Lu-ka 10

1Hadơi dơgrữq vruãq nữn, Yàc kung duỡt ruãh tơjuh plôh dua aràc mơnuĩh mơgrũ tơmo wỡq, sì pơđar pơnõq nhũ sơkàp nao hlơu di anãq Pitrai trôh dơgrữq palơi sì anĩh nữn mĩn Pitrai ròq jẽq nao. 2Pitrai đơp sì pơnõq nhũ: “Bôh làiq tãl vlàt yuãq nữn iỡuq viãq, nữn mơnuĩh rgơi yuãq nữn tơkìq uãn. Yơu nữn lakơu sì Yàc vlàt yuãq pioh Pitrai pơđar mơnuĩh rgơi yuãq trôh tơmã dơlãp vlàt pẽq yuãq Pitrai hũ. 3Iỡuq tơviãq nao vẽq. Iãq dih, Pôgrũ pơđar pơnõq adơi sơai nao yơu avo anàq dòq pãq khrãh tơpuôl asơu sĩc. 4Juơi va tui kadũc jĩn, kadũc kaya nao jơlàt, chơkhõq, kalìq juãq, sì juơi tơnĩa chuãq rơwãc asơi pãq jơlàt nao. 5Dơlãp tũq sàc halơi pơnõq adơi sơai tơmã, hlơu viãq la iỡuq tơnĩa chuãq rơwãc làiq: ‘Lakơu kaya dadu lơngai ga sàc nĩ.’ 6Mơyah làiq anàq kaya dadu lơngai hũ dòq pãq đỡn, nữn kaya dadu lơngai pơnõq adơi sơai ròq trôh pãq dlòc mơnuĩh nữn; dòq mơyah làiq ôh, nhũ ròq mai wỡq pãq adơi sơai. 7Iỡuq dòq wỡq dơlãp sàc nữn, bõc hẽla mơnhũm dơgrữq kaya hagĩq tồq mãq mưng pơnõq nhũ, kơyua mơnuĩh ngãq vruãq harơi đang mang sì tồq mãq jĩn harơi drơi. Juơi pađuỡt va mưng sàc nĩ tơpa sàc dih. 8Mơyah làiq palơi halơi pơnõq adơi sơai nao tơmã sì pơnõq nhũ tồq ròq pơnõq adơi sơai, iỡuq angui dơgrữq kaya hagĩq pơnõq nhũ pồq pơyãq ga adơi sơai, 9iỡuq pasồq pakhơĩh mơnuĩh ruãq pãq anĩh nữn, sì đơp sigỡuq pơnõq nhũ làiq: ‘Lơgar Yàc Pô Lơngĩq song trôh jẽq sì pơweh sì pơnõq adơi sơai.’ 10Dòq mơyah làiq palơi halơi pơnõq adơi sơai nao tơmã nữn pơnõq nhũ ôh tồq ròq pơnõq adơi sơai, nữn hadơi tũq tơviãq nao wỡq pãq lơniãu jơlàt palơi nữn, iỡuq đơp: 11‘Dơlãp nữn hũ hlùq thũl dơlãp palơi pơnõq hã pãq dì tơkai pơnõq hlãq, nữn pơnõq hlãq iỡuq tơtôh sơchih pioh jơdrãq pơnõq nhũ! Nữn iỡuq thơu kaya nĩ, nữn la Lơgar Yàc Pô Lơngĩq ròq jẽq trôh.’ 12Pôgrũ đơp sì pơnõq adơi sơai làiq pơweh sì palơi Sô-đôm dơlãp harơi nữn, nhũ đang sì palơh sa-iỡl rlao palơi nữn. 13Dleh dlàr ga hã, palơi Kô-ra-sin! Dleh dlàr ga hã, palơi Bet-sai-đa! Kơyua mơyah làiq dơgrữq vruãq gơnuar chơnuãq, sì pơnõq nhũ pa-tơviãq pãq khrãh pơnõq hã, ròq hũ bôh dơlãp palơi Ti-rơ sì palơi Si-đôn, nữn pơnõq nhũ song mơvai tlàq dlàiq, kung tũq dòq guh dơlãp havơu sigỡuq sì ao jơrai mưng halơu vloh. 14Yơu nữn, ròq đang mang sì hũ tồq pa sa-iỡl ga Ti-rơ sì Si-đôn dơlãp kaya ãt chahrơna rlao pơnõq hã. 15Dòq hã, Ka-be-na-um, ôh iỡuq hã ròq hũ wỡh va tơgùq trôh tãl dlòc lơngĩq? Hã ròq kađòc pa-trỗt pãq lơgar atơu. 16Mơnuĩh halơi ưng hmỡq pơnõq adơi sơai la ưng hmỡq pôgrũ, sì mơnuĩh kơmlah tlàq pơnõq adơi sơai la kơmlah tlàq pôgrũ, nữn mơnuĩh kơmlah tlàq pôgrũ la kơmlah tlàq Pitao pơđar pôgrũ.”

