Lu-ka 7

1Hadơi sì tũq Pitrai pa-luỗiq dơgrữq pơnuaĩq drơi hũ hlơu sì kaya hmỡq vual vơla, Pitrai tơmã dơlãp palơi Ka-be-na-um.

2Tũq nữn, sa aràc mơnuĩh halỗt mơnãq dih mơnuĩh pô apãt sa rơtôh ling hũ sì nữn la ung anĩt duman viãq pơweh sì ung, ãn kađòc ruãq tơrãq, jẽq mơtai. 3Hadơi sì tũq hmỡq mưng Yàc Je-su, ung pơđar dơgrữq mơnuĩh pô tơha gah vual vơla Ju-đa trôh pãp Pitrai, lakơu Pitrai trôh pioh pakhơĩh ga halỗt mơnãq drơi hũ. 4Tũq dơgrữq mơnuĩh nữn trôh sì Yàc Je-su, pơnõq nhũ òt rãn lakơu sì Pitrai, đơp làiq: “Ung nữn đang mang viãq pioh ga Pôgrũ ròq drơ vruãq nĩ ga ung, 5kơyua ung khiãng anĩt vual vơla pơnõq drơi, ung kung song vữq padỡc sàc pơtõm ga pơnõq drơi.” 6Vloh nữn, Yàc Je-su nao sigỡuq sì pơnõq nhũ. Nữn tũq Pitrai ròq dòq mưng anĩh nĩ tãl sàc ôh hadùp sì atah, nữn pô apãt sa rơtôh ling, pơđar mơnuĩh mơnuĩh mayơu tơviãq nao đơp sì Pitrai: “Talơvãt Yàc, lakơu juơi ngãq kãn ga drơi, kơyua hlãq ôh đang mang sì tồq ròq Pitrai trôh sì tơmã sàc drơi. 7Kơyua yơu nữn, hlãq sơnơng kung ôh đang mang hagĩq drơi nao trôh pãp Pitrai, Bôh làiq, nữn lakơu Pitrai đơp mĩn sa pơnuaĩq, nữn mơnuĩh halỗt hlãq iỡuq hũ ròq pakhơĩh ruãq. 8Kơyua hlãq kung la mơnuĩh hũ dòq gah ala gơnuar mơnuĩh tơmo, sì hũ ling gah ala gơnuar drơi hũ, nữn hlãq đơp sì mơnuĩh nĩ: ‘Nao vẽq,’ nữn nhũ nao; vloh hũ pơđar mơnuĩh tơmo wỡq: ‘Trôh pãq đĩ,’ nữn nhũ nao trôh; nữn sigỡuq sì mơnuĩh halỗt mơnãq drơi: ‘Iỡuq ngãq vruãq nĩ,’ nữn nhũ ngãq.” 9Tũq Yàc Je-su hmỡq yơu nữn, Pitrai mãq ngãq krơi mưng ung nữn, vloh nữn weh pãq vual vơla lũ ãn nao tui drơi, Pitrai đơp: “Kơu đơp sì pơnõq adơi sơai, nữn kung pãq Is-ra-el kơu kung ôh ka bôh mơnuĩh halơi hũ voh-tui yơu nữn.” 10Tũq dơgrữq mơnuĩh hũ pơđar nao tũq nữn mai wỡq pãq sàc, pơnõq nhũ bôh mơnuĩh halỗt mơnãq song jỡc prãn khãc.

