Lu-ka 13

1Sa katih mơnuĩh hũ bôh mơta dơlãp tũq nữn akhàt wỡq ga Pitrai hmỡq mưng dơgrữq mơnuĩh Ga-li-le sì Phi-lat song ngãq dơrah dơgrữq mơnuĩh nữn jrơu sì kaya talơvãt pơnõq nhũ hũ. 2Dơlãp tũq hẽ wỡq, Pitrai đơp sì pơnõq nhũ: “Dơgrữq ung sơnơng làiq dơgrữq mơnuĩh Ga-li-le nữn la dlàiq dơnũh rlao avih dơgrữq mơnuĩh Ga-li-le tơmo kơyua pơnõq nhũ iỡuq ãt yơu nữn yơh? 3Kơu đơp sì pơnõq ung thơu, ôh iỡuq yơu nữn. Bôh làiq yơu nữn, mơyah làiq pơnõq ung ôh mơvai tlàq dlàiq, nữn avih dơgrữq tãl aràc kung ròq kađòc lơhiãq thĩt yơu nữn. 4Hẽla yơu sa plôh talơpãn aràc mơnuĩh dih, sì pãq anĩh vơ-mũng dòq pãq Si-lô-e ròq jơlưh trỗt katỡq sì mơtai pơnõq nhũ: Pơnõq ung sơnơng làiq pơnõq nhũ la dơgrữq mơnuĩh sỗq dlàiq dơnũh iãh sàq rlao avih dơgrữq mơnuĩh hadiuq pãq palơi Je-ru-sa-lem yơh? 5Kơu đơp ga pơnõq ung thơu, ôh iỡuq yơu nữn. Nữn mơyah làiq pơnõq ung ôh mơvai tlàq dlàiq, nữn avih dơgrữq tãl aràc kung ròq kađòc lơhiãq thĩt yơu nữn.”

6Vloh Pitrai akhàt pơnuaĩq pa-mayơu nĩ: “Mơnuĩh dih hũ sa phuỗt kayơu vãl hũ pơla dơlãp vỡn nho drơi, sì ung trôh duah voh pãq dlòc kayơu nữn sì ôh bôh voh. 7Ung đơp sì mơnuĩh ngãq vỡn: ‘Sơai iãq nĩ, tlơu thũt vloh mưng tũq sì kơu trôh duah voh pãq kayơu vãl nĩ nữn ôh bôh voh. Iỡuq koh nhũ vẽq. Kơyua kanõh hagĩq sì hayơu vloh luơi nhũ vàc tơnãh soh?’ 8Nữn dơlãp tũq mơnuĩh iãq drơ làiq, sơai nữn đơp sì pô: ‘Ơ pô, lakơu iỡuq luơi ga nhũ dòq wỡq pơtãl sa thũt nĩ tơra, vloh hlãq ròq chõh hlùq pa-vrùq tòp dar nhũ sì vuh khãq. 9Tơkìq viãq la, wỡq sa hadơi pơlih nhũ tơviãq voh … dòq mơyah làiq viãq ôh hũ hagĩq, pô ròq koh nhũ!’”

