Lu-ka 11

1Vruãq ròq trôh tũq Pitrai ãn iơu lakơu pãq sa anĩh dih, tũq Pitrai iơu lakơu vloh, nữn sa aràc dơlãp dơgrữq mơnuĩh mơgrũ đơp sì Pitrai: “Lơvãt Yàc, lakơu pơto ga pơnõq hlãq iơu lakơu, yơu Jãng kung ròq pơto dơgrữq mơnuĩh mơgrũ nhũ.” 2Vloh, Pitrai đơp sì pơnõq nhũ: “Tũq pơnõq adơi sơai iơu lakơu, iỡuq đơp làiq:

‘Talơvãt Ama, lakơu angãn Ama jỡc sơđah.

Lakơu lơgar Ama hũ trôh.

3Lakơu vrơi ga pơnõq anàq kaya bõc iỡuq chàc angui dơgrữq harơi ga pơnõq anàq hũ.

4Lakơu tơleh pơnõq anàq mưng dlàiq dơnũh pơnõq anàq hũ,

kơyua pơnõq anàq kung tơleh dơgrữq mơnuĩh sỗq dlàiq ga pơnõq anàq.

Lakơu juơi va pơnõq anàq tơmã dơlãp kaya ơniãi.’”

5Sì Pitrai đơp sì pơnõq nhũ: “Asơi dơlãp pơnõq adơi sơai hũ gỡuq mayơu, sì mơtơh mơlãp nao trôh sì sơai nữn, vloh đơp sigỡuq sì sơai nữn: ‘Ơ ban mayơu, lakơu vrơi ga hlãq anham tlơu voh bẽn, 6kơyua hũ sa aràc mơnuĩh gỡuq mayơu hlãq hũ mưng atah trôh sigỡuq sì hlãq, sì hlãq ôh hũ kaya hagĩq pioh pồq pơyãq ga sơai nữn’? 7Tũq nữn mơnuĩh dih drơ wỡq mưng dơlãp sàc, sơai nữn pơlih đơp: ‘Juơi ngãq nhũn sabôn hlãq. Bãc song krỡq vloh, sì dơgrữq anàq hlãq ãn dòq pìq pãq dlòc chơnang sigỡuq sì hlãq. Hlãq ôh tũq halơi tơgùq vrơi ga sơai jỡc.’ 8Pôgrũ đơp sì adơi sơai, bôh làiq mơnuĩh nữn ôh tơgùq pioh mãq vrơi ga sơai dih kơyua la gỡuq mayơu drơi hũ, nữn kơyua mưng kaya pagùq pasũl sơai dih, nữn iỡuq ròq tơgùq, mơnuĩh nĩ ròq mãq vrơi ga sơai dih tãl katih bẽn sơai dih iỡuq chàc angui. 9Pôgrũ kung đơp sì adơi sơai, iỡuq lakơu vẽq, sì kaya nữn ròq hũ vrơi ga adơi sơai; iỡuq duah, nữn adơi sơai ròq pãp; iỡuq tơteh bãc, nữn bãc ròq pơh ga adơi sơai. 10Kơyua mưng mơnuĩh halơi lakơu ròq hũ; asơi duah ròq pãp; sì bãc ròq hũ pơh ga mơnuĩh halơi tơteh. 11Mơnuĩh ama halơi dơlãp pơnõq adơi sơai, tũq anàq drơi lakơu akàt, sì mơnuĩh nữn vloh vrơi nhũ ala gơla akàt yơh? 12Hẽla anàq lakơu voh mơnũq, sì mơnuĩh nữn vrơi ga nhũ adiãc yơh? 13Yơu nữn, mơyah làiq adơi sơai, bôh làiq iãh, song thơu dơgrữq kaya siàp pioh vrơi ga anàq tơcho drơi, nữn Ama la Pitao dòq pãq dlòc lơngĩq ròq vrơi Yàc Vơngãq Sơđah ga mơnuĩh lakơu Pitrai yơh?”

