Lu-ka 9

1Hadơi sì tũq iơu sa plôh dua aràc mơnuĩh gơnuar pơđar pơtõm wỡq, Pitrai vrơi ga pơnõq nhũ sì gơnuar chơnuãq pioh pơtiãuq avih dơgrữq kamlai sì pakhơĩh ruãq, 2vloh Pitrai pơđar pơnõq nhũ tơviãq nao akhàt pa-thơu mưng lơgar Yàc Pô Lơngĩq sì pioh pasồq pakhơĩh mơnuĩh ruãq. 3Pitrai đơp sì pơnõq nhũ: “Juơi va tui kaya hagĩq tũq nao jơlàt — Ôh va gai mơjrà, kadũc, bẽn, hẽla jĩn priãq — kung juơi va tui dua vlah ao. 4Pơnõq adơi sơai tơmã dơlãp sàc halơi, iỡuq dòq pãq đỡn sì iỡuq mưng sàc nữn tơviãq nao. 5Bôh làiq hũ anĩh halơi sì pơnõq nhũ ôh tồq ròq pơnõq adơi sơai, nữn tũq hlơi tơviãq mưng palơi nữn, iỡuq tơtôh thũl pãq ala tơkai pơnõq adơi sơai yơu pơnuaĩq ngãq chưng jơdrãq wỡq sì pơnõq nhũ.” 6Yơu nữn la tũq tơviãq nao, dơgrữq mơnuĩh mơgrũ nao gãt dơgrữq palơi, akhàt payơr pơnuaĩq siàp sì pasồq pakhơĩh ruãq dơgrữq vĩq anĩh.

7Dơlãp tũq pitao adơi He-rôt hmỡq mưng avih dơgrữq vruãq ãn song bôh tơviãq, ung nữn ka-ùq ka-ãn viãq, kơyua pơnuaĩq hũ sa asit mơnuĩh đơp làiq Jãng ròq mưng kaya mơtai song hadiuq wỡq, 8nữn hũ sa asit mơnuĩh đơp làiq E-li ròq pabôh tơviãq, dòq hũ mơnuĩh tơmo đơp làiq sa dơlãp dơgrữq mơnuĩh gơnuar hwơr rài sơđãq song hadiuq wỡq. 9Nữn He-rôt đơp: “Kơu song koh akõq Jãng vloh, dòq mơnuĩh nĩ la asơi sì kơu hmỡq dơgrữq pơnuaĩq đơp yơu nĩ mưng mơnuĩh yơh?” Vloh ung nữn duah pơnẽq pãp Pitrai.