11Dơlãp harơi hadơi, Pitrai nao tơmã sa palơi hũ angãn la Na-in, dơgrữq mơnuĩh mơgrũ Pitrai sì vual vơla lũ viãq ãn nao sigỡuq sì Pitrai. 12Mư tũq nữn Pitrai jẽq trôh sơvòq bãc palơi nữn iãq dĩh, aràc ãn chơkồc tơviãq sa aràc mơnuĩh ròq mơtai, la anàq lakơi sa aràc mơnuĩh ami nhũ hũ (mòq nữn la kamơi vlơu), hũ tơpuôl vual vơla lũ viãq dơlãp palơi nao sigỡuq sì mơnuĩh kamơi nữn. 13Dơlãp tũq iãq bôh mòq, Yàc hũ hatai anĩt anar pơweh sì mòq, sì Pitrai đơp sì mòq: “Juơi sia.” 14Vloh nao trôh jẽq, Pitrai rawỡq dì vòc atơu, nữn dơgrữq mơnuĩh ãn chakồc dòq padưh wỡq. Vloh nữn Pitrai đơp: “Ơ mơnuĩh dãm tìt, kơu pơđar hã, iỡuq tơgùq dữc.” 15Mơnuĩh mơtai tơgùq dòq dữc sì pơdòq đơp dlài, vloh Pitrai pơjao nhũ ga ami nhũ. 16Nữn yơh, kaya huaĩq tatơh tlỗp kơ-rơwàc tòp dar avih tãl aràc, pơnõq nhũ sơuỗt mơyòp Yàc Pô Lơngĩq, đơp làiq: “Sa pitao gơnuar hwơr prõc mang song pabôh tơviãq pãq khrãh pơnõq drơi” sì làiq: “Yàc Pô Lơngĩq song iãq mưng vual vơla Pitrai.” 17Pơnuaĩq nĩ kơyua mưng Pitrai hũ akhàt vãq avih phũm Ju-đe sì dơgrữq phũm jẽq phia.

18Dơgrữq mơnuĩh mơgrũ Jãng hũ akhàt wỡq ga ung hmỡq mưng avih dơgrữq vruãq nữn. Sì hadơi tũq pơđar iơu dua aràc mơnuĩh mơgrũ nhũ, nữn la Jãng 19Pơđar pơnõq nhũ trôh sì Yàc, tơnĩa: “Pôgrũ la Pitao iỡuq trôh, hẽla pơnõq hlãq iỡuq dòq chơkhãq chàc Pitao tơmo?” 20Dơlãp tũq trôh sì Pitrai, dơgrữq mơnuĩh nữn tơnĩa: “Jãng Bãp-tit pơđar pơnõq hlãq trôh sì pôgrũ, đơp làiq: ‘Pôgrũ la Pitao iỡuq trôh, hẽla pơnõq hlãq iỡuq dòq chàc Pitao tơmo?’” 21Tơmã jơ nữn mư, Pitrai pasồq pakhơĩh lũ mơnuĩh tlah dơgrữq ruãq sakìq, pơđìq pơđua sì kamlai mơsãc, Pitrai kung ngãq lũ mơnuĩh vùp hũ iãq bôh sơdah. 22Pioh drơ pơnuaĩq, Pitrai đơp sì pơnõq nhũ: “Hadơi sì tũq mai wỡq, iỡuq akhàt wỡq ga Jãng dơgrữq kaya hagĩq pơnõq sơai song bôh sì hmỡq: Mơnuĩh vùp hũ sơdah mơta, mơnuĩh kao yàp nao jỡc, mơnuĩh aphũng jỡc sơchih, mơnuĩh tơngoh hmỡq jỡc, mơnuĩh mơtai hũ hadiuq wỡq, mơnuĩh rơbah hũ hmỡq pơnuaĩq siàp, 23sì lơngai ga mơnuĩh halơi ôh sơnẽq sỗq kơyua mưng kơu.”