14Pitrai pơtiãuq kamlai kamlo. Vloh nữn, tũq nữn kamlai ròq tơviãq vloh, mơnuĩh kamlo đơp jỡc, sì tơpuôl vual vơla mãq ngãq krơi viãq. 15Nữn tơkìq aràc mơnuĩh dơlãp pơnõq nhũ đơp: “Ung nữn pơtiãuq kamlai, gơnang Be-el-se-bul, la yàc kamlai.” 16Dòq sa tơkìq mơnuĩh tơmo, kơyua pioh lòc Pitrai, pơnõq nhũ lakơu Pitrai vrơi sa krung nỡm krơi mưng lơngĩq. 17Nữn kơyua ròq thơu kaya sơnơng pơnõq nhũ, Pitrai đơp sì pơnõq nhũ: “Lơgar halơi pa-chơlah krơi ròq ãt jơdrãq wỡq rùp drơi nữn ngãq chơlah chơluỡn, sì sàc sòq jơdrãq sàc nữn ròq jơlưh trỗt. 18Mơyah làiq Satan kung kađòc pa-chơlah mĩn jơdrãq wỡq krơi rùp nhũ, nữn ngãq hayơu lơgar nhũ hũ dòq wỡq jỡc? Kơyua pơnõq ung đơp kơu pơtiãuq kamlai gơnang dì Be-el-se-bul. 19Mơyah làiq kơu pơtiãuq kamlai gơnang dì Be-el-se-bul, nữn gơnang asơi sì anàq tơcho pơnõq ung pơtiãuq kamlai? Kơyua yơu nữn, pơnõq nhũ la dơgrữq mơnuĩh chahrơna pơnõq ung. 20Bôh làiq yơu nữn, mơyah làiq kơu pơtiãuq kamlai gơnang dì tơđiãc tơngãn Yàc Pô Lơngĩq hũ, nữn lơgar Yàc Pô Lơngĩq song trôh sì pơnõq ung. 21Tũq sa aràc mơnuĩh prãn khãc hũ kaya mơsôh wil tãl iãq jàc sàc nhũ, nữn kaya mơnã mơnuĩh nữn hũ dòq gơjãp gađữc, 22nữn tũq hũ sa aràc mơnuĩh prãn khãc rlao sơai nữn gơluh poh, mơnuĩh nữn pha rlao sơai nữn, mơvlah mãq kaya mơsôh sơai hũ, la kaya sơai nữn chàc gơnang, vloh mơnuĩh nữn pa-mơpha kaya mơnã tlẽq hũ mưng sơai nữn. 23Mơnuĩh halơi ôh dòq sì kơu nữn la sòq jơdrãq wỡq kơu, sì mơnuĩh halơi ôh hũ sa lơnuãq sigỡuq sì kơu sì ròq chơlah chơluỡn. 24Tũq kamlai mơsãc ròq tơviãq tlah sa aràc mơnuĩh, nhũ nao gãt tơpa dơgrữq anĩh thô thiãq duah anĩh padơi. Sì tũq nữn ôh duah jỡc, nhũ đơp làiq: ‘Kơu ròq mai wỡq sàc kơu, la anĩh kơu vơhrơu tơviãq.’ 25Hadơi sì tũq mai wỡq nữn trôh, nhũ bôh sàc song hũ vah vơhồc sì rơmiãq pioh siàp mơkrơ. 26Tũq nữn, nhũ nao sì jàq tui tơjuh kamlai tơmo brơh mơsãc rlao nhũ tơmã hadiuq sigỡuq sì dơlãp sàc nĩ. Sì dòq dơlãp tũq hadơi mơnuĩh hũ nữn tơviãq jỡc iãh mơsãc rlao tũq halơu.”

27Vruãq ròq bôh tũq Pitrai ãn đơp dơgrữq pơnuaĩq nĩ, hũ sa aràc mơnuĩh kamơi dih pãq khrãh vual vơla lũ mãq sãp, mòq đơp sì Pitrai: “Lơngai ga tũc song tũc mơtiàt Pôgrũ sì tasơu song vrơi ga Pôgrũ mõm.” 28Nữn Pitrai hẽ: “Iỡuq viãq nữn, lơngai ga aràc halơi hmỡq pơnuaĩq Yàc Pô Lơngĩq sì rơmiãq jàc.”

29Tũq tơpuôl vual vơla ãn dòq pơtõm gỡuq lũ rlao, Pitrai pơdòq sãp đơp làiq: “Pơjẽh pơtiàt nĩ la pơjẽh pơtiàt iãh mơsãc. Pơnõq nhũ duah sa khrung nỡm krơi, nữn ròq ôh hũ khrung nỡm krơi halơi jỡc vrơi ga pơnõq nhũ lơniãu krung nỡm Jô-na hũ. 30Kơyua Jô-na ròq tơviãq jỡc nỡm krơi yơu halơi ga vual vơla palơi Ni-ni-ve, nữn Anàq Mơnuĩh kung ròq la khrung nỡm krơi ga pơjẽh pơtiàt nĩ yơu nữn mĩn. 31Dơlãp harơi chahrơna, Pitao Kamơi Gah Prìq ròq tơgùq dữc sigỡuq sì mơnuĩh pơjẽh pơtiàt nĩ, sì yãq dlàiq pơnõq nhũ, kơyua mòq ròq trôh mưng anĩh tãl luôĩq dũt voh hlùq, pioh hmỡq pơnuaĩq jãc rgơi pitao Sa-lô-môn hũ, sì iãq dih, sa Pitao prõc rlao Sa-lô-môn pãq anĩh nĩ. 32Dơlãp harơi chahrơna, vual vơla palơi Ni-ni-ve ròq tơgùq dữc sigỡuq sì pơjẽh pơtiàt nĩ sì ròq yãq dlàiq pơnõq nhũ, kơyua pơnõq nhũ song mơvai tlàq dlàiq hlơu dì tũq hmỡq pơnuaĩq pơto akhàt Jô-na hũ, sì iãq nĩ, dòq hũ sa Pitao dòq prõc rlao Jô-na pãq đĩ.

33Hadơi sì tũq tuỗiq đeng, ôh aràc halơi chẽq nhũ pãq anĩh dơđỡuq, kung ôh chẽq dơlãp thũng, nữn chẽq nhũ pãq dlòc tơkai đeng pioh ga dơgrữq mơnuĩh halơi yàp tơmã pơlih bôh kaya sơdah. 34Dơlah apôi rùp phuỗt la mơta pơnõq adơi sơai hũ. Tũq mơta pơnõq adơi sơai la siàp, nữn avih rùp phuỗt pơnõq adơi sơai kung hũ vãq sơrè kaya sơdah. Nữn tũq nhũ iãh, nữn avih rùp phuỗt pơnõq adơi sơai kung vãq kaya sồp kơnãm. 35Kơyua yơu nữn, iỡuq gơrhia, huaĩq kaya sơđah dơlãp pơnõq adơi sơai la sồp kơnãm. 36Yơu nữn mơyah làiq avih rùp phuỗt pơnõq adơi sơai vãq sơrè kaya sơdah, ôh hũ vơnah halơi sồp kơnãm, nữn nhũ ròq sơdah blãc, kung yơu apôi gơchràq sơdah đeng pơsàc sơdah adơi sơai.”

37Dơlãp tũq Pitrai đơp vloh, hũ sa aràc mơnuĩh Pha-ri-si jàq Pitrai hayơu vrơi ga Pitrai pơlih angui bõc sigỡuq sì ung. Tũq nao trôh, Pitrai dòq guh ban bõc. 38Tũq bôh yơu nữn, mơnuĩh Pha-ri-si mãq ngãq krơi viãq kơyua Pitrai ôh rao tơngãn hlơu sì tũq angui bõc. 39Nữn Yàc đơp sì ung: “Tũq nĩ, mơnuĩh Pha-ri-si pơnõq ung rao sơchih gah lơniãu chơwàt sì prìc, dòq gah dơlãp pơnõq ung nữn vãq kaya bõc ham ưng sì iãh mơsãc. 40Dơgrữq mơnuĩh gơla pơtòq dih! Ôh iỡuq Pitao song ngãq jỡc gah lơniãu kung ngãq jỡc gah dơlãp yơh? 41Kơyua yơu nữn, iỡuq mãq pa-mơpha dơgrữq kaya hagĩq dòq gah dơlãp yơu vruãq ngãq siàp, sì iãq nĩ, dơgrữq kaya hũ ròq sơchih vrơi ga pơnõq ung.

42Bôh làiq, dleh dlàr ga mơnuĩh Pha-ri-si pơnõq ung, kơyua pơnõq ung pioh vơnãh sa plôh iãm katrơu, iãm bơu sì avih dơgrữq iãm rỡq dơlãp vỡn, nữn vloh pơnõq ung prah luơi dơgrữq vruãq ngãq siàp sì hatai khiãng duman Yàc Pô Lơngĩq. Nữn iỡuq chàc ngãq dơgrữq vruãq nĩ, nữn ôh prah luơi dơgrữq vruãq dih. 43Dleh dlàr ga mơnuĩh Pha-ri-si sì pơnõq ung, kơyua pơnõq ung ưng sơh anĩh dòq guh siàp rlao avih dơlãp sàc pơtõm sì dơgrữq pơnuaĩq chuãq rơwãc pãq khrãh dràq. 44Dleh dlàr ga pơnõq ung, kơyua pơnõq ung drưh yơu vơnẽq atơu dơđỡuq thĩt, sì anàq mơnuĩh ôh thơu tũq aràc nao juãq pãq dlòc.”

45Hadơi nữn, pioh drơ wỡq, sa dơlãp dơgrữq mơnuĩh gơnuar pơto voh-va đơp sì Pitrai: “Ơ Pôgrũ, pôgrũ kung siẽq siẽl pơnõq hlãq đơp yơu nữn.” 46Nữn Pitrai đơp: “Dleh dlàr ga mơnuĩh gơnuar pơto voh-va pơnõq ung wỡq! Kơyua pơnõq ung dãq chẽq ga aràc dơgrữq kaya anong tơrãq kãn sì gui, dòq mĩn rùp phàp pơnõq ung nữn ôh chròq sa tơđiãc tơngãn drơi tơmã anong gui tơrãq nữn. 47Dleh dlàr ga pơnõq ung, kơyua pơnõq ung vỡq vơnẽq atơu ga dơgrữq mơnuĩh gơnuar hwơr, dòq ung kõq pơnõq ung song pa-mơtai pơnõq nhũ. 48Yơu nữn, pơnõq ung ngãq chưng sì sa hatai vruãq ngãq ung kõq drơi hũ, kơyua pơnõq nhũ song pa-mơtai dơgrữq mơnuĩh gơnuar hwơr, dòq pơnõq ung nữn vỡq vơnẽq ga pơnõq nhũ. 49Kung kơyua yơu nữn, kaya jãc rgơi Yàc Pô Lơngĩq Yàc song đơp: ‘Kơu ròq pơđar dơgrữq mơnuĩh gơnuar hwơr sì dơgrữq mơnuĩh gơnuar pơđar trôh sigỡuq sì pơnõq nhũ, nữn pơnõq nhũ ròq pa-mơtai sì mãq pakỡuq lũ mơnuĩh dơlãp katih tơpuôl pơnõq nhũ’ 50nữn dơrah avih dơgrữq mơnuĩh gơnuar hwơr song tôh tơviãq mưng tũq chrơng pajỡc iỡuq ãt tơnĩa wỡq mưng pơjẽh pơtiàt nĩ, 51mưng dơrah A-bel tãl trôh dơrah Sa-cha-ri, la mơnuĩh song ãt pa-mơtai pãq khrãh ban talơvãt sì sàc duh talơvãt. Iỡuq, kơu đơp sì pơnõq ung thơu, dơrah nữn ròq tơnĩa đồq wỡq mưng pơjẽh pơtiàt nĩ. 52Dleh dlàr ga tơpuôl mơnuĩh pơto voh-va pơnõq ung, kơyua pơnõq ung mãq apãt anàq tlir kaya thơu jãc hũ; mĩn pơnõq ung ôh tơmã, nữn pơnõq ung dòq mãq pakỡuq mơnuĩh tơmo tơmã.”

53Hadơi sì tũq Pitrai tơviãq mưng anĩh nữn, dơgrữq mơnuĩh gơnuar pơto voh-va sì mơnuĩh Pha-ri-si pơdòq sòq jơdrãq dì Pitrai sa vĩq khãc viãq sì gơrlah pơnuaĩq sì Pitrai mưng lũ kaya, 54duah pơnẽq pioh padỡc vơnrẽq Pitrai mưng pơnuaĩq đơp tơviãq mưng chơbuai Pitrai.