10Pitrai ãn pơto akhàt dơlãp sàc pơtõm dơlãp harơi Sa-bat, 11sì dih, hũ sa aràc mơnuĩh kamơi kađòc kamlai ngãq ruãq ãp pơđìq pơđua dơlãp sa plôh talơpãn thũt, sơai kamơi ãt kakũc kơ-iãng sì ôh tũq halơi dòq dữc tơpãq jỡc. 12Tũq Yàc Je-su bôh nhũ, Pitrai iơu nhũ trôh vloh đơp sì nhũ: “Nĩ ơ sơai kamơi, sơai song hũ tlah mưng kaya ruãq pơđìq drơi hũ.” 13Pitrai chẽq tơngãn pãq dlòc rùp kamơi nữn, mư tũq nữn nhũ phuah dòq dữc, sì sơuỗt mơyòp Yàc Pô Lơngĩq. 14Nữn mơnuĩh apãt iãq sàc pơtõm hũ đơp, nữn nong kơyua mưng Yàc Je-su ròq pakhơĩh ruãq dơlãp harơi Sa-bat, nữn ung đơp sì tơpuôl vual vơla làiq: “Hũ nãm harơi la dơdrữq harơi nĩ iỡuq pioh ngãq vruãq. Kơyua yơu nữn, iỡuq trôh pakhơĩh ruãq dơlãp dơgrữq harơi nữn, ôh iỡuq tơmã dơlãp harơi Sa-bat.” 15Nữn Yàc hẽ sì ung nữn, sì Pitrai đơp: “Ơ mơnuĩh vlữq lor! Ôh iỡuq la dơlãp harơi Sa-bat avih tãl aràc pơnõq ung song tơleh talơi akãq lơmo hẽla halang drơi tơviãq mưng war sì va nhũ nao mơnhũm ia yơh? 16Dòq mơnuĩh kamơi nĩ, nữn la anàq kamơi A-bra-ham hũ, la mơnuĩh kađòc kamlai Satan ròq mãq akãq, iãq dih, dơlãp miẽt sa plôh talơpãn thũt, sơai kamơi vloh ôh jỡc tơleh suãq tlah mưng kaya yơu nĩ dơlãp harơi Sa-bat yơh?” 17Tũq Pitrai đơp dơgrữq pơnuaĩq nữn, dơgrữq mơnuĩh sòq jơdrãq sì Pitrai nữn mơlơu ơlah, dòq avih dơgrữq vual vơla lũ nữn uỗt sơh mưng avih dơgrữq vruãq krơi tơmo hũ ngãq kơyua mưng Pitrai.

18Nữn vloh, Pitrai đơp: “Lơgar Yàc Pô Lơngĩq nữn drưh yơu kaya hagĩq, sì kơu ròq pa-mơyơu nhũ sì kaya hagĩq nĩ? 19Lơgar Yàc nữn nhũ drưh yơu sa asar savơi sì hũ sa aràc mơnuĩh mãq dràq dơlãp vỡn nhũ, vloh nhũ tơmuh prõc tơgùq jỡc phuỗt bẽq kayơu, sì chĩp lơngĩq ngãq srôh pãq dlòc thàt nhũ hũ.”

20Pitrai đơp wỡq làiq: “Kơu ròq pa-mơyơu lơgar Yàc Pô Lơngĩq hũ sì kaya hagĩq? 21Lơgar Yàc nữn sì drưh yơu voh tapơi sì hũ sa aràc mơnuĩh kamơi mãq hlỡq sơkãq tlơu voh wal nữn jrơu tơmã sì voh tapơi tãl trôh tũq hlỡq vrùq avih tơgùq.”