24Patui wỡq, hadơi sì tũq dơgrữq mơnuĩh ãt pơđar Jãng hũ nữn nao vloh, Pitrai pơdòq đơp sì vual vơla mưng Jãng: “Pơnõq adơi sơai nao tơma dơlãp blàc choah pioh iãq hagĩq? Sa bẽq kayơu tơràc kađòc angĩn vluh mơgơi yơh? 25Vlữq wỡq làiq, pơnõq adơi sơai tơviãq nao iãq hagĩq? Sa aràc mơnuĩh hũ chồq ao mưng pơchà lơmuỡn lơĩh? Iãq dih, dơgrữq mơnuĩh chồq ao charơpha siàp mơkrơ sì hadiuq bõc dòq lơngai nữn dòq dơlãp gơlãng pitao. 26Kơyua yơu nữn, pơnõq adơi sơai tơviãq nao iãq ngãq hagĩq? Sa aràc mơnuĩh gơnuar hwơr yơh? Iỡuq, kơu đơp sì pơnõq adơi sơai thơu, dòq rlao sì sa Pitao mơnuĩh gơnuar hwơr wỡq tơra. 27Nữn la mưng mơnuĩh sì hũ pơnuaĩq nĩ ròq hũ wãq:

‘Nĩ, Kơu pơđar mơnuĩh ãt pơđar Kơu nao hlơu pãq anãq Anàq,

nhũ ròq wah jơlàt ga Anàq hũ pãq anãq Anàq.’

28Kơu đơp ga pơnõq dơi sơai thơu, dơlãp katih dơgrữq pơjẽh anàq mơnuĩh mưng mơnuĩh kamơi đeh tơviãq, ôh asơi la prong rlao Jãng, nữn mơnuĩh tìt rlao avih dơlãp lơgar Yàc Pô Lơngĩq nữn prong rlao ung nữn.” 29(Tũq song pa-hmỡq, nữn dơgrữq mơnuĩh, sigỡuq sì mơnuĩh mãq jia, sì mãq angãn Yàc Pô lơngĩq la tơpãq dãng, tũq song ãt ngãq bãp-tem tui yơu adãt bãp-tem Jãng hũ. 30Nữn dơgrữq mơnuĩh Pha-ri-si sì dơgrữq mơnuĩh gơnuar pơto kaya voh-va ròq kơmlah tlàq pơnuaĩq Yàc Pô Lơngĩq pơweh sì pơnõq drơi, nữn ôh ưng ung ngãq bãp-tem.) 31“Nữn yơh, kơu ròq pơgãp dơgrữq mơnuĩh pơweh sì rài nĩ sì la hagĩq nĩ? Pơnõq nhũ drưh yơu asơi? 32Pơnõq nhũ drưh yơu tơpuôl lơđeh dòq guh pãq gah dràq, priãu iơu gỡuq, pơnõq nhũ đơp: ‘Pơnõq kơu ayùq tơliãq ga pơnõq hã sì pơnõq hã ôh ưng tãm-ya. Pơnõq kơu adoh rơgãm adoh sì pơnõq hã ôh sia chõq.’ 33Kơyua mưng Jãng Bãp-tit ròq trôh, ôh bõc bẽn, kung ôh mơnhũm alãc, nữn pơnõq ung đơp: ‘Ung nữn kađòc kamlai ãp.’ 34Anàq Mơnuĩh song trôh, bõc sì mơnhũm, nữn pơnõq ung đơp: ‘Iãq dih, sa aràc mơnuĩh haràq bõc, sì haràq mơnhũm, gỡuq mayơu sì dơgrữq mơnuĩh mãq jia nữn la tơpuôl mơnuĩh hũ dlàiq!’ 35Nữn kaya jãc rgơi ròq hũ dõc jơga nhũ kơyua gơnang avih dơgrữq anàq tơcho nhũ hũ.”