10Tũq dơgrữq mơnuĩh gơnuar pơđar mai wỡq, pơnõq nhũ akhàt wỡq ga Pitrai avih dơgrữq vruãq pơnõq nhũ song ngãq. Sì hadơi sì tũq va pơnõq nhũ nao sigỡuq sì nhũ, sì Pitrai pleh dađỡuq sa palơi angãn la Bet-sai-đa. 11Nữn tơpuôl vual vơla lũ tồq thơu jỡc, nữn pơnõq nhũ nao tui Pitrai. Pitrai tồq ròq pơnõq nhũ, pơto akhàt ga pơnõq nhũ mưng lơgar Yàc Pô Lơngĩq, sì Pitrai dõc pasồq pakhơĩh dơgrữq mơnuĩh chơkhãq chàc hũ pasồq pakhơĩh. 12Harơi jẽq sồp mơlãp, tũq nữn, nữn hũ sa plôh dua aràc nao trôh pơnõq nhũ drơ sì Pitrai: “Lakơu Pôgrũ vrơi ga vual vơla pioh nao tơmã dơlãp dơgrữq palơi sì palơi tìt tòp dar nĩ, pơnõq nhũ pơlih duah anĩh dòq padơh sì kaya bõc, kơyua pãq anĩh nĩ, pơnõq drơi ãn dòq pãq khrãh anĩh suà lìt viãq.” 13Bôh làiq, Pitrai đơp sì pơnõq nhũ: “Pơnõq adơi sơai iỡuq vrơi ga pơnõq nhũ bõc.” Nữn pơnõq nhũ drơ: “Ôh hũ kaya hagĩq pãq anĩh pơnõq hlãq hũ lũ rlao mĩn la lơmã voh bẽn sì dua drơi akàt soh — lơniãu sì pơnõq hlãq nao vlơi kaya bõc pơtãl wỡq pioh hũ tãl ga vual vơla nĩ.” 14(Kơyua hũ pơgãp lơmã rơvơu aràc mơnuĩh lakơi.) Pitrai đơp sì dơgrữq mơnuĩh mơgrũ nhũ: “Iỡuq pơđar pơnõq nhũ dòq guh pãq ala pioh bõc tui dơgrữq tơpuôl pơgãp lơmã plôh aràc.” 15Pơnõq nhũ ngãq tui yơu nữn, vrơi ga avih tơpuôl vual vơla dòq guh pioh bõc. 16Hadơi sì tũq mãq lơmã voh bẽn sì dua drơi akàt, angơìq mơta pãq dlòc lơngĩq, Pitrai ỡn ngai, kaya bõc nữn, vloh pẽq tơviãq, vrơi ga dơgrữq mơnuĩh mơgrũ pioh vrơi pa-mơpha ga tơpuôl vual vơla. 17Avih tãl aràc hũ bõc tarơi tũc, sì dơdrữq tleh lơveh hũ duỡt pơtõm ga pơnõq nhũ la hũ sa plôh dua vai bẽn lơveh.

18Hũ sa harơi dih dơlãp tũq Pitrai ãn iơu lakơu krơi, dơgrữq mơnuĩh mơgrũ kung nao sigỡuq sì Pitrai, nữn Pitrai tơnĩa pơnõq nhũ làiq: “Vual vơla đơp Pôgrũ la asơi?” 19Tũq drơ pơnuaĩq, pơnõq nhũ hẽ làiq: “La Jãng Bãp-tit, dòq mơnuĩh tơmo đơp pôgrũ la E-li, nữn kung hũ mơnuĩh tơmo wỡq đơp pôgrũ la sa dơlãp dơgrữq mơnuĩh gơnuar hwơr mưng rài sơđãq hadiuq wỡq.” 20Vloh Pitrai tơnĩa pơnõq nhũ wỡq: “Dòq pơnõq adơi sơai đơp pôgrũ la asơi?” Tũq nữn, nữn Pier drơ, ung hẽ làiq: “Pôgrũ la Pitao Dõc Pơ-tlah Yàc Pô Lơngĩq hũ.” 21Nữn pioh pakỡuq pơnõq nhũ, Pitrai đơp juơi akhàt kaya nĩ ga asơi, 22sì đơp làiq: “Anàq Mơnuĩh iỡuq ãt lũ kaya dleh dlàr, kađòc dơgrữq mơnuĩh pồ tơhã, dơgrữq pồ gơnuar pioh kaya duh talơvãt prõc, sì dơgrữq mơnuĩh gơnuar pơto voh-va kơmlah tlàq, vloh ròq kađòc pa-mơtai, sì trôh harơi bãc tlơu ròq hadiuq wỡq.” 23Vloh Pitrai đơp sì avih dơgrữq tãl aràc pơnõq nhũ: “Mơyah làiq asơi ưng nao tui pôgrũ nữn iỡuq tlàq rùp drơi, dơgrữq harơi gơlãp kayơu pỡc drơi sì nao tui pôgrũ. 24Kơyua mưng mơnuĩh halơi ưng dõc kaya hadiuq drơi nữn mơnuĩh nữn ròq lơhiãq nhũ, dòq mơnuĩh halơi kơyua pôgrũ ãt lơhiãq kaya hadiuq drơi, nữn mơnuĩh nữn ròq hũ dõc nhũ. 25Kơyua hũ sa aràc mơnuĩh hũ kuơ hagĩq, sì gam hũ avih dun kơyua nữn vloh rùp phuỗt drơi kađòc lơhiãq lơmuĩq hẽla pa-lơhiãq rùp phuỗt drơi? 26Kơyua mơyah làiq aràc halơi malơu ơlah mưng pôgrũ sì pơnuaĩq pôgrũ hũ, nữn Anàq Mơnuĩh ròq malơu ơlah mưng mơnuĩh nữn tũq Pitrai trôh dơlãp kaya gơhluh drơi hũ, sigỡuq sì kaya gơhluh Ama hũ sì dơgrữq mơnuĩh gơnrơh sơđah hũ. 27Nữn iỡuq viãq, pôgrũ đơp sì adơi sơai, hũ sa asĩt mơnuĩh dòq dơlãp dơgrữq mơnuĩh ãn dòq dữc nĩ, la dơgrữq mơnuĩh đơp viãq ròq ka ôh mơtai sì tãl trôh tũq pơnõq nhũ bôh lơgar Yàc Pô Lơngĩq.”

