Lu-ka 8

1Hadơi sa asĩt suơi hũ tũq lơwah harơi nữn, Pitrai miẽt pơdòq nao trôh dơgrữq palơi nĩ, palơi dih, pơto akhàt kung yơu pa-thơu đơp pa-tơviãq pơnuaĩq siàp mưng lơgar Yàc Pô Lơngĩq, Hũ sa plôh dua aràc mơnuĩh gơnuar pơđar nao sigỡuq sì Pitrai, 2sigỡuq sì mơnuĩh kamơi dih la dơgrữq mơnuĩh song hũ pasồq pakhơĩh tlah mưng kamlai mơsãc sì ruãq sakìq: Ma-ri, la mơnuĩh hũ angãn la Ma-đơ-len, sì mưng nai hũ tơjuh drơi kamlai mơsãc tơviãq tlah; 3Jan-nơ, sơdiuq Chu-sa, mơnuĩh apãt akõq sàc pitao He-rôt hũ; Su-san-nơ; sì lũ mơnuĩh kamơi tơmo; pơnõq nhũ duh vruãq gah Pitrai hũ mưng dơgrữq kaya angui mơnã drơi hũ pioh dõc vrơi ga pơnõq nhũ.

4Dơlãp tũq tơpuôl vual vơla lũ pơtõm gỡuq mưng dơgrữq palơi prõc nao trôh sigỡuq sì Yàc Je-su, Pitrai pơto akhàt mưng pơnuaĩq pa-mơyơu: 5“Hũ sa aràc mơnuĩh tơviãq nao dràq pơjẽh nhũ hũ, sì dơlãp tũq sơai nữn dràq pơjẽh, hũ asar pơjẽh hõq rah jơlàt, kađòc mơnuĩh juãq pãq tơkai sì chĩp lơngĩq trỗt bõc avih asar pơjẽh nữn. 6Hũ asar tơmo hõq pãq dlòc voh patơu, nữn tũq tơmuh tơgùq, asar nữn kađòc thô thiãq, kơyua ôh hũ hlùq la hõq. 7Hũ gar tơmo wỡq hõq tơmã dơlãp bôr druơi, vloh nữn tũq tơmuh tơgùq, nữn druơi ngãq ga nhũ gãl jơdãl. 8Sì hũ gar tơmo hõq pãq hlùq siàp, nữn tũq tơmuh tơgùq, nhũ hũ sa voh tơviãq jỡc sa rơtôh bãc rlao.” Hadơi sì tũq đơp vloh dơgrữq pơnuaĩq nữn, Pitrai đơp prõc sãp: “Asơi hũ tơnĩa pioh hmỡq, iỡuq hmỡq.”

9Hadơi nữn, dơgrữq mơnuĩh mơgrũ tơnĩa Pitrai hũ: “Pơnuaĩq pa-mơyơu nữn gơtha la yơu hayơu?” 10Pitrai đơp làiq: “Pơnõq adơi sơai ròq hũ vrơi kaya anĩt pioh thơu pãc dơgrữq kaya dơlãp dađỡuq mưng lơgar Yàc Pô Lơngĩq hũ, nữn pơweh sì mơnuĩh tơmo nữn angui pơnuaĩq pa-mơyơu, pioh ‘tũq halơi iãq, pơnõq nhũ nữn ôh bôh, sì tũq hmỡq, pơnõq nhũ ôh thơu pãc.’ 11Pơnuaĩq pa-mơyơu nữn la yơu nĩ: Asar pơjẽh la pơnuaĩq Yàc Pô Lơngĩq hũ. 12Dơgrữq anĩh rah jơlàt la dơgrữq mơnuĩh ưng hmỡq, nữn hadơi nữn kamlai trôh sì tlẽq sơwah mãq pơnuaĩq Yàc mưng hatai pơnõq nhũ nữn jỡc pơnõq nhũ ôh pãc tui sì ôh hũ dõc pơ-tlah. 13Dơgrữq anĩh hõq asar pơjẽh pãq dlòc voh patơu nữn mĩn dơgrữq mơnuĩh tũq pơnõq nhũ ròq hmỡq, nữn hũ kaya sơh sơr, pơnõq nhũ tồq mãq pơnuaĩq Yàc. Nữn pơnõq nhũ ôh hũ akhà, nữn la dơgrữq mơnuĩh mĩn pãc tui sa tũq suơi, nữn tũq pãp kaya lòc dleh dlàr trôh, nữn pơnõq nhũ ta-vlữq hatai prah luơi. 14Dòq asar hõq tơmã bôr druơi, vơnah nữn la dơgrữq mơnuĩh ròq hmỡq, vloh nữn ngãq tui wỡq hatai krơi drơi, pơnõq nhũ ga gãl jơdãl kơyua mưng dơgrữq kaya rơchãc sơnơng, kaya mơda gơnãp sì ham khiãng rài nĩ, sì pơnõq nhũ ôh tơviãq chơtai voh jỡc. 15Nữn dòq asar pơjẽh hõq pãq anĩh hlùq siàp, nĩ la dơgrữq mơnuĩh hũ hatai tui tơpãq sì siàp hatai, hadơi sì tũq hmỡq pơnuaĩq Yàc nữn pơnõq nhũ rơmiãq gơjãp tồq mãq pơnuaĩq Yàc sì chơtai voh dơlãp kaya ãt ỡl.