22Vloh Pitrai nao gãt dơgrữq palơi prõc sì palơi tìt, pơto akhàt tiãng rah jơlàt nao trôh pãq palơi Je-ru-sa-lem. 23Tũq nữn, hũ mơnuĩh dih drơ sì Pitrai: “Talơvãt Yàc, iỡuq lơĩh la hũ mĩn tơkìq mơnuĩh hũ dõc?” Pitrai đơp wỡq sì pơnõq nhũ: 24“Iỡuq mơvlah prãn pioh nao tơmã gãt bãc gơniãq kơyua, kơu đơp sì pơnõq adơi sơai thơu, lũ mơnuĩh ròq duah pơnẽq pioh tơmã sì ôh tơmã jỡc. 25Hadơi sì tũq pô sàc song tơgùq dữc sì krỡq bãc wỡq, tãl tũq nĩ pơnõq adơi sơai sì ròq dòq dữc pãq gah lơniãu sì tơtoh bãc, Ơ Yàc làiq: ‘Talơvãt Yàc, lakơu pơh ga pơnõq hlãq tơmã.’ Tũq nữn ròq hẽ wỡq sì pơnõq adơi sơai, mơnuĩh pô ròq đơp: ‘Kơu ôh thơu pơnõq hã mưng halơi trôh.’ 26Tũq nữn, pơnõq adơi sơai ròq pơh pơnuaĩq đơp làiq: ‘Pơnõq hlãq song bõc mơnhũm pãq anãq Pitrai, sì Pitrai song pơto pơđar dlãp dơgrữq jơlàt prõc pơnõq hlãq hũ.’ 27Nữn Pô sàc ròq đơp wỡq, đơp sì pơnõq adơi sơai: ‘Kơu ôh thơu pơnõq adơi sơai dòq mưng hlơi trôh. Iỡuq pleh ơtah dì Kơu, avih dơgrữq mơnuĩh ngãq vruãq harơi ôh tơpãq dih!’ 28Pãq anĩh nữn, ròq hũ sia chõq sì kẽq tagơi tũq pơnõq adơi sơai bôh A-bra-ham, Y-sac, sì Ja-kôp sigỡuq sì avih dơgrữq mơnuĩh gơnuar hwơr dòq dơlãp lơgar Yàc Pô Lơngĩq, sì ôh hũ pơnõq adơi sơai, kơyua ròq ãt prah tơviãq lơniãu. 29Anàq mơnuĩh ròq trôh mưng gah ia harơi tơgùq sì tãl ia tơmã, mưng gah prang sì tãl gah prìq, nữn pơnõq nhũ ròq dòq guh angui adãt dơlãp lơgar Yàc Pô Lơngĩq hũ. 30Dih, hũ dơgrữq mơnuĩh luôĩq hadơi sì pơnõq nhũ ròq tơviãq jỡc chơmrờp, sì hũ mơnuĩh mưng chơmrờp nữn pơnõq nhũ ròq tơviãq jỡc luôĩq hadơi.”

31Dơlãp mư jơ nữn, hũ mơnuĩh Pha-ri-si nữn trôh jẽq, đơp sì Pitrai: “Lakơu pôgrũ tơviãq nao sì iỡuq nao ơtah mưng anĩh nĩ kơyua Pitao He-rôt ưng pa-mơtai pôgrũ.” 32Pitrai đơp sì pơnõq nhũ: “Iỡuq nao vẽq, đơp sì anàq mơja nữn: ‘Iãq nĩ, kơu pơtiãuq kamlai sì pakhơĩh ruãq harơi nĩ sì pơgi, vloh tơmã harơi bãc tlơu kơu ròq ngãq wil tãl.’ 33Bôh làiq yơu nữn, pơweh sì kơu, kaya iỡuq chàc la iỡuq pơtui nao jơlàt harơi nĩ, harơi pơgi sì harơi kadih, kơyua pơweh sì mơnuĩh gơnuar hwơr, pơlih ôh tũq halơi mơtai pãq gah lơniãu palơi Je-ru-sa-lem. 34Ơ Je-ru-sa-lem, Je-ru-sa-lem, hã pa-mơtai dơgrữq mơnuĩh gơnuar hwơr sì prah patơu dơgrữq mơnuĩh ròq hũ pơđar trôh sì drơi. Thơu hadùp bãc Kơu ưng pơjũm pơtõm anàq tơcho pơnõq hã wỡq hũ yơu mơnũq vơnai pakrôp anàq nhũ pãq ala siãuq, nữn hã ôh ưng. 35Dih, sàc pơnõq hã ròq kađòc pa-chơlah prah luơi dì pơnõq hã. Kơu đơp sì pơnõq hã, pơnõq hã viãq ôh tũq halơi bôh kơu tãl trôh tũq halơi nữn ròq trôh, la tũq pơnõq hã đơp: ‘Đang mang sơuỗt mơyòp Pitao ròq trôh dơlãp angãn Yàc.’”