28Vruãq ròq trôh pơgãp talơpãn harơi hadơi dơgrữq pơnuaĩq nữn, tũq va Pier, sigỡuq sì Jãng, sì Ja-kơ, Pitrai tơgùq nao pãq dlòc chỡq pioh iơu lakơu. 29Vruãq akhàt pa-tơviãq tũq Pitrai ãn dòq iơu lakơu, nữn la bòq mơta Pitrai pa-sơdua krơi tơmo, sì kaya angui chồq Pitrai hũ nữn tơviãq jỡc sơdah gơchràq. 30Nữn dih, hũ dua aràc mơnuĩh ãn dòq đơp dlài sì Pitrai, nữn la Môi-se sì E-li, 31sì pơnõq nhũ tồq thơu kơnãl dơlãp kaya gơhluh, ãn đơp mưng kaya mơtai Pitrai hũ, la kaya Pitrai jẽq ngãq ga tơviãq jỡc iỡuq viãq pãq palơi Je-ru-sa-lem. 32Pier sì dơgrữq mơnuĩh sigỡuq sì ung kung ãn tơnòq mơta viãq, nữn tũq mơdưh nữn tơgùq vloh, pơnõq nhũ bôh kaya gơhluh Pitrai hũ sì dua aràc ãn dòq dữc sigỡuq sì Pitrai. 33Vruãq hadơi ròq bôh tũq dua aràc mơnuĩh nữn tơviãq nao tlah mưng Pitrai, Pier đơp sì Yàc Je-su: “Ơ Pôgrũ, viãq la siàp ga pơnõq drơi dòq pãq đĩ, pơnõq hlãq pơlih padỡc tlơu voh tlam, sa voh ga Pôgrũ, sa voh ga Môi-se sì sa voh ga E-li.” (Ung ôh thơu drơi ãn dòq đơp kaya hagĩq). 34Nữn dơlãp tũq ung ãn dòq đơp yơu nữn, sa pỗc huãl pabôh tơviãq sì tlỗp pơnõq nhũ; pơnõq nhũ huaĩq tatơh viãq tũq pơnõq nhũ tơmã dòq dơlãp pỗc huãl. 35Vloh mưng dơlãp pỗc huãl sỡm wàc sãp, đơp, làiq: “Nĩ la Anàq Kơu, la mơnuĩh Kơu song duỡt ruãh. Iỡuq hmỡq pơnuaĩq Nhũ.” 36Tũq sãp sỡm wàc nữn luôĩq nữn mĩn dòq wỡq sa aràc Yàc Je-su. Avih pơnõq nhũ dòq suà lìt, sì ôh asơi akhàt mưng dơlãp dơgrữq kaya hagĩq sì drơi song bôh dơlãp dơgrữq harơi nữn.

