Skip to content
BibleKenya

Roglai Bible Literal Text

Lu-ka 19

Tũq song tơmã gah dơlãp. Pitrai nao gãt palơi Je-ri-kô. Sì iỡuq iãq mưng sa aràc mơnuĩh, hũ iơu angãn la Sa-che, ung la pô apãt akõq tơpuôl mãq jia, sì ung nữn mơda gơnãp viãq. Ung duah pơnẽq hayơu hũ iãq mưng Yàc Je-su la asơi, nữn ung pơlih ôh ngãq jỡc mững dơlãp tơpuôl lũ, kơyua rùp phàp ung tìt rùp sì viar. Vloh nữn tũq ròq đuaĩq nao trôh pãq hlơu ung đìq pãq dlòc kayơu vãl pioh ung pơlih tơlàq iãq bôh Pitrai kơyua Pitrai jẽq nao gãt jơlàt nữn. Tũq Pitrai nao trôh anĩh nữn, angơìq tơgùq iãq Yàc Je-su đơp sì ung: “Ơ Sa-che, iỡuq trỗt sơmar vẽq, kơyua harơi nĩ kơu iỡuq tơmã dòq dơlãp sàc sơai.” Nữn la ung chơmãq chơmao trỗt sì uỗt sơh nữn tồq ròq Pitrai. Tũq bôh yơu nữn, vual vơla đơp rơbòp sigỡuq làiq: “Ung nữn tơmã dòq sigỡuq sì mơnuĩh hũ dlàiq.” Nữn tũq Sa-che dữc pãq anãq, ung drơ sì Yàc: “Talơvãt Yàc, lakơu iãq nĩ, hlãq pa-mơpha sa mơtơh kaya mơnã drơi hũ vrơi ga mơnuĩh rơbah, sì mơyah làiq hlãq ròq pa-gơla asơi kaya hagĩq, hlãq ròq vơyar wỡq pàq bãc rlao.” Tũq nữn, Yàc Je-su đơp sì ung làiq: “Harơi nĩ kaya dõc pơ-tlah song trôh dơlãp sàc nĩ, kơyua sơai nĩ kung la anàq tơcho A-bra-ham hũ. Kơyua Anàq Mơnuĩh song trôh pioh duah sì dõc mơnuĩh kađòc lơhiãq thĩt.”