16Hadơi sì tũq tuỗiq đeng, ôh hũ asơi tlỗp nhũ wỡq dơlãp thũng hẽla chẽq ala chơnang. Vlữq wỡq nữn, Aràc chẽq nhũ pãq dlòc tơkai đeng pioh ga tãl aràc mơnuĩh yàp tơmã pơlih iãq bôh kaya sơdah. 17Kơyua ôh hũ kaya hagĩq hũ padỡuq dađỡuq nữn ròq ôh kađòc pabôh tơviãq, kung ôh hũ kaya hagĩq dađỡuq halơi nữn viãq ôh tũq halơi kađòc pabôh tơviãq jỡc sì va ràc pa-tơviãq nĩq nũn. 18Yơu nữn, iỡuq gơrhia mưng pơnõq adơi sơai hmỡq, kơyua mưng mơnuĩh hũ ròq hũ vrơi pơtãl wỡq, dòq asơi ôh hũ, nữn vloh mĩn kaya pơnõq nhũ hũ nữn sanơng drơi hũ kung ròq kađòc suãq tơviãq mưng dì nhũ wỡq.”

19Tũq nữn ami sì dơgrữq adơi Pitrai trôh sì Pitrai, nữn pơnõq nhũ pơlih ôh tũq halơi pãp Pitrai jỡc kơyua mơnuĩh tơpuôl lũ. 20Vloh, vruãq nữn pioh pa-thơu ga Pitrai: “Ami Pôgrũ sigỡuq sì pơnõq adơi Pôgrũ hũ ãn dòq dữc pãq gah lơniãu, ưng pãp Pôgrũ.” 21Nữn dơlãp tũq hẽ pơnuaĩq, Pitrai đơp sì pơnõq nhũ: “Nĩ la ami kơu sì adơi sơai kơu, la dơgrữq mơnuĩh halơi hmỡq sì ngãq tui pơnuaĩq Yàc Pô Lơngĩq.”

22Vruãq tơviãq jỡc hũ sa harơi dih, Pitrai sigỡuq sì dơgrữq mơnuĩh mơgrũ nhũ hũ yàp tơmã sa sơrôh ahòq, nữn Pitrai đơp sì pơnõq nhũ: “Pơnõq drơi iỡuq nao gãt tơpa gah dih dơnao.” Vloh nữn pơnõq nhũ wah ahòq nao. 23Dơlãp tũq pơnõq nhũ wah ahòq nữn Pitrai dòq pìq. Patui hadơi nữn, hũ angĩn rơvùq prõc vluh pãq dlòc dơnao tơsìq, pơnõq nhũ ãt ia tơmã vãq ahòq nữn viãq huaĩq tatơh. 24Pơnõq nhũ trôh pa-mơdưh Pitrai, làiq: “Ơ Pôgrũ! Ơ Pôgrũ! Pơnõq drơi jẽq sì mơtai!” Nữn Pitrai mơdưh sì tơgùq dữc, Pitrai gơrloh angĩn sì ia rơyàq, nữn pơnõq nhũ padưh wỡq sì dơgrữq kaya tơviãq jỡc kađữc rĩc. 25Pitrai đơp sì pơnõq nhũ: “Voh-tui pơnõq adơi sơai hũ dòq pãq halơi?” Hagĩq dòq huaĩq tatơh, pơnõq nhũ mãq ngãq krơi nữn tơnĩa sì gỡuq: “Yơu nữn Pôgrũ nĩ la asơi sì Pôgrũ vloh pơđar avih angĩn sì ia, nữn pơnõq nhũ iỡuq pãc sãp sì tui pôgrũ yơh?”