37Hũ vruãq harơi hadơi, dơlãp tũq pơnõq nhũ mưng dlòc chỡq trỗt, hũ sa tơpuôl vual vơla lũ trôh pãp Pitrai. 38Sì iãq dih, hũ sa aràc mơnuĩh mưng dơlãp tơpuôl lũ priãu prõc sãp làiq: “Ơ Pôgrũ, lakơu Pôgrũ iãq trôh anàq lakơi hlãq, kơyua nhũ la anàq lakơi sa aràc hlãq hũ. 39Iãq nĩ, nữn kamlai ãp sì pa-gruãq nhũ sì nhũ ròq kơmrão papơ, vloh nhũ nữn pa-vlữq sì jarơnũ ia mơvah. Nhũ ôh tơviãq tlah lơđeh tìt nữn, miẽt ngãq dleh dlàr ga anàq tìt nữn dơvrãm rùp nhũ. 40Hlãq song lakơu dơgrữq mơnuĩh mơgrũ Pôgrũ hũ hagĩq ôh vrơi pơnõq nhũ pơtiãuq nhũ nao, nữn pơnõq nhũ ôh ngãq jỡc.” 41Dơlãp tũq nữn drơ pơnuaĩq, Yàc Je-su đơp: “Ơ pơjẽh pơtiàt ôh pãc sì brưh mơsãc sì alah, kơu ròq dòq sì pơnõq hã sì ãt ỡn ga pơnõq hã tãl trôh tũq halơi? Iỡuq va anàq lakơi sơai mai pãq đĩ.” 42Anàq tìt nữn ãn trôh, nữn kamlai pa-lơvuh gruãq nhũ trỗt pãq hlùq sì ngãq ga nhũ jơdoh papỡq. Nữn Yàc Je-su gơloh pơkhè kamlai mơsãc sì pakhơĩh anàq tìt, vloh Pitrai pơjao adơi nữn wỡq ga ama nhũ. 43Avih tãl aràc kung huaĩq tatơh mưng gơnuar chơnuãq sì gơhluh đah Yàc Pô Lơngĩq hũ. Nữn dơlãp tũq dơgrữq tãl aràc mơnuĩh ãn dòq mãq ngãq krơi hlơu dơgrữq vruãq Pitrai ngãq, nữn Pitrai đơp sì dơgrữq mơnuĩh mơgrũ nhũ: 44“Pơnõq adơi sơai iỡuq hmỡq vẽq dơgrữq pơnuaĩq nĩ dơlãp tơnĩa drơi: Kơyua Anàq Mơnuĩh ròq kađòc pơjao tơmã dơlãp tơngãn anàq mơnuĩh.” 45Bôh làiq, Pơnõq nhũ ôh thơu pãc pơnuaĩq nữn sì vruãq nĩ kung nhũ ròq padỡuq dađỡuq pơweh sì pơnõq nhũ, nữn pơnõq nhũ ôh thơu pãc jỡc nhũ, pơnõq nhũ vloh huaĩq ôh khĩn pioh gơrlah sãp wỡq sì Pitrai mưng pơnuaĩq nữn.

46Hadơi nữn, pãq khrãh pơnõq nhũ hũ pơnuaĩq vơyai pioh iãq mơnuĩh halơi dơlãp tơpuôl pơnõq nhũ la prong rlao. 47Nữn kơyua mưng Yàc Je-su thơu kaya đơp sơnơng dơlãp hatai pơnõq nhũ, nữn hadơi sì tũq va wỡq anàq tìt, Pitrai chẽq anàq nữn jẽq phia nhũ, 48sì đơp sì pơnõq nhũ: “Mơyah làiq mơnuĩh halơi mãq angãn Pôgrũ tồq ròq sa aràc anàq tìt nĩ, sì mơnuĩh nữn tồq ròq Pôgrũ, sì aràc halơi tồq ròq Pôgrũ, sì mơnuĩh nữn la tồq Pitao song pơđar Pôgrũ. Kơyua mơnuĩh hlơi tìt rlao avih dơlãp dơgrữq adơi sơai, sì mơnuĩh nữn la prong mang rlao avih.”