Pơnõq nhũ ãn dòq hmỡq dơgrữq pơnuaĩq nữn, Pitrai pơdòq akhàt sa pơnuaĩq pa-mơyơu, kơyua Pitrai ãn dòq jẽq palơi Je-ru-sa-lem, sì pơnõq nhũ sơnơng làiq lơgar Yàc Pô Lơngĩq hũ jẽq bôh tơviãq vloh. Kơyua yơu nữn, Pitrai akhàt: “Hũ sa voh sàc mơnuĩh mơ-àc mơyàc dih nao trôh pãq lơgar ơtah pioh rùp phuỗt nhũ hũ tồq gơnuar ngãq pitao vloh nữn ròq mai wỡq. Hadơi sì tũq iơu sa plôh aràc mơnuĩh halỗt mơnãq nhũ trôh, ung pơjao ga pơnõq nhũ sa plôh tleh priãq sì đơp sì pơnõq nhũ: ‘Iỡuq kãq pa-vlơi dơlãp tũq hlãq nao ơtah.’ Nữn vual vơla ung hũ mơvai lơmùq di ung sì pơđar sa tơpuôl mơnuĩh nao tui hadơi ung đơp: ‘Pơnõq hlãq ôh ưng mơnuĩh nĩ apãt akõq pơnõq drơi.’ Vruãq ròq thơu tũq ung mai wỡq hadơi sì tũq tồq gơnuar, ung pơđar iơu trôh pãp nhũ dơgrữq mơnuĩh halỗt mơnãq sì ung song pơjao jĩn, pioh ung pơlih thơu pơnõq nhũ song ngãq tơviãq hũ kaya hagĩq mưng vruãq ngãq bõc kãq pa-vlơi. Yơu nữn vloh, mơnuĩh bãc sa trôh, đơp: ‘Ơ pô, tleh priãq ung hũ song ngãq tơviãq hũ sa plôh tleh priãq.’ Mơnuĩh pô đơp sì sơai nữn: ‘Halỗt mơnãq tơpãq siàp, siàp viãq. Kơyua sơai song tui tơpãq dơlãp vruãq tìt, nữn sơai iỡuq hũ apãt akõq sa plôh palơi prõc.’ Sì mơnuĩh bãc dua trôh, đơp: ‘Ơ pô, tleh priãq ung hũ song ngãq tơviãq hũ lơmã tleh priãq.’ Vloh mơnuĩh pô kung đơp sì sơai nĩ: ‘Sơai ròq apãt akõq lơmã palơi prõc.’ Sa aràc mơnuĩh tơmo trôh, đơp: ‘Ơ pô, lakơu iỡuq iãq tleh priãq ung hũ sì hlãq song pơpòq rơmiãq, ròq pioh nhũ dơlãp charơnãq, kơyua hlãq huaĩq ung, kơyua ung la mơnuĩh gơjãp gađữc. Ung mãq dơlãp anĩh drơi ôh chẽq, sì yuãq dơlãp anĩh drơi ôh dràq.’ Pô pơđar sơai nữn: ‘Gơnang mưng pơnuaĩq đơp sơai hũ, kơu ròq chahrơna sơai, angãn mơnuĩh halỗt mơnãq brữh mơsãc. Sơai thơu làiq kơu la mơnuĩh gơjãp gađữc, mãq dơlãp anĩh kơu ôh chẽq, sì yuãq dơlãp anĩh kơu ôh dràq. Yơu nữn kơyua hagĩq sơai ôh pơyua priãq kơu hũ tơmã dơlãp anĩh adũq kãq pa-vlơi jĩn, pioh tũq tồq kơu mai wỡq, kơu kung ròq mãq wỡq priãq nữn sigỡuq sì hajũc halàq?’ Vloh ung đơp sì dơgrữq mơnuĩh ãn dòq dữc pãq đỡn: ‘Iỡuq mãq vẽq tleh priãq mưng mơnuĩh nĩ ròq vrơi ga mơnuĩh hũ sa plôh tleh priãq.’ Pơnõq nhũ đơp sì ung: ‘Ơ pô, sơai nữn ãn hũ sa plôh tleh priãq vloh.’ ‘Kơu đơp vrơi ga pơnõq adơi sơai thơu, mơnuĩh halơi hũ ròq hũ ròq vrơi pơtãl wỡq, nữn mưng mơnuĩh halơi ôh hũ, ròq kađòc mãq suãq avih dơgrữq kaya nhũ song hũ. Dòq dơgrữq mơnuĩh sòq jơdrãq sì kơu dih, la dơgrữq mơnuĩh ôh ưng kơu apãt akõq pãq dlòc pơnõq nhũ, iỡuq va pơnõq nhũ trôh pãq đĩ sì pa-mơtai pơnõq nhũ pãq anãq kơu.’”

Hadơi sì tũq đơp dơgrữq pơnuaĩq nữn, Pitrai nao halơu, nao tơgùq pãq palơi Je-ru-sa-lem.

Vruãq ròq tơviãq trôh tũq Pitrai nao jẽq palơi Be-pha-je sì Be-tha-ni, pãq bò chỡq angãn la Ô-li-ve, Pitrai pơđar dua aràc mơnuĩh mơgrũ, đơp làiq: “Iỡuq nao tơmã palơi pãq anãq, dơlãp tũq tơmã pãq đỡn, pơnõq adơi sơai ròq bôh sa drơi anàq halang anàq dòq akãq, nữn pãq dlòc anàq halang nữn ka-ôh mơnuĩh halơi đìq nhũ. Hadơi sì tơleh talơi akãq nhũ, iỡuq dui va mai pãq đĩ. Mơyah làiq asơi nữn tơnĩa pơnõq adơi sơai: ‘kơyua hagĩq pơnõq adơi sơai tơleh talơi nhũ?’ nữn pơnõq adơi sơai đơp làiq: ‘Yàc iỡuq chàc angui nhũ.’” Yơu nữn, hũ dua aràc mơnuĩh ròq pơđar tơviãq nao, pơnõq nhũ bôh avih dơgrữq vruãq drưh yơu pơnuaĩq Pitrai song đơp sì pơnõq nhũ. Dơlãp tũq pơnõq nhũ ãn tơleh talơi halang anàq, mơnuĩh pô halang nữn tơnĩa pơnõq nhũ: “Hayơu pơnõq sơai tơleh talơi halang tơviãq?” Pơnõq nhũ drơ làiq: “Yàc iỡuq chàc angui nhũ.” Vloh nữn pơnõq nhũ dui va nhũ ga Yàc Je-su, nữn hadơi sì tũq làc ao ơtah drơi pãq dlòc rõc anàq halang, pơnõq nhũ pađìq Yàc Je-su dòq guh pãq dlòc nhũ. Tũq Pitrai nao gãt, hũ mơnuĩh làc ao atah pơnõq nhũ pãq dlòc jơlàt. Dơlãp tũq Pitrai nao jẽq trôh bòq chỡq Ô-li-ve vloh, avih tơpuôl mơnuĩh mơgrũ lũ pơdòq mãq ngãq sơh sơr, sì prõc sãp sơuỗt mơyòp Yàc Pô Lơngĩq mưng avih dơgrữq vruãq gơnuar chơnuãq nữn pơnõq nhũ song bôh, làiq: “Lơngai ga pitao trôh dơlãp angãn Yàc hũ! Lơngai pãq dlòc lơngĩq, sì gơhluh sơdah pãq dlòc anĩh dloòng dlòc rlao avih!” Nữn hũ sa katih mơnuĩh Pha-ri-si mưng dơlãp tơpuôl vual vơla lũ đơp sì Pitrai: “Ơ Pôgrũ, lakơu gơloh pơkhè dơgrữq mơnuĩh mơgrũ Pôgrũ hũ.” Drơ wỡq sì pơnõq nhũ, nữn Pitrai đơp: “Kơu đơp sì pơnõq ung thơu, làiq mơyah làiq pơnõq nhũ dòq suà nữn dơgrữq voh patơu nĩ ròq priãu tơgùq.”

Tũq Pitrai ròq trôh jẽq, tũq song iãq bôh palơi prong, nữn Pitrai sia mưng palơi nữn, sì đơp làiq: “Iỡuq chơkhãq khiãng pơnõq hã ròq tồq thơu dơlãp harơi nĩ, viãq mĩn pơnõq hã iỡuq thơu, dơgrữq kaya hagĩq va trôh dadu lơngai! Bôh làiq, pơnõq nhũ tũq nĩ ròq kađòc pơvãc dađỡuq dì mơta hã. Kơyua ròq hũ harơi song trôh pãq pơnõq hã, dơgrữq mơnuĩh sòq jơdrãq hã hũ ròq vữq chõh tòp dar hã, pơnõq nhũ ròq kơrwàc hã, sì gơriãq gơjãp hã mưng pàq gah akiãc. Pơnõq nhũ ròq poh pa-lơhiãq hã sigỡuq sì anàq tơcho hã dòq pãq khrãh pơnõq hã. Vloh pơnõq nhũ ròq ôh luơi sa voh patơu halơi dòq pa-đual pãq dlòc voh patơu tơmo pãq anĩh hã, kơyua mưng hã ôh ròq tồq kơnãl thơu tũq lơwah drơi hũ nao chuãq rơwãc.”

Vloh nữn tũq tơmã dơlãp sàc talơvãt, Pitrai pơdòq pơtiãuq avih dơgrữq mơnuĩh kãq pa-vlơi pãq đỡn, đơp sì pơnõq nhũ: “Hũ pơnuaĩq wãq làiq: ‘Sàc Kơu la sàc iơu lakơu,’ nữn pơnõq hã song ngãq ga nhũ tơviãq jỡc anĩh dòq mơnuĩh tlẽq sơwah.”

Dơgrữq harơi Pitrai miẽt pơto akhàt dơlãp sàc talơvãt. Dòq dơgrữq mơnuĩh gơnuar pioh kaya duh talơvãt, dơgrữq mơnuĩh gơnuar pơto voh-va sì dơgrữq mơnuĩh pô tơha dơlãp vual vơla ãn duah pơnẽq pa-mơtai Pitrai, nữn pơnõq nhũ ka ôh duah hũ pơnẽq halơi sì pơnõq nhũ pơlih ngãq jỡc, kơyua avih dơgrữq vual vơla ròq ưng hmỡq pơnuaĩq Pitrai.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.