36Tũq nữn, hũ Sa aràc dơlãp dơgrữq mơnuĩh Pha-ri-si jàq Yàc Je-su pioh angui bõc siỡuq sì nhũ. Tũq ròq tơmã dơlãp sàc mơnuĩh Pha-ri-si nữn, Pitrai dòq guh pãq ban bõc. 37Iãq dih, hũ sa aràc mơnuĩh kamơi dơlãp palơi, la sơai kamơi nữn la mơnuĩh hũ dlàiq. Tũq tồq thơu làiq Pitrai ãn dòq guh di ban bõc pãq anĩh sàc mơnuĩh Pha-ri-si, sơai kamơi nữn va tui sa kalõq patơu màc vuh vãq mơnhàq bơu vơlhũ, 38sì trôh dòq dữc gah hadơi, jẽq anĩh tơkai Pitrai, sì sia. Sơai kamơi nữn pơdòq ngãq hõq ia mơta ngãq pơsah tơkai Pitrai mưng ia mơta, vloh sơai kamơi nữn uãq nhũ sì mãq bùq pãq akõq nhũ, chũm tơkai Pitrai sì vruah mơnhàq vơlhũ. 39Tũq mơnuĩh Pha-ri-si la mơnuĩh song jàq Pitrai, bôh yơu nữn, ung nữn sơnơng krơi, làiq: “Mơyah làiq ung nĩ la mơnuĩh gơnuar hwơr, Ung nữn pơlih thơu mơnuĩh kamơi sì ãn rawỡq trôh nhũ la asơi sì pơweh sì tơpuôl mơnuĩh halơi, làiq mòq nữn la mơnuĩh dlàiq dơnũh.” 40Pioh mãq pơnuaĩq akhàt pa-tơviãq, Yàc Je-su đơp sì ung: “Si-môn, kơu hũ kaya nĩ pioh đơp sì ung.” Ung nữn đơp: “Ơ pôgrũ, lakơu đơp vẽq!” 41“Hũ dua aràc mơnuĩh dih tơwãq srẽ sa aràc mơnuĩh vrơi anham jĩn nữn. Sa aràc mơnuĩh srẽ lơmã rơtôh đơ-ni-e, dòq mơnuĩh dĩh srẽ lơmã plôh. 42Tũq nữn pơnõq nhũ ôh hũ jĩn pioh vơyar, pô vrơi anham nữn ròq tơleh avih ga dua aràc mơnuĩh nữn. Yơu nữn, dơlãp dua aràc mơnuĩh nữn ròq khiãng anĩt ung nữn rlao?” 43Tũq Si-môn hũ pơnuaĩq drơ, ung đơp: “Hlãq sơnơng làiq mơnuĩh pô hũ tơwãq srẽ ròq tơleh lũ rlao.” Pitrai đơp sì ung: “Ung đơp iỡuq viãq.” 44Vloh weh pãq mơnuĩh kamơi nữn, Pitrai đơp sì Si-môn: “Ung bôh mơnuĩh kamơi nĩ lơĩh? Kơu tơmã dơlãp sàc ung hũ. Ung ôh vrơi ga kơu ia rao tơkai, dòq sơai kamơi nữn ngãq pơsah tơkai kơu mưng ia mơta, vloh uãq nhũ sì mãq bồq nhũ. 45Ung ròq ôh chũm kơu ôh yơh, dòq sơai kamơi, mưng tũq kơu tơmã sàc, ròq ôh padưh chũm tơkai kơu. 46Ung ôh pavuh mơnhàq pãq dlòc akõq kơu, dòq sơai kamơi ròq pavuh pãq tơkai kơu mơnhàq vơlhũ. 47Kơyua yơu nữn, kơu đơp sì ung, dlàiq dơnũh mơnuĩh kamơi nĩ, bôh làiq lũ, song hũ tơleh avih, kơyua kamơi nữn khiãng anĩt lũ. Dòq asơi hũ tơleh sa asĩt nữn khiãng anĩt sa asĩt.” 48Vloh Pitrai đơp sì mơnuĩh kamơi nữn: “Dlàiq dơnũh sơai song hũ tơleh vloh.” 49Dơgrữq mơnuĩh ãn dòq guh pãq ban bõc pơdòq sơnơng dơlãp hatai pơnõq nhũ: “Mơnuĩh nĩ la asơi vloh kung tơleh dlàiq?” 50Vloh Pitrai đơp sì mơnuĩh kamơi: “Voh-tui sơai hũ song dõc sơai. Iỡuq nao dadu lơngai.”