49Tũq Jãng đơp làiq: “Ơ Pôgrũ, pơnõq hlãq bôh hũ mơnuĩh mãq angãn Pôgrũ pơtiãuq kamlai sì pơnõq hlãq song pakỡuq mơnuĩh nữn wỡq, kơyua mơnuĩh nữn ôh nao sigỡuq sì pơnõq drơi.” 50Nữn Yàc Je-su đơp sì ung: “Juơi mãq pakỡuq ngãq hagĩq, kơyua mưng mơnuĩh ôh iỡuq la mơnuĩh sòq jơdrãq sì pơnõq adơi sơai nữn la dòq gah pơnõq adơi sơai.”

51Vruãq ròq hadơi la tũq jẽq trôh harơi song đìq pãq dlòc lơngĩq Pitrai hũ song trôh jẽq, nữn Pitrai ưng ngãq gơnĩt pioh nao pãq palơi Je-ru-sa-lem. 52Pitrai pơđar dơgrữq mơnuĩh ãt pơđar nao di anãq Pitrai, hadơi sì tũq tơviãq nao, pơnõq nhũ nao dơlãp sa palơi mơnuĩh Sa-ma-ri pioh rơchãc pơkhrà dơgrữq vruãq ga Pitrai. 53Aràc ôh tồq ròq Pitrai kơyua Pitrai ưng ngãq gơnĩt la nao pãq Je-ru-sa-lem. 54Dơgrữq mơnuĩh mơgrũ la Ja-kơ sì Jãng, tũq bôh yơu nữn, pơnõq nhũ drơ: “Lơvãt Yàc, Pitrai hũ ưng pơnõq hlãq pơđar apôi mưng dlòc lơngĩq trỗt chôh pa-lơhiãq pơnõq nhũ lơĩh?” 55Nữn hadơi sì tũq weh wỡq, Pitrai gơrloh pơkhè pơnõq nhũ, 56vloh pơnõq nhũ nao gãt pãq palơi tơmo.

57Tũq pơnõq nhũ ãn nao jơlàt, hũ sa aràc mơnuĩh dih drơ sì Pitrai: “Hlãq ròq nao tui Pôgrũ anĩh halơi Pôgrũ ròq nao.” 58Yàc Je-su đơp sì pơnõq sơai nữn: “Mơjà hũ lơvàc, nữn chĩp lơngĩq hũ srôh, nữn Anàq Mơnuĩh ôh hũ anĩh aguãl akõq.” 59Pitrai đơp sì sa aràc mơnuĩh tơmo: “Iỡuq tui Pôgrũ.” Nữn mơnuĩh nữn drơ: “Lơvãt Yàc, lakơu vrơi ga hlãq nao dor ama hlãq hlơu ka.” 60Nữn Pitrai đơp sì nhũ nữn: “Iỡuq luơi ga mơnuĩh mơtai dor dơgrữq mơnuĩh mơtai pơnõq nhũ hũ. Dòq tũq hã tơviãq nao akhàt pa-thơu lơgar Yàc Pô Lơngĩq hũ.” 61Vloh nữn, sa aràc mơnuĩh tơmo tơra wỡq đơp: “Lơvãt Yàc, hlãq ròq nao tui Pitrai, nữn halơu viãq iỡuq vrơi gơnuar ga hlãq nao wỡq pa-lơnguãq dơgrữq mơnuĩh dơlãp sàc hlãq.” 62Bôh làiq, Yàc Je-su hẽ: “Ôh aràc halơi, tũq song apãt lơngãn drơi dơlãp lơngãn lơ-oa sì miẽt dòq iãq wỡq pãq gah hadơi, nữn ôh đang mang sì lơgar Yàc Pô Lơngĩq hũ.”