26Vloh pơnõq nhũ wah ahòq trôh phũm Je-ra-se, la anĩh dòq sơmu phũm Ga-li-le. 27Tũq Pitrai yàp đìq pãq gah, hũ sa aràc mơnuĩh dih dơlãp palơi nữn tơviãq tồq ròq Pitrai, mơnuĩh nữn ãt kamlai ãp. Song suơi vloh, sơai nữn ôh chồq ao charơpha, kung ôh hadiuq dơlãp sàc, nữn dòq dơlãp dơgrữq vơnẽq atơu. 28Tũq iãq bôh Yàc Je-su, sơai nữn priãu tơgùq, sì pơviar rùp pãq anãq tơkai Pitrai sì đơp sãp prõc: “Ơ, Je-su, Anàq Yàc Pô Lơngĩq Dloòng Dlòc Rlao Avih, hlãq sì Pitrai hũ kaya hagĩq lơĩh? Hlãq lakơu Pitrai, lakơu juơi ngãq dleh dlàr hlãq.” 29Kơyua Pitrai song pơđar ga kamlai mơsãc tơviãq tlah mưng mơnuĩh lakơi nữn. Kơyua nhũ song lũ bãc ãp dòq dơlãp rùp phuỗt sơai nữn, dòq sơai nữn gãm ãt aràc mãq srẽng sì vuh akãq, bôh làiq aràc chơkhãq iãq, nữn kơyua mưng Kamlai mơsãc, dơgrữq tũq ngãq tơyah srẽng, sơai nữn ãt sì va tơmã anĩh blàc choah. 30Tũq nữn, Yàc Je-su tơnĩa nhũ: “Angãn hã la hagĩq?” Nhũ drơ: “Tơpuôl ling,” kơyua hũ lũ kamlai ãp tơmã dơlãp nhũ. 31Vloh pơnõq nhũ rãn lakơu Pitrai nữn Pitrai juơi pơtiãuq pơnõq kơu trỗt tơmã thòc dơlãp. 32Pãq đỡn, hũ sa tơpuôl vơvui lũ viãq ãn dòq bõc pãq dlòc chỡq, pơnõq nhũ lakơu Pitrai sì vrơi ga gơnuar pơnõq nhũ tơmã dơlãp tơpuôl vơvui. Sì Pitrai vrơi gơnuar tơmã tơpuôl nhũ. 33Nữn, tũq song tơviãq tlah mưng mơnuĩh lakơi nữn, viãq lũ kamlai sì ãp tơmã dơlãp tơpuôl vơvui, vloh avih tơpuôl vơvui nhũt akõq đuaĩq trỗt mưng chỡq plõc tơmã dơnao sì mơtai krãp. 34Hadơi nữn dơgrữq mơnuĩh dlãc vơvui bôh dơgrữq vruãq ròq tơviãq jỡc, nữn pơnõq nhũ đuaĩq dỡuq sì akhàt wỡq vruãq nữn dơlãp palơi gãm sì phũm dơlãp palơi tìt. 35Nữn la, vual vơla va gỡuq tơviãq blàc iãq vruãq vơhrơu tơviãq trôh, pơnõq nhũ trôh pãq anĩh Yàc Je-su sì bôh mơnuĩh lakơi, sì tơpuôl kamlai ròq tơviãq tlah, ãn dòq guh pãq ala tơkai Yàc Je-su, hũ chồq ao charơpha siàp, nữn dlò sơnơng thơu jãc siàp vơhian, nữn pơnõq nhũ huaĩq tatơh viãq. 36Dơgrữq mơnuĩh song dòq dữc chưng song akhàt wỡq ga pơnõq nhũ yơu hayơu sì mơnuĩh kađòc kamlai ãp ròq hũ dõc pakhơĩh vloh. 37Avih tơpuôl vual lũ dơlãp phũm Je-ra-se lakơu Pitrai tơviãq tlah anĩh pơnõq nhũ, kơyua pơnõq nhũ huaĩq tatơh viãq. Vloh nữn, Pitrai yàp đìq ahòq sì gơlàiq mai wỡq. 38Mơnuĩh lakơi, sì tơpuôl kamlai ròq tơviãq tlah, òt lakơu Pitrai pioh dòq sigỡuq sì Pitrai, nữn Pitrai pơđar sơai nao wỡq, đơp làiq: 39“Iỡuq nao wỡq pãq sàc sơai hũ sì iỡuq akhàt wỡq ga avih dơgrữq vruãq Yàc Pô Lơngĩq song ngãq ga sơai.” Vloh nữn sơai tơviãq nao akhàt vãq avih dơlãp palơi dơgrữq vruãq Yàc Je-su song ngãq ga drơi.

