mơnuĩh mơtai hũ, nữn la mơnuĩh hadiuq hũ, kơyua dơgrữq tãl aràc kung hadiuq pơweh sì Pitrai.” 39Vloh tũq nữn hũ tơkìq mơnuĩh gơnuar pơto voh-va drơ làiq, pơnõq nhũ đơp: “Ơ Pôgrũ, Pôgrũ đơp iỡuq viãq.” 40Pơnõq nhũ ôh khĩn tơnĩa Pitrai sa pơnuaĩq halơi tơra.

41Hadơi nữn, Pitrai đơp sì pơnõq nhũ: “Hayơu aràc đơp làiq Yàc Dõc Pơ-tlah la anàq Da-vĩt? 42Kơyua dơlãp sơrãq Đơp chrih, mĩn rùp phuỗt Da-vĩt hũ đơp:

‘Yàc đơp sì Yàc hlãq làiq:

“Iỡuq dòq guh gah hơnuãq Kơu,

43tãl trôh tũq Kơu ngãq ga dơgrữq mơnuĩh sòq jơdrãq Anàq hũ ngãq jỡc pãq gah ala tơkai Anàq.”’

44Yơu nữn, Đa-vit angãn Pitrai la ‘Yàc’, nữn hayơu Pitrai la anàq Pitao nữn jỡc?”

45Dơlãp tũq avih dơgrữq vual vơla ãn dòq hmỡq, Pitrai đơp sì dơgrữq mơnuĩh mơgrũ làiq: 46“Iỡuq gơrhia iãq dơgrữq mơnuĩh gơnuar pơto voh-va, la dơgrữq mơnuĩh ưng chồq ao ơtah nao rah jơlàt, sơh dơgrữq pơnuaĩq tơnĩa chuãq rơwãc pãq anĩh dràq, sì dơgrữq anĩh dòq guh kuơ mang dơlãp sàc pơtõm sigỡuq sì anĩh dlòc rlao avih dơlãp kaya bõc mơnhũm, 47sì tơpuôl pơnõq nhũ bõc luỗt sàc dơgrữq mơnuĩh kamơi vlơu, vloh nữn iơu lakơu suơi pioh yeh drơi. Dơgrữq mơnuĩh nữn ròq kađòc chahrơna tơrãq rlao wỡq.”