17Vloh nữn tơjuh plôh dua aràc mơnuĩh mơgrũ mai wỡq mưng kaya uỗt sơh, sì drơ: “Lơvãt Yàc, dơlãp angãn Pitrai, tơviãq jỡc dơgrữq kamlai kung duh huaĩq pơnõq hlãq.” 18Nữn Pitrai đơp sì pơnõq nhũ: “Pôgrũ song bôh Sa-tan mưng lơngĩq lẽq trỗt yơu gơlia liãq. 19Iỡuq iãq, Pôgrũ song vrơi ga pơnõq adơi sơai hũ gơnuar pioh juãq jơlì anàq ala sì anàq adiãc, sigỡuq sì avih dơgrữq gơnuar prãn anàq mơnuĩh sòq jơdrãq, nữn viãq ôh hũ dơgrữq kaya halơi pơlih ngãq iãh ga pơnõq adơi sơai jỡc. 20Bôh làiq yơu nữn, juơi uỗt sơh mưng vruãq nữn, nữn la vruãq dơgrữq kamlai ròq duh huaĩq hlơu dì pơnõq adơi sơai, nữn iỡuq uỗt sơh kơyua mưng angãn pơnõq adơi sơai hũ wãq angãn pãq dlòc lơngĩq.”

21Dơlãp tũq jơ nữn, Pitrai viãq uỗt sơh dơlãp Yàc Vơngãq Sơđah, sì đơp: “Lơvãt Ama, la Yàc Pô Lơngĩq sì hlùq tơnãh hũ, anàq sơuỗt mơyòp Ama kơyua Ama ròq padỡuq dơđỡuq dơgrữq kaya nĩ tlah mưng dơgrữq anàq mơnuĩh jãc rgơi sì mơnuĩh thơu pãc, nữn Ama ròq akhàt pa-tơviãq ga lơđeh tìt. Lơvãt Ama, iỡuq, kơyua yơu nữn la kaya siàp pãq anãq mơta Ama.” 22“Dơgrữq vruãq song hũ pơjao ga anàq mưng Ama anàq hũ, ôh aràc halơi thơu Anàq la asơi lơniãu Ama, sì ôh mơnuĩh halơi thơu Ama la lơniãu Anàq sì mơnuĩh halơi Anàq ưng akhàt pa-tơviãq ga nhũ.” 23Vloh hadơi sì tũq weh wỡq dơgrữq mơnuĩh mơgrũ, Pitrai đơp krơi sì pơnõq nhũ: “Lơngai ga mơta bôh kaya sì pơnõq adơi sơai bôh. 24Kơyua mưng Pôgrũ đơp ga pơnõq adơi sơai thơu làiq lũ pitao gơnuar hwơr sì pô pitao chơkhãq khiãng hũ bôh kaya sì adơi sơai bôh, nữn ôh bôh jỡc, sì hmỡq kaya adơi sơai hmỡq, nữn ôh hmỡq jỡc.”