40Tũq Yàc Je-su mai wỡq, hũ sa tơpuôl vual vơla lũ tồq ròq Pitrai, kơyua avih dơgrữq aràc song chơkhãq chàc Pitrai. 41Iãq mững dih, hũ sa aràc ròq gluh mai trôh, angãn ung la Jai-ru, ung la mơnuĩh iãq sàc pơtõm. Pơviar rùp pãq ala tơkai Yàc Je-su, ung lakơu Pitrai trôh sàc nhũ, 42kơyua nhũ hũ mĩn sa aràc anàq kamơi ung hũ, pơgãp sa plôh dua thũt, anàq tìt nữn jẽq mơtai. Dơlãp tũq Pitrai ãn dòq nao jơlàt, tơpuôl vual vơla lũ sũl jẽh tòp dar Pitrai.

43Hũ sa aràc mơnuĩh kamơi sì kađòc ruãq tôh dơrah ròq sa plôh dua thũt, bôh làiq ròq vlơi jĩn aràc avih priãq ga mơnuĩh gơnuar jrao, sì ôh hũ asơi pơlih pakhơĩh jỡc ga sơai kamơi. 44Hũ sa kaya pơnẽq mưng gah hadơi, anàq tìt kamơi nữn sì rơwỡq kơnui ao Pitrai, nữn mư, dơrah ôh tơviãq wỡq tơra. 45Yàc Je-su đơp: “Aràc asơi song rawỡq trôh kanui ao kơu?” Tũq Nữn aràc halơi song kơmlah, Pier hẽ làiq: “Ơ pôgrũ, tơpuôl lũ vual vơla ãn kơ-rơwàc tòp dar sì sũl jẽh Pôgrũ mĩn.” 46Nữn Yàc Je-su đơp: “Hũ mơnuĩh halơi nữn song rawỡq tèc goq Pôgrũ, kơyua pôgrũ thơu hũ gơnuar chơnuãq mưng kơu song tơviãq.” 47Tũq nữn, dơlãp tũq mơnuĩh kamơi tồq thơu làiq kamơi nữn ôh tũq halơi padỡuq jỡc, nữn mơnuĩh kamơi tatơh rùp tơgùq nao trôh sì pơviar rùp trỗt pãq ala tơkai Pitrai, mơnuĩh kamơi nữn akhàt pãq anãq avih dơgrữq vual vơla kơyua kanõh hagĩq sì mơnuĩh nữn rơwỡq trôh Pitrai nữn nhũ ưng pakhơĩh mư tũq nữn. 48Pitrai đơp sì nhũ: “Ơ anàq kamơi, voh-tui anàq hũ song pasồq pakhơĩh anàq. Iỡuq nao dơlãp kaya dadu lơngai.”

49Tũq Pitrai dòq ãn đơp, mơnuĩh halơi nữn dòq mưng sàc pô iãq sàc pơtõm trôh đơp làiq: “Anàq kamơi ung mơtai vloh. Juơi ngãq nhũn ga Pôgrũ wỡq tơra.” 50Nữn tũq Yàc Je-su hmỡq pơnuaĩq nữn, Pitrai hẽ sì ung: “Juơi huaĩq, iỡuq hũ hatai pãc tui nữn anàq kamơi tìt ròq khơĩh.” 51Tũq ròq nao trôh sàc, Pitrai ôh vrơi asơi tui tơmã sigỡuq sì Pitrai, lơniãu Pier, Jãng, Ja-kơ, sigỡuq sì ami ama anàq tìt nữn. 52Avih dơgrữq aràc mơnuĩh ãn dòq sia chõq sì iãq anĩt di anàq tìt, nữn Pitrai đơp: “Juơi sia, kơyua anàq tìt nĩ ka-ôh mơtai, nữn mĩn ãn dòq pìq.” 53Nữn pơnõq nhũ tlao siẽq siẽl Pitrai, kơyua pơnõq nhũ thơu làiq anàq tìt song mơtai vloh. 54Nữn hadơi sì tũq apãt tơngãn anàq kamơi tìt, Pitrai iơu prõc sãp, làiq: “Ơ anàq kamơi tìt, iỡuq tơgùq dữc vẽq.” 55Vơngãq yuà anàq tìt luãq mai wỡq sì kamơi tìt nữn mư tơgùq dữc, vloh Pitrai pơđar ga lơđeh tìt nữn bõc. 56Ami ama lơđeh tìt mãq ngãq krơi viãq, nữn Pitrai hakơi pơnõq nhũ ôh đơp sì asơi mưng vruãq song tơviãq trôh.