Lu-ka 12

1Dơlãp tũq nữn, tũq tơpuôl rơtôh rơvơu mơnuĩh tũq pơtõm gỡuq wỡq nữn jỡc lũ gơniãq sì juãq tơkai gỡuq, nữn hlơu viãq, Pitrai pơdòq đơp sì dơgrữq mơnuĩh mơgrũ Pitrai: “Iỡuq iãq gơrhia rùp drơi tlah mưng voh tapơi mơnuĩh Pha-ri-si hũ, nữn la kaya lơđãp vlữq lor. 2Nữn ôh hũ kaya hagĩq kađòc mãq pa-dơđỡuq nữn ròq ôh hũ aràc thơu, hẽla dơlãp dơđỡuq nữn ròq ôh tũq halơi aràc thơu. 3Yơu nữn, mơyah làiq dơgrữq kaya hagĩq sì pơnõq adơi sơai đơp dơlãp anĩh kơnãm ròq kung hmỡq pãq blàc, nữn dơgrữq kaya hagĩq pơnõq adơi sơai đơp mơnhĩ rơlẽq pãq tơnĩa dơlãp adũq dơđỡuq ròq hũ akhàt tơviãq pãq dlòc pơvũc sàc. 4Yơu nữn, Pôgrũ đơp sì pơnõq adơi sơai la dơgrữq mơnuĩh mayơu Pôgrũ hũ, juơi huaĩq tatơh kơyua aràc pa-mơtai rùp phàp, vloh hadơi nữn ôh hũ ngãq hagĩq jỡc tơra. 5Nữn Pôgrũ akhàt vrơi ga pơnõq adơi sơai thơu iỡuq huaĩq tatơh aràc hlơi. Iỡuq duh huaĩq Pitao, hadơi sì tũq song pa-mơtai rùp phàp, hũ gơnuar prah anàq mơnuĩh tơmã dơlãp tơnãh ala. Iỡuq, Pôgrũ đơp sì pơnõq adơi sơai thơu, iỡuq duh huaĩq Pitao nữn. 6Ôh iỡuq lơmã drơi chĩp niãq pa-vlơi hũ dua đong jĩn yơh? Nữn ôh hũ sa drơi halơi dơlãp katih pơnõq nhũ la kađòc prah luơi wơr pãq anãq Yàc Pô Lơngĩq. 7Bôh làiq nữn bồq pãq dlòc akõq pơnõq adơi sơai song hũ karhia avih. Juơi huaĩq: Pơnõq adơi sơai hũ kuơ màc lũ rlao sì anàq chĩp niãq. 8Pôgrũ đơp sì pơnõq adơi sơai mơyah làiq asơi mãq angãn Pôgrũ pãq anãq anàq mơnuĩh nữn, sì Anàq Mơnuĩh kung ròq mãq angãn mơnuĩh nữn pãq anãq dơgrữq mơnuĩh gơnrơh Yàc Pô Lơngĩq hũ, 9dòq asơi kơmlah tlàq Pôgrũ pãq anãq anàq mơnuĩh nữn ròq kađòc kơmlah tlàq pãq anãq dơgrữq mơnuĩh gơnrơh Yàc Pô Lơngĩq hũ. 10Sì mơyah làiq mơnuĩh halơi hũ pơnuaĩq đơp sòq jơdrãq sì Anàq Mơnuĩh ròq hũ tơleh, nữn asơi sì đơp savĩl tãl Yàc Vơngãq Sơđah ròq ôh hũ tơleh jỡc. 11Nữn dơlãp tũq hũ mơnuĩh va pơnõq adơi sơai trôh pãq anãq dơgrữq sàc pơtõm, gah tơpuôl sì mơnuĩh gơnuar apãt akõq, juơi rơchãc drơi iỡuq dõc jơga yơu halơi hẽla kaya hagĩq, hẽla drơi iỡuq đơp pơnuaĩq hagĩq, 12kơyua dơlãp tũq jơ nữn, Yàc Vơngãq Sơđah ròq pơto pơnõq adơi sơai dơgrữq pơnuaĩq iỡuq chàc đơp.”

13Hadơi nữn, sa aràc mơnuĩh dơlãp tơpuôl lũ đơp sì Pitrai: “Ơ Pôgrũ, lakơu đơp sì sơai hlãq pa-mơpha kaya mơnã ga hlãq.” 14Nữn Pitrai drơ sì mơnuĩh nữn: “Nĩ sơai, asơi pồq padỡc hlãq ngãq pô chahrơna hẽla mơnuĩh dòq di khrãh pa-mơpha kaya ga pơnõq sơai?” 15Vloh Pitrai đơp sì pơnõq nhũ: “Iỡuq gơrhia sì rơmiãq jàc vẽq rùp drơi tlah dơgrữq kaya ham ưng, kơyua mưng kaya hadiuq anàq mơnuĩh hũ ôh iỡuq hũ dòq pãq kaya lơveh-lơviãq mưng sì kaya mơnã drơi.” 16Pơtui wỡq, Pitrai đơp ga pơnõq nhũ sa pơnuaĩq pa-mơyơu làiq: “Savĩq hlùq apôh hama sa aràc mơnuĩh mơda dĩh iỡuq vlàt tơviãq voh chơtai. 17Sì nhũ sơnơng krơi dơlãp hatai làiq: ‘Kơu ròq ngãq hagĩq nĩ, kơyua kơu ôh hũ adũq pioh avih kaya chơtai voh drơi hũ?’ 18Nữn sơai đơp: ‘Kơu ròq ngãq yơu nĩ: “Kơu ròq yah prah dơgrữq adũq pioh nhũ, vữq padỡc dơgrữq sàc tơmo prõc rlao, sì chẽq pioh pãq đỡn avih dơgrữq vơdai sì dơgrữq kaya mơnã siàp drơi hũ.” 19Vloh kơu ròq đơp sì vơngãq yuà nhũ: “Ơ vơngãq yuà, hã song hũ lũ kaya mơnã pioh akhiãm angui ga lũ thũt. Iỡuq dòq lơngai, sì bõc, mơnhũm nữn uỗt sơh.”’ 20Nữn Yàc Pô Lơngĩq đơp sì sơai nữn: ‘Mơnuĩh gơla pơtòq dih, dơlãp mơlãp nĩ vơngãq yuà hã ròq kađòc lakơu đồq wỡq, vloh dơgrữq kaya hã song sơgãm pioh ròq pơweh ga asơi?’ 21Mơnuĩh rơmiãq akhiãm pioh kaya mơnã ga drơi nữn ôh hũ mơda gơnãp dơlãp Yàc Pô Lơngĩq la kung yơu nữn.”

22Vloh Pitrai đơp sì dơgrữq mơnuĩh mơgrũ nhũ: “Kơyua mưng nữn, Pôgrũ đơp sì pơnõq adơi sơai, juơi mơ-ôh rơchãc mưng kaya hadiuq drơi, ròq bõc hagĩq — kung juơi mơ-ôh rơchãc mưng rùp phàp drơi, ròq chồq hagĩq. 23Kơyua kaya hadiuq la kuơ màc rlao kaya bõc, sì rùp phàp kuơ màc rlao ao charơpha chồq. 24Iỡuq iãq pơjẽh anàq chĩp àq, nữn la pơnõq nhũ ôh dràq kung ôh yuãq, ôh hũ adũq pioh hẽla anĩh pioh ga nhũ, nữn Yàc Pô Lơngĩq ròc pơnõq nhũ. Pơnõq adơi sơai kuơ màc rlao pơjẽh chĩp ôh thơu hadùp! 25Vơnãh tơmo, aràc asơi dơlãp pơnõq adơi sơai, gơnang di kaya mơ-ôh rơchãc, pơlih pơtãl ga harơi vlàt dơlãp rài hadiuq drơi sa asĩt lơĩh? 26Yơu nữn, mơyah làiq pơnõq adơi sơai ôh hũ ngãq jỡc mĩn sa vruãq viãq tìt nữn, nữn hayơu pơnõq adơi sơai dòq mơ-ôh rơchãc mưng dơgrữq vruãq tơmo? 27Iỡuq iãq vẽq vơngà phũng — pơnõq nhũ tơmuh tơgùq yơu hayơu. Pơnõq nhũ ôh dleh dlàr, kung ôh katũc mơrai. Nữn Pôgrũ đơp sigỡuq sì pơnõq adơi sơai thơu, vloh yơu pitao Sa-lô-môn, mưng avih dơgrữq kaya gơhluh pitao nữn hũ, kung ôh hũ chồq ao charơpha yơu sa vơngà halơi dơlãp katih nữn. 28Ơ mơnuĩh tơkìq voh-tui, mơyah làiq Yàc Pô lơngĩq dòq angui chồq yơu nữn ga vơngà rỡq gah lơniãu blàc la pơjẽh harơi nĩ dòq pơgi ãt prah tơmã apôi, nữn adah làiq pơnõq adơi sơai dòq rlao yơu halơi. 29Pơnõq adơi sơai ôh chàc duah ga drơi kaya bõc hagĩq sì mơnhũm hagĩq, kung juơi mơ-ôh rơchãc. 30Kơyua dơgrữq pơjẽh pơtiàt dơlãp lơgar dun kơyua lơđãp duah dơgrữq kaya nĩ, nữn Ama pơnõq adơi sơai ròq thơu làiq pơnõq adơi sơai iỡuq chàc dơgrữq kaya nữn. 31Bôh làiq yơu nữn, iỡuq duah vẽq lơgar Pitrai hũ, nữn dơgrữq kaya nữn ròq hũ pơtãl ga pơnõq adơi sơai. 32Ơ tơpuôl tìt, juơi huaĩq, kơyua Ama pơnõq adơi sơai hũ siàp hatai vrơi lơgar Yàc ga pơnõq adơi sơai. 33Iỡuq pa-vlơi kaya mơnã drơi sì pa-mơpha ga mơnuĩh rơbah. Iỡuq sơgãm ga drơi kadũc ôh tơyah tẽq — nữn la kaya mơnã ôh kađòc siẽuq pãq dlòc lơngĩq, la anĩh mơnuĩh tlẽq sơwah ôh trôh jẽq, sì halãq-halĩc ôh ngãq tơyah jỡc. 34Kơyua mưng kaya mơnã pơnõq adơi sơai dòq anĩh halơi nữn hatai pơnõq adơi sơai kung ròq dòq pãq anĩh nữn.

35Kơ-iãng pơnõq adơi sơai iỡuq akãq vẽq, sigỡuq sì đeng iỡuq luơi ga nhũ khũ gãm. 36Sì pơnõq adơi sơai drưh yơu dơgrữq mơnuĩh ãn dòq chơkhãq chàc pô drơi hũ tũq halơi ung mai wỡq mưng bõc mơnhũm adãt pơhuãq, pioh hadơi sì tũq pô mai trôh sì tơteh bãc, pơnõq nhũ mư tũq nữn pơlih pơh ga pô. 37Lơngai ga mơnuĩh halỗt mơnãq nữn la dơgrữq mơnuĩh hadơi sì tũq trôh, pô ròq bôh dơgrữq halỗt mơnãq ãn dòq mơ-uãh chơkhãq. Iỡuq viãq, Pôgrũ đơp sì pơnõq adơi sơai làiq pô ròq akãq kơ-iãng nhũ, sì jàq pơnõq nhũ dòq guh pãq ban bõc, vloh nữn sì pô ròq duh vruãq pơnõq nhũ sì nao tãl aràc mơnuĩh. 38Mơyah làiq mơnuĩh pô trôh tơma tũq dua, hẽla tơma tũq tlơu, sì pô pơlih bôh yơu nữn, lơngai ga dơgrữq mơnuĩh halỗt mơnãq nữn. 39Nữn iỡuq thơu pãc yơu nĩ, nữn la mơyah làiq pô sàc ròq thơu tũq jơ halơi mơnuĩh tlẽq trôh, nữn ung ròq ôh luơi sàc drơi ãt mơnuĩh tơmã tlẽq dơlãp sàc drơi. 40Pơnõq adơi sơai kung iỡuq rơchãc lơĩh, kơyua dơgrữq tũq jơ sì pơnõq adơi sơai ôh thơu ròq trôh, nữn Anàq Mơnuĩh ròq trôh.”

41Vloh Pier drơ: “Lơvãt Yàc, Pitrai ãn akhàt pơnuaĩq pa-mayơu nĩ ga pơnõq hlãq, hẽla kung vrơi ga avih tãl aràc mơnuĩh?” 42Nữn Yàc hẽ: “Yơu nữn, asơi la mơnuĩh iãq sàc ngãq tui tơpãq, jãc rgơi, la mơnuĩh sì pô ròq mãq iãq mưng avih dơgrữq mơnuĩh halỗt mơnãq pơnõq nhũ, pioh pa-mơpha kaya bõc ga pơnõq nhũ tãl tũq jơ? 43Lơngai ga mơnuĩh halỗt mơnãq nữn, la mơnuĩh pô drơi, tũq trôh iãq, ròq bôh ãn dòq ngãq iỡuq yơu nữn. 44Iỡuq viãq, pôgrũ đơp sì pơnõq adơi sơai làiq, pô ròq mãq mơnuĩh halỗt mãq nữn iãq jàc avih dơgrữq kaya mơnã nhũ hũ. 45Nữn mơyah làiq mơnuĩh halỗt mơnãq nữn sơnơng dơlãp krơi hatai nhũ làiq: ‘Pô kơu dòq suơi ka mai wỡq,’ nữn pơdòq poh atòc dơgrữq mơnuĩh halỗt mơnãq lakơi sì halỗt mơnãq kamơi, sì bõc sì mơnhũm, vloh mơvũq mơvẽl, 46nữn pô mơnuĩh halỗt mơnãq nữn ròq trôh dơlãp harơi sì nhũ ôh thơu, iỡuq dơlãp tũq jơ sì nhũ ôh thơu, sì pô poh atòc nhũ, vloh ngãq gơnĩt anĩh ga nhũ sigỡuq sì dơgrữq mơnuĩh ôh tui tơpãq. 47Mơnuĩh halỗt mơnãq nữn, nữn la mơnuĩh thơu hatai sơnơng pô nhũ sì ôh rơchãc pơkhrà hẽla ngãq tui hatai pô, ròq ãt poh lũ. 48Dòq mơnuĩh halỗt mơnãq ôh thơu hatai sanơng pô sì ngãq vruãq đang mang sì ãt poh tơkìq. Vruãq tơmo, asơi, la mơnuĩh hũ vrơi lũ, kaya ròq ãt đồq wỡq pãq anĩh mơnuĩh nữn, sì pơweh sì asơi ròq hũ pơjao lũ, dơgrữq kaya hagĩq ròq ãt đồq pãq mơnuĩh nữn vloh hũ lũ rlao wỡq.

49Pôgrũ ròq trôh pioh prah apôi pãq hlùq, sì pôgrũ chơkhãq chàc kaya hagĩq mơyah làiq nhũ ròq khũ tơgùq vloh? 50Nữn Pôgrũ dòq iỡuq ãt sa adãt bãp-tem, sì Pôgrũ pơđìq pơđua ka-ồq ka-ãn ôh thơu hadùp tãl trôh tũq nhũ hũ ngãq wil tãl! 51Adơi sơai sanơng làiq pôgrũ trôh pioh va kaya dadu lơngai ga dun kơyua yơh? Ôh iỡuq ôh, Pôgrũ đơp sì adơi sơai, iỡuq rlao la kaya pa-chơlah. 52Kơyua mưng nĩ, ròq hũ lơmã aràc dơlãp savoh sàc ãt pa-chơlah tơviãq — tlơu aràc jơdrãq wỡq dua, sì dua aràc jơdrãq wỡq sì tlơu aràc. 53Pơnõq nhũ ròq ãt pa-chơlah gỡuq, ama jơdrãq sì anàq lakơi sì anàq lakơi jơdrãq sì ama, ami jơdrãq sì anàq kamơi sì anàq kamơi jơdrãq sì ami, ami vơsàc jơdrãq sì mơtơu kamơi drơi nữn mơtơu jơdrãq wỡq sì ami vơsàc.”

54Vloh Pitrai kung đơp sì vual vơla: “Tũq adơi sơai bôh sa pỗc huãl tơgùq pãq gah ia harơi tơma, adơi sơai nữn đơp mư làiq: ‘Lơngĩq jẽq hajàt ãn trôh,’ sì iỡuq viãq yơu nữn. 55Dòq dơlãp tũq bôh angĩn mưng gah prìq vluh, pơnõq adơi sơai đơp làiq: ‘Ròq hũ pơđiãq tluỡiq,’ nữn vruãq tơviãq jỡc iỡuq yơu nữn. 56Ơ mơnuĩh vlữq lor! Pơnõq adơi sơai thơu akhàt pa-tơviãq dơgrữq nỡm lơngĩq hũ sì voh hlùq, nữn hayơu pơnõq adơi sơai vloh ôh thơu pãc pioh akhàt pa-tơviãq wỡq dơlãp tũq lơwah rài nĩ? 57Hayơu pơnõq adơi sơai nữn ôh sơdor sơnơng krơi drơi sì iãq pơweh kaya hagĩq la iỡuq? 58Kơyua mư tũq nĩ pơnõq adơi sơai ãn nao sigỡuq sì mơnuĩh yãq drơi trôh pãq sàc anãq pô gơnuar apãt akõq, iỡuq ngãq avih prãn pioh rơchãc vruãq sì mơnuĩh nữn dòq nao jơlàt, pioh ga pơnõq nhũ ôh va pơnõq adơi sơai trôh pãq anãq pô chahrơna, vloh pô chahrơna pơjao pơnõq adơi sơai ga pô apãt sàc jam, sì pô apãt sàc jam va pơnõq adơi sơai tơmã dơlãp sàc jam. 59Kơu đơp sì pơnõq adơi sơai, viãq pơnõq adơi sơai ròq ôh tũq halơi tơviãq tlah mưng sàc jam jỡc tãl trôh tũq pơnõq adơi sơai vơyar avih jĩn gãm dòq wỡq.”