25Sì dih, hũ sa aràc mơnuĩh pơto voh-va sì tơgùq dữc pioh đơp lòc Pitrai, tũq nữn đơp: “Ơ Pôgrũ, hlãq ròq hũ tồq mãq kaya hadiuq dòq gãm gãm sì ngãq kaya hagĩq?” 26Nữn Pitrai đơp sì ung nữn: “Pơnuaĩq hagĩq hũ wãq dơlãp voh-va? Ung pơpoh bôh yơu hayơu?” 27Tũq nữn drơ pơnuaĩq, ung nữn đơp: “Anàq iỡuq anĩt duman Yàc la Yàc Pô lơngĩq anàq hũ sì avih hatai drơi, Sì avih vơngãq yua drơi, sì avih prãn drơi, sì avih dlò jãc drơi, sì iỡuq anĩt duman mơnuĩh jẽq phia anàq hũ yơu rùp phuỗt drơi.” 28Nữn la Pitrai đơp sì ung: “Ung drơ làiq iỡuq viãq. Iỡuq ngãq yơu nữn nữn ung ròq hadiuq.” 29Nữn kơyua ưng akhàt angãn drơi la tơpãq dãng, ung nữn drơ sì Yàc Je-su: “Yơu nữn asơi la mơnuĩh gỡuq jẽq phia hlãq?” 30Vloh pioh drơ pơnuaĩq, Yàc Je-su đơp: “Sa aràc mơnuĩh dih ãn nao mưng palơi Je-ru-sa-lem trỗt pãq palơi Je-ri-kô, nữn sơai kađòc tơmã dơlãp tơngãn mơnuĩh tlẽq sơwah, la tơpuôl pơnõq nhũ wàq avih kaya sơai sì hadơi nữn aràc poh gơlĩh sơai nữn dơvrãm vrỡuq, pơnõq nhũ prah nao, luơi sơai nữn sa vơnah hadiuq sa vơnah mơtai. 31Tũq nữn, kơtuãq hũ sa aràc mơnuĩh gơnuar pioh kaya duh talơvãt nữn ãn lơvàq nao jơlàt nữn, sì tũq iãq bôh sơai, ung nữn pleh nao gãt gah dih. 32Kung yơu nữn, hũ sa aràc mơnuĩh Le-vi, tũq nao trôh anĩh nĩ sì bôh mơnuĩh nữn kung pleh sơgah dih. 33Nữn hũ sa aràc mơnuĩh Sa-ma-ri dih, dơlãp tũq nao jơlàt, ròq trôh anĩh mơnuĩh ãt dleh dlàr nữn, sì tũq iãq bôh, nữn sơai nữn hũ hatai anĩt anar. 34Tũq nữn ròq nao trôh jẽq, sơai nữn mãq pơchà pơpòq mơnuĩh hlôh lơka, vruah mơnhàq sì alãc pãq đỡn. Hadơi sì tũq wơh mơnuĩh kađòc dleh dlàr nữn tơgùq sì pađìq pãq dlòc rõc anàq asỡq nhũ hũ, nhũ va mơnuĩh nữn trôh sa anĩh sàc padơi sì iãq dõc ga nhũ nĩ. 35Tơmã sơdah ờp harơi hadơi, tũq nhũ mãq dua đơ-ni-e, sơai nữn vrơi ga pô sàc sì hakơi: ‘Iỡuq iãq mưng sơai nữn, sì mơyah làiq ung iỡuq pa-vlơi dơgrữq kaya hagĩq nữn, nữn tũq kơu mai wỡq, hlãq ròq vơyar wỡq ga ung.’ 36Ung sanơng asơi dơlãp tlơu aràc mơnuĩh nữn ròq tơviãq jỡc mơnuĩh gỡuq palơi sigỡuq sì mơnuĩh dleh dlàr kađòc tơmã dơlãp tơngãn mơnuĩh tlẽq sơwah?” 37Ung nữn drơ: “Mơnuĩh song hũ hatai anĩt duman pơweh sì mơnuĩh kađòc kaya dleh dlàr.” Yơu nữn la Yàc Je-su pơđar ung: “Ung iỡuq tơviãq nao vẽq ngãq yơu nữn.”

38Dơlãp tũq pơnõq nhũ nao jơlàt, Pitrai tơmã dơlãp sa palơi dih, sì hũ sa aràc mơnuĩh kamơi dih angãn la Ma-the tồq ròq Pitrai. 39Nai hũ sa aràc adơi kamơi angãn la Ma-ri, dòq guh pãq anĩh tơkai Yàc Je-su pa-hmỡq pơnuaĩq Pitrai. 40Nữn Ma-the ãn tơwãq sì lũ vruãq rơchãc kaya bõc, vloh nữn nai trôh pãq Pitrai sì đơp làiq: “Lơvãt Yàc, Pitrai ôh thơu làiq adơi kamơi hlãq luơi sa aràc hlãq duh vruãq yơh? Nữn Lakơu đơp adơi kamơi hlãq, pioh nhũ pơlih dõc hlãq.” 41Bôh làiq, nữn tồq pơnuaĩq, Yàc hẽ sì nai: “Ơ Ma-the, Ma-the, nai mơ-ôh rơchãc sì sơwãn mưng lũ vruãq, 42nữn mĩn hũ sa vruãq la iỡuq chàc. Kơyua Ma-ri song ruãh vơnãh siàp, la vơnãh ròq ôh kađòc mơvlah mãq mưng